‘ Amamako Lomunga Yespiritu’
UPOSTOLO Paulu wa vetiya Akristão vo ko Efeso oco va amameko oku ‘pandikisa omunu lukuavo locisola, oku kuata ombembua omunu lukuavo, oku likolisilako oku amamako lomunga yavo, yina va tambula omo liespiritu sandu.’—Va Efe. 4:2, 3.
“Omunga” tu kuete yina tu sole calua, yi tunda kunene ‘wespiritu sandu.’ Eci ci lomboloka okuti, tu kuete lika omunga yaco omo liongusu ya pama ya Suku. Pole, ndomo upostolo Paulu a ci popia, omunga yaco yi sukila oku amamako. Oco hẽ, helie o sukila oku ci linga? Ocili okuti, ukristão lukristão o sukila oku likolisilako oco ‘omunga yespiritu’ yamameko.
Ndocindekaise, sokolola okuti omunu umue wa ku ĩha ocendelo cimue cokaliye. Helie o kuete ocikele coku amamako oku tata ciwa ocendelo caco? Tua kũlĩha etambululo liaco. Nda okuti ove kua tatele ciwa ocendelo caco kuenje olio lia nyõleha, ka citava okuti o vetela evelo omunu wa ku lĩha.
Cimuamue haico okuti, omunga yetu Tuakristão, ombanjaile yimue ya eciwa la Suku, pole, omunu lomunu pokati ketu, o kuete ocikele coku amamako oku teyuila omunga yaco. Omo liaco, nda tua litatamisa lamanji umue, tu sukila oku lipula ndoco: ‘Ñasi hẽ oku likolisiliko oku amamako lomunga yespiritu poku tetulula ocitangi caco?’
‘LIKOLISILIKO OKU AMAMAKO LOMUNGA’
Upostolo Paulu wa popia okuti, tu sukila oku likolisilako oco tu amameko lomunga yespiritu. Ocili okuti ka ca lelukile oku ci linga, ca piãla enene eci manji umue a tu sumuisa. Anga hẽ oku amamako lomunga ci lomboloka okuti olonjanja viosi tu sukila oku enda komunu wa tu sumuisa kuenda oku sapela catiamẽla kocitangi caco? Halonjanja viosiko ci sukiliwa. Omo liaco, lipula ndoco: ‘Anga hẽ oku ci linga ci ka potolola ale ci ka vokiya kocitangi caco?’ Olonjanja vimue onjila yiwa yoku ci linga, oku ivalako ocitangi caco ale oku ecela omunu wa tu sumuisa.—Olosap. 19:11; Mar. 11:25.
Lipula ndoco: ‘Oku ka sapela lomunu wa ndi sumuisa catiamẽla kocitangi caco, ci kuatisa hẽ oku potolola ale ci ka vokiya kocitangi caco?’
Ndomo upostolo Paulu a ci popia, tu yongola oku amamako oku “pandikisa omunu lukuavo locisola.” (Va Efe. 4:2) Elivulu limue li popia okuti ondaka yaco yi pondola oku pongoluiwa ndoco: “oku tava omanu ndomo ovo va tuwa.” Eci ci lomboloka okuti, tu tava okuti ndeci etu, vamanjetu ka va lipuile. Ocili okuti tu kasi oku likolisilako oku ‘wala omunu wokaliye.’ (Va Efe. 4:23, 24) Pole, lomue pokati ketu o tẽla oku ci linga lonjila yimue ya lipua. (Va Rom. 3:23) Oku tava kocili caco, ci ka leluka kokuetu oku pandikisa omunu lukuavo locisola, oku kala vakuakuecela kuenje tu ‘kamamako lomunga yespiritu.’
Eci tu sumuisiwa kuenje tu potolola ocitangi caco ndaño muẽle vutima wetu, tu kamamako oku “kuata ombembua omunu lukuavo.” Kukanda ku va Efeso 4:3 ondaka yo Helasi ya pongoluiwa okuti “ombembua omunu lukuavo,” kukanda ku va Kolosai 2:19 ya pongoluiwa okuti, oku “tokekisua.” Atokekiso, olosinga via pama vi tokeka ekepa limue kekepa likuavo. Cimuamue haico okuti, ombembua kuenda ocisola tu kuetele vamanji, ci ka tu kuatisa oku amamako lomunga ndaño ceci ka tua solele ovina va tu lingila.
Nda manji umue wa ku sumuisa ale wa ku temisa, likolisilako oku kuata elomboloko lieci a ci lingila kuenda lekisa ohenda okuti, ku pisa omunu waco. (Va Kol. 3:12) Omo okuti ka tua lipuile, citava okuti vepuluvi limue ove wa sumuisile ale omunu umue. Oku ivaluka ovina viaco, ci ka ku kuatisa oku likolisilako oku ‘amamako lomunga yespiritu.’