Wa Lipongiyila hẽ Oku Liyaka Lovitangi Noke Yoku Papatisiwa?

1-2. Nye ci ka tu kuatisa oku amamako oku pamisa ukamba wetu la Yehova eci tu liyaka lovitangi? Tukula ocindekaise cimue.

TUA kũlĩha okuti voluali lulo, tu laika oku liyaka lovitangi. Yesu wa sapuila olondonge viaye hati: “Ocilondokua ciya muẽle.” (Mat. 18:7) Olondaka evi vi lekisa okuti, tu sukila oku lipongiyila ovitangi tu pondola oku liyaka lavio okuti, vimue pokati kavio vi pondola oku yilila pocakati ca vamanji. Nda tua ci linga, ci ka tu kuatisa oku amamako oku pamisa ukamba wetu la Yehova.

² Kũlĩhĩsa ocindekaise cikuãimo. Afendeli va Yehova va siata oku vetiyiwa oku lipongiyila ovilunga. Tua siata oku lipongiya ndati? Tete, tu sanda oku kũlĩha ovilunga via siata oku lipita pocitumãlo tu kasi. Ci kuete esilivilo lialua oku ci linga ca piãla enene nda okuti, ndopo tua ilukila kocitumãlo caco. Noke lioku kũlĩhĩsa ovilunga vi pondola oku lipita pocitumãlo tu kasi, tu sukila oku sokiya ovina tu ka linga eci ovilunga viaco viya. (Olosap. 21:5) Cimuamue haico okuti, tu sukila oku sanda oku kũlĩha ovitangi tu pondola oku liyaka lavio omo lioku kala vocili kuenda oku lipongiya cilo oco tu kũlĩhe ovina tu linga nda okuti tueya oku liyaka lovitangi viaco komuenyo wetu. Poku ci linga, tu pondola oku liyaka lovitangi viaco lonjila yimue okuti ka tu nyõli ukamba wetu la Yehova. (Osa. 17:5) Omo liaco, vocipama cilo tu ka konomuisa ovitangi vitatu tu pondola oku liyaka lavio noke yoku papatisiwa kuenda ovina tu sukila oku linga oco tu tẽle oku liyaka lovitangi viaco.a

CECI MANJI UMUE A TU SUMUISA

3. Ocitangi cipi tu pondola oku liyaka laco vekongelo?

³ Ivaluka hẽ ndomo wa liyeva eci wa endele kohongele yimue yekongelo onjanja yatete kuenda wa mola ocisola ci kasi pokati kafendeli va Yehova? Omo liocisola caco, wa nõlapovo oku vumba Yehova. (Yoa. 13:35; Va Kol. 3:12 ) Manji umue o tukuiwa Blancab wa liyevavo ndoco. Pole, noke yoku papatisiwa, kueya oku lipita ocina cimue okuti ka ci lavokaile. Eye wa popia hati: “Manji umue ukãi wa ndi tata lãvi. Nda limbukavo okuti, manji yaco wa kuatele ocituwa coku popia lãvi vamanji vakuavo vovekongelo. Eci ca ndi sumuisa calua momo ame nda lilongisa okuti, Olombangi Via Yehova vi likolisilako oku kala vakuambembua kuenda vakuacisola.” Ocili okuti, afendeli va Yehova va siata oku likolisilako calua oco va setukule ovituwa viwa via Yehova, pole, ovo ka va lipuile. (Va Efe. 4:​23, 24; 1 Yoa. 1:8) Omo liaco, citava okuti manji umue o ka vangula ale o ka linga ocina cimue ci tu sumuisa. (Tia. 3:8) Ci sumuisa calua omo okuti, vamue va liwekapo oku vumba Yehova omo liocitangi caco.

4. Nye ci ka ku kuatisa oku kũlĩha ovina o sukila oku linga eci manji umue a ku sumuisa? (Va Efeso 4:32)

⁴ Oco hẽ, nye ci ka ku kuatisa oku kũlĩha ovina o sukila oku linga, eci manji umue a ka ku sumuisa? Kapako elungulo li sangiwa kukanda ku va Efeso 4:32. (Tanga.) Nda okuti ove wa likolisilako oku kala ukuacisola kuenda ukuahenda lomanu vakuavo, ci ka ku kuatisa oku yuvula oku kuata ovitangi la vamanji. Kuata ocimãho coku ecela vakuene nda okuti ovo va popia ale va linga ovina vi ku sumuisa. Nye ci ka ku kuatisa oku ci linga? Ivaluka okuti ove olonjanja viosi wa siata oku pinga ku Yehova oco a ecele akandu ove kuenje wa siata oku sanjuka eci eye a ku ecela lutima wosi. (Mat. 6:12) Omo liaco, eci o tiamisila utima konjila ndomo Yehova a siata oku ecela akandu ove, ci ka leluka kokuove oku ecela vakuene.

