“Pinga Ekuatiso Kakulu Vekongelo”

1. Yehova wa lekisa ndati okuti o sole calua afendeli vaye?

YEHOVA o sole calua afendeli vaye. Eye wa va landa losonde yomõlaye kuenda wa linga esokiyo oco akulu vekongelo va va tate ciwa. (Ovil. 20:28) Yehova o yongola okuti akulu vekongelo va tata afendeli vaye lohenda. Akulu vekongelo va siata oku kuama olonumbi via Yesu poku pamisa vamanji, loku va kuatisa oku amamako oku kuata ukamba uwa la Yehova.—Isa. 32:​1, 2.

2. Omanu vapi Yehova a tata lonjila yimue yi likasi? (Esekiele 34:​15, 16)

² Yehova wa kapako calua afendeli vaye vosi, pole, eye o tata lonjila yi likasi vana va kasi oku tala ohali. Yehova pocakati cakulu vekongelo, o kuatisa vana va kasi oku tala ohali omo liekandu limue va linga. (Tanga Esekiele 34:​15, 16.) Pole, eye o yongola okuti tu sanda ekuatiso olonjanja viosi tu sukila. Yehova ka yongola lika okuti tu likutilila kokuaye oku pinga ekuatiso, pole, o yongolavo okuti tu pingavo ekuatiso ‘kangombo kuenda kalongisi’ vovekongelo, oco va tu kuatise kapuluvi osi tu sukila.—Va Efe. 4:​11, 12.

3. Nye tu ka konomuisa vocipama cilo kuenda apulilo api a ka tambuluiwa?

³ Vocipama cilo, tu konomuisa ndomo Yehova a talavaya lakulu vekongelo, oco va tu kuatise eci ukamba wetu Laye u hongua. Tu ka tambulula apulilo akuãimo ndeci: Vepuluvi lipi tu sukila oku pinga ekuatiso kakulu vekongelo? Momo lie tu sukilila oku ci linga? Kuenda akulu vekongelo va pondola oku tu kuatisa ndati? Pamue cilo, ukamba wetu la Yehova wa pama kuenda ka tu sukila ekuatiso liakulu vekongelo. Pole, ocipama cilo ci ka vokiya olopandu vietu konjila ndomo Yehova a talavaya lakulu vekongelo kuenda ci ka tu kuatisa oku kũlĩha ovina tu pondola oku linga eci tu sukila ekuatiso liavo.

VEPULUVI LIPI TU SUKILA OKU “PINGA EKUATISO KAKULU VEKONGELO?”

4. Momo lie tu popela okuti olondaka vi sangiwa kukanda wa Tiago 5:​14-16, 19, 20, vi tiamisiwila komanu vana va vela konepa yespiritu? (Talavo oviluvialuvia.)

⁴ Ndonge Tiago wa lombolola ndomo Yehova a talavaya lakulu vekongelo oco a tu kuatise. Eye wa soneha ndoco: “Pokati kene pali hẽ umue o vela? A vilikiye akulu vekongelo.” (Tanga Tiago 5:​14-16, 19, 20.) Ulandu waco u lekisa okuti, Tiago wa kala oku tukula catiamẽla komunu umue o sukila oku tumbulula ukamba waye la Yehova. Ndeci, omunu waco ka sukila oku vilikiya ondotolo yimue, pole, o sukila oku vilikiya akulu vekongelo oco vo kuatise. Handi vali, Tiago wa popia okuti, omunu waco o pondola oku kaya nda akandu aye a eceliwa. Olonjanja vimue, ananga a sukiliwa oco ku sakuiwe omunu umue o vela konepa yespiritu, amuamue lananga a sukiliwa oco ku sakuiwe omunu umue o vela ketimba. Eci tu vela ketimba, tu sandiliya ondotolo, tu lombolola kokuaye evalo tu yevite kuenda tu kuama olonumbi eye a tu ĩha. Cimuamue haico okuti, eci tu vela konepa yespiritu, tu sukila oku sandiliya ukulu umue wekongelo, loku u lomboluila ekalo lietu kuenda oku kapako olonumbi Viembimbiliya tu tambula.

