Ndomo tu Eca Alungulo Awa

1. Helie o sukila oku eca alungulo kuenda momo lie?

OVE hẽ o sole oku eca alungulo komanu vakuavo? Komanu vamue ca leluka oku ci linga. Vakuavo va kuete ohele yoku eca alungulo. Pole, olonjanja vimue vosi yetu tu ka sukila oku eca alungulo. Momo lie? Momo Yesu wa popia okuti, olondonge viaye viocili vi limbukiwila kocisola vi likuetele pokati. (Yoa. 13:35) Onjila yimue yoku lekisa ocisola tu likuetele, oku eca alungulo ku vamanjetu eci va sukila. Ondaka ya Suku yi popia okuti, eci tu eca alungulo tu pamisa ukamba tu likuetele la vamanji.—Olosap. 27:9.

2. Nye akulu vekongelo va sukila oku linga kuenda momo lie? (Talavo okakasia losapi hati, “Kuatisiwa Lalungulo a Eciwa Kolohongele Vio Vokati Kosemana.”)

² Akulu vekongelo va sukila oku kũlĩha ndomo va eca alungulo awa ku vakuavo. Yehova pocakati ca Yesu, wa nõla alume vaco oco va tate ekongelo. (1 Pet. 5:​2, 3) Ovo va siata oku ci linga pocakati colohundo mua kongela alungulo a kunamẽla Vondaka ya Suku. Ovo va siatavo oku eca alungulo komunu lomunu, oku kongelamo vana va yanduluka Yehova loku va kuatisa oku tiuka vekongelo. Akulu vekongelo kuenda vosi yetu, tu eca ndati alungulo awa?

3. (a) Tu lilongisa ndati oku eca alungulo awa? (Isaya 9:6; talavo okakasia losapi hati, “Setukula Yesu Poku Eca Alungulo.”) (b) Nye tu konomuisa vocipama cilo?

³ Tu pondola oku lilongisa ovina vialua viatiamẽla koku eca alungulo awa, poku lilongisa ovolandu omanu vana va tukuiwa Vembimbiliya, ca piãla enene kongangu ya Yesu. Ndeci, yimue pokati kolonduko eye a tambula yeyi yokuti, “Ndunguli o Komõhisa.” (Tanga Isaya 9:6.) Vocipama cilo, tu lilongisa ovina tu sukila oku linga eci omunu umue a tu pinga alungulo kuenda ovina tu pondola oku linga poku eca alungulo nda okuti ka va tu a pingile. Handi vali, tu konomuisavo esilivilo lioku eca alungulo vepuluvi liwa kuenda lonjila ya sunguluka.

CECI OMUNU UMUE A TU PINGA ELUNGULO

4-5. Eci omunu umue a tu pinga alungulo, nye tu sukila oku lipula tete? Tukula ocindekaise cimue.

⁴ Eci omunu umue a tu pinga alungulo, pamue tu yeva esanju momo ci lekisa okuti omunu waco wa tu kolela kuenda tu kuata onjongole yoku u kuatisa vepuluvi liaco. Pole, tete tu sukila oku sokolola lutate nda tua kũlĩha ciwa ocitangi eye a kasi oku liyaka laco. Omo liaco, tu sukila oku lipula ndoco: ‘Anga hẽ ndi tẽla muẽle oku eca elungulo liwa konepa eyi?’ Olonjanja vimue onjila ya velapo yoku kuatisa omunu waco, oku u ilikila umue wa kũlĩha ciwa ocitangi caye.

⁵ Kũlĩhĩsa ocindekaise ci kuãimo. Sokolola okuti ekamba liove lia kuatiwa luvei umue wa kãla. Kuenje eye o ku sapuila okuti, wa fetika oku linga akonomuiso atiamẽla koku tatiwa kuvei waco. Noke eye o pinga ocisimĩlo cove catiamẽla konjila ove o sima okuti oyo a pondola oku kuama poku sakuiwa. Ndaño okuti ove o kuete ovisimĩlo viwa konjila ndomo uvei waco u sakuiwa, pole, kua pindisiwile oco o tate uvei waco. Onjila ya suapo o pondola oku kuama oco o kuatise ekamba liove, oku sanda omunu umue wa pindisiwa okuti o tẽla oku tata uvei waco.

6. Momo lie ci kuetele esilivilo oku kevelela otembo yimue osimbu ka tua ecele elungulo limue?

⁶ Ndaño tu sima okuti tua loñoloha koku eca alungulo atiamẽla kondaka yimue, tu sukila oku kevelela otembo yimue osimbu ka tua ecele etambululo komunu wa tu pinga alungulo. Momo lie? Elivulu Liolosapo 15:28 li popia hati: “Ukuesunga o sokolola vutima osimbu ka tambuluile.” Nye ci popiwa nda tua kũlĩha ale etambululo liaco? Ndaño ndoco, tu sukila oku kevelela otembo yimue oco tu linge akonomuiso, oku likutilila kuenda oku sokolola lutate. Nda tua ci linga, tu ka kolela okuti etambululo tu ka eca, li likuata lovisimĩlo via Yehova viatiamẽla kocitangi caco. Tu konomuisi ulandu wa Natana.

