کیا آپ ’‏خدا کی نعمتوں کے اچھے مختار‘‏ ثابت ہو رہے ہیں؟‏

‏”‏برادرانہ محبت سے آپس میں ایک دوسرے کو پیار کرو۔ عزت کی رُو سے ایک دوسرے کو بہتر سمجھو۔“‏—‏روم ۱۲:‏۱۰‏۔‏

۱.‏ خدا کے کلام میں ہمیں کس بات کا یقین دلایا جاتا ہے؟‏

خدا کے کلام میں ہمیں یقین دلایا جاتا ہے کہ جب ہم مایوسی کا شکار ہوتے ہیں یا پھر شکستہ دل ہوتے ہیں تو یہوواہ خدا ہماری مدد کرتا ہے۔ اِس سلسلے میں اِن الفاظ پر غور کریں:‏ ”‏[‏یہوواہ]‏ گِرتے ہوئے کو سنبھالتا اور جھکے ہوئے کو اُٹھا کھڑا کرتا ہے۔ وہ شکستہ‌دلوں کو شفا دیتا ہے اور اُن کے زخم باندھتا ہے۔“‏ (‏زبور ۱۴۵:‏۱۴؛‏ ۱۴۷:‏۳‏)‏ اِس کے علاوہ یہوواہ خدا خود ہم سے وعدہ کرتا ہے کہ”‏مَیں [‏یہوواہ]‏ تیرا خدا تیرا دہنا ہاتھ پکڑ کر کہوں گا مت ڈر۔ مَیں تیری مدد کروں گا۔“‏—‏یسع ۴۱:‏۱۳‏۔‏

۲.‏ یہوواہ خدا اپنے خادموں کی مدد کیسے کرتا ہے؟‏

^۲ اگرچہ یہوواہ خدا آسمان پر رہتا ہے تو بھی وہ ہمارا ”‏ہاتھ پکڑ کر“‏ ہماری مدد کر تا ہے۔ یہ کیسے ممکن ہے؟ یہوواہ خدا دُکھی لوگوں کو کیسے ’‏اُٹھا کھڑا کرتا‘‏ ہے؟ وہ مختلف طریقوں سے ہماری مدد کرتا ہے۔ مثال کے طور پر وہ اپنے خادموں کو اپنی پاک روح کے ذریعے ”‏حد سے زیادہ قدرت“‏ بخشتا ہے۔ (‏۲-‏کر ۴:‏۷؛‏ یوح ۱۴:‏۱۶، ۱۷‏)‏ خدا کے خادم بائبل سے بھی قوت حاصل کرتے ہیں۔ (‏عبر ۴:‏۱۲‏)‏ کیا یہوواہ خدا کسی اَور طریقے سے بھی ہمارا حوصلہ بڑھاتا ہے؟ اِس سوال کا جواب ہمیں پطرس رسول کے پہلے خط میں ملتا ہے۔‏

‏’‏خدا کی مختلف نعمتیں‘‏

۳.‏ (‏ا)‏ آزمائشوں کے سلسلے میں پطرس رسول نے کیا لکھا؟ (‏ب)‏ پطرس رسول نے اپنے پہلے خط کے چوتھے باب میں کونسی تسلی دی؟‏

^۳ ممسوح مسیحیوں کو مخاطب کرتے ہوئے پطرس رسول نے لکھا کہ اُنہیں اِس لئے خوش ہونا چاہئے کیونکہ خدا اُن کی خدمت کا اجر دے گا۔ اُس نے آگے لکھا:‏ ”‏تُم .‏ .‏ .‏ اب چند روز کے لئے ضرورت کی وجہ سے طرح طرح کی آزمایشوں کے سبب سے غم‌زدہ ہو۔“‏ (‏۱-‏پطر ۱:‏۱-‏۶‏)‏ غور کریں کہ پطرس رسول نے کہا کہ مسیحیوں کو ”‏طرح طرح کی آزمایشوں“‏ کا سامنا ہوگا۔ لیکن اِس کے ساتھ ساتھ اُس نے یہ بھی کہا کہ آزمائش چاہے جیسی بھی ہو اِس کا سامنا کرنے میں خدا ہماری مدد کرے گا۔ یہ تسلی ہمیں پطرس کے خط کے چوتھے باب میں ملتی ہے۔ اِس باب میں وہ ایسی باتوں کا ذکر کرتا ہے جن کا تعلق ’‏سب چیزوں کے خاتمے‘‏ سے ہے۔—‏۱-‏پطر ۴:‏۷‏۔‏

