خدا کی مرضی کیا ہے؟‏

خدا چاہتا ہے کہ پوری زمین ایک فردوس بن جائے اور زمین پر ہمیشہ تک امن اور سلامتی ہو۔‏

لیکن شاید آپ سوچیں کہ یہ کیسے ہو سکتا ہے؟ خدا کے کلام بائبل میں بتایا گیا ہے کہ خدا کی بادشاہت زمین پر فردوس قائم کرے گی۔ خدا کی مرضی یہ ہے کہ سب لوگ اُس کی بادشاہت کے بارے میں سیکھیں اور جان جائیں کہ انسانوں کے لئے اُس کا مقصد کیا ہے۔—‏زبور 37:‏11،‏ 29؛‏ یسعیاہ 9:‏7‏۔‏

خدا چاہتا ہے کہ ہم خوش رہیں۔‏

جس طرح ایک باپ اپنے بچوں کا بھلا چاہتا ہے اِسی طرح ہمارا خالق چاہتا ہے کہ ہم ہمیشہ تک خوش رہیں۔ (‏یسعیاہ 48:‏17، 18‏)‏ خدا نے اپنے کلام میں وعدہ کِیا ہے کہ ”‏جو خدا کی مرضی پر عمل کرتا ہے، وہ ہمیشہ رہے گا۔“‏—‏1-‏یوحنا 2:‏17‏۔‏

خدا چاہتا ہے کہ ہم اُس کی رہنمائی پر چلیں۔‏

خدا کے کلام میں لکھا ہے کہ ہمارا خالق ہمیں ”‏اپنی راہیں“‏ بتاتا ہے تاکہ ”‏ہم اُس کے راستوں پر چلیں۔“‏ (‏یسعیاہ 2:‏2، 3‏)‏ اُس نے اپنے نام کی ’‏ایک ایسی قوم چُنی‘‏ ہے جو سب لوگوں کو اُس کی مرضی کے بارے میں بتاتی ہے۔—‏اعمال 15:‏14‏۔‏

خدا چاہتا ہے کہ اُس کے سب بندوں میں اتحاد ہو۔‏

یہوواہ خدا کی عبادت لوگوں میں اختلافات نہیں ڈالتی بلکہ اُن کو متحد کرتی ہے اور اُن کے درمیان محبت کو فروغ دیتی ہے۔ (‏یوحنا 13:‏35‏)‏ آج‌کل کون لوگ آپس میں متحد ہو کر خدا کی عبادت کر رہے ہیں اور پوری دُنیا میں لوگوں کو خدا کی راہوں کے بارے میں سکھا رہے ہیں؟ اِس سوال کا جواب جاننے کے لئے اِس کتاب کو پڑھیں۔‏