Omãla “Ocipiñalo Cimue ci Tunda ku Yehova”

NYE o sokolola eci o yeva ondaka “ocipiñalo?” Citava okuti o sokolola kolombongo, epia, onjo ale ocina cimue ci kuete esilivilo wa piñala komunu umue ukuepata. Eci ci lekisa okuti ocipiñalo, ocina cimue ci kuete esilivilo lialua kuenda ove o yongola oku ci tata ciwa.

Embimbiliya li popia okuti, “omãla ocipiñalo cimue ci tunda ku Yehova.” (Osa. 127:⁠3) Ocili okuti, olonjali vina vi sole Yehova, vi tenda omãla vavo ndombanjaile yimue yi kuete esilivilo lialua va tambula ku Isiavo wo kilu. Omo liaco, ovo va likolisilako oco omãla vavo va liyeve okuti va kolapo kuenda va tatiwa ciwa konepa yespiritu, yoketimba loku va kuatisa oku kuata esanju.

Ci sumuisa calua oku kũlĩha okuti, olonjali vimue ka vi tendi omãla vavo ndombanjaile ya tunda ku Suku. (Isa. 49:15; 2 Tim. 3:​1-3) Vakuavo, va yongola oku tata ciwa omãla vavo, pole, ka ca lelukile kokuavo oku ci linga, omo liovitangi vialua va kasi oku liyaka lavio. Ovitangi vipi olonjali vimue vi kasi oku liyaka lavio? Nye Yehova a lavoka kolonjali? Olonjali vi pondola oku tata ndati omãla vavo loku va kuatisa oku kuata omuenyo umue wesanju?

Ovitangi

•  Oku vetiyiwa lavakuepata kuenda lomanu vakuavo. Kolonepa vimue violuali, olonjali vina vi kuete omãla valua, va sumbiwa calua lavakuepata kuenda lomanu vakuavo. Omo liaco, olohueli via siata oku vetiyiwa lavakuepata ale lomanu vana va lisungue lavo oco va kuate omãla valua, ndaño okuti ka va kuete epondolo lioku va tata.

•  Esakalalo liovina vi ka pita kovaso yoloneke. Kovitumãlo vimue, omãla valua va siata oku fa omo liekambo liokulia, ovovei kuenda omo okuti olosipitali ka vi kuete ovihemba. Eli olio esunga lieci okuti, olohueli vimue, vi nõlapo oku kuata omãla valua oco okuti ndaño vamue va fa, vakuavo va amamako lomuenyo. Handi vali vikuavo, vi nõlapo oku kuata omãla valua oco okuti eci va kuka, va tatiwa lomãla vaco. Eci ca siata oku lipita calua kolofeka vina okuti ombiali ka yeci ekuatiso komanu vana va kuka.

•  Esokiyo lioku yuvula oku mina. Kovitumãlo vimue, olohueli ka vi kuete ndomo vi landa ovihemba vi kuatisa oku yuvula oku mina. Vikuavo ca leluka oku landa ovihemba viaco, pole, vi kuete usumba wokuti pamue ovihemba viaco vi va kokela uvei umue omo okuti ovio ka via lisokele lovihemba viokolofeka vikuavo. Handi vali, ­olohueli vimue ka vi kuete epondolo lioku landa ovihemba viaco omo okuti via tĩla calua.a

NYE YEHOVA A LAVOKA KOLONJALI?

Oku eca komãla ovina va sukila. Yehova wa eca kolonjali ocikele coku eca komãla vavo okulia, uwalo kuenda ocitumãlo cimue coku kala toke eci va linga akulu. Yehova o lavokavo okuti olonjali vi pindisa omãla vavo. Omo liaco, olonjali Akristão ka va tumi omãla vavo oco va ka tangele ocipãla okuti ka va kala lavo konjo. Pole, vi likolisilako okuti omãla vavo va kala konjo toke eci va kula, loku va kuatisa oku lilongisa ovoloño ana a ka va kuatisa komuenyo. Handi vali, olonjali via siatavo oku likolisilako oku pita otembo lomãla vavo oco ovo va liyeve okuti va kolapo kuenda va soliwe. Pole, Yehova o lekisa esunguluko, eye ka lavoka okuti olonjali vi kala olohuasi. Toke muẽle Yehova wa nõla ohueli yimue ya kala ohukũi haevo olonalavayi viwa, oco va tate omõlaye o soliwe.​—⁠Mat. 13:​55, 56; Luka 2:⁠24.

Onumbi Yembimbiliya: “Ocili okuti, nda umue ka eci ku vana vatiamẽla kokuaye ovina va sukila, ca piãla enene ku vakuepata liaye muẽle, o likala ekolelo kuenda omunu una ka kuete ekolelo wo velapo.”​—⁠1 Tim. 5:⁠8.

Yehova wa kũlĩha okuti pamue olonjali osimbu va kuka, vi ka sukila ekuatiso. Ocili okuti, onjila yimue omãla va pondola oku lekisa esumbilo kolonjali viavo, oku eca ekuatiso kokuavo eci va kuka. (Etu. 20:12; 1 Tim. 5:⁠4) Pole, Yehova o sanjuka calua eci olonjali vi sokolola tete ndomo va pondola oku tata omãla vavo, okuti ka va tiamisila utima kekuatiso va pondola oku tambula kokuavo.​—⁠2 Va Kor. 12:⁠14.

