Ndomo tu Likutilila ku Yehova Lutima Wosi

1-2. (a) Momo lie pamue ka ca lelukilile oku situlula ku Yehova ovina vi kasi vutima? (b) Tua kũlĩha ndati okuti Yehova o yevelela lutate olohutililo vietu?

ANGA hẽ, o sima okuti wa siata oku pitulula olohutililo viove ale ka ca lelukile kokuove oku situlula ku Yehova ovina vi kasi vutima? Nda oco, haveko lika. Pamue omo liasakalalo eteke leteke, tu kuata ocituwa coku likutilila lonjanga. Ale tu sima okuti ka tu sesamẽla esumũlũho liohutililo kuenje ka tu tẽla oku situluila Yehova ovisimĩlo vietu viondongosi.

² Embimbiliya li tu sapuila okuti poku likutilila, ca velapo ku Yehova oku vangula laye lutima wosi okuti, oku tukula olondaka via posoka hacoko. Eye o “yevelela epingilo liambombe.” (Osa. 10:17) Yehova o yevelela lutate olondaka viosi tu popia momo tu kuete esilivilo kokuaye.—Osa. 139:​1-3.

3. Apulilo api tu konomuisa vocipama cilo?

³ Vocipama cilo, tu konomuisa atambululo kapulilo a kuãimo ndeci: Momo lie tu ponduila oku likutilila ku Yehova lekolelo? Tu pondola oku likutilila ndati ku Yehova lutima wosi? Olohutililo via tukuiwa Vembimbiliya vi tu kuatisa ndati? Nye tu sukila oku linga nda tua sumua calua okuti ka tu tẽla oku situlula ovisimĩlo vietu ku Yehova? Tu konomuisi atambululo kapulilo aco.

LIKUTILILA KU YEHOVA LEKOLELO

4. Nye ci pondola oku tu kuatisa oku likutilila ku Yehova lekolelo? (Osamo 119:145)

⁴ Yehova ekamba limue liocili li tu yonguila ekalo liwa. Oku ci kũlĩha, ci ka tu kuatisa oku lianja poku likutilila kokuaye, loku u situluila ovisimĩlo vietu kuenda onjila ndomo tu liyevite. Eci oco usonehi Wosamo 119 a enda oku linga poku likutilila ku Yehova. Eye wa kuatelevo ovitangi komuenyo waye. Omanu olondingaĩvi va enda oku vangula ovohembi atiamẽla kokuaye. (Osa. 119:​23, 69, 78) Handi vali, eye olonjanja vimue wa enda oku sumua omo liakulueya aye. (Osa. 119:5) Ndaño lovina viaco, eye ka kuatele ohele yoku situluila ku Yehova ovina via kala vutima waye.—Tanga Osamo 119:145.

5. Momo lie tu sukilila oku yuvula okuti ovisimĩlo ka via sungulukile viatiamẽla kokuetu muẽle vi tu tateka oku likutilila? Tukula ocindekaise cimue.

⁵ Yehova o lalekavo vana va linga akandu anene oco va likutilile kokuaye. (Isa. 55:​6, 7) Omo liaco, ka tu ka eceleli okuti ovisimĩlo ka via sungulukile viatiamẽla kokuetu muẽle vi tu tateka oku likutilila. Kũlĩhĩsa ocindekaise ci kuãimo: Sokolola okuti omunu umue wa nyẽlela vusenge kuenje eye o mola omunu umue o pondola oku u lekisa onjila. Anga hẽ eye nda wa kuata osõi yoku kalukila omunu waco oku pinga ekuatiso? Ocili okuti sio! Cimuamue haico okuti, eci tu linga ekandu limue, ka tu sukila oku kuata osõi yoku situluila Yehova ovina vi kasi vutima wetu.—Osa. 119:​25, 176.

OVINA VI TU KUATISA OKU LIKUTILILA KU YEHOVA LUTIMA WOSI

6-7. Nye ci pondola oku tu kuatisa oku likutilila lutima wosi? Tukula ulandu umue. (Talavo etosi pombuelo yemẽla.)

