گواہی دینے کے کام میں اپنی مہارتوں کو نکھاریں—‏مُنادی کے دوران اپنے ساتھی کی مدد کریں

یہ مہارت پیدا کرنا ضروری کیوں ہے؟‏ یسوع مسیح جانتے تھے کہ کسی کے ساتھ مل کر مُنادی کرنے سے بہت فائدہ ہوتا ہے۔ اِس لیے اُنہوں نے ۷۰ شاگردوں کو دو دو کرکے مُنادی کرنے کے لیے بھیجا۔ (‏لو ۱۰:‏۱‏)‏ مُنادی کے دوران دو مبشر ایک دوسرے کی مدد کیسے کر سکتے ہیں؟ اگر ایک مبشر کو مُنادی کے دوران کسی مشکل کا سامنا ہوتا ہے یا اُسے صاحبِ‌خانہ کے کسی سوال کا جواب دینا مشکل لگتا ہے تو اُس کا ساتھی اُس کی مدد کر سکتا ہے۔ (‏واعظ ۴:‏۹، ۱۰‏)‏ ایک مبشر اپنے ساتھی کو کبھی‌کبھار کچھ ایسے مشورے بھی دے سکتا ہے جو اَور مؤثر طریقے سے مُنادی کرنے میں اُس کے کام آ سکتے ہیں۔ (‏امثا ۲۷:‏۱۷‏)‏ اِس کے علاوہ وہ گھرگھر مُنادی کے دوران اپنی باتوں سے اپنے ساتھی کا حوصلہ بھی بڑھا سکتا ہے۔—‏فل ۴:‏۸‏۔‏

آپ کیا کر سکتے ہیں؟‏

جب آپ کا ساتھی صاحبِ‌خانہ کو گواہی دیتا ہے تو بات‌چیت کو دھیان سے سنیں۔ (‏یعقو ۱:‏۱۹‏)‏ جب وہ کوئی آیت پڑھتا ہے تو اپنی بائبل سے اِسے دیکھیں۔ اِس طرح آپ ضرورت پڑنے پر اپنے ساتھی کی مدد کرنے کو تیار ہوں گے۔‏
سمجھ‌داری سے اِس بات کا فیصلہ کریں کہ آیا آپ کو اپنے ساتھی کی مدد کرنے کے لیے بیچ میں بولنا چاہیے یا نہیں اور اگر ایسا ہے تو آپ کو کب بولنا چاہیے۔ (‏امثا ۲۵:‏۱۱‏)‏ اگر کوئی مبشر آپ کو اپنے ساتھ کسی شخص کو بائبل کا مطالعہ کرانے کے لیے لے کر جاتا ہے اور آپ مطالعے کے دوران کچھ تبصرے کرتے ہیں تو ہو سکتا ہے کہ مبشر کو یہ اچھا لگے۔ لیکن گھرگھر مُنادی کے دوران شاید آپ کا ساتھی یہ توقع کرے کہ وہ اپنی باری پر خود صاحبِ‌خانہ سے بات کرے۔ لیکن اگر وہ نیا مبشر ہے یا اُسے کسی سوال یا اِعتراض کا جواب دینا مشکل لگتا ہے تو وہ یقیناً آپ کی مدد کی قدر کرے گا۔ چاہے آپ کسی بہن یا بھائی کے ساتھ گھرگھر مُنادی کریں، دوبارہ ملاقات کے لیے جائیں یا اُس کے ساتھ بائبل کا مطالعہ کرانے جائیں، اُس کی بات کو بیچ میں نہ کاٹیں اور نہ ہی کسی اَور موضوع پر بات کرنا شروع کر دیں۔‏
کبھی‌کبھار اپنے ساتھی کو کچھ ایسے مشورے دیں جو اَور مؤثر طریقے سے مُنادی کرنے میں اُس کے کام آ سکتے ہیں۔ ایسا کرنے سے نہ ہچکچائیں۔ (‏امثا ۳:‏۲۷‏)‏ کوئی بھی مشورہ دینے سے پہلے شاید آپ کہہ سکتے ہیں کہ ”‏آپ کے خیال میں صاحبِ‌خانہ کے ساتھ آپ کی بات‌چیت کیسی رہی؟“‏ یا ”‏کیا مَیں آپ کو ایک مشورہ دے سکتا ہوں؟“‏ یا ”‏ایسی صورتحال میں مَیں یہ کرتا ہوں .‏ .‏ .‏۔“‏ یاد رکھیں کہ اگر ایک شخص کو کبھی‌کبھار مشورہ دیا جائے تو اُسے اچھا لگتا ہے لیکن اگر اُس کی ہر غلطی پر توجہ دِلائی جائے تو وہ بے‌حوصلہ ہو سکتا ہے۔‏

اِس مہینے یہ کریں:‏

مُنادی کے بعد اپنے ساتھی کو بتائیں کہ وہ کس طرح آپ کے لیے مددگار ثابت ہوا۔‏