Vangula Ocili ci Kaile Poku Sapela Ale Kupange Woku Kunda

1. Nye tu sukila oku linga oco tu pange onepa kepata lia Yehova?

ECI tu kũlĩha manji umue, ocina catete tu pula kokuaye ceci: “Wa kũlĩha ndati ocili?” Vamue va tambulula poku popia okuti, “va citiwa ale vocili.” Vakuavo pamue va popia okuti “ka pa pitile otembo yalua tunde eci va lilongisa ocili.” Momo lie tua siatela oku tukula ondaka ocili vapuluvi aco? Momo ocili Condaka ya Suku, ci songuila omuenyo wetu. Kuenda tua kũlĩha okuti tu pondola lika oku panga onepa kepata lia Yehova nda tua sola ocili loku ci kapako komuenyo wetu. Voku ci linga, mua kongela oku vangula ocili kovina viosi tu popia kuenda kovina tu linga.—Osa. 15:​1-3.

2. (a) Nye omanu va kũlĩhĩle catiamẽla ku Yesu? (b) Omanu va enda oku tambulula ndati kesapulo Yesu a enda oku va kundila?

² Yesu olonjanja viosi wa enda oku vangula ocili ndaño okuti, olondaka viaye ka via endaile oku sanjuisa omanu vosi. Toke muẽle ovanyãli vaye va enda oku limbuka okuti eye ukuacili. (Mat. 22:16) Yesu wa sapuila olondonge viaye ndomo omanu va laikele oku liyeva catiamẽla kocili eye a kala oku longisa. Eye wa popia hati: “Ndeya oku nena ukuse pokati kulume la isiaye, omõla ukãi la inaye kuenda ndatembo yukãi, lukãi womõlaye ulume.” (Mat. 10:35) Olondaka evi ka vi lekisa okuti Yesu wa yonguile okuti omanu ka va ka tava kesapulo eye kumue lolondonge viaye va kala oku kunda, pole, eye wa kũlĩhĩle okuti ovina viaco via laikele muẽle oku lipita. (Mat. 23:37) Yesu wa kũlĩhĩlevo okuti omanu va laikele oku tambulula esapulo eye a kala oku kunda volonjila via litepa. Vamue va laikele oku li sola, pole, vakuavo sio.—2 Va Tes. 2:​9-11.

3. Nye tu konomuisa vocipama cilo?

³ Ndeci Yesu a linga, tua siata oku likolisilako oku kala vakuacili kapuluvi osi, ndaño okuti omanu valua ka va ci sole. Handi vali, tua siatavo oku kunda loku longisa ocili Cembimbiliya, ndaño okuti poku ci linga ca siata oku temisa omanu valua. Anga hẽ, eci ci lomboloka okuti ka tu sukila vali oku sokolola epuluvi ale otembo tu vangula ocili? Ocili okuti sio! Vocipama cilo, tete tu ka tambulula epulilo liokuti: Pi tu pondola oku sanga ocili? Noke, tu ka tambulula epulilo liavali liokuti: Momo lie, ndamupi kuenda epuluvi lipi tu sukila oku vangula ocili? Eci ci ka tu kuatisa oku vangula ocili ci kaile poku sapela ale kupange woku kunda.

PI TU PONDOLA OKU SANGA OCILI?

4. Momo lie tu popela okuti Yehova eye Ono yocili?

⁴ Yehova eye Ono yocili. Ovina viosi eye a popia viocili. Ndeci, poku tu sapuila eci catiamẽla kueci ciwa leci cĩvi, eye o vangula ocili. (Osa. 19:9; 119:​142, 151) Ovina viosi eye a likuminya kovaso yoloneke vi ka tẽlisiwa. (Isa. 55:​10, 11) Olonjanja viosi, eye o tẽlisa eci a likuminya. (Ate. 23:19) Omo liaco, Embimbiliya li popia okuti ka citava okuti Yehova o kemba! (Va Hev. 6:18) Eli olio esunga lieci Yehova a kũlĩhĩwa okuti, “Suku yocili.”—Osa. 31:5.