⁶ Eci tu likutilila ku Yehova lutima wosi poku u situluila ovisimĩlo vietu kuenda onjila ndomo tu liyevite, ukamba wetu laye u livokiya. Oco hẽ, ovina vipi vi ka tu kuatisa oku likutilila lutima wosi?

⁷ Sokolola lutate kovituwa via Yehova.a Eci tu sokolola kovituwa vi komõhisa Yehova a kuete, ci ka leluka kokuetu oku u situluila ovisimĩlo vietu kuenda onjila ndomo tu liyevite. (Osa. 145:​8, 9, 18) Kũlĩhĩsa ulandu wa manji umue ukãi o tukuiwa Kristine okuti isiaye wa kala ongangala. Eye wa popia hati: “Ka ca lelukile kokuange oku tenda Yehova nda Isiange kuenda oku likutilila kokuaye. Nda simĩle okuti omo liakulueya ange, Yehova nda wa liwekapo oku lekisa ocisola kokuange.” Ocituwa cipi ca Yehova ca kuatisa manji Kristine? Eye wa lombolola ndoco: “Ocisola ka ci pongoloka ca Yehova, ci ndi kuatisa oku kolela okuti eye o ndi sole. Nda kũlĩha okuti, Yehova olonjanja viosi o ka ndi kuatisa. Ndaño okuti olonjanja vimue ndi ka lueya, Yehova o ka ndi tata locisola kuenda o ka ndi kuatisa. Eci ndi sokolola kocisola ca Yehova, ci leluka kokuange oku u sapuila ovina vi ndi sanjuisa levi vi ndi sakalaisa.”

8-9. Ndomo ca lekisiwa kulandu wa manji Aliska, momo lie ci kuetele esilivilo oku sokolola tete kovina tu ka popia osimbu ka tua likutililile? Tukula ocindekaise cimue.

⁸ Sokolola kovina o ka popia. Osimbu kua likutilile, ove o pondola oku linga apulilo amue kokuove muẽle. Ndeci: ‘Ocitangi cipi ndi kasi oku liyaka laco cilo? Kuli hẽ omunu umue ndi sukila oku ecela? Kuli hẽ cimue ca pongoloka komuenyo wange okuti ndi sukila ekuatiso lia Yehova?’ (2 Olos. 19:​15-19) Handi vali, tu pondolavo oku ivaluka ohutililo Yesu a longisa kuenda oku tukula volohutililo vietu ovina viatiamẽla konduko ya Suku, Usoma Waye kuenda ocipango Caye.—Mat. 6:​9, 10.

⁹ Manji umue ukãi o tukuiwa Aliska, eci a yeva okuti ulume waye o kuete uveyi wo Kanser vowoño kuenda wa laikele oku fa, kefetikilo ka ca lelukile kokuaye oku likutilila ku Yehova. Eye ivaluka hati: “Nda yeva esakalalo lialua okuti poku likutilila, sia tẽlele oku sokolola kovina ndi popia.” Nye ca kuatisa manji Aliska? Eye wamisako hati: “ Osimbu sia fetikile oku likutilila, ndi sanda otembo yoku sokolola kovina ndi pondola oku popia kuenje, eci ci ndi kuatisa oku yuvula oku vangula lika catiamẽla kokuange muẽle kuenda kuvei ulume wange a kuete. Oku ci linga, ci ndi kuatisa oku tula utima kuenje ndi tẽla oku likutilila ku Yehova loku tukula ovina vikuavo.”