5. Ocisonehua cipi ci ka tu kuatisa eci omunu umue a tu sumuisa? (Olosapo 19:11) (Talavo oviluvialuvia.)

⁵ Tanga Olosapo 19:11. Embimbiliya li popia okuti nda tua kala vakualondungec kuenda tu kuata elomboloko liekalo lia vakuetu, ci ka tu kuatisa oku kala vakuepandi eci ovo va tu sumuisa. Ocisonehua eci ca kuatisa calua manji umue ukãi o tukuiwa Rima okuti, tunde eci a papatisiwa pa pita lika anyamo amue. Eye wa popia hati: “Eci vamanji va linga ale va vangula ovina ndi sima okuti ka via sungulukile, ndi sokolola kolondaka vi sangiwa kelivulu Liolosapo 19:11. Ndi sokololavo kovina via lipita lomanu vaco kosimbu kuenda kesunga lieci ovo va lingila ale va vanguila ovina viaco ka via sungulukile. Handi vali, ndi linga esokiyo lioku va laleka oco tu endele kumosi kupange woku kunda. Eci ci ndi kuatisa oku va kũlĩha ciwa.” Eli elungulo limue liwa. Yilo oyo otembo yoku kũlĩha ciwa vamanji. Momo nda tua ci linga, tu ka kuata elomboloko liovina ovo va linga kuenje eci va ka popia ovina vi tu sumuisa, ci ka leluka kokuetu oku va ecela.

6. Nye ci ka ku kuatisa oku kuata akamba vawa vekongelo?

⁶ Ocina cipi cikuavo o pondola oku linga oco o kuate ukamba uwa la vamanji vekongelo? Poku sanda oku kũlĩha vamanji, tiamisila utima kovituwa viavo viwa. (Sokisa lelivulu Liolosapo 10:12; Va Rom. 12:10; kuenda Va Fil. 2:​2, 3) Limbuka ndomo oku ci linga ca kuatisa manji umue ulume wa papatisiwa ndopo o tukuiwa Mark. Noke yoku papatisiwa, eye wa sanda otembo yoku kala calua la vamanji vovekongelo kuenje wa fetika oku limbuka ahonguo avo. Nye ca kuatisa manji Mark oku pamisa ukamba waye la Yehova kuenda la vamanji? Eye wa popia hati: “Nda limbuka okuti akulueya a vamanji, atito calua oku a sokisa lakandu omanu voluali va siata oku linga. Omo liaco, nda nõlapo okuti si pesela otembo yange oku sokolola kakulueya a vamanji. Pole, nda fetika oku tiamisila utima kovituwa viavo viwa kuenda oku sokolola kokuavio.” Cimuamue haico okuti, nda wa tiamisilavo utima kovituwa viwa via vamanji, ci ka ku kuatisa oku kuata akamba vawa vekongelo.

CECI O FETIKA OKU SOKOLOLA KOVINA WA LINGAILE OSIMBU KUA PAPATISIWILE

7. Nye ci pondolola oku ku vetiya oku sokolola kovina tua sia konyima?

⁷ Eci ove wa lilongisa ocili, wa kuata esanju lialua omo okuti ku pangi vali onepa koluali lua Satana. Citava okuti ka ci leluka kokuove oku tava okuti, omunu umue o nõlapo oku tiukila vali koluali lua Satana. Pole, poku liyaka lovitangi viomuenyo, pamue o fetika oku sokolola kovina vimue wa enda oku linga osimbu kua lingile Ombangi ya Yehova. Kuenje citava okuti o livela kuenda o sokolola oku linga vali ovina viaco. (Sokisa lelivulu Liatendelo 11:​4-6) Ndeci, pamue vamanji vamue va nõlapo oku siapo upange umue va feta olombongo vialua hawo wa kemãla, omo okuti upange waco wa enda oku va nyana otembo yalua. Vakuavo pamue, eci va fetika oku lilongisa Embimbiliya, va siapo akamba va kuatele. Handi vali vakuavo, citava okuti va liwekapo oku linga ocina cimue va solaile calua, pole, ocina caco ka ci sanjuisa Yehova. Ci sumuisa calua nda Ukristão umue ecelela okuti ovina vimue a lingaile kosimbu, vi u kokela oku liwekapo oku vumba Yehova! Oco hẽ, nye o sukila oku linga cilo oco okuti eci o liyaka lovitangi, ku sokolola vali kovina wa sia konyima?