5. Momo lie tu popela okuti ca leluka oku sanga “Suku yocili?” Ci lombolola. (Ovilinga 17:27)

⁵ Omanu vamue va siata oku popia okuti ka ca lelukile oku kũlĩha Yehova “Suku yocili.” Pole, eci haciliko. Ovina viosi via lulikiwa, vi eca uvangi wokuti kuli Suku. (Va Rom. 1:20) Upostolo Paulu eci a kala ko Atenai, poku vangula locimunga cimue comanu va loñolõha, eye wa popia hati, Suku o yongola okuti omanu “vo sanga” kuenda eye “ka kasi ocipãla lomunu lomunu pokati ketu.” (Tanga Ovilinga 17:27.) Ocili okuti Yehova o koka omanu ambombe vana va kasi oku sanda ocili catiamẽla kokuaye.—Yoa. 6:44.

6. (a) Ovina vipi vi sangiwa Vembimbiliya? (b) Momo lie tu sanjukilila oku kũlĩha ovina viaco?

⁶ Onjila yimue yoku kũlĩha Yehova, oku lilongisa Embimbiliya. Momo alume va soneha elivulu liaco, va vetiyiwa lespiritu sandu lia Suku. (2 Pet. 1:​20, 21) Omo liaco, tu pondola oku kolela okuti ovina viosi vi sangiwa Vembimbiliya viocili. Ndeci, tu pondola oku kolela kovina olio li popia viatiamẽla koku lulikiwa kuongongo kuenda kuomuenyo. (Efet. 1:​1, 26) Handi vali, tu pondola oku kolela kovina olio li popia viatiamẽla kesunga lieci vosi yetu tua lingila vakuakandu, tu talela ohali kuenda tu fila. (Va Rom. 5:12; 6:23) Tu pondolavo oku kolela kueci olio li popia okuti, Yehova pocati comõlaye, o ka nyõla ovilinga viosi via kokiwa leliapu, “isia yuhembi.” (Yoa. 8:44; Va Rom. 16:20) Tua kolela kohuminyo Yembimbiliya yokuti Yesu o ka kundula olondingaĩvi, o ka pindula ava va fa kuenda o ka pongolola ongongo oco yi linge oluali luokaliye loku kuatisa omanu oku li pua. (Yoa. 11:​25, 26; 1 Yoa. 3:8) Ocili okuti Yehova wa tu ĩha esumũlũho limue linene! Eye wa tu longisa ocili catiamẽla kokuaye kuenda wa tu ĩhavo epuluvi lioku longisa ocili caco komanu vakuavo.—Mat. 28:​19, 20.

MOMO LIE TU SUKILILA OKU VANGULA OCILI?

7-8. Anga hẽ ovina vi tu vetiya oku vangula ocili vi kuete esilivilo? Tukula ulandu umue. (Marko 3:​11, 12) (Talavo oviluvialuvia.)

⁷ Ndomo tua ci konomuisa, oco tu pange onepa kepata lia Yehova, tu sukila oku vangula ocili. Pole, oco tu sanjuise Yehova, ka tu sukila lika oku vangula ocili. Momo eye o kũlĩhĩsa esunga lieci tu vanguila ocili kuenda ovina vi tu vetiya oku ci linga. Tu konomuisi ulandu umue wa lipita vokuenda kupange wa Yesu woku kunda palo posi. (Tanga Marko 3:​11, 12.) Osimbu Yesu a kala oku kunda ocipepi lokalunga ko Galilea, owiñi walua wa liongoluila ocipepi laye oco vo yevelele. Pokati komanu vaco, pa kala vamue va kuatiwile lolondele okuti va enda oku kekamẽla kovaso a Yesu loku kaluka vati: “Ove Vumõla a Suku.” Momo lie olondele via kalela oku vangula ocili catiamẽla ku Yesu? Citava okuti va yonguile oku koleliwa lomanu kuenda oku va yapuisa oco ka va ka fendele vali Yehova. Ovina olondele via popia viocili, pole, ovio ka via kuatele ovisimĩlo via sunguluka. Yesu wa kũlĩhĩle ciwa ovisimĩlo viavo. Omo liaco, ka solele ovina ovio via popia kuenje wa vi handeleka oco ka vi ka kunde ovina viatiamẽla kokuaye.

⁸ Ulandu waco u tu longisa nye? Yehova wa kapako calua esunga lieci tu vanguila ocili. Omo liaco, ci kuete esilivilo oku longisa omanu ocili catiamẽla ku Yehova omo liocisola tu u kuetele. Kuenda nda omanu va tu sivaya omo liesapulo tu kunda, tu eca esivayo liaco ku Yehova!—Mat. 5:16; sokisa lelivulu Liovilinga 14:​12-15.

