کیا سب مذاہب خدا کی نظروں میں قابلِقبول ہیں؟
لوگ اکثر اِس سوال کا جواب یوں دیتے ہیں:
◼ ”جیہاں۔ تمام مذاہب کی بنیاد سچائی ہے۔“
◼ ”اگر آپ خلوصدلی سے خدا کی عبادت کرتے ہیں تو اِس سے کوئی فرق نہیں پڑتا کہ آپ کس مذہب سے تعلق رکھتے ہیں۔“
یسوع مسیح نے اِس موضوع پر کیا تعلیم دی؟
◼ ”تنگ دروازہ سے داخل ہو کیونکہ وہ دروازہ چوڑا ہے اور وہ راستہ کشادہ ہے جو ہلاکت کو پہنچاتا ہے اور اُس سے داخل ہونے والے بہت ہیں۔ کیونکہ وہ دروازہ تنگ ہے اور وہ راستہ سکڑا ہے جو زندگی کو پہنچاتا ہے اور اُس کے پانے والے تھوڑے ہیں۔“ (متی ۷:۱۳، ۱۴) یسوع مسیح نے یہ نہیں کہا کہ ہم کسی بھی مذہب کے ذریعے خدا تک رسائی حاصل کر سکتے ہیں۔
◼ ”اُس دن بہتیرے مجھ سے کہیں گے اَے خداوند اَے خداوند! کیا ہم نے تیرے نام سے نبوّت نہیں کی اور تیرے نام سے بدرُوحوں کو نہیں نکالا اور تیرے نام سے بہت سے معجزے نہیں دکھائے؟ اُس وقت مَیں اُن سے صاف کہہ دوں گا کہ میری کبھی تُم سے واقفیت نہ تھی۔ اَے بدکارو میرے پاس سے چلے جاؤ۔“ (متی ۷:۲۲، ۲۳) بہت سے لوگ یسوع مسیح کے پیروکار ہونے کا دعویٰ کرتے ہیں لیکن یسوع مسیح اُن میں سے ہر ایک کو قبول نہیں کرتا۔
عام طور پر لوگ اپنے عقیدوں اور روایات سے بڑی لگن محسوس کرتے ہیں۔ لیکن اگر یہ عقیدے اور روایات خدا کے کلام کے مطابق نہیں ہیں تو خدا اِن کو کیسا خیال کرتا ہے؟ یسوع مسیح نے مذہبی راہنماؤں سے کہا: ”تُم نے اپنی روایت سے خدا کا کلام ردّ کر دیا۔“ پھر اُس نے اُنہیں بتایا کہ خدا اُن کی عبادت کو کیسا خیال کرتا ہے۔ اُس نے کہا: ”یہ لوگ زبان سے تو میری عزت کرتے ہیں، لیکن اُن کا دل مجھ سے بہت دُور ہے۔ یہ لوگ بےفائدہ میری پرستش کرتے ہیں؛ کیونکہ آدمیوں کے حکموں کی تعلیم دیتے ہیں۔“—متی ۱۵:۱-۹؛ یسعیاہ ۲۹:۱۳، نیو اُردو بائبل ورشن۔
خدا کی خوشنودی حاصل کرنے کے لئے نہ صرف ہمارے عقیدوں کو بلکہ ہمارے چالچلن کو بھی خدا کے کلام کے مطابق ہونا چاہئے۔ خدا کے کلام میں کچھ لوگوں کے بارے میں لکھا ہے کہ ”وہ خدا کی پہچان کا دعویٰ تو کرتے ہیں مگر اپنے کاموں سے اُس کا اِنکار کرتے ہیں۔“ (ططس ۱:۱۶) خدا کے کلام میں یہ بھی لکھا ہے کہ آخری زمانے میں رہنے والے زیادہتر لوگ ”خدا کی نسبت عیشوعشرت کو زیادہ دوست رکھنے والے ہوں گے۔ وہ دینداری کی وضع تو رکھیں گے مگر اُس کے اثر کو قبول نہ کریں گے ایسوں سے بھی کنارہ کرنا۔“—۲-تیمتھیس ۳:۴، ۵۔
خدا کی خوشنودی حاصل کرنے کے لئے یہ کافی نہیں ہے کہ ہم خلوصدلی سے اُس کی عبادت کریں۔ اِس کی وجہ یہ ہے کہ ایک خلوصدل شخص بھی غلطی پر ہو سکتا ہے۔ اس لئے خدا کے بارے میں سچائی جاننا بہت اہم ہے۔ (رومیوں ۱۰:۲، ۳) خدا کے بارے میں سچائی سیکھنے اور اُس کی مرضی پر چلنے سے ہی ہم اُس کی خوشنودی حاصل کر سکتے ہیں۔ (متی ۷:۲۱) لہٰذا خدا کی خوشنودی حاصل کرنے کے لئے ہمیں خلوصدلی سے اُس کی عبادت کرنی چاہئے اور اپنے عقیدوں اور چالچلن کو اُس کے کلام کے مطابق ڈھالنا چاہئے۔ جیہاں، ہمیں خدا کی مرضی پر چلنے کا معمول قائم کرنا چاہئے۔—۱-یوحنا ۲:۱۷۔
اگر آپ جاننا چاہتے ہیں کہ پاک صحائف میں خدا کے بارے میں اَور کونسی تعلیمات پائی جاتی ہیں تو یہوواہ کے گواہوں سے رابطہ کریں۔
[صفحہ ۹ پر عبارت]
خدا کی خوشنودی حاصل کرنے کے لئے ہمیں خلوصدلی سے اُس کی عبادت کرنی چاہئے اور اپنے عقیدوں اور چالچلن کو اُس کے کلام کے مطابق ڈھالنا چاہئے