Oku longisa omãla ovina viatiamẽla ku Yehova. Olonjali Akristão, vi kuetevo ocikele coku kuatisa omãla vavo oku sola Yehova kuenda oku u vumba. Kokuaye eci oco ocina ca velapo olonjali vi sukila oku linga.​—⁠Esin. 6:​6, 7.

Onumbi Yembimbiliya: “Tati [omãla vene] poku va lungula loku va pindisa ndomo ci likuata leci Yehova a popia.”​—⁠Va Efe. 6:⁠4.

YEHOVA O YONGOLA OKU KU KUATISA OKU TATA OMÃLA VOVE OCO VA KUATE ESANJU

Sokololi lutate etendelo liomãla vu ka kuata. Nda vu kasi oku sokiya oku cita omãla, sokololi lutate kekalo liomuenyo wene. Ndeci, anga hẽ vu ka kuata olombongo vi tẽla oco vu landi okulia, uwalo kuenda oku pindisa omãla valua? Nda okuti ku kuete epondolo liaco, sapela lohueli yove catiamẽla ketendelo liomãla vu ka kuata, oco vu tati omãla vaco ndomo Yehova a yongola. Ocili okuti Yehova wa kũlĩha okuti halonjanja viosiko ovina vi tunda ndomo tua sokiya. (Uku. 9:11) Pole, eye o ka sumũlũisa alikolisilo osi vu ka linga oco vu tati ciwa omãla vene.

Olonumbi Viembimbiliya: “Asokiyo omunu ukuambili, a nena muẽle onima yiwa, pole, vosi vakuanjanga va ka kala olohukũi.”​—⁠Olosap. 21:⁠5.

“Helie pokati kene okuti, o yongola oku tunga osapalalo yimue ka tumãla tete oku kũlĩhĩsa epese liaco, nda o kuete eci ci tẽla coku yi malusula?”​—⁠Luka 14:⁠28.

Pitisa kovaso efendelo lia Yehova vepata liove. Efendelo lia Yehova li sukila oku kala ocina ca velapo vepata liove. Nda ove o kuete ale omãla, sanda otembo yoku va kuatisa oku sola Yehova. Va kuatisavo oku yevelela lutate kolohongele kuenda oku kapako ovina va lilongisa. Lingi efendelo liepata olosemana viosi. Pindisi omãla vene kupange woku kunda. Ku ka ece ocikele cove conjali komõla umue ukulu ale komunu ukuavo ukuepata. Oku kuatisa omãla oku sola Yehova, ci sukila otembo kuenda alikolisilo, pole, nda wa ci lingi, vu ka kuata esanju poku mola omãla vene oku vumba Yehova.

Onumbi Yembimbiliya: “Eci ndi yeva okuti omãla vange va kasi oku endela vocili, ci ndi sanjuisa calua.”​—⁠3 Yoa. 4.b

Kolela ku Yehova. Nda vu kasi oku sokiya oku cita omãla ale vu kuete ale omãla, koleli okuti oku linga ovina Yehova a lavoka kokuene, oco ocina ca velapo okuti oku kuama ovituwa kuenda oviholo viopocitumãlo vu kasi ci sule.

Nda wa nõlipo oku kuata etendelo litito liomãla, koleli okuti Yehova o kamamako oku vu kuatisi eci vu kuka. Yuvuli ocisimĩlo cokuti omãla vene “ovo va ka ku tati eci vu ka kuka.” Ka vu sukila oku sakalala okuti lomue o ka vu tati. Yehova wa likuminya oku vu tati kuenje eye olonjanja viosi o tẽlisa olohuminyo viaye.​—⁠Yeh. 23:⁠14.

Olonumbi Viembimbiliya: “Kolela Yehova lutima wove wosi, kuenda ku ka kolele kelomboloko liove muẽle. U kapako kolonjila viove viosi, kuenje eye o ka suñamisa olonjila viove.”​—⁠Olosap. 3:​5, 6.

“Nda kala umalẽhe kuenje cilo nda kuka, pole, sia la mola ukuesunga okuti wa yandulukiwa, ndaño omãla vaye oku sanda okulia.”​—⁠Osa. 37:⁠25.

“Amamiko oku sandiliya tete Usoma lesunga Liaye kuenje ovina evi viosi vikuavo viu vokiyiwi.”​—⁠Mat. 6:⁠33.

Omãla ombanjaile yimue yiwa Yehova a eca kolonjali. Omo liaco, Yehova o sanjuka calua eci a mola okuti olonjali vi kasi oku tẽlisa ciwa ocikele cavo coku tata omãla vavo! Ci kuete esilivilo okuti olonjali vi kuama olonumbi via Yehova okuti ovituwa viopocitumãlo havioko. Eli olio esunga lieci okuti olonjali, vi sukila oku sokolola lutate etendelo liomãla va ka kuata. Kuenje, ovo va ka tẽla oku eca komãla vavo ovina viosi va sukila, ci kaile ketimba, kovisimĩlo kuenda konepa yespiritu. Poku ci linga, olonjali vi lekisa okuti vi sole calua omãla vavo kuenda kokuavo, omãla “ocipiñalo cimue ci tunda ku Yehova.”