وہ بچہ جو مسیح بنا

یوسف اور مریم ناصرت لوٹنے کی بجائے بیت‌لحم میں رہنے لگے۔ جب یسوع آٹھ دن کے ہوئے تو موسیٰ کی شریعت کے مطابق اُن کا ختنہ کروایا گیا۔ (‏احبار 12:‏2، 3)‏ اِس موقعے پر عموماً لڑکے کا نام بھی رکھا جاتا تھا۔ یوسف اور مریم نے اپنے بیٹے کا نام یسوع رکھا، بالکل جیسے خدا کے فرشتے جبرائیل نے اُن سے کہا تھا۔‏

تقریباً ایک مہینہ گزر گیا۔ اب یسوع 40 دن کے تھے۔ یوسف اور مریم اُنہیں ہیکل لے گئے جو اُن کے گھر سے کچھ میل دُور یروشلیم میں تھی۔ وہ وہاں اِس لیے گئے کیونکہ شریعت میں یہ حکم تھا کہ لڑکے کی پیدائش کے 40 دن بعد ماں اپنی ناپاکی دُور کرنے کے لیے قربانی پیش کرے۔—‏احبار 12:‏4-‏8۔‏

مریم نے قربانی کے طور پر کبوتر کے دو بچے پیش کیے۔ اِس سے پتہ چلتا ہے کہ یوسف اور مریم کی مالی صورتحال کیسی تھی۔ دراصل شریعت کے مطابق ماں کو قربانی کے لیے ایک یکسالہ برّہ اور ایک کبوتر پیش کرنا ہوتا تھا۔ لیکن اگر ایک ماں غریب تھی تو وہ دو فاختائیں یا کبوتر کے دو بچے پیش کر سکتی تھی۔ لہٰذا مریم کی قربانی سے پتہ چلتا ہے کہ وہ غریب تھیں۔‏

ہیکل میں ایک عمررسیدہ آدمی یوسف اور مریم کے پاس آئے۔ اُن کا نام شمعون تھا۔ خدا نے اُن پر ظاہر کِیا تھا کہ مرنے سے پہلے اُنہیں یہوواہ کے مسیح کو دیکھنے کا شرف ملے گا۔ اُس دن پاک روح نے شمعون کو ہیکل جانے کی ہدایت دی تھی۔ وہاں پہنچ کر شمعون کی ملاقات یوسف اور مریم اور اُن کے ننھے بیٹے سے ہوئی۔ شمعون نے یسوع کو اپنی گود میں اُٹھا لیا۔‏

پھر اُنہوں نے خدا کا شکر ادا کرتے ہوئے کہا:‏ ”‏اَے کائنات کے مالک!‏ اب مَیں سکون سے مر سکتا ہوں کیونکہ وہ بات پوری ہو گئی ہے جو تُو نے مجھ سے کہی تھی۔ میری آنکھوں نے وہ نجات‌دہندہ دیکھ لیا ہے جسے تُو نے بھیجا ہے تاکہ سب لوگ اُسے دیکھ سکیں۔ وہ ایک روشنی ہے جس کے ذریعے قوموں کی آنکھوں سے پردہ ہٹ جائے گا۔ اور وہ تیری قوم اِسرائیل کی شان ہے۔“‏—‏لُوقا 2:‏29-‏32‏۔‏

یہ سُن کر یوسف اور مریم بہت حیران ہوئے۔ پھر شمعون نے اُن کو برکت دی اور مریم سے کہا کہ اُن کا یہ بیٹا ”‏اِسرائیل میں کچھ کے گِرنے اور کچھ کے اُٹھ کھڑے ہونے کا باعث بنے [‏گا]‏۔“‏ اُنہوں نے یہ بھی پیش‌گوئی کی کہ مریم کے دل میں ایک لمبی تلوار گھونپی جائے گی یعنی اُنہیں شدید صدمے سے گزرنا ہوگا۔—‏لُوقا 2:‏34‏۔‏

اُس دن ہیکل میں حناہ بھی موجود تھیں۔ وہ ایک نبِیّہ تھیں اور اُن کی عمر 84 سال تھی۔ وہ ہر روز ہیکل میں آتی تھیں۔ جب اُنہوں نے یوسف، مریم اور ننھے یسوع کو دیکھا تو وہ اُن کے پاس گئیں اور خدا کا شکر ادا کرنے لگیں۔ پھر وہ سب لوگوں کو یسوع کے بارے میں بتانے لگیں۔‏

ذرا تصور کریں کہ یوسف اور مریم اِن واقعات کی وجہ سے کتنے خوش ہوئے ہوں گے!‏ بِلاشُبہ اب اُنہیں پورا یقین ہو گیا کہ اُن کا بیٹا ہی وہ مسیح ہوگا جس کا خدا نے وعدہ کِیا تھا۔‏