7. Nye wa lilongisila kulandu wuprofeto Natana?

⁷ Daviti wa sapuila uprofeto Natana okuti, wa yonguile oku tungila Yehova onembele yimue. Natana ka sokoluile vali kuenje wa sapuila Daviti oco a ci linge. Pole, Natana tete wa sukilile oku kũlĩhĩsa Yehova. Momo lie? Momo Yehova ka yonguile okuti Daviti u tungila onembele. (1 Asa. 17:​1-4) Ulandu owu u lekisa okuti, eci va tu pinga elungulo limue, ci kuete esilivilo oku ‘livala koku popia.’—Tia. 1:19.

8. Esunga lipi likuavo li lekisa esilivilo lioku kuata utate osimbu ka tua ecele elungulo limue?

⁸ Tu konomuisi esunga likuavo lieci tu sukilila oku kuata utate osimbu ka tua ecele elungulo komunu umue. Nda tua eca elungulo limue ka lia sungulukile komunu umue, tu ka kuata onepa yimue yeko nda ocina cimue cĩvi ceya oku lipita lomunu waco. Omo liaco, ci kuete esilivilo oku sokolola lutate osimbu ka tua ecele alungulo.

NDOMO TU ECA ALUNGULO NDA OKUTI KA VA TU A PINGILE

9. Nye akulu vekongelo va sukila oku kũlĩhĩsa osimbu ka va ecele elungulo limue? (Va Galatia 6:1)

⁹ Olonjanja vimue akulu vekongelo va sukila oku eca elungulo ku manji umue wa linga “ekandu limue.” (Tanga Va Galatia 6:1.) Omunu umue pamue o kasi oku linga ovina vimue ka via sungulukile okuti noke, vi pondola oku u kokela oku linga ekandu limue linene. Ocimãho cakulu vekongelo oku kuatisa omunu waco oku amamako oku vumba Yehova, loku kuata omuenyo ko pui. (Tia. 5:​19, 20) Pole, oco elungulo liavo li ece onima yiwa, va sukila oku kũlĩhĩsa lutate nda okuti omunu waco o kasi oku nõlapo onjila yimue ka ya sungulukile. Yehova ecelela okuti vosi yetu tu nõla olonjila vi likuata lowanji wetu wo vutima. (Va Rom. 14:​1-4) Oco hẽ, nda akulu vekongelo va limbuka okuti manji umue wa linga ocina cimue ci pondola oku nyõla ukamba waye la Yehova, va eca ndati elungulo kokuaye?

10-12. Nye ukulu umue wekongelo a sukila oku linga poku eca alungulo nda okuti ka vo a pingile? Tukula ocindekaise cimue. (Talavo oviluvialuvia.)

¹⁰ Ka ca lelukile kakulu vekongelo oku eca elungulo komunu umue okuti ka li pingile. Momo lie? Upostolo Paulu wa popia okuti omunu umue pamue o linga ocina cimue ka ca sungulukile okuti ka ci limbuka. Omo liaco, akulu vekongelo osimbu handi ka va ecele elungulo, va sukila oku linga ovina vimue vi ka kuatisa omunu waco oku yevelela lutate elungulo.

¹¹ Oku eca alungulo nda okuti ka va tu a pingile, ci sokisiwa loku kũla ombuto vosi yimue ya kõla. Osimbu ongunja yimue ka ya fetikile oku kũla, oyo yi pongiya tete osi oco yi leñele okuti yi tambula ciwa ombuto. Noke yi waya ombuto kuendao yi tapela oco yi kule. Cimuamue haico okuti, osimbu ukulu umue wekongelo ka ecele elungulo limue ka lia pingiwile, ci kuete esilivilo kokuaye oku linga ovina vimue oco ci leluke ku manji yaco oku yevelela elungulo. Ndeci, ukulu wekongelo o kevelela epuluvi liwa oco a sapele la manji yaco, loku u sapuila okuti wo kapako calua kuenda kuli cimue a yongola oku sapela laye. Nda okuti manji eca elungulo wa kũlĩhĩwa okuti ukuacisola haeye ukuacimbe, ci ka leluka komanu vakuavo oku tava kelungulo liaye.

¹² Vokuenda kuombangulo, ukulu wekongelo o pondolavo oku kuatisa omunu waco oku tava elungulo, poku wivaluisa okuti vosi yetu tuakuakulueya kuenda olonjanja vimue tu sukila alungulo. (Va Rom. 3:23) Kuenje loku omboka kuenda esumbilo, ukulu wekongelo o lekisa kokuaye pocakati Covisonehua okuti, eye wa linga ocina cimue ka ca sungulukile. Nda okuti omunu waco wa limbuka okuti wa lueya, ukulu wekongelo u lomboluila lonjila ya suapo ovina a sukila oku linga oco a pongolole ekalo liaye. Kesulilo liombangulo, ukulu wekongelo o kuatisa manji oku tava elungulo, poku u sapuila ovina viwa eye a kasi oku linga kuenda oku likutilila laye.—Tia. 5:15.