9. Tukula ocindekaise cimue ci lekisa esilivilo lioku yuvula oku likemãlisa etu muẽle?

⁹ Tu konomuisi ocindekaise cikuavo lieci tu sukilila oku yuvula oku likemãlisa etu muẽle. Sokolola okuti manji umue o kuete ocikele cimue vocisoko ca Yehova, wa tu sapuila ondaka yimue yoku uhĩla kuenje tu sapuila ondaka yaco komanu vakuavo. Eci omanu va limbuka okuti ovina tua vangula viocili, ovo pamue va komõha loku sima okuti etu tua kũlĩha ovina vialua. Ocili okuti eci ci pondola oku komõhisa omanu, pole, ka ci sanjuisa Yehova. (Olosap. 11:13) Momo lie? Momo, ka tua vanguile lika ondaka yoku uhĩla, pole, tua vangula ocili lovisimĩlo ka via sungulukile.

TU VANGULA NDATI OCILI?

10. Nye ci lomboloka oku vangula olondaka “viumbombe?” (Va Kolosai 4:6)

¹⁰ Tanga Va Kolosai 4:6. Upostolo Paulu wa ivaluisa Akristão va Kolosai okuti olondaka viavo vi sukila oku ‘kala viumbombe.’ Eci ci lomboloka nye? Kelimi lio Helasi ondaka yaco, yi lomboloka okuti ovina tu popia, ka vi sukila lika oku kuatisa omanu vakuavo, pole, vi sukilavo oku kala viumbombe kuenda oku sanjuisa omanu.

11-12. Momo lie tu sukilila oku kuata utate konjila ndomo tu longisa ocili? Tukula ocindekaise cimue. (Talavo oviluvialuvia.)

¹¹ Tu sukila oku kapako elungulo upostolo Paulu a eca, lioku vangula lumbombe eci tu longisa ocili Cembimbiliya komanu vakuavo. Ocili Cembimbiliya, ci sokisiwa losipata yimue ya tua, yi tepisa eci omunu a tuwa kilu leci a tuwa vokati, ale oyo yi pondola oku situlula eci tua tuwa vutima. (Va Hev. 4:12) Pole, nda ka tua kuatele utate poku talavaya Lembimbiliya, tu pondola oku sumuisa omanu kuenda oku koka okuti ovo va lihoyisa letu. Ndamupi?

¹² Sokolola okuti kupange woku kunda, tua sanga omunu umue wa lekisa onjongole, pole, eye wa siata oku likutilila koviñumañuma loku sambiliya ocipito Conatale kuenda co Paskoa kumue lepata liaye. Ocili okuti, vepuluvi liaco etu nda tua talavaya Lembimbiliya oco tu lekise komunu waco okuti, oku likutilila koviñumañuma vina ka vi kuete omuenyo ci lekisa ekambo liolondunge. Handi vali, nda tuo sapuilavo okuti ocipito Conatale kuenda co Paskoa, ka vi likuata leci Embimbiliya li longisa. (Isa. 44:​14-20; 2 Va Kor. 6:​14-17) Ocili okuti nda tua popia ovina viaco vokuenda kuombangulo yatete, nda tua vangula ocili, pole, eci nda ca lekisa okuti ka tu kasi oku talavaya Londaka ya Suku lonjila yimue ya sunguluka.

13. Nye ci lomboloka oku singa olondaka vietu lomongua?

¹³ Upostolo Paulu wa popiavo okuti olondaka vietu vi sukila oku singiwa lomongua. Anga hẽ, eci ci lomboloka okuti tu sukila oku limbika ocili? Sio! Eye wa kala oku popia okuti tu sukila oku ‘singa’ olondaka vietu oco tu longise ocili lonjila yimue yi “sanjuisa” omanu vana va tu yevelela. (Yovi 12:11) Ocili okuti oku ci linga ka ca lelukile. Sokolola okuti tu ka telekela okulia omanu vakuavo. Pamue tu sima okuti okulia tu ka teleka, ku ka va sanjuisa momo tua ku teleka lonjila yimue etu muẽle tu sole. Cimuamue haico okuti, pamue tu pondola oku sima okuti, onjila ndomo tu vangula yi ka sanjuisa omanu vosi. Pole, ocisimĩlo caco ka ca sungulukile. Ndeci, kolofeka vimue, omanu va siata oku situlula ovisimĩlo viavo lonjila yimue okuti ka va sokolola vali, ndaño ceci va kasi oku vangula lomanu vana okuti akulu. Pole, kolofeka vikuavo, onjila yaco yoku vangula ka yi taviwa kuenda ka yi lekisa esumbilo. Upostolo Paulu wa popia okuti tu sukila oku kũlĩha ‘ndomo tu tambulula omunu lomunu.’ Eci ci lekisa okuti, tu sukila oku vangula lonjila yimue yi sanjuisa omanu vana va tu yevelela kuenda ka tu ci lingi oco tu li sanjuise etu muẽle.