8. Nye tu lilongisila kulandu wa Avirahama la Sara?

⁸ Vembimbiliya mu sangiwa ovolandu omanu valua vakuekolelo okuti, nda va kuata epuluvi lioku fetika oku sokolola kovina va sia konyima. Ndeci, Avirahama la Sara va pokola ku Yehova kuenje va siapo olupale luo Uri luna lua kuatele ovimbaka via pama, oco va ka kale volombalaka. (Va Hev. 11:​8, 9) Citava okuti ovo va ivaluka omuenyo uwa va kuatele kolupale luo Uri. Pole, “nda ovo vamameleko oku ivaluka” ale oku kuatela ongeva ovina va sia konyima, nda va kuata evelo lioku tiukila. Pole, ovo va nõlapo oku tiamisila utima kovina Yehova a likuminya oku va ĩha kovaso yoloneke.—Va Hev. 11:​15, 16.

9. Upostolo Paulu wa tendele ndati ovina a sia konyima? (Va Filipoi 3:​7, 8, 13)

⁹ Upostolo Paulu wa lingavo apongoloko komuenyo waye, oco a vumbe Yehova lonjila yimue ya sunguluka. Ndeci, osimbu ka lingile Ukristão, eye wa lilongisa Ovihandeleko via va Yudea lulongisi umue wa sumbiwile calua o tukuiwa Gamalieli. (Ovil. 22:3) Omo liaco, Paulu nda wa kala usongui umue wa velapo calua wa va Yudea. (Va Gal. 1:​13, 14) Pole, eci a lilongisa olondaka viwa viatiamẽla ku Yesu, wa siapo ovina viosi. Anga hẽ noke yoku linga Ukristão, omuenyo waye wa lelukile? Sio. Eye wa tipuiwa kuenda wa suvukiwile la va Yudea. (2 Va Kor. 11:​23-26) Paulu nda okuti wa tiamisilile utima kovitangi a kala oku liyaka lavio kuenda ndomo omuenyo waye wa kala osimbu ka lingile Ukristão, eye nda wa sima okuti wa nõla onjila yimue ka ya sungulukile yoku kala upostolo wa Yesu. Pole, Paulu wa tiamisila utima kesumũlũho li likasi a kuatele lioku kala ondonge ya Kristu Yesu kuenda wa sanjukilile oku tambula onima yimue yi komõhisa kovaso yoloneke. Paulu wa kolelele okuti apongoloko a linga, a velelepo calua okuti ovina a sia konyima vi sule.—Tanga Va Filipoi 3:​7, 8, 13.

10. Kovina vipi o sukila oku sokolola? (Marko 10:​29, 30) (Talavo oviluvialuvia.)

¹⁰ Nye tu lilongisilako? Nda okuti wa fetika oku sokolola kovina wa sia konyima osimbu kua lingile Ukristão, ivalukavo esunga lieci wa silapo ovina viaco. (Uku. 7:10) Handi vali, sokololavo kovina viosi viwa o kuete cilo okuti via velapo ovina wa sia konyima. Ndeci, ove o kuete ukamba umue uwa la Yehova Suku. (Olosap. 3:32) O kuetevo vamanji valua vekongelo kuenda voluali luosi okuti va ku sole calua. (Tanga Marko 10:​29, 30.) Kuenda Yehova wa likuminyavo oku ku ĩha ovina vialua viwa kovaso yoloneke! (Isa. 65:​21-23) Nda okuti wa kuata ocituwa coku sokolola kasumũlũho o kuete omo lioku vumba Yehova, ku ka sokolola kovina wa sia konyima.