5. Tu kũlĩha ndati nda ukamba wetu la Yehova u kasi oku hongua?

⁵ Kukanda wa Tiago ocipama 5, ndonge Tiago o tu vetiya oku sapela lakulu vekongelo olonjanja viosi tu liyeva okuti, ukamba wetu la Yehova u kasi oku hongua. Pole, ci kuete esilivilo lialua oku pinga ekuatiso kokuavo, osimbu ukamba wetu la Yehova ka wa nyolẽhele! Embimbiliya li tu lungula okuti, nda ka tua kuatele utate, tu pondola oku sima okuti tu kuete ukamba uwa la Yehova, osimbu okuti ka tu kuete. (Tia. 1:22) Eci oco ca lipita Lakristão vamue vo kosimbu vekongelo lio Sardesi. Omo liaco, eli olio esunga Yesu a va sapuilila okuti, ovo ka va kaile vali oku sanjuisa Yehova. (Esit. 3:​1, 2) Tu kũlĩha ndati okuti tu kuete ukamba uwa la Yehova? Onjila yimue, oku sokisa ombili tua kuatelele efendelo lia Yehova eci handi ka tua papatisiwile, lombili tu kuete cilo. (Esit. 2:​4, 5) Tu pondola oku lipula ndoco: ‘Anga hẽ nda siata oku tanga Embimbiliya loku sokolola ondongosi catiamẽla kueci nda tanga, ndeci nda lingaile kosimbu? Nda siata hẽ oku panga onepa loku lipongiya kolohongele viosi viovekongelo, ale ndi ci linga lika kolohongele vimue? Ombili nda kuatele kupange woku kunda ya tepuluka? Anga hẽ nda siata oku pesela otembo yange kovitalukilo kuenda koku sanda olombongo?’ Nda wa tambulula okuti oco pokati kapulilo aco, ci lomboloka okuti ukamba wove la Yehova u kasi oku hongua kuenda nda kua pingile ekuatiso, ocitangi caco ci pondola oku livokiya. Nda okuti etu muẽle ka tu tẽla oku pamisa ukamba wetu la Yehova, ale tua linga ale ocina cimue ci sumuisa Yehova, tu sukila oku pinga ekuatiso kakulu vekongelo.

6. Nye omanu vana va linga ekandu limue linene va sukila oku linga?

⁶ Kuli akandu amue okuti nda omunu wa a linga kuenda ka likekembelele, o pondola oku tundisiwa vekongelo. Nda okuti tua linga akandu aco, tu sukila oku sapela lakulu vekongelo. (1 Va Kor. 5:​11-13) Omunu umue wa linga ekandu limue linene, o sukila ekuatiso oco a tumbulule ukamba waye la Yehova. Oco Yehova a tu ecele pocakati cocisembi, tu sukila oku “linga ovina vi lekisa elikekembelo” lietu. (Ovil. 26:20) Vovina viaco, mua kongela oku sapela lakulu vekongelo, nda okuti tua linga ekandu limue linene.

7. Velie vali va sukila ekuatiso liakulu vekongelo?

⁷ Akulu vekongelo ka va kuatisa lika vana va linga akandu anene, pole, va kuatisavo vana va hongua konepa yespiritu. (Ovil. 20:35) Ndeci, pamue o liyeva okuti ka ca lelukile kokuove oku liyaka lolonjongole ka via sungulukile. Pamue osimbu kua lingile Ukristão, wa kuatele ocituwa coku nyua olodroga, oku tala omanu va kasi epolõla haivo va linga ukahonga ale wa litumbikile koku linga evĩho liukahonga. Ndaño lovina viaco, ku ka kuate usumba woku pinga ekuatiso. Ove o pondola oku sapuilako ukulu umue wekongelo wa kolela kuenje eye o ka yevelela asakalalo ove, o ka ku ĩha olonumbi o sukila kuenda o ka ku lomboluila ovina o sukila oku linga oco o sanjuise Yehova poku yuvula olonjongole ka via sungulukile. (Uku. 4:12) Pamue ove wa sumua omo okuti, olonjongole ka via sungulukile vi kasi oku amamako. Pole, ukulu wekongelo o ka ku ivaluisa okuti, Yehova wa sanjuka omo wa pinga ekuatiso kuenda ci lekisavo okuti ove umunu umue embombe momo, kua kolelele kongusu yove muẽle kuenda o yongola oku sanjuisa Yehova.—1 Va Kor. 10:12.

8. Anga hẽ tu sukila oku sapuilako akulu vekongelo catiamẽla kakulueya etu osi? Ci lombolola.

⁸ Ka tu sukila oku sapuilako akulu vekongelo catiamẽla kakulueya etu osi. Ndeci, sokolola okuti ove wa vangula ocina cimue ci sumuisa manji umue ale wa temẽla manji yaco. Kocitangi caco, ku sukila oku enda kukulu umue wekongelo, pole, ove o sukila oku likolisilako oku kapako elungulo lia Yesu liatiamẽla koku sapela la manji yaco kuenda oku pinga ongecelo. (Mat. 5:​23, 24) O pondolavo oku linga akonomuiso valivulu etu oco o tẽle oku lekisa ovituwa ndeci, umbombe, epandi kuenda oku likandangiya. Nda wa ci linga pole handi kua tẽlele oku tetulula ocitangi caco, o sukila oku pinga ekuatiso kukulu umue wekongelo. Upostolo Paulu kukanda a sonehela va Filipoi, wa pinga ku manji umue wovekongelo liaco, oco a kuatise Euodia la Suntuke oku tetulula ovitangi via kala pokati kavo. Cimuamue haico okuti, ukulu umue wekongelo o pondolavo oku ku kuatisa.—Va Fil. 4:​2, 3.