۴.‏ پہلے پطرس ۴:‏۱۰ کے الفاظ ہمارے لئے تسلی کا باعث کیوں ہیں؟‏

^۴ پطرس رسول نے کہا:‏ ”‏جن کو جس جس قدر نعمت ملی ہے وہ اُسے خدا کی مختلف نعمتوں کے اچھے مختاروں کی طرح ایک دوسرے کی خدمت میں صرف کریں۔“‏ (‏۱-‏پطر ۴:‏۱۰‏)‏ غور کریں کہ پطرس نے خدا کی ”‏مختلف نعمتوں“‏ کا ذکر کِیا۔ دراصل پطرس کے کہنے کا مطلب تھا کہ ہر قسم کی آزمائش سے نپٹنے کے لئے خدا کوئی نہ کوئی ’‏نعمت‘‏ فراہم کرتا ہے۔ یہ ہمارے لئے تسلی کا باعث کیوں ہے؟ کیونکہ اِس سے ظاہر ہوتا ہے کہ ہمیں چاہے جیسی بھی آزمائش کا سامنا ہو یہوواہ خدا ”‏مختلف نعمتوں“‏ کے ذریعے ہماری مدد کرتا ہے۔ لیکن کیا آپ نے غور کِیا کہ خدا یہ ’‏نعمتیں‘‏ کیسے فراہم کرتا ہے؟ پہلے پطرس ۴:‏۱۰ کے مطابق وہ ہمیں یہ ’‏نعمتیں‘‏ دوسرے مسیحیوں کے ذریعے فراہم کرتا ہے۔‏

‏’‏ایک دوسرے کی خدمت کریں‘‏

۵.‏ (‏ا)‏ ہر مسیحی کو کیا کرنا چاہئے؟ (‏ب)‏ اب کونسے سوال اُٹھتے ہیں؟‏

^۵ پطرس رسول نے سب مسیحیوں کو یوں تاکید کی:‏ ”‏سب سے بڑھ کر یہ ہے کہ آپس میں بڑی محبت رکھو۔“‏ پھر اُس نے کہا:‏ ”‏جن کو جس جس قدر نعمت ملی ہے وہ اُسے خدا کی مختلف نعمتوں کے اچھے مختاروں کی طرح ایک دوسرے کی خدمت میں صرف کریں۔“‏ (‏۱-‏پطر ۴:‏۸،‏ ۱۰‏)‏ اِس لئے ہر مسیحی کو چاہئے کہ وہ دوسرے بہن‌بھائیوں کی حوصلہ‌افزائی کرے۔ یہوواہ خدا نے ہمیں ایک ایسی بیش قیمت چیز سونپی ہے جسے دوسروں تک پہنچانا ہمارا فرض بنتا ہے۔ پطرس اِسے ایک ”‏نعمت“‏ کہتا ہے۔ یہ نعمت کیا ہے؟ اور ہم اسے ’‏دوسروں کی خدمت میں‘‏ کیسے صرف کر سکتے ہیں؟‏