10. Momo lie ci kuetele esilivilo oku yuvula onjanga poku likutilila? (Talavo oviluvialuvia.)

¹⁰ Ku ka kuate onjanga. Ocili okuti olohutililo vina vi teta onimbu, vi pondola oku tu kuatisa oku pamisa ukamba wetu la Yehova. Pole, nda okuti ka tu kuata onjanga poku likutilila, citava okuti tu ka tẽla oku situluila Yehova ovisimĩlo vietu kuenda onjila ndomo tu liyevite.b Manji Elijah, ulume wa manji Aliska wa tukuiwa ale, wa popia hati: “Ndi seteka oku likutilila olonjanja vialua veteke kuenje nda okuti si kuata onjanga poku likutilila, ndi liyeva okuti ukamba wange la Yehova u pamisiwa. Yehova o lekisa epandi kuenda ka kevelela oco ndi malusule lonjanga ohutililo yange. Nda kũlĩha okuti, ndi pondola oku vangula ovina viosi ndi yongola.” Omo liaco, seteka ndoco: Sanda elivala limue kuenda ocitumãlo o pondola oku likutilila okuti lomue oku sakalaisa, haico ci ku ecelela oku likutilila lolukandi kuenda ku kuata onjanga poku likutilila.

SOKOLOLA KOLOHUTILILO VIA LINGIWA LUTIMA WOSI VI SANGIWA VEMBIMBILIYA

11. Momo lie ci kuetele esilivilo oku sokolola lutate kolohutililo vi sangiwa Vembimbiliya via lingiwa lutima wosi? (Talavo okakasia losapi hati: “Anga hẽ Ovitangi Viove Via Lisoka Levi Viavo?”)

¹¹ Ocina cimue ci pondola oku tu kuatisa, oku sokolola lutate kolohutililo via lingiwa lutima wosi kuenda ovisungo vi kola ale olosamo vi sangiwa Vembimbiliya. Oku kũlĩhĩsa ndomo afendeli va Suku kosimbu va situlula ovisimĩlo viavo viondongosi, ci ka ku vetiyavo oku situluila ku Yehova ovina vi kasi vutima wetu. Olohutililo viavo, vi pondola oku ku kuatisa oku sanga olondaka viokaliye o pondola oku tukula volohutililo viove. Pamue o ka sanga olohutililo viafendeli va Yehova va liyakavo lovitangi vimuamue ndevi viove.

12. Nye tu sukila oku lipula eci tu sokolola kohutililo yimue yi sangiwa Vembimbiliya?

¹² Eci o tanga ohutililo yimue yi sangiwa Vembimbiliya, lipula ndoco: ‘Helie wa linga ohutililo yaco kuenda ovitangi vipi a kala oku liyaka lavio? Anga hẽ mondola oku sokisa olondaka viaye levi nda nda tukula vohutililo yange? Nye ndi lilongisila kohutililo yaco?’ Pamue o ka sukila oku linga akonomuiso oco o sange atambululo kapulilo aco, pole, o ka kuatisiwa calua lalikolisilo aco. Tu konomuisi ovolandu amue.

13. Nye tu lilongisila kohutililo Hana a linga? (1 Samuele 1:​10, 11) (Talavo koñoño.)

¹³ Tanga 1 Samuele 1:​10, 11. Hana eci a linga ohutililo yaco, wa kala oku liyaka lovitangi vivali vinene. Eye wa kala osiũle kuenda sepakãi yaye wa enda oku u sanumula calua. (1 Sam. 1:​4-7) Pole, Hana wa yeva ekavuluko eci a likutilila ku Yehova okuti, ka kuatele onjanga yoku situlula ovina via kala vutima waye. (1 Sam. 1:​12, 18) Nda ove o kasi oku liyaka locitangi cimue ci ku sakalaisa calua, nye o pondola oku lilongisila kohutililo ya Hana? Eci tu “imba ocilemo [cetu] ku Yehova” loku situluila kokuaye ovitangi vietu viosi kuenda ndomo tu liyevite, tu pondolavo oku yeva ekavuluko.—Osa. 55:22.

14. (a) Ovina vipi vikuavo tu lilongisila kulandu wa Hana?(b) Nye ci lekisa okuti oku sokolola kovolandu Embimbiliya ci pondola oku mioñolola olohutililo vietu? (Talavo etosi pombuelo yemẽla.)