MOMO LIE TU SUKILILA OKU PINGA EKUATISO KAKULU VEKONGELO?

9. Momo lie tu sukilila oku yuvula okuti osõi yi tu tateka oku pinga ekuatiso kakulu vekongelo? (Olosapo 28:13)

⁹ Tu sukila oku lekisa ekolelo kuenda utõi, oco tu pinge ekuatiso eci tu linga ekandu limue linene, ale ceci tu liyeva okuti ka ca lelukile kokuetu oku yula olonjongole ka via sungulukile. Tu sukilavo oku yuvula okuti osõi yi tu tateka oku pinga ekuatiso kakulu vekongelo. Momo lie? Momo Yehova wa tu ĩha akulu vekongelo oco va tu kuatise oku amamako oku pamisa ukamba wetu laye. Eci tu sapela lakulu vekongelo, tu lekisa okuti tua kolela ku Yehova kuenda tu pokola kokuaye. Tu lekisavo okuti tu sukila ekuatiso liaye oco tu amameko oku linga eci ca sunguluka. (Osa. 94:18) Omo liaco, nda tua linga ekandu limue, tu pondola oku kolela okuti Yehova o ka tu ecela, nda tua sapuilako akulu vekongelo ovina tua linga, loku liwekapo oku linga ovina ka via sungulukile.—Tanga Olosapo 28:13.

10. Nye ci pondola oku lipita letu nda tua seteka oku limbika ekandu limue?

¹⁰ Eci tu lomboluila kakulu vekongelo catiamẽla kakandu tua linga, Yehova o pondola oku tu ecela kuenda tu ka kuata vali ukamba uwa laye. Pole, nda ka tua sapuilileko akulu vekongelo catiamẽla kekandu limue tua linga, tu pondola oku likokela ovitangi. Soma Daviti eci a seteka oku limbika akandu aye, wa tala ohali konepa yespiritu, kovisimĩlo kuenda ketimba. (Osa. 32:​3-5) Ndeci, eci tu kuata uvei umue, nda tua kala otembo yalua okuti ka tu sandi ondotolo, uvei waco u livokiya. Cimuamue haico okuti, nda tua linga ekandu limue linene kuenda ka tu pingi ekuatiso kakulu vekongelo, tu pondola oku pumba ukamba wetu la Yehova. Yehova ka yongola okuti ovina viaco vi lipita letu, omo liaco, eye o tu laleka oco ‘tu tetulule ovitangi’ viaco laye pocakati cakulu vekongelo, vana eye a talavaya lavo oco va tu kuatise oku kuata vali ukamba laye.—Isa. 1:​5, 6, 18.

11. Nye vali ci pondola oku lipita nda tua limbika ekandu limue linene kakulu vekongelo?

¹¹ Nda tua limbika akandu etu kakulu vekongelo, omanu vakuavo va pondolavo oku tala ohali. Momo, tu ka tateka okuti Yehova eca espiritu liaye vekongelo kuenda ekongelo ka li ka kuata ombembua. (Va Efe. 4:30) Handi vali, nda tua kũlĩha omunu umue vekongelo wa linga ekandu limue linene, tu sukila oku u vetiya oco a ka sapele lakulu vekongelo.a Nda eye ka ci lingile, tu sukila oku nõlapo oku ci linga. Nda tua ci limbika, tu ka kuata eko omo liekandu liaco. (Ovis. 5:1) Ocisola tu kuetele Yehova, ci tu vetiya oku sapuilako akulu vekongelo nda okuti, omunu umue wa linga ekandu limue linene. Nda tua ci linga, tu ka teyuila vamanjetu kuenda tu ka kuatisa omunu una wa linga ekandu oku tumbulula ukamba waye la Yehova.

AKULU VEKONGELO VA PONDOLA OKU TU KUATISA NDATI?