۶.‏ مسیحیوں کو کونسی نعمتیں حاصل ہیں؟‏

^۶ خدا کے کلام میں بتایا جاتا ہے کہ ”‏ہر اچھی بخشش [‏یعنی نعمت]‏ اور ہر کامل انعام اوپر سے ہے۔“‏ (‏یعقو ۱:‏۱۷‏)‏ لہٰذا ہر نعمت یہوواہ خدا کی طرف سے ہی ہے۔ خدا کی سب سے نمایاں نعمت اُس کی پاک روح ہے۔ اِس پاک روح کی مدد سے ہم محبت، نیکی اور تحمل جیسی خوبیاں پیدا کرتے ہیں۔ اِن خوبیوں کے ذریعے ہم میں اپنے مسیحی بہن‌بھائیوں کے لئے دلی محبت ظاہر کرنے اور اُنہیں سہارا دینے کی خواہش پیدا ہوتی ہے۔ خدا کی پاک روح کے ذریعے ہمیں حکمت اور سمجھ جیسی نعمتیں بھی حاصل ہوتی ہیں۔ (‏۱-‏کر ۲:‏۱۰-‏۱۶؛‏ گل ۵:‏۲۲، ۲۳‏)‏ ہماری خوبیاں، لیاقتیں اور قوت خدا کی طرف سے نعمتیں ہیں۔ ہمیں چاہئے کہ ہم اِنہیں خدا کی ستائش کے لئے بھرپور طور پر کام میں لائیں۔ یہوواہ خدا نے ہمیں یہ ذمہ‌داری سونپی ہے کہ ہم اُس کی نعمتوں یعنی اُس کی دی ہوئی خوبیوں اور لیاقتوں کے ذریعے دوسروں کی مدد کریں۔‏

‏’‏خدا کی نعمتوں کو ایک دوسرے کی خدمت میں صرف کریں‘‏

۷.‏ (‏ا)‏ اصطلا‌ح ”‏جس جس قدر“‏ سے کیا ظاہر ہوتا ہے؟ (‏ب)‏ ہمیں خود سے کونسے سوال پوچھنے چاہئیں اور کیوں؟‏

^۷ پطرس رسول نے کہا:‏ ”‏جن کو جس جس قدر نعمت ملی ہے وہ اُسے .‏ .‏ .‏ صرف کریں۔“‏ اِس آیت میں اصطلا‌ح ”‏جس جس قدر“‏ سے ظاہر ہوتا ہے کہ ہم میں سے ہر ایک کو مختلف درجوں میں خوبیاں اور لیاقتیں ملی ہیں۔ یہ نعمتیں ہم میں جس حد تک پائی جاتی ہیں ہمیں اِن کو ’‏دوسروں کی خدمت میں صرف‘‏ کرنا چاہئے۔ ہمیں حکم دیا گیا ہے کہ ہم اِن نعمتوں کو ”‏اچھے مختاروں کی طرح .‏ .‏ .‏ صرف کریں۔“‏ اِس لئے ہمیں خود سے پوچھنا چاہئے کہ کیا مَیں خدا کی دی ہوئی نعمتوں کو واقعی بہن‌بھائیوں کی حوصلہ‌افزائی کرنے کے لئے کام میں لا رہا ہوں؟ (‏۱-‏تیمتھیس ۵:‏۹، ۱۰ پر غور کریں۔)‏ یاپھر کیا مَیں خدا کی دی گئی لیاقتوں کو صرف اپنے فائدے کے لئے استعمال کرتا ہوں مثلاً دولت اور شہرت حاصل کرنے کے لئے؟ (‏۱-‏کر ۴:‏۷‏)‏ اگر ہم اپنی نعمتوں کو ”‏ایک دوسرے کی خدمت میں صرف“‏ کریں گے تو ہمیں خدا کی خوشنودی حاصل ہوگی۔—‏امثا ۱۹:‏۱۷؛‏ عبرانیوں ۱۳:‏۱۶ کو پڑھیں۔‏

۸، ۹.‏ (‏ا)‏ مسیحی اپنے بہن‌بھائیوں کی خدمت کیسے کرتے ہیں؟ (‏ب)‏ آپ کی کلیسیا میں بہن‌بھائی ایک دوسرے کی مدد کیسے کرتے ہیں؟‏

