Litumbikila Ocimãho Coku Papatisiwa

1. (a) Tu kuatisiwa ndati poku papatisiwa? (b) Nye tu konomuisa vocipama cilo?

ANGA hẽ wa tumbika ale omuenyo wove ku Yehova loku lekisa elitumbiko liaco pocakati Cepapatiso? Nda oco, eci ci lomboloka okuti ove wa pinga ku Yehova oco a ecele akandu ove loku ecelela okuti ove u vumba kumue lafendeli vaye. (1 Pet. 3:21) Poku ci linga, wa eca ongangu yiwa ku vana ka va papatisiwile handi. Wa nõla onjila yiwa poku tumbika omuenyo wove ku Yehova! Pole, nye ci popiwa nda handi kua papatisiwile? Ocili okuti ove o sole Yehova kuenda o yongola oku linga ocipango caye. Handi vali, ove wa kũlĩhavo okuti, oco akandu ove a eceliwe kuenda oku kuata ukamba wa pama la Yehova, o sukila oku papatisiwa. (Ovil. 2:​38-40) Pole, pamue ka ca lelukile kokuove oku nõlapo oku papatisiwa. Oco hẽ, nye ci pondola oku ku kuatisa? Vocipama cilo, tu konomuisa (1) esunga lieci omanu vamue va kuetele usumba woku papatisiwa, (2) esilivilo lioku kũlĩha okuti esulilo li kasi ocipepi kuenda (3) asumũlũho o ka kuata omo lioku likolisilako oco o papatisiwe lonjanga.

ESUNGA LIECI OMANU VAMUE VA KUETELE USUMBA WOKU PAPATISIWA

2. Momo lie omanu vamue va kuetele usumba woku papatisiwa?

² Omanu vamue ka va yongola oku papatisiwa omo liusumba. Ndeci, ndaño okuti va kuete onjongole yoku vumba Yehova, ovo va kuete usumba wokuti lalimue eteke va ko sanjuisa. Nda wa siata oku liyeva ndoco, tanga Ovisonehua vi pondola oku ku kuatisa oku limbuka okuti Yehova ka lavoka okuti ove o li pua, pole, eye o sanjuka calua eci o likolisilako oku linga ovina o tẽla kupange waye. (Osa. 103:​13, 14; Va Kol. 3:23) Nda okuti ove o kuete usumba woku lambalaliwa, pinga ku Yehova oco a ku ĩhe utõi ndowu wukualosamo wa popia hati: “Yehova o kasi konele yange; si ka kuata usumba. Omunu hẽ o ndinga nye?”—Osa. 118:6.

3. Ocina cipi cikuavo ci pondola oku tateka omanu vamue oku papatisiwa? (Talavo ociluvialuvia .)

³ Omanu vamue ndaño va sole Yehova, ka va yongola oku papatisiwa momo va sima okuti, ka va kuete ukũlĩhĩso walua watiamẽla Kembimbiliya kuenda ku Yehova. Pole, anga hẽ oco o papatisiwe o sukila oku kũlĩha ovina viosi viatiamẽla Kembimbiliya? Ocili okuti sio! Kũlĩhĩsa ulandu umue Wembimbiliya watiamẽla kulume umue ukuakayike kumue lepata liaye. Eteke limue luteke, Yehova wa koka ocilemawe cimue oco a yovole Paulu la Sila vokayike kuenje ovo va kuata epuluvi lioku kundila ukuakayike kumue lepata liaye. Citava okuti ulume waco kumue lepata liaye, va kuata elomboloko liokuti Suku eye wa koka ocikomo caco oco a yovole afendeli vaye vokayike. Handi vali vuteke waco, ovo va lilongisa ovina vimue vi kuete esilivilo viatiamẽla ku Yehova kuenda ku Yesu. Ovina ovo va lilongisa vuteke waco, via va vetiya oku nõlapo oku “papatisiwa lonjanga.” (Ovil. 16:​25-33) Nda okuti wa kũlĩha Yehova, u sole lutima wove wosi, wa kũlĩha alongiso atete Embimbiliya, wa likekembela akandu ove kuenda wa likapelako oku amamako oku ambata omuenyo umue u likuata lolonumbi viaye, ove o pondola oku papatisiwa.—Mar. 12:30.