12. Akulu vekongelo va pondola oku kuatisa ndati vana va hongua konepa yespiritu?

¹² Embimbiliya li vetiya akulu vekongelo oku kuatisa vana va hongua konepa yespiritu. (1 Va Tes. 5:14) Nda ove wa linga ekandu limue, akulu vekongelo va pondola oku linga apulilo amue kokuove, oco va kuate elomboloko liovisimĩlo viove kuenda ndomo o liyevite. (Olosap. 20:5) Citava okuti ka ci leluka kokuove oku sapela lakulu vekongelo, momo pamue ove o kuata osõi yoku lombolola ovina via li pita. Pole, o pondola oku va kuatisa poku lombolola ocitangi o kasi oku liyaka laco. Ku ka kuate ohele nda olondaka viove vi ka molẽha ndu okuti “viumamõhe.” (Yovi 6:3) Akulu vekongelo ka va ka ku pisa ale oku ku teta kondaka omo liovina o popia. Pole, ovo va ka likolisilako oku ku yevelela lutate loku kuata elomboloko liovina viosi via kongelamo, osimbu ka va ku ihĩle alungulo a kunamẽla Vembimbiliya. (Olosap. 18:13) Akulu vekongelo va kũlĩha okuti oku eca ekuatiso li sukiliwa komunu umue, ci ambata otembo. Omo liaco, oco o tambule ekuatiso o sukila, ovo ka va ka sapela lika love onjanja yimosi.

13. Akulu vekongelo va pondola oku tu kuatisa ndati pocakati colohutililo viavo kuenda olonumbi Viembimbiliya? (Talavo oviluvialuvia.)

¹³ Eci o pinga ekuatiso kakulu vekongelo, ovo va ka likolisilako oco ku ka livetele calua evelo. Pole, va ka ku likutililako. Ove o ka komõha calua poku mola “unene” olohutililo viavo vi kuete. Vekuatiso liavo, mua kongelavo oku “sieketa ulela [kokuove] vonduko ya Yehova.” (Tia. 5:​14-16) “Ulela” waco, u lomboloka ocili Condaka ya Suku. Akulu vekongelo, va ka tanga love ovinimbu Viembimbiliya vi pondola oku ku lembeleka kuenda oku ku kuatisa oku tumbulula ukamba wove la Yehova. (Isa. 57:18) Olonumbi Viembimbiliya ovo va ku lekisa, vi ka ku ĩha ongusu o sukila oco amameko oku linga eci ca sunguluka. Lekuatiso liavo, ove o pondola oku yevelela ondaka ya Yehova yi ku sapuila hati: “Eyi oyo onjila. Endelimo.”—Isa. 30:21.

14. Ndomo ca tangiwa kukanda ku Va Galatia 6:​1, akulu vekongelo va pondola oku kuatisa ndati omunu ‘wa linga ekandu limue okuti ka ci limbukile?’ (Talavo oviluvialuvia.)

¹⁴ Tanga Va Galatia 6:1. Ukristão umue wa ‘linga ekandu limue okuti ka ci limbukile,’ ka kasi oku kapako olonumbi viesunga via Suku. Ekandu liaco, li tiamisiwila konjila yimue ka ya sungulukile ya nõliwa, ale kekandu limue linene. Akulu vekongelo poku vetiyiwa locisola, va ‘pengulula omunu waco lumbombe.’ Ondaka yo Helasi ya pongoluiwa okuti oku ‘pengulula,’ yi tiamisiwilavo kondotolo yimue yi pengulula ekepa limue lia teka oco li kaye. Ndeci ondotolo yimue ya loñoloha yi li kolisilako oku sakula ekepa limue lia teka lonjila yimue okuti ka yi koki evalo lialua, cimuamue haco okuti akulu vekongelo va tiamisila utima koku kuatisa omunu wa linga ekandu poku u tata lohenda. Akulu vekongelo va vetiyiwavo oku ‘amamako oku li lavulula ovo muẽle.’ Ovo poku kuatisa omunu umue oku kapako olonumbi Viembimbiliya, va ivaluka okuti va siatavo oku lueya. Omo liaco, ovo va likolisilako oku kuata utate walua poku kuatisa omunu waco, oco ka va ka li lekise okuti va velapo.—1 Pet. 3:8.

15. Nye tu sukila oku linga nda tu kuete ocitangi cimue?

¹⁵ Tu pondola oku kolela kakulu vovekongelo lietu. Ovo va pindisiwa oco ka va ka sandeke ovitangi vietu komanu vakuavo. Handi vali, va pindisiwavo oku eca alungulo a kunamẽla Vembimbiliya okuti, kovisimĩlo viavo muẽle hakoko kuenda oku tu kuatisa ndomo tu liyaka lovitangi vietu. (Olosap. 11:13; Va Gal. 6:2) Ndaño okuti akulu vekongelo va kuete ovituwa lovoloño a litepa, tu pondola oku lianja poku sapela lukulu wosi wa tu sungulukila catiamẽla kocitangi cimue tu kasi oku liyaka laco. Ocili okuti, ka tu ka sapela lakulu vosi vekongelo locimãho coku sanga umue, o tu sapuila ovina tu yongola oku yevelela. Momo nda tua ci linga, tu ka sokisiwa lomanu vana va yongola lika oku ‘yeva eci ovatũi avo