^۸ بائبل میں ہمیں بتایا جاتا ہے کہ پہلی صدی کے مسیحیوں نے کن طریقوں سے ایک دوسرے کی خدمت کی۔ (‏رومیوں ۱۵:‏۲۵،‏ ۲۶؛‏ ۲-‏تیمتھیس ۱:‏۱۶-‏۱۸ کو پڑھیں۔‏‏)‏ مسیحی آج بھی پورے دِل سے اپنی ”‏نعمتوں“‏ کو استعمال کرتے ہوئے اپنے بہن‌بھائیوں کی خدمت کرتے ہیں۔ غور کریں کہ وہ کن طریقوں سے ایسا کرتے ہیں۔‏

^۹ بہتیرے بھائی تقریروں کو تیار کرنے میں ہر مہینے کئی گھنٹے صرف کرتے ہیں۔ پھر اجلاسوں پر وہ اپنی تقریروں میں ایسے اہم نکات پیش کرتے ہیں جن سے پوری کلیسیا کو بڑا فائدہ ہوتا ہے۔ (‏۱-‏تیم ۵:‏۱۷‏)‏ کئی بہن‌بھائی دوسروں کے لئے ہمدردی دکھانے کی اچھی مثال قائم کرتے ہیں۔ (‏روم ۱۲:‏۱۵‏)‏ بہتیرے مسیحی اُن بہن‌بھائیوں سے ملنے کے لئے جاتے ہیں جو افسردگی کا شکار ہیں اور اُن کے ساتھ دُعا بھی کرتے ہیں۔ (‏۱-‏تھس ۵:‏۱۴‏)‏ دوسرے مسیحی خطوں کے ذریعے ایسے بہن‌بھائیوں کی حوصلہ‌افزائی کرتے ہیں جو آزمائشوں کا سامنا کر رہے ہیں۔ کچھ مسیحی اُن بہن‌بھائیوں کی مدد کرتے ہیں جو بیماری کی وجہ سے خود اجلاسوں پر حاضر نہیں ہو سکتے۔ اِس کے علاوہ ہزاروں یہوواہ کے گواہ کسی آفت سے متاثر ہونے والے بہن‌بھائیوں کی بھی مدد کرتے ہیں اور اُن کے گھروں کی مرمت کرنے میں اُن کا ہاتھ بٹاتے ہیں۔ جب ایک مسیحی اِن طریقوں سے اپنے بہن‌بھائیوں کی مدد کرتا ہے تو اصل میں وہ ”‏خدا کی مختلف نعمتوں“‏ کو دوسروں کی خدمت میں صرف کرتا ہے۔—‏۱‏-‏پطرس ۴:‏۱۱ کو پڑھیں۔‏

کونسی ذمہ‌داری زیادہ اہمیت رکھتی ہے؟‏

۱۰.‏ (‏ا)‏ پولس رسول خدا کی خدمت کے کن دو پہلوؤں کو اہم خیال کرتا تھا؟ (‏ب)‏ ہم پولس رسول کی مثال پر کیسے عمل کر سکتے ہیں؟‏