¹⁴ Eci pa pita anyamo amue, Hana wa cita omõla umue ulume o tukuiwa Samuele. Noke eye wo wambata ku Eli, Ocitunda Cinene. (1 Sam. 1:​24-28) Vohutililo yimue Hana a linga lutima wosi, wa eca olopandu ku Yehova omo lioku teyuila afendeli vaye vakuekolelo kuenda oku va tata.c (1 Sam. 2:​1, 8, 9) Ovitangi via Hana ka via puile, pole, eye wa tiamisilile utima kasumũlũho Yehova o wĩhile. Nye tu lilongisilako? Tu ka tẽla lika oku pandikisa kovitangi, nda tua tiamisila utima kueci Yehova a tu lingila ale kuenda evi a kasi oku amamako oku linga oco a tu kuatise.

15. Nye tu lilongisila kohutililo uprofeto Yeremiya a linga? (Yeremiya 12:1)

¹⁵ Tanga Yeremiya 12:1. Uprofeto Yeremiya vepuluvi limue, wa sumuile calua eci a mola okuti omanu valua olondingaĩvi va molẽhele ndu okuti va kuatele ekalo liwa komuenyo kuenda esanju. Eye wa sumuilevo omo a kala oku tatiwa lãvi la vamanjaye va Isareli. (Yer. 20:​7, 8) Eci oco ca siatavo oku lipita letu, eci tu mola omanu olondingaĩvi oku litunda ciwa ale ceci tu tatiwa lãvi. Yeremiya ka lundilile Yehova omo liekambo liaco liesunga, pole, wa situluila kokuaye esumuo a kala oku yeva. Vokuenda kuotembo, Yeremiya wa mola ndomo Yehova a pindisa va Isareli vana va kala vakuesino. Kuenje eci ca vokiya ekolelo eye a kuatelele kesunga lia Yehova. (Yer. 32:19) Ndeci Yeremiya a linga, tu pondolavo oku situluila ku Yehova esumuo lietu liosi loku kolela okuti, kotembo ya sokiyiwa eye o ka tetulula ekambo liosi liesunga tua siata oku liyaka lalio koloneke vilo.

16. Nye tu pondola oku lilongisila kohutililo yu Lewi umue ka kuatele epondolo lioku fendela vonembele? (Osamo 42:​1-4) (Talavo oviluvialuvia.)

¹⁶ Tanga Osamo 42:​1-4. Osamo eyi ya sonehiwa lu Lewi umue ka kuatele epondolo lioku fendela vonembele kumue la va Isareli vakuavo. Olondaka viaye vi lekisa ndomo eye a kala oku liyeva. Pamue, tu liyevavo ndeci u Lewi waco, nda okuti tua kapiwa vokayike omo liekolelo lietu, ale tu kuete uvei umue u tu tateka oku tunda konjo. Olonjanja vimue, tu pondola oku liyeva ciwa, pole, olonjanja vikuavo tu yeva esumuo. Pole, ndaño lovina viaco, ci kuete esilivilo oku lomboluila ku Yehova onjila ndomo tu liyevite pocakati cohutililo. Oku ci linga, ci pondola oku tu kuatisa oku kũlĩhĩsa ovisimĩlo vietu kuenda oku kuata elomboloko lia suapo liekalo lietu. Ndeci, u Lewi wa limbuka okuti eye wa kuatele apuluvi akuavo oku sivaya Yehova. (Osa. 42:5) Eye wa sandavo otembo yoku sokolola ndomo Yehova a kala oku u tata. (Osa. 42:8) Oku likutilila ku Yehova lutima wosi, ci pondola oku tu kuatisa oku kuata elomboloko lia suapo liovisimĩlo vietu, oku tu ivaluisa ovina vi kuete esilivilo lia velapo kuenda oku kuata ongusu yoku pandikisa.

17. (a) Nye tu pondola oku lilongisila kohutililo uprofeto Yona a linga? (Yona 2:​1, 2) (b)  Momo lie ci kuetele esilivilo oku patekela olondaka vimue vi sangiwa kelivulu Liolosamo? (Tala etosi pombuelo yemẽla.)

