اُنہوں نے مورت کو سجدہ نہیں کِیا

مورت والا خواب دیکھنے کے کچھ عرصے بعد بادشاہ نبوکدنضر نے سونے کی ایک مورت بنوائی۔ اُس نے یہ مورت دُورا کے میدان میں کھڑی کروائی اور ملک کے خاص خاص لوگوں کو اِس کے سامنے اِکٹھا ہونے کے لیے کہا۔ اِن میں سدرک، میسک اور عبدنجو بھی تھے۔ بادشاہ نے یہ حکم دیا:‏ ”‏جیسے ہی تُم نرسنگوں، بربط اور دوسرے سازوں کی آواز سنو تو اِس مورت کو سجدہ کرنا۔ جس نے ایسا نہیں کِیا، اُسے آگ کی جلتی بھٹی میں پھینک دیا جائے گا۔“‏ کیا اُن تین عبرانی لڑکوں نے اُس مورت کو سجدہ کِیا یا کیا اُنہوں نے صرف یہوواہ کی عبادت کی؟‏

پھر بادشاہ نے ساز بجانے کا حکم دیا۔ سدرک، میسک اور عبدنجو کے علاوہ سب لوگوں نے اُس مورت کو سجدہ کِیا۔ کچھ آدمیوں نے یہ دیکھا اور اُنہوں نے جا کر بادشاہ سے کہا:‏ ”‏اُن تین عبرانی لڑکوں نے آپ کی بنوائی مورت کو سجدہ کرنے سے اِنکار کر دیا ہے۔“‏ نبوکدنضر نے اُن تینوں کو بُلوایا اور اُن سے کہا:‏ ”‏مَیں تمہیں مورت کو سجدہ کرنے کا ایک اَور موقع دے رہا ہوں۔ اگر اب بھی تُم نے ایسا نہیں کِیا تو مَیں تمہیں آگ کی جلتی بھٹی میں پھینک دوں گا۔ کوئی بھی خدا تمہیں مجھ سے نہیں بچا پائے گا۔“‏ اُن تینوں لڑکوں نے کہا:‏ ”‏ہمیں ایک اَور موقع نہیں چاہیے۔ ہمارا خدا ہمیں بچا سکتا ہے۔ لیکن بادشاہ سلامت!‏ اگر اُس نے ہمیں نہیں بھی بچایا تو بھی ہم کسی مورت کو سجدہ نہیں کریں گے۔“‏

نبوکدنضر کو بہت زیادہ غصہ آیا۔ اُس نے اپنے آدمیوں سے کہا:‏ ”‏آگ کی بھٹی کو پہلے سے سات گُنا زیادہ گرم کر دو!‏“‏ پھر اُس نے اپنے سپاہیوں سے کہا:‏ ”‏اِن تینوں کو باندھ کر آگ کی بھٹی میں پھینک دو۔“‏ بھٹی اِتنی گرم تھی کہ جیسے ہی وہ سپاہی اِس کے قریب گئے، وہ اُسی وقت مر گئے۔ وہ تینوں عبرانی لڑکے آگ کی بھٹی میں گِر گئے۔ لیکن جب نبوکدنضر نے اندر جھانک کر دیکھا تو اُسے تین نہیں بلکہ چار آدمی نظر آئے۔ وہ بہت ڈر گیا۔ اُس نے اپنے افسروں سے کہا:‏ ”‏ہم نے تو آگ میں تین آدمیوں کو پھینکا تھا نا؟ مجھے چار نظر آ رہے ہیں اور اُن میں سے ایک تو فرشتے جیسا لگ رہا ہے!‏“‏

نبوکدنضر آگ کی بھٹی کے قریب گیا اور اُس نے کہا:‏ ”‏خدا تعالیٰ کے بندو!‏ باہر آ جاؤ۔“‏ سب یہ دیکھ کر حیران رہ گئے کہ سدرک، میسک اور عبدنجو کو کچھ بھی نہیں ہوا تھا۔ اُن کی جِلد، بال اور کپڑے جلے نہیں تھے، یہاں تک کہ اُن سے آگ کی بُو بھی نہیں آ رہی تھی!‏

نبوکدنضر نے کہا:‏ ”‏سدرک، میسک اور عبدنجو کا خدا بہت عظیم ہے۔ اُس نے اپنے فرشتے کو بھیج کر اِنہیں بچایا ہے۔ اُن کے خدا جیسا کوئی اَور خدا نہیں!‏“‏

کیا اُن تینوں عبرانی لڑکوں کی طرح آپ نے بھی یہ ٹھان لیا ہے کہ چاہے جو بھی ہو جائے، آپ یہوواہ کے وفادار رہیں گے؟‏