^۱۰ مسیحیوں کو نہ صرف یہ ذمہ‌داری سونپی گئی ہے کہ وہ خدا کی دی ہوئی ”‏نعمتوں“‏ کے ذریعے اپنے بہن‌بھائیوں کی خدمت کریں بلکہ اُنہیں دوسروں تک ایک پیغام پہنچانے کی ذمہ‌داری بھی سونپی گئی ہے۔ پولس رسول جانتا تھا کہ یہ دونوں کام خدا کی خدمت کرنے کے اہم پہلو ہیں۔ اُس نے افسس کی کلیسیا کو لکھا کہ اپنے بہن‌بھائیوں کے فائدے کی خاطر اُس پر”‏خدا کے .‏ .‏ .‏ فضل کا انتظام“‏ ہوا۔ (‏افس ۳:‏۲‏)‏ ایک اَور موقعے پر اُس نے کہا:‏ ”‏خدا نے ہم کو مقبول کرکے خوشخبری ہمارے سپرد کی۔“‏ (‏۱-‏تھس ۲:‏۴‏)‏ پولس رسول کی طرح ہم بھی جانتے ہیں کہ ہمیں خوشخبری سنانے کی ذمہ‌داری سونپی گئی ہے۔ جب ہم جوش‌وجذبے سے منادی کے کام میں حصہ لیتے ہیں تو ہم پولس رسول کی بہترین مثال پر عمل کر رہے ہوتے ہیں۔ (‏اعما ۲۰:‏۲۰، ۲۱؛‏ ۱-‏کر ۱۱:‏۱‏)‏ ہم جانتے ہیں کہ منادی کے کام کے ذریعے ہم لوگوں کی جانیں بچا سکتے ہیں۔ اِس کے ساتھ ساتھ ہم پولس رسول کی مثال پر عمل کرتے ہوئے اپنے مسیحی بہن‌بھائیوں کو ’‏روحانی نعمت دیتے ہیں۔‘‏—‏رومیوں ۱:‏۱۱،‏ ۱۲؛‏ ۱۰:‏۱۳-‏۱۵ کو پڑھیں۔‏

۱۱.‏ ہمیں منادی کے کام کو اور اپنے مسیحی بہن‌بھائیوں کی حوصلہ‌افزائی کرنے کو کیسا خیال کرنا چاہئے؟‏

^۱۱ خدا کی خدمت کے اِن دو پہلوؤں میں سے کون سا پہلو زیادہ اہمیت رکھتا ہے؟ جس طرح ایک پرندے کو اُڑنے کے لئے دونوں پروں کی ضرورت ہوتی ہے اُسی طرح ہمیں اِن دونوں کاموں میں حصہ لینے کی ضرورت ہے۔ صرف ایسا کرنے سے ہم مسیحیوں کے طور پر اپنی ذمہ‌داری پوری کر رہے ہو ں گے۔ اِس لئے ہمیں یہ نہیں سوچنا چاہئے کہ منادی کا کام کرنے اور اپنے مسیحی بہن‌بھائیوں کی حوصلہ‌افزائی کرنے میں کوئی تعلق نہیں ہے۔ پطرس رسول اور پولس رسول نے اِن دونوں کاموں کو اہم خیال کِیا اور ہمیں بھی انہیں اہم خیال کرنا چاہئے۔ لیکن یہ دونوں کام ایک دوسرے سے کیا تعلق رکھتے ہیں؟‏

۱۲.‏ خدا نے مسیحیوں کو کونسے شرف عطا کئے ہیں؟‏

^۱۲ بادشاہت کی منادی کرتے وقت ہم اپنی لیاقتوں کو استعمال میں لا کر دوسروں کے دلوں کو چُھونے کی کوشش کرتے ہیں۔ اِس طرح ہم لوگوں کی مدد کرتے ہیں تاکہ وہ یسوع کے پیروکار بن جائیں۔ اِس کے علاوہ ہم اپنی لیاقتوں کو کام میں لاتے ہوئے اپنے الفاظ اور اعمال سے مسیحی بہن‌بھائیوں کی حوصلہ‌افزائی کرتے ہیں۔ ایسا کرنے سے ہم خدا کی نعمتوں کو دوسروں کی خدمت میں صرف کرتے ہیں۔ (‏امثا ۳:‏۲۷؛‏ ۱۲:‏۲۵‏)‏ اِس طرح ہم اپنے بہن‌بھائیوں کی مدد کرتے ہیں تاکہ وہ یسوع کی پیروی کرتے رہیں۔ جی‌ہاں، منادی کرنے اور ”‏ایک دوسرے کی خدمت“‏ کرنے کا شرف خدا ہی نے مسیحیوں کو عطا کِیا ہے۔—‏گل ۶:‏۱۰‏۔‏

