کیا بائبل واقعی بدل گئی ہے؟‏

بائبل دوسری مذہبی کتابوں سے بالکل فرق ہے۔ تاریخ کے دوران دُنیا کی کسی بھی کتاب نے اِتنے زیادہ لوگوں کے عقیدوں پر اثر نہیں ڈالا جتنا کہ بائبل نے ڈالا ہے۔ لیکن یہ بھی سچ ہے کہ دوسری کتابوں کی نسبت بائبل کو سب سے زیادہ تنقید کا نشانہ بنایا گیا ہے۔‏

مثال کے طور پر بعض عالم اِس بات پر شک کرتے ہیں کہ بائبل کے جدید ترجمے ہو بہو اصلی متن کے مطابق ہیں۔ ایک مذہبی عالم نے کہا:‏ ”‏ہم پورے یقین سے یہ نہیں کہہ سکتے کہ آج ہمارے پاس بائبل کی جو نقلیں ہیں، وہ اصلی متن کے مطابق ہیں۔ یہ نقلیں غلطیوں سے بھری ہیں اور اِن میں سے زیادہ‌تر تو اصلی متن کے بہت صدیوں بعد تیار کی گئیں اور اِن میں ہزاروں تبدیلیاں کی گئیں۔“‏

کچھ لوگ اپنے مذہبی پس‌منظر کی وجہ سے بائبل کے درست ہونے پر شک کرتے ہیں۔اِس حوالے سے ذرا فائزل نامی آدمی کی مثال پر غور کریں۔ اُن کے گھر والے مسیحی نہیں ہیں۔ وہ بچپن سے یہ سنتے آئے تھے کہ بائبل ایک مُقدس کتاب تو ہے لیکن اِسے بدل دیا گیا ہے۔ اُنہوں نے کہا:‏ ”‏اِس لیے جب کوئی مجھ سے بائبل کے بارے میں بات کرنا چاہتا تھا تو میرے دل میں صرف شک بھرا ہوتا تھا۔ مَیں سوچتا تھا کہ اِن لوگوں کے پاس کون سی اصلی بائبل ہے۔ یہ تو بدل گئی ہے۔“‏

کیا اِس بات سے کوئی فرق پڑتا ہے کہ بائبل بدل گئی ہے یا نہیں؟ اِس سلسلے میں ذرا اِن سوالوں پر غور کریں:‏ اگر آپ کو اِس بات پر شک ہے کہ مستقبل کے حوالے سے بائبل میں جو وعدے کیے گئے ہیں، وہ اصلی متن میں تھے تو کیا آپ اُن پر بھروسا کریں گے؟ (‏رومیوں 15:‏4‏)‏ اگر جدید بائبلیں محض غلطیوں سے بھری ہیں تو کیا آپ اپنی ملازمت، گھرانے یا عبادت جیسے اہم معاملوں کے بارے میں فیصلہ کرتے وقت بائبل کے اصولوں کو کام میں لائیں گے؟‏

سچ ہے کہ آج ہمارے پاس بائبل کی وہ اصلی کتابیں نہیں ہیں جو اِن کو تحریر کرنے والوں نے اپنے ہاتھوں سے لکھیں۔ لیکن ہم اِن کتابوں کی قدیم نقلوں کو دیکھ سکتے ہیں جن میں ہزاروں نسخے بھی شامل ہیں۔ لیکن سوال یہ اُٹھتے ہیں کہ یہ نسخے خراب ہونے سے کیسے بچ گئے؟ بائبل کو لوگوں کی پہنچ سے باہر رکھنے کے لیے کیا کچھ کِیا گیا؟ اور اِس میں لکھی باتوں کو بدلنے کی کوشش کیسے کی گئی؟ جب آپ دیکھیں گے کہ بائبل کے نسخے صدیوں کے دوران کیسے محفوظ رہے تو آپ کا اِعتماد اِس بات پر بڑھے گا کہ ابھی آپ کے پاس جو بائبل ہے، وہ بدلی نہیں ہے۔ آئیں، اِن سوالوں کے جواب اگلے مضامین میں دیکھیں۔‏