سبق 6
کیا مُردے زندہ ہوں گے؟
1. مُردوں کے سلسلے میں خوشخبری کیا ہے؟
جب یسوع مسیح زمین پر تھے تو اُن کے دوست لعزر فوت ہو گئے۔ لعزر یروشلیم کے نزدیک بیتعَنِیاہ نامی ایک گاؤں میں رہتے تھے۔ اُن کی دو بہنیں تھیں جن کے نام مارتھا اور مریم تھے۔ جب یسوع مسیح بیتعَنِیاہ پہنچے تو لعزر کی موت کو چار دن ہو چکے تھے۔ یسوع مسیح، مارتھا اور مریم کے ساتھ لعزر کی قبر پر گئے۔ جلد ہی کافی لوگ وہاں جمع ہو گئے۔ پھر کیا ہوا؟ یسوع مسیح نے لعزر کو زندہ کر دیا! یہ دیکھ کر مارتھا اور مریم کی خوشی کی انتہا نہ رہی۔ یوحنا 11:21-24، 38-44 کو پڑھیں۔
مارتھا پہلے ہی سے جانتی تھیں کہ مُردوں کے سلسلے میں خوشخبری کیا ہے۔ اُن کو پتہ تھا کہ خدا مُردوں کو زمین پر زندہ کرے گا۔ یسعیاہ 26:19 کو پڑھیں۔
2. مرنے کے بعد انسان کے ساتھ کیا ہوتا ہے؟
خدا نے آدم سے کہا: ”تُو خاک ہے اور خاک میں پھر لوٹ جائے گا۔“—پیدایش 3:19۔
انسان خاک یعنی مٹی سے بنائے گئے ہیں۔ (پیدایش 2:7؛ 3:19) ہمارے جسم میں کوئی ایسی روح موجود نہیں ہے جو مرنے کے بعد زندہ رہتی ہے۔ جب جسم مر جاتا ہے تو کچھ بھی زندہ نہیں رہتا۔ ہمارا دماغ کام کرنا بند کر دیتا ہے اور اِس لئے ہماری سوچنے سمجھنے کی صلاحیت ختم ہو جاتی ہے۔ مُردے بالکل بےخبر ہوتے ہیں۔ اِس لئے لعزر نے اُس وقت کے بارے میں کچھ نہیں بتایا جب وہ موت کی حالت میں تھے۔ زبور 146:4؛ واعظ 9:5، 10 کو پڑھیں۔
کیا خدا مُردوں کو دوزخ میں تڑپاتا ہے؟ چونکہ پاک صحیفوں سے ظاہر ہوتا ہے کہ مُردے بالکل بےخبر ہیں اِس لئے یہ ہو ہی نہیں سکتا کہ اُنہیں دوزخ میں تڑپایا جائے۔ دوزخ کا عقیدہ صحیح نہیں ہے۔ اِس عقیدے سے خدا کو ایک ظالم خدا کے طور پر پیش کِیا جاتا ہے۔ خدا کو تو اِس خیال سے ہی نفرت ہے کہ لوگوں کو آگ میں جھونک کر تڑپایا جائے۔ یرمیاہ 7:31 کو پڑھیں۔
ویڈیو: ”مرنے کے بعد اِنسان کے ساتھ کیا ہوتا ہے؟“ دیکھیں۔
3. کیا مُردے ہم سے رابطہ کر سکتے ہیں؟
مُردے نہ تو بول سکتے ہیں اور نہ ہی سُن سکتے ہیں۔ (زبور 115:17) لیکن کبھیکبھار شیطان کے فرشتے لوگوں سے بات کرکے اُنہیں یہ تاثر دیتے ہیں کہ مُردے اُن سے بات کر رہے ہیں۔ (2-پطرس 2:4) یہوواہ خدا اپنے بندوں کو مُردوں سے رابطہ کرنے سے منع کرتا ہے۔ یسعیاہ 8:19 کو پڑھیں۔
4. کن لوگوں کو زندہ کِیا جائے گا؟
کروڑوں مُردوں کو زمین پر زندہ کِیا جائے گا۔ اُن میں کچھ ایسے لوگ بھی شامل ہوں گے جو خدا کے بارے میں نہیں جانتے تھے اور جنہوں نے بُرے کام کئے تھے۔ لوقا 23:43؛ اعمال 24:15 کو پڑھیں۔
جن لوگوں کو زندہ کِیا جائے گا، وہ خدا کے بارے میں سیکھیں گے۔ اُنہیں یہ موقع ملے گا کہ وہ اپنے اعمال سے یسوع مسیح پر ایمان ظاہر کریں۔ (مکاشفہ 20:11-13) جو لوگ اُس وقت نیکی کی راہ پر چلیں گے، اُنہیں زمین پر ہمیشہ کی زندگی ملے گی۔ یوحنا 5:28، 29 کو پڑھیں۔
5. یہ جان کر کہ مُردے زندہ ہوں گے، ہم یہوواہ خدا کے بارے میں کیا سیکھتے ہیں؟
مُردوں کا زندہ ہونا اِس لئے ممکن ہوا کیونکہ خدا نے یسوع مسیح کو زمین پر بھیجا تاکہ وہ ہماری خاطر اپنی جان دیں۔ اِس سے ہم یہوواہ خدا کی محبت اور مہربانی کا اندازہ لگا سکتے ہیں۔ جب مُردے زندہ ہوں گے تو آپ خاص طور پر کس سے ملنا چاہیں گے؟ یوحنا 3:16؛ رومیوں 6:23 کو پڑھیں۔