‏”‏ایک دوسرے کو پیار کرو“‏

۱۳.‏ اگر شیطان ہمیں ”‏ایک دوسرے کی خدمت“‏ کرنے سے روکنے میں کامیاب ہو گا تو اِس کا کیا نتیجہ ہو سکتا ہے؟‏

^۱۳ پولس رسول نے مسیحیوں کو ہدایت دی:‏ ”‏برادرانہ محبت سے آپس میں ایک دوسرے کو پیار کرو۔ عزت کی رُو سے ایک دوسرے کو بہتر سمجھو۔“‏ (‏روم ۱۲:‏۱۰‏)‏ اپنے مسیحی بہن‌بھائیوں کے لئے محبت رکھنے سے ہم خدا کی مختلف نعمتوں کے اچھے مختار ثابت ہوں گے۔ ہم جانتے ہیں کہ اگر شیطان ہمیں ”‏ایک دوسرے کی خدمت“‏ کرنے سے روکنے میں کامیاب ہو گا تو وہ ہمارے اتحاد کو کمزور کر دے گا۔ (‏کل ۳:‏۱۴‏)‏ اور اِس طرح منادی کے کام میں ہمارا جوش بھی ماند پڑ جائے گا۔ جب پرندے کا ایک پر کاٹ دیا جاتا ہے تو وہ اُڑنے کے قابل نہیں رہتا۔ اِسی طرح اگر شیطان ہمیں خدا کی خدمت کے کسی ایک پہلو میں کمزور کر دے تو مسیحیوں کے طور پر ہم اپنی ذمہ‌داریاں پوری نہیں کر پائیں گے۔‏

۱۴.‏ ”‏ایک دوسرے کی خدمت“‏ کرنے سے کس کو فائدہ ہوتا ہے؟ اِسکی ایک مثال دیں۔‏

^۱۴ ”‏ایک دوسرے کی خدمت“‏ کرنے سے نہ صرف اُس شخص کا فائدہ ہوتا ہے جس کی خدمت کی جاتی ہے بلکہ خدمت کرنے والے کو بھی فائدہ ہوتا ہے۔ (‏امثا ۱۱:‏۲۵‏)‏ اِس سلسلے میں رائین اور رَونی نامی ایک جوڑے کی مثال پر غور کریں جو امریکہ کا رہنے والا ہے۔ جب اُنہیں معلوم ہوا کہ سمندری طوفان ”‏کترینا“‏ نے اُن کے ہزاروں بہن‌بھائیوں کے گھروں کو تباہ کر دیا ہے تو اُنہوں نے فیصلہ کِیا کہ وہ اُن کی مدد کریں گے۔ اُنہوں نے اپنی ملازمت چھوڑ دی اور اپنا گھر بیچ دیا۔ پھر اُنہوں نے ایک بس لے لی اور اُس کی مرمت کر کے اُسے اِس قابل بنایا کہ اُس میں رہا جا سکے۔ اس کے بعد اُنہوں نے ریاست لوئزیانہ تک ۱،۴۰۰ کلومیٹر [‏۹۰۰ میل]‏ کا سفر طے کِیا۔ وہ وہاں ایک سال تک رہے اور اِس دوران اُنہوں نے اپنے بہن‌بھائیوں کی مدد کرنے میں اپنا وقت اور اپنی قوت صرف کی۔ رائین جس کی عمر ۲۹ سال ہے، بتاتا ہے:‏ ”‏اپنے بہن‌بھائیوں کی مدد کرنے سے مَیں یہوواہ خدا کے اَور بھی قریب ہو گیا۔ مَیں نے دیکھا کہ یہوواہ اپنے خادموں کی ضروریات کو کن طریقوں سے پورا کرتا ہے۔ مَیں نے ایسے بھائیوں کے ساتھ کام کِیا جو عمر میں مجھ سے کافی بڑے تھے اور اُن سے مَیں نے مسیحی بہن‌بھائیوں کی مدد کرنا سیکھا۔ مَیں نے یہ بھی دیکھا کہ ہم جوان لوگ یہوواہ خدا کی خدمت میں کتنا کچھ انجام دے سکتے ہیں۔“‏ رَونی جس کی عمر ۲۵ سال ہے، کہتی ہے:‏ ”‏مَیں بہت شکرگزار ہوں کہ مجھے اپنے بہن‌بھائیوں کی مدد کرنے کا موقع ملا۔ زندگی میں پہلی بار مَیں نے اتنی خوشی محسوس کی ہے۔ مَیں جانتی ہوں کہ آئندہ بھی مَیں اِس تجربے سے فائدہ حاصل کرتی رہوں گی۔“‏