EPULUVI LIPI TU SUKILA OKU VANGULA OCILI?

14. Anga hẽ eci Yesu a kala palo posi, wa longisa olondonge viaye ovina viosi a kũlĩhĩle vonjanja yimuamue? Ci lombolola.

¹⁴ Yesu olonjanja viosi wa enda oku lekisa umbombe poku vangula lolondonge viaye kuenda wa vi longisa ovina vialua. (Mar. 6:34) Pole, ovio handi via kuatele ovina vialua vioku lilongisa. Omo liaco, Yesu ka setekele oku vi longisa ovina viosi eye a kũlĩhĩle vonjanja yimuamue. Eye wa kapeleko epondolo liolondonge viaye kuenda wa kũlĩhĩle epuluvi lia suapo oco a vi longise ocili. Handi vali, Yesu wa popia okuti ovio ka via ponduile oku kuata elomboloko liovina viosi. (Yoa. 16:12) Eci ci tu longisa nye?

15. Anga hẽ tu sukila oku sapuila komanu tu longisa Embimbiliya ovina viosi tua kũlĩha vonjanja yimuamue? Ci lombolola. (Olosapo 25:11) (Talavo ociluvialuvia.)

¹⁵ Ongangu ya Yesu yi tu longisa okuti, ndaño tua kũlĩha ocili, ka ci lomboloka okuti tu sukila oku longisa ovina viosi tua kũlĩha vonjanja yimuamue. Tu setukula ndati ongangu yaye? Tu sukila oku kapako ekalo liomanu. Sokolola vali komunu una o sole oku sambiliya ocipito Conatale kuenda co Paskoa kumue lepata liaye. Etu tua kũlĩha ono yovipito viaco kuenda tua kũlĩhavo okuti ovio ka vi taviwa la Suku. Pole, sokolola okuti wa fetika oku longisa Embimbiliya komunu waco osimbu kua kambele osemana yimosi ale vivali oco ku lingiwe ocipito Conatale. Nda vepuluvi liaco wa lomboluile ale eci Embimbiliya li popia catiamẽla kovipito viaco, loku u sapuila okuti ka citava oku sambiliya ocipito Conatale, eci nda ca lekisa hẽ okuti o kasi oku vangula lonjila yimue yi sanjuisa? Ocili okuti omanu vamue tu longisa Embimbiliya, va siata oku kapako lonjanga ovina va kasi oku lilongisa. Pole, vakuavo vambata otembo yalua oco va kapeko ovina va kasi oku lilongisa. Omo liaco, oco tu kuatise omanu vana tu longisa Embimbiliya oku kapako ovina va kasi oku lilongisa, tu sukila oku va sapuila ovina va sukila oku kũlĩha vepuluvi lia suapo ale ceci ovo va kuata epondolo lioku kuata elomboloko liovina viosi.—Tanga Olosapo 25:11.

16. Tu kuatisa ndati vana tu longisa Embimbiliya oku ‘amamako oku endela vocili?’

¹⁶ Ka kuli ocina cikuavo ci tu ĩha esanju lialua okuti, oku kuatisa omanu oku lilongisa ocili catiamẽla ku Yehova ci sule. Pole, oco tu va kuatise oku ‘amamako oku endela vocili,’ tu sukila oku eca ongangu yiwa kokuavo. (3 Yoa. 3, 4) Tu sukila oku lekisa konjila ndomo tu ambata omuenyo wetu okuti, tua kolela kolohuminyo vi sangiwa Vondaka ya Suku. Handi vali, tu sukila oku vangula ocili lovisimĩlo via sunguluka, lonjila yimue yi sanjuisa kuenda lolondaka viumbombe oco tu longise ocili komanu vepuluvi lia suapo. Kuenda tu sukilavo oku eca esivayo ku Yehova omo liepandiyo liosi tu tambula. Nda tua ci linga, tu ka lekisa okuti tu vumba Yehova, Suku yocili.