سموئیل کی پہلی کتاب
7 تب قِریتیعریم کے لوگ آ کر یہوواہ کے صندوق کو لے گئے۔ اُنہوں نے اِسے پہاڑی پر ابینداب کے گھر میں رکھا اور اُن کے بیٹے اِلیعزر کو یہوواہ کے صندوق کی نگرانی کرنے کے لیے مقرر* کِیا۔
2 قِریتیعریم میں خدا کا صندوق آنے کے بعد ایک لمبا عرصہ یعنی 20 سال گزر گئے۔ پھر اِسرائیل کا پورا گھرانہ یہوواہ کی رہنمائی حاصل کرنے کی کوشش کرنے لگا۔* 3 تب سموئیل نے اِسرائیل کے پورے گھرانے سے کہا: ”اگر آپ پورے دل سے یہوواہ کے پاس لوٹ رہے ہیں تو دوسرے خداؤں اور عستارات کے بُتوں کو اپنے بیچ سے نکال دیں اور اپنا دل پوری طرح سے یہوواہ کی طرف لگائیں اور صرف اُس کی خدمت کریں۔ پھر وہ آپ کو فِلِستیوں کے ہاتھ سے چھڑائے گا۔“ 4 اِس پر اِسرائیلیوں نے بعل اور عستارات کے بُتوں کو نکال دیا اور صرف یہوواہ کی خدمت کرنے لگے۔
5 اِس کے بعد سموئیل نے کہا: ”سب اِسرائیلیوں کو مِصفاہ میں اِکٹھا کریں اور مَیں آپ کے لیے یہوواہ سے دُعا کروں گا۔“ 6 اِس لیے وہ مِصفاہ میں اِکٹھے ہوئے۔ وہ پانی بھر کر لائے اور اِسے یہوواہ کے حضور اُنڈیلا اور اُس دن روزہ رکھا۔ وہاں اُنہوں نے کہا: ”ہم نے یہوواہ کے خلاف گُناہ کِیا ہے۔“ پھر سموئیل مِصفاہ میں اِسرائیلیوں کا اِنصاف کرنے لگے۔
7 جب فِلِستیوں نے سنا کہ اِسرائیلی مِصفاہ میں جمع ہوئے ہیں تو اُن کے حاکم اِسرائیلیوں سے لڑنے کے لیے نکلے۔ جب اِسرائیلیوں نے یہ سنا تو وہ فِلِستیوں کی وجہ سے بہت ڈر گئے۔ 8 اُنہوں نے سموئیل سے کہا: ”آپ یہوواہ ہمارے خدا سے اِلتجا کرتے رہیں کہ وہ ہماری مدد کرے اور ہمیں فِلِستیوں کے ہاتھ سے بچائے۔“ 9 پھر سموئیل نے ایک دودھ پیتا میمنا لیا اور اِسے یہوواہ کے حضور بھسم ہونے والی سالم قربانی کے طور پر پیش کِیا۔ سموئیل نے اِسرائیلیوں کی خاطر یہوواہ سے مدد کی اِلتجا کی اور یہوواہ نے اُن کی اِلتجا سنی۔ 10 جب سموئیل بھسم ہونے والی قربانی پیش کر رہے تھے تو فِلِستی اِسرائیلیوں سے جنگ کرنے کے لیے آگے بڑھے۔ اُس دن یہوواہ کی طرف سے فِلِستیوں کے خلاف آسمان سے زوردار گرج ہوئی۔ خدا نے اُنہیں بوکھلاہٹ کا شکار کر دیا اور اِسرائیلیوں کے ہاتھوں شکست دی۔ 11 پھر اِسرائیلی مِصفاہ سے نکلے اور فِلِستیوں کا پیچھا کرتے کرتے بیتکر تک اُنہیں مارتے گئے۔ 12 تب سموئیل نے ایک پتھر لیا اور اِسے مِصفاہ اور یسانہ کے بیچ میں رکھا۔ اُنہوں نے یہ کہتے ہوئے اُس کا نام ابنعزر* رکھا: ”اب تک یہوواہ نے ہماری مدد کی ہے۔“ 13 اِس طرح فِلِستیوں کو شکست ہوئی اور وہ پھر کبھی اِسرائیل کے علاقے میں نہیں آئے۔ سموئیل کے زمانے میں یہوواہ* فِلِستیوں کے خلاف رہا۔ 14 فِلِستیوں نے عِقرون سے جات تک اِسرائیل کے جن شہروں پر قبضہ کر لیا تھا، وہ اِسرائیل کو واپس مل گئے۔ اِس طرح اِسرائیلیوں نے فِلِستیوں کے ہاتھ سے اپنے علاقے چھڑا لیے۔
اِس کے علاوہ اِسرائیلیوں اور اموریوں کے بیچ بھی امن تھا۔
15 سموئیل ساری زندگی اِسرائیل کا اِنصاف کرتے رہے۔ 16 وہ ہر سال بیتایل، جِلجال اور مِصفاہ کا دورہ کرتے تھے اور اِن ساری جگہوں میں اِسرائیل کا اِنصاف کرتے تھے۔ 17 پھر وہ رامہ واپس آتے تھے کیونکہ وہاں اُن کا گھر تھا۔ وہ وہاں بھی اِسرائیل کا اِنصاف کرتے تھے اور اُنہوں نے وہاں یہوواہ کے لیے ایک قربانگاہ بنائی تھی۔