4. Esunga lipi likuavo lia siata oku tateka omanu vamue oku papatisiwa? (Talavo ociluvialuvia.)

⁴ Omanu vamue va yongola oku linga apongoloko a sukiliwa komuenyo oco va sanjuise Yehova kuenda oku papatisiwa, pole, va sima okuti ka va tẽla oku ci linga. Ocili okuti ci kuete esilivilo oku sokolola lutate ndomo omuenyo wetu u ka kala omo lionjila yimue tu nõla. (Luka 14:​27-30) Vakuavo, va sokolola calua kovina va sukila oku siapo oco va vumbe Suku. Eci oco ca lipita la manji umue ukãi o tukuiwa Candace okuti, wa kulila vepata limue Liolombangi Via Yehova. Eci eye a kala omõla wa lilongisa ovina omunu a sukila oku linga oco a sanjuise Yehova, pole, lalimue eteke a kapeleko ovina viaco. Noke, eci eye a kula wa fetika vali oku lilongisa Embimbiliya. Manji Candace wa popia hati: “Nda kũlĩhĩle ovina nda sukilile oku linga oco ndi sanjuise Yehova, pole, nda solaile ovina nda kala oku linga voluali, ndaño nda kũlĩhĩle okuti ovina viaco ka vi u sanjuisa. Nda kũlĩhĩlevo okuti ka ca ponduile oku leluka kokuange oku linga apongoloko komuenyo.” Handi vali, vakuavo va sakalala calua momo va sima okuti, ka va ka tẽla oku kapako olonumbi Yehova a lavoka kokuavo noke yoku papatisiwa. Ovo va kuete usumba wokuti noke yoku papatisiwa, va ka linga ekandu limue linene kuenje va tundisiwa vekongelo. Nda okuti vimue pokati kovina viaco vi kasivo oku ku tateka oku papatisiwa, nye o sukila oku linga?

5. Kovina vipi tu sukila oku sokolola nda okuti tu kuete usumba woku papatisiwa? (Mateo 13:​44-46)

⁵ Nda okuti tu yongola oku landa ocikuata cimue, ka tu tiamisila lika utima kondando yaco, pole, tu sokololavo ndomo ocikuata caco ci ka tu kuatisa. Ndaño okuti ocikuata caco ca tĩla calua, citava okuti tu ci landa momo tua kũlĩha okuti oco ci ka tu kuatisa. Cimuamue haico okuti, eci tu nõlapo oku papatisiwa, ka tu sokolola lika kapongoloko ka a lelukile tu sukila oku linga. Pole, tu sokololavo ndomo omuenyo wetu u ka kala ciwa omo liukamba uwa tu ka kuata la Yehova. Yesu wa ta alusapo avali oco a longise etosi liaco. (Tanga Mateo 13:​44-46.) Valusapo aco, eye wa lombolola eci catiamẽla kulume umue wa landisa ovina viosi a kuatele, oco a lande ocina cimue ca kuatele esilivilo lialua. Ove wa sangavo ocina cimue ci kuete esilivilo lialua okuti, ocili catiamẽla Kusoma wa Suku. Nda okuti o kuete usumba woku linga apongoloko a sukiliwa oco o papatisiwe, sokolola lutate kalusapo a Yesu. Ove o pondola oku lipula ndoco: ‘Nda kolela hẽ okuti olondaka viwa Viusoma vi kuete esilivilo lialua kokuange? Anga hẽ nda kapako ukamba ndi kuete la Yehova, elavoko lioku kuata omuenyo ko pui kuenda epata liavamanji vakuacisola eye a nyĩha?’ Atambululo ove kapulilo a-a, a pondola oku ku kuatisa oku limbuka nda o sukila oku nõlapo oku papatisiwa ale sio.