11. Nye wa lilongisa kulandu wa manji Rosemary?

¹¹ Manji umue ukãi o tukuiwa Rosemary, eci a papatisiwa wa kuata eci ci soka 50 kanyamo. Kũlĩhĩsa eci co kuatisa oku yuvula oku sokolola kovina a sia konyima. Eye wa popia hati: “Eci nda linga Ombangi ya Yehova, anyamo osi nda nda oku sumua omo okuti sia lingaile vali ocipito co Natale, cina ca enda oku nyĩha epuluvi lioku kala lepata liange. Ame nda solaile calua oku eca olombanjaile kuvakuepata liange. Nda solailevo oku mola esanju omãla vange kuenda olonekulu viange via enda oku kuata poku ikula olombanjaile nda enda oku va ĩha.” Nye co kuatisa oku yuvula oku sokolola kovina viaco? Manji Rosemary wa popia hati: “Nda sanga onjila yikuavo yoku kala la vakuepata liange kapuluvi akuavo. Unyamo lunyamo, veteke limue lia litepa, ndi laleka epata liange oco veye konjo yange. Vapuluvi aco, ndi va ĩha olombanjaile kuenda ndi va sapuila esunga lieci ndi va solile calua.” Manji Rosemary wa liyakavo locitangi cikuavo. Eye wa popia hati: “Eci nda lilongisa ocili, akamba vange vo kosimbu va ndi yanduluka. Olonjanja vimue nda enda oku sumua loku liyeva ulika.”d Nye co kuatisa oku liyaka locitangi caco? Eye wa fetika oku linga esokiyo lioku laleka vamanji va litepa oco va kundile kumosi. Eye hati: “Kupange woku kunda, ndeya oku kũlĩha ciwa vamanji kuenje tua linga akamba vawa. Cilo ndi kuete akamba vokaliye haivo ndi sole calua.” Nye o pondola oku lilongisila kulandu wa manji Rosemary? Ndaño cilo ku kasi vali oku linga ovina wa lingaile osimbu kua fetikile oku lilongisa ocili okuti via enda oku ku sanjuisa calua, ivaluka okuti o pondola oku kuata ovina vikuavo via velapo vi pondola oku ku nenela esanju liocili. (Va Fil. 4:​8,9) Ivalukavo okuti: Yehova olonjanja viosi oku ĩha ovina vialua okuti vina wa sia konyima vi sule.

CECI OMUNU UMUE A LIWEKAPO OKU VUMBA YEHOVA

12. Ocitangi cipi ci pondola oku lipita vekongelo okuti pamue ka ci leluka oku liyaka laco?

¹² Eci wa linga Ombangi ya Yehova, citava okuti wa kuata esanju lialua omo okuti ku pangi vali onepa voluali lua vĩha kuenje cilo ove o panga onepa kocimunga cimue comanu va longisa ocili havo va likolisilako oku linga eci ca sunguluka. (Isa. 65:14) Pole, olonjanja vimue omunu umue vekongelo o pondola oku linga ekandu limue linene. Omunu waco pamue nda ka likekembelele, o tundisiwa vekongelo. (1 Va Kor. 5:13) Kũlĩhĩsa ndomo manji umue ukãi o tukuiwa Samar a liyeva omo liocitangi caco. Eye wa popia hati: “Noke yotembo yimue tunde eci nda papatisiwa, ukulu umue wekongelo wa linga ekandu limue linene kuenje wa tundisiwa vekongelo. Nda yeva esumuo lialua kuenda ekolelo liange lia fetika oku hongua omo okuti, sia simĩle okuti ukulu umue wekongelo o lingila ekandu limue linene Yehova kuenda ekongelo.” Ocili okuti tu sukila oku kolela okuti vamanjetu va sole Yehova kuenda va yongola oku amamako oku u vumba lekolelo. (1 Va Kor. 13:​4, 7) Pole, ci sumuisa omo okuti anyamo osi, vamanji vamue va siata oku tundisiwa vekongelo. Pamue ka ci leluka kokuove nda okuti ekamba limue, omunu umue ukuepata ale omunu umue ove wa sumbila calua o liwekapo oku vumba Yehova.

13. Nye tu sukila oku linga cilo, oco ka tu ka hongue konepa yespiritu nda okuti ekamba lietu ale umue ukuepata wa liwekapo oku vumba Yehova?

¹³ Nye tu sukila oku linga cilo, oco ka tu ka hongue konepa yespiritu nda okuti ekamba lietu ale umue ukuepata wa liwekapo oku vumba Yehova? Tu sukila oku amamako oku pamisa ukamba wetu la Yehova. (Tia. 4:8) Ka tu ka eceleli okuti ukamba wetu la Yehova u kunamẽla kekolelo liomanu vakuavo. Ndeci, ndaño okuti olonjanja vialua tua siata oku fendela Yehova kumue lepata lietu kuenda lekongelo, tu sukilavo oku kuata esokiyo lietu muẽle lioku likutilila kuenda oku tanga Embimbiliya.—Osa. 1:2; 62:8.