۱۵.‏ ہمیں آئندہ بھی اچھے مختاروں کی طرح خدا کی مختلف نعمتوں کو دوسروں کی خدمت میں کیوں صرف کرنا چاہئے؟‏

^۱۵ واقعی، منادی کے کام میں حصہ لینے سے اور اپنے مسیحی بہن‌بھائیوں کی حوصلہ‌افزائی کرنے سے سب کو برکات حاصل ہوتی ہیں۔ ہم جن کی مدد کرتے ہیں وہ روحانی طور پر مضبوط ہو جاتے ہیں اور اُن کی مدد کرنے سے ہمیں بھی دلی خوشی حاصل ہوتی ہے۔ (‏اعما ۲۰:‏۳۵‏)‏ جب ہم ایک دوسرے کے لئے محبت ظاہر کرتے ہیں تو کلیسیا کی گرمجوشی اور محبت بڑھ جاتی ہے۔ اِس کے علاوہ اِس محبت کی بِنا پر ہم یسوع مسیح کے شاگردوں کے طور پر جانے جاتے ہیں۔ یسوع نے کہا تھا:‏ ”‏اگر آپس میں محبت رکھو گے تو اِس سے سب جانیں گے کہ تُم میرے شاگرد ہو۔“‏ (‏یوح ۱۳:‏۳۵‏)‏ یہوواہ خدا چاہتا ہے کہ ہم اپنے بہن‌بھائیوں کی حوصلہ‌افزائی کریں۔ جب ہم ایسا کرتے ہیں تو اصل میں ہم یہوواہ خدا کی بڑائی کر رہے ہوتے ہیں۔ اِس لئے آئیں ہم خدا کی مختلف نعمتوں کو ”‏اچھے مختاروں کی طرح ایک دوسرے کی خدمت میں صرف کریں۔“‏—‏عبرانیوں ۶:‏۱۰ کو پڑھیں۔‏

کیا آپ کو یاد ہے؟‏

‏• یہوواہ خدا اپنے خادموں کی مدد کیسے کرتا ہے؟‏

‏• مسیحیوں کو کونسی دو ذمہ‌داریاں سونپی گئی ہیں؟‏

‏• ہم کن طریقوں سے اپنے بہن‌بھائیوں کی خدمت کر سکتے ہیں؟‏

‏• ہم ”‏ایک دوسرے کی خدمت“‏ کیوں کرنا چاہتے ہیں؟‏

‏[‏صفحہ ۱۸ پر تصویریں]‏

کیا آپ خدا کی دی ہوئی نعمتوں کو دوسروں کی خدمت کرنے کے لئے استعمال کرتے ہیں یا پھر اپنے فائدے کے لئے؟‏

‏[‏صفحہ ۱۹ پر تصویریں]‏

ہم منادی کے کام میں حصہ لینے کے ساتھ ساتھ اپنے بہن‌بھائیوں کی حوصلہ‌افزائی بھی کرتے ہیں