6. Nye ci ka tu kuatisa oku kapako ovina tu kasi oku lilongisa?

⁶ Yesu kolusapo a ta luatiamẽla kukuakulima, wa lombolola eci catiamẽla komanu vana va yevelela olondaka viwa, pole, ka va kapiko ovina va lilongisa. Pole, Yesu wa lombololavo okuti omanu vamue va laikele oku yevelela olondaka viwa Viusoma loku kapako ovina va lilongisa. (Luka 8:​5-15) Omo liaco, nda okuti wa sakalala omo kua kũlĩhĩle nda eteke limue o ka kapako ovina o kasi oku lilongisa, ku ka liwekepo. Lekuatiso lia Yehova, o pondola oku kuata onjongole yoku pokola kokuaye. Likutilila ku Yehova oco a ku kuatise oku sola ovina o kasi oku lilongisa kuenda oku vi kapako komuenyo wove.—Esek. 18:31; 36:26.

7-8. Nye ca siata oku tateka amalẽhe vamue oku papatisiwa? (Talavo ociluvialuvia.)

⁷ Amalẽhe vamue va sole Yehova, ka va lingi apongoloko a sukiliwa omo lioku yapuisiwa lomanu vakuavo. Ndeci, alongisi vamue kosikola, va siata oku vetiya olondonge oku lekisa ovituwa vimue vi molẽha ndu okuti viwa, pole, kovaso a Yehova ka via sungulukile. Pole, ka ca sungulukile oku tava kevetiyo liaco momo ci pondola oku ku kokela ovitangi vialua komuenyo wove. (Osa. 1:​1, 2; Olosap. 7:​1-5) Ove o pondola oku yuvula oku kupukila keyonjo liaco, poku kuama ongangu yukualosamo wa sapuila Yehova hati: “Ñuete olondunge vialua okuti alongisi vange vosi ci sule, momo ndi sokolola olonumbi viove.”—Osa. 119:99.

⁸ Ovolandu a lekisa okuti olonjali vimue Olombangi Via Yehova, va siata oku koka okuti ka ci leluka komãla vavo oku nõlapo oku papatisiwa. Momo olonjali viaco, vi tiamisila calua utima kepindiso omãla vavo va pondola oku tambula kuenda oku kuata upange umue uwa. Ale pamue va ivalako oku vetiya omãla vavo oku litumbikila ovimãho vi va kuatisa oku kuata ukamba uwa la Yehova. Ove hẽ o sima okuti olonjali viove vi pondola oku ku kuatisa oku litumbikila ocimãho coku papatisiwa? Nda oco, momo lie ku sapela lavo catiamẽla kondaka yaco? Kũlĩha okuti anyamo o kuete, ka a ku tateka oku kuata ukamba uwa la Yehova.—Olosap. 20:11.

9. Momo lie omanu vamue va siata oku talamẽla otembo yalua oco va papatisiwe?

⁹ Omanu vamue okuti va pondola ale oku papatisiwa, ka va ci lingi omo lioku yapuisiwa lomanu vakuavo ale va talamẽla omunu ukuavo oco va ka papatisiwe keteke limuamue. Ndeci, ovo pamue va talamẽla eteke limue oco va papatisiwe kumosi lekamba limue ale la umue ukuepata. Ocili okuti, ove o pondola oku papatisiwa veteke limuamue lomunu umue o sole. Pole, anga hẽ ocisimĩlo caco ci sukila oku ku tateka oku papatisiwa cilo? Ivaluka okuti, elitumbiko liove ku Suku, ohuminyo yimue yo pokolika okuti ka mu kongela omunu ukuavo. Ovina omanu vakuavo va linga, ka vi sukila oku ku tateka oku papatisiwa cilo.—Va Rom. 14:12.

IVALUKA OKUTI ESULILO LI KASI OCIPEPI

10. Momo lie omanu vamue ka va lingi apongoloko a sukiliwa oco va papatisiwe?

¹⁰ Omanu vamue, pamue ka va lingi apongoloko a sukiliwa oco va papatisiwe, momo va sima okuti handi kua kamba otembo yalua oco esulilo liye. Anga hẽ, ca sunguluka oku sima ndoco? Yesu wa lungula olondonge viaye hati: “Lenevo lipongiyi, momo owola ka wa lavokaili, oyo Mõlomunu eya.”—Luka 12:40.

