Sokolola Kovolandu Embimbiliya

Vembimbiliya, tu sangamo ovolandu alua osimbu a tu longisa ovina vialua vi kuete esilivilo. Oku sokolola lutate kovolandu aco, ci tu kuatisa oku kuata elomboloko lia suapo liovina tu tanga kuenda oku kuatisiwa lavio. Kũlĩhĩsa atosi amue a pondola oku ku kuatisa osimbu o tanga ovolandu Embimbiliya.

• Tanga lolukandi. Oku tanga Embimbiliya lolukandi, ci pondola oku ku kuatisa oku sokolola ciwa kulandu o kasi oku tanga. Poku tanga Embimbiliya lepata liove o pondola oku pinga oco omunu lomunu a tange olondaka via popiwa la umue wa tukuiwa Vembimbiliya.

• Sokolola kulandu o kasi oku tanga. Seteka oku sokolola kueci omanu va tukuiwa kulandu waco va kala oku sokolola kuenda ndomo va kala oku liyeva. Ndeci, lipula ndoco: ‘Momo lie omunu waco a popela ale a lingila ovina viaco? Nda ca kaile ame, nye nda nda linga? Kuenda nda nda liyeva ndati?

• Soneha Oviluvialuvia. Oku soneha oviluvialuvia vimue, ci pondola oku ku kuatisa oku sokolola lonjila yiwa ovolandu Embimbiliya kuenda oku yuvula oku ivalako ovina wa tanga, ndaño okuti kua loñolõhele koku soneha oviluvialuvia.