14. Nye tu lilongisila kulandu wupostolo Petulu? (Yoano 6:​66-68)

¹⁴ Tu pondolavo oku lilongisila kulandu wupostolo Petulu konjila eye a nõlapo eci olondonge vialua via liwekapo oku kuama Yesu. Citava okuti kotembo yaco, upostolo Petulu wa kuatele atatahãi. Pole, limbuka olondaka eye a popia vi sangiwa kelivulu lia Yoano 6:​66-68. (Tanga.) Petulu ka tiamisilile utima kovina omanu vakuavo va kala oku linga, pole, eye wa tiamisila utima kolondaka viocili Yesu o longisa. Onima yeyililako yeyi yokuti eye ka honguele konepa yespiritu ale oku liwekapo oku kuama Yesu. Cimuamue haico okuti, ndaño omanu vakuavo va liwekapo oku vumba Yehova, ivaluka okuti ove o panga onepa kocisoko ca Yehova cina ca ku longisa ocili catiamẽla kokuaye. Omo liaco, amamako oku kakatela kovina viwa wa lilongisa kuenda oku vumba Yehova lekolelo! Manji Samar wa tukuiwa ale wa popia hati: “Olonjanja viosi ndi ivaluka okuti nda manji umue wa linga ocina cimue cĩvi, ka ci lekisa okuti vosi vekongelo va siatavo oku linga ovina viaco ale okuti ovina ocisoko ca Yehova ca siata oku tu longisa viuhembi. Yehova, o Suku yimue ukuavituwa viwa ndaño okuti omanu olonjanja vimue va linga ovina ka via sungulukile.”

15. Nye wa lilongisila kulandu wa manji Emily?

¹⁵ Kũlĩhĩsa ulandu wa manji umue ukãi o tukuiwa Emily. Noke lioku pita lika osemana yimosi tunde eci eye a papatisiwa, ina yaye wa siapo epata kuenda wa tundisiwa vekongelo. Manji Emily wa popia hati: “Lalimue eteke nda sokoluile okuti ina yange wa laikele oku liwekapo oku vumba Yehova. Eci ocitangi cimue ca tĩlapo vali nda liyaka laco toke cilo kuenda ndi kuetele ongeva yalua inayange.” Nye ca kuatisa manji Emily oku liyaka locitangi caco? Eye wa popia hati: “Isiange o ndi sole calua kuenda wa siata oku ndi tata ciwa. Handi vali, vamanji vekongelo va ndi kapakovo calua kuenda va ndi tenda ndepata. Afendeli vosi va Yehova va kasi oku liyaka lovitangi. Eli olio esunga lieci ci kuetele esilivilo oku sola vamanji, kuenda oku lipamisa pokati.” (1 Pet. 5:9) Ove ku sukila oku talamela toke eci ovitangi viya oco o pamise ukamba wove la vamanji. Amamako oku ci linga cilo. Nda wa ci linga, eci o ka liyaka locitangi cimue komuenyo, vamanji va ka ku kuatisa loku ku pamisa.

16. Nye o sukila oku ivaluka? (Talavo ociluvialuvia.)

¹⁶ Ivalukavo okuti Yehova o pindisa vana eye a sole. (Va Hev. 12:6) Eye o yongola okuti vosi vana va tundisiwa vekongelo va tiuka kokuaye. (2 Pet. 3:9) Omo liaco, nda omunu umue ove o sole wa tundisiwa vekongelo, kolela okuti akulu vekongelo va ka linga cosi ci kasi vepondolo liavo, oco vo kuatise oku tumbulula vali ukamba waye la Yehova.—2 Tim. 2:​24, 25.

17. Ekolelo lipi o sukila oku kuata?

¹⁷ Vocipama cilo, tua konomuisa ovitangi vimue tu pondola oku liyaka lavio noke yoku papatisiwa. Ocili okuti vimue pokati kavio vi pondola oku ku saluisa, pole, ku sukila oku kuata usumba. Kuli ovina vialua o pondola oku linga oco o lipongiyile ovitangi viaco. Kuenda ku ka ivaleko okuti, Yehova o ka ku kuatisa oco wamameko oku u vumba lekolelo. Eye wa ku kuatisa ale kuenda o yongola oku ci linga otembo yosi! (1 Pet. 5:10) Yehova olonjanja viosi o ka ku ĩha ongusu kuenda utõi o sukila oco o liyake loloseteko. Omo liaco, nda wamamako oku ecelela okuti Yehova o ku kuatisa, o ka pamisa ukamba wove laye otembo yosi, ndaño ceci o liyaka lovitangi!—Osa. 119:165; Va Rom. 8:​38, 39.