11. Osimbu tu amamako oku kũlĩha Yehova, nye tu vetiyiwa oku linga kuenda momo lie? (Osamo 119:60)

¹¹ Elitumbiko lietu ku Yehova, li sukila oku vetiyiwa locisola. Osimbu tu amamako oku kũlĩha Yehova, tu ka limbuka okuti eye o tu sole calua kuenda wa tu ĩha ovihandeleko viaye oco vi tu kuatise. (Tanga Osamo 119:60.) Ndonge Tiago wa tukula ocina cikuavo ci kuete esilivilo, ci pondola oku tu kuatisa oku pokola lutima wosi kovihandeleko via Yehova. Eye hati: Lomue pokati ketu wa kũlĩha eci ci ka lipita hẽla. Pamue ka tu kuata vali eteke likuavo “lioku linga eci sanguluka.” Omo liaco, yilo oyo otembo yoku linga ovina viosi vi sanjuisa Yehova.—Tia. 4:​13-17.

12. Nye tu lilongisila kolusapo Yesu a ta luatiamẽla kocumbo cayuva?

¹² Sokolola kolusapo Yesu a ta luatiamẽla kocumbo cayuva. Eye wa lombolola okuti vamue va laikele oku talavaya lika owola yimosi, pole, va laikele oku tambula ofeto yimuamue la vana va talavaya eteke liosi. Pole, momo lie olonalavayi vina via talavaya lika owola yimosi ka via fetikilile selo? Ovo va popia hati: “Momo lomue wa tu laleka.” Ocili okuti, olonavayi viaco, ka via setekele oku liwekapo oku talavaya vokuenda kueteke liosi, pole, ocili ceci okuti, lomue wa va laleka oco va talavaye. Kuenje eci va lalekiwa, haico va fetika oku talavaya. (Mat. 20:​1-16) Koloneke vilo, Yesu wa tu lalekavo oco tu linge olondonge viaye kuenda oku kunda olondaka viwa Viusoma. Omo liaco, noke yoku yevelela elaleko liaco, tu sukila oku tava loku linga eci eye a tu pinga.

13. Nye tu lilongisila kulandu wukãi wa Lote?

¹³ Citava okuti omanu vamue ka va yongola oku linga apongoloko komuenyo oco va vumbe Yehova, momo va sima okuti va ka tẽla oku linga apongoloko aco, eci ku ka kamba otembo yimue yitito oco esulilo liye. Pole, osimbu amamako oku talamẽla, ka ci ka leluka kokuove oku linga apongoloko komuenyo oco o vumbe Yehova. Yesu wa kũlĩhĩle ciwa ohele yaco kuenje wa lungula olondonge viaye hati: “Ivaluki ukãi wa Lote.” (Luka 17:​31-35) Ukãi wa Lote wa kũlĩhĩle okuti, kua kambele lika otembo yimue yitito oco Yehova a kundule o Sodoma kuenda o Gomora, pole, eye ka yonguile oku siapo ovokuasi a kuatele. (Efet. 19:​23-26) Ulandu waco u tu ivaluisa okuti, Yehova wa sokiya ale otembo yimue oco omanu va linge apongoloko a sukiliwa komuenyo loku u vumba. Eci otembo yaco yi ka sulila, omanu ka va ka kuata vali epuluvi liaco.—Luka 13:​24, 25.

14. Momo lie ci kuetele esilivilo oku limbuka oku tẽlisiwa kuovitumasuku Viembimbiliya viatiamẽla kesulilo lioluali lulo?

¹⁴ Ovina vi kasi oku lipita voluali koloneke vilo, vi situlula ciwa okuti ovitumasuku Viembimbiliya viatiamẽla kesulilo lioluali lulo, vi kasi oku tẽlisiwa. Ndaño okuti ovitumasuku vimue ka vi kasi oku tẽlisiwa kocitumãlo o sangiwa, oku mola ndomo ovio vi kasi oku tẽlisiwa kovitumãlo vikuavo, ci pondola oku ku vetiya oku linga apongoloko a sukiliwa oco o papatisiwe lonjanga. Kũlĩhĩsa eci upostolo Petulu a sapuila Kakristão vokocita catete. Eye wa va vetiya hati: “Esulilo liovina viosi li kasi ocipepi. Omo liaco, kuati olondunge kuenda lavululi lolohutililo.” (1 Pet. 4:7) Vocinimbu eci ondaka yokuti, “esulilo,” citava okuti ya kala oku tiamisiwila kotembo eci o Yerusãlai kuenda Onembele ya laikele oku kunduiwa. Petulu wa va vetiyavo oku kala ocipãla lo Yerusalãi, oco ka va ka kunduiwe kumue lolupale luaco. (1 Pet. 1:1) Omo liaco, Akristão vaco poku mola oku tẽlisiwa kuocitumasuku caco, ca ponduile oku pamisa ekolelo liavo kolohuminyo vikuavo via Yehova. Cimuamue haico okuti, ci kuete esilivilo oku limbuka ovitumasuku vi kasi oku tẽlisiwa koloneke vilo. Momo, eci tu limbuka okuti esulilo lioluali lulo li kasi ocipepi, ci ka tu vetiya oku linga apongoloko a sukiliwa oco tu papatisiwe.

