Ekuatiso Kakãi va Siata Oku Tatiwa Lãvi

Evi ovio olondaka vioku fetika vi sangiwa vocipama losapi hati, “Eteyuilo Kakãi—Elavoko Liembimbiliya,” vonumbi yo jw.org. Kesulilo liocipama caco ku molẽha onepa yimue yi ku ecelela oku tapa ocipama caco. O pondola oku upa okopia yimue loku yi muña okuti oyo yi kala ndocicapa cimue camẽla akuãla. Manji umue ukãi o tukuiwa Stacy wo ko Estadus Unidus wa popia hati: “Ame ndopa olokopia vimue viocipama caco. Noke ame kumue lamanji ukuavo ukãi, tuambata olokopia viaco, loku ka vi eca konjo yimue yakãi yi sangiwa vocikanjo co vekongelo lietu.”

Ukãi umue o talavaya konjo yaco, wa pula ku manji nda enda laye nda o pondola oku u sila olokopia vikuavo, oco eye a vi ece komanu va kala konjo yaco. Onima yeyililako yeyi yokuti, kua eciwa eci ci pitahãla 40 kotuicapa tuaco kumue leci ci soka 30 kotuikanda tuonumbi yo jw.org. Keteke likuavo, usongui wonjo yaco wa pinga oco ku lekisiwe kakãi vaco ndomo elilongiso limue Liembimbiliya li lingiwa.

Manji Stacy kumue la vamanji vakuavo vavali akãi, va kuatavo onima yiwa poku eca otuikanda tuaco konjo yikuavo yakãi. Ovo va sia otuikanda tutãlo kuenda omanu va pinga oco va nene vali olokopia vikuavo. Umue pokati kolonalavayi wa popia ndoco: “Okokanda kalo, ka ka kuatisa calua akãi valua va kasi vonjo yilo. Eci oco tua sukilile.” Kepasu likuavo, akãi valua vovonjo yaco va liongolola oco va mole ndomo elilongiso Liembimbiliya li lingiwa kuenje vavali pokati kavo va lekisa onjongole yoku enda kohongele kesulilo liosemana, Konjango Yusoma.

Manji Stacy wa popia hati: “Ca komõhisa calua poku mola esanju omanu va kuata eci va tanga esapulo liaco. Eci omunu opa okopia loku muña okokanda kaco, ci vetiya onjongole yomanu kuenda onjila yimue yiwa yoku sandeka esapulo Liusoma kocimunga caco cakãi va tatiwa lãvi. Ca komõhisavo calua oku mola ndomo omanu vaco va liyeva eci va tambula esapulo liaco. Omo liaco, tu lavoka lesanju oku mola ndomo Yehova a ka sumũlũisa alikolisilo etu, oku amamako oku kuatisa akãi vaco lolondaka viwa.”