13. Akulu vekongelo va limbuka ndati nda okuti omunu o kuete elomboloko lielungulo lia eciwa?

¹³ Olonjanja vimue, olondaka vi popiwa lomunu o kasi oku eca elungulo, ka vi lomboloka ciwa komunu o vi yevelela. Nye akulu vekongelo va sukila oku linga oco ovina va popia vi kuate elomboloko? Lumbombe, ovo va pondola oku linga apulilo, oco va limbuke nda omunu waco o kuete elomboloko lielungulo lia eciwa kuenda wa kũlĩha ovina a sukila oku linga oco a kapeko elungulo liaco.—Uku. 12:11.

OKU ECA ALUNGULO VEPULUVI LIWA KUENDA LONJILA YA SUNGULUKA

14. Momo lie tu sukilila oku yuvula oku eca elungulo osimbu tu kasi lonyeño?

¹⁴ Omo okuti ka tua lipuile, olonjanja vimue tu pondola oku popia ale oku linga ovina vi sumuisa vakuetu. (Va Kol. 3:13) Embimbiliya li lekisa okuti olonjanja vimue omunu umue o pondola oku popia ale oku linga ocina cimue ci pondola oku tu temisa. (Va Efe. 4:26) Omo liaco, tu sukila oku yuvula oku eca alungulo osimbu tu kasi lonyeño. Momo lie? Momo “onyeño yomunu ka yi tuala kesunguluko lia Suku.” (Tia. 1:20) Nda tu eca elungulo osimbu tu kasi lonyeño, tu pondola oku popia ale oku linga ocina cimue ka ca sungulukile. Eci ka ci lomboloka okuti ka tu sukila oku situlula ovisimĩlo vietu ale onjila ndomo tu liyevite komunu umue wa tu temisa. Pole, tu sukila oku kevelela toke tu tulumũha osimbu ka tua popele ondaka yimue komunu waco. Tu konomuisi eci tu lilongisila kulandu wa Elihu wa eca elungulo limue liwa ku Yovi.

15. Nye tu lilongisila kongangu ya Elihu? (Talavo ociluvialuvia.)

¹⁵ Elihu wa yevelela Yovi vokuenda kuoloneke vialua, osimbu Yovi a kala oku liteyuila kalundi a lingiwa lolondembeleki viaye viesanda. Elihu wa kuatela ohenda yalua Yovi. Pole, Elihu wa kuatavo onyeño omo okuti Yovi wa popia olondaka viuhembi viatiamẽla ku Yehova loku tiamisila calua utima kokuaye muẽle. Ndaño ndoco, Elihu wa kevelela onjanja yaye yoku vangula noke wa lekisa ohenda kuenda esumbilo poku lungula Yovi. (Yovi 32:2; 33:​1-7) Ulandu wa Elihu u tu longisa ocili cimue ci kuete esilivilo cokuti: Tu sukila oku eca alungulo vepuluvi lina okuti tua tulumũha loku eca alungulo aco lesumbilo kuenda locisola.—Uku. 3:​1, 7. 

AMAMAKO OKU ECA KUENDA OKU TAVA ALUNGULO

16. Osamo 32:8 yi tu longisa nye?

¹⁶ Kocisonehua kua kunamẽla ocipama cilo, Yehova wa popia hati: “Ndi ka ku lavulula oco ndi ku tate loku ku ĩha elungulo.” (Tanga Osamo 32:8.) Eci ci lekisa okuti Yehova o kamamako oku tu kuatisa. Eye ka tu ĩha lika alungulo, pole, o tu kuatisavo oku a kapako. Tu pondola oku setukula ongangu ya Yehova! Eci tu kuata esumũlũho lioku eca alungulo ku vakuetu, tu pondola oku setukula Yehova poku amamako oku va pamisa kuenda oku va kuatisa oku nõla olonjila viwa.

17. Tu liyeva ndati eci akulu vekongelo va tu ĩha alungulo a kunamẽla Vembimbiliya? (Isaya 32:​1, 2)

¹⁷ Koloneke vilo, ci kuete esilivilo lialua oku eca loku tambula alungulo awa, okuti kosimbu ci sule. (2 Tim. 3:1) Ndeci ‘olondui viovava vofeka yimue ka muli ovava’ vi pondola oku kavuluisa omunu umue, akulu vekongelo vana va eca alungulo a kunamẽla Vembimbiliya va tu pamisa loku tu kuatisa oku amamako oku vumba Yehova. (Tanga Isaya 32:​1, 2.) Akamba vana va kũlĩha ovina tu yongola oku yevelela, pole, va tu sapuila ovina tu sukila oku yevelela, olondaka viavo vi sokisiwa ‘ndolomasã viulu vovikuata viopalata.’ (Olosap. 25:11) Omo liaco, vosi yetu tu amamiko oku lilongisa ndomo tu eca loku tambula alungulo awa.