¹⁷ Tanga Yona 2:​1, 2. Uprofeto Yona wa linga ohutililo yaco eci a kala vimo liombisi yimue yinene. Ndaño okuti eye ka pokuile ku Yehova, pole, wa kolelele okuti Yehova wa laikele oku u yeva. Yona vohutililo a linga, wa tukula olondaka vialua vi sangiwa Kosamo.d Eci ci lekisa okuti, eye wa kũlĩhĩle ciwa Olosamo viaco. Poku sokolola kokuavio, co wĩha ekolelo liokuti Yehova wa laikele oku u kuatisa. Cimuamue haico okuti, nda tua likolisilako oku patekela ovinimbu vimue Viembimbiliya, tu ka vi ivaluka kuenda vi ka tu lembeleka eci tu likutilila ku Yehova poku liyaka lovitangi.

AMAMAKO OKU PAMISA UKAMBA WOVE LA YEHOVA POCAKATI COHUTILILO

18-19. Ohuminyo yipi yi sangiwa kukanda ku va Roma 8:​26, 27? Tukula ulandu umue.

¹⁸ Tanga Va Roma 8:​26, 27. Olonjanja vimue tu sakalala calua okuti ka tu tẽla oku lomboluila ku Yehova ndomo tu liyevite. Pole, tu kuete ekuatiso limue. Vapuluvi aco, espiritu sandu lia Suku li ecelela okuti ‘ovisimĩlo vietu vi kũlĩhĩwa laye.’ Ndamupi? Yehova wa talavaya lespiritu sandu liaye oco a vetiye asonehi Vembimbiliya oku soneha olohutililo vialua. Nda okuti ka tu tẽla oku situlula ovisimĩlo vietu vohutililo, Yehova o pondola oku nõla olondaka vimue violohutililo vi sangiwa Vembimbiliya, ndu okuti apingilo etu. Kuenje eye o ka tambulula olohutililo viaco ndu okuti etu tua vi linga.

¹⁹ Oku kũlĩha ovina viaco, ca kuatisa manji umue ukãi wo ko Rusia o tukuiwa Yelena. Eye wa kapiwa vokayike omo lioku likutilila kuenda oku tanga Embimbiliya. Manji Yelena wa sumuile calua okuti ka ca lelukile kokuaye oku linga olohutililo. Eye wa popia hati: “Nda ivaluka okuti, eci ndi yeva esakalalo lialua okuti si kũlĩha ovina ndi pinga vohutililo, Yehova o pondola oku tava olohutililo viafendeli vaye vo kosimbu . . . ndu okuti ame nda vi linga. . . . Eci ca ndembeleka calua vokuenda kuotembo yaco ka ya lelukile.”

20. Eci tu yeva esakalalo tu pondola oku pongiya ndati utima wetu oco tu likutilile?

²⁰ Eci tu kuata esakalalo kuenje tu likutilila, tu pondola oku sokolola ovina vikuavo kuenda ka tu tiamisila utima kueci tu yongola oku popia. Oco hẽ, nye tu sukila oku linga oco tu pongiye utima wetu? Tu pondola oku tanga lolukandi ovinimbu vimue vi sangiwa Kosamo. Tu pondolavo oku soneha onjila ndomo tu liyevite ndeci Daviti a linga. (Osa. 18, 34, 142; olondaka vioku fetika.) Ocili okuti ka kuli ulala umue wolonumbi u lekisa ndomo tu lipongiya oco tu likutilile. (Osa. 141:2) Omo liaco, seteka oku limbuka onjila ya suapo ya ku sungulukila.

21. Momo lie tu sukilila oku likutilila ku Yehova lutima wosi?

²¹ Ci lembeleka calua oku kũlĩha okuti, Yehova wa kapako onjila ndomo tu liyevite ndaño ceci handi ka tuo sapuilile cimue. (Osa. 139:4) Eye o sanjukila oku tu yevelela eci tu likutilila kokuaye lekolelo. Omo liaco, ku ka kuate ohele yoku likutilila ku Isiove wokilu. Konomuisa olohutililo via tukuiwa Vembimbiliya oco vi ku kuatise oku mioñolola olohutililo viove. Likutilila lutima wosi. Lomboluila ku Yehova ovina via siata oku ku nenela esanju kuenda evi vi ku sumuisa. Omo okuti Yehova eye Ekamba liove lia velapo, olonjanja viosi o ka ku kuatisa!