15. Tu likapelako ndati oku iya kueteke lia Yehova? (2 Petulu 3:​10-13)

¹⁵ Upostolo Petulu vukanda waye wavali a vetiyiwa oku soneha, wa lombolola ndomo tu pondola oku lavoka “eteke lia Yehova” okuti, esulilo lioluali lulo. Kotembo eci Petulu a soneha ukanda waco, handi kua kambele anyamo alua oco Akristão vaco va mole oku tukuluka kueteke lia Yehova. Pole, eye wa va vetiya oco va ‘ivaluke olonjanja viosi’ ale “oku livela calua” eteke liaco. (Tanga 2 Petulu 3:​10-13; etosi.) Oco tu sokolole olonjanja viosi eteke lia Yehova, tu sukila oku kolela okuti olio ndopo li keya muẽle. Kuenje tu likolisilako oku linga cosi tu tẽla loku likapelako eteke liaco, poku “lekisa ovilinga vioku sumbila Suku.” Eci ove o linga ovina vi sanjuisa Yehova, eye o sanjuka calua! Handi vali, esanju liaye li ka livokiya vali calua eci a ka mola ove oku litumbika kokuaye loku papatisiwa.

ASUMŨLŨHO O KA TAMBULA POKU PAPATISIWA CILO

16. Epuluvi lipi lia suapo o sukila oku eca ananga a sukiliwa oco o papatisiwe? (2 Va Korindo 6:​1, 2) (Talavo oviluvialuvia.)

¹⁶ Lilo, olio epuluvi lioku likolisilako kuenda oku eca ananga a sukiliwa oco o papatisiwe. (Tanga 2 Va Korindo 6:​1, 2.) Ulume umue u enuku wo ko Etiopia, una Filipu a kũlĩha, wa limbukile okuti wa sukilile oku papatisiwa lonjanga. Noke lioku lilongisa ovina viatiamẽla kolondaka viwa kuenda oku mola ocitumãlo cimue a ponduile oku papatisiwa, eye ka popele ndoco: ‘Handi ndi lilongisa vali ovina vikuavo viatiamẽla kolondaka viwa. Tu ka sanga ale olui lukuavo kovaso.’ Pole, eye wa pulisa Filipu hati: “Nye ci nateka oku papatisiwa?” (Ovil. 8:​26, 27, 35-39) Eyi ongangu yimue yiwa! Enuku noke yoku papatisiwa, “wa enda lonjila yaye lesanju.”

17. Ekolelo lipi o sukila oku kuata?

¹⁷ Nda okuti o kuete usumba woku papatisiwa, kolela okuti Yehova o yongola oku ku kuatisa oco o kuate ukamba uwa laye. (Va Rom. 2:4) Yehova o pondola oku ku kuatisa oku yula usumba, asakalalo ove ale ovina vikuavo vi kasi oku ku tateka oku nõlapo oku papatisiwa. Noke lioku papatisiwa, ove o ka yeva esanju lialua kuenda o ka limbuka okuti, ‘ovina wa sia konyima’ ka vi kuete vali esilivilo kokuove. (Va Fil. 3:​8, 13) Kuenje, o ka lavoka “ovina vio kovaso” okuti, oku tẽlisiwa kuolohuminyo Yehova a linga komanu vana va litumbika kokuaye haivo va papatisiwa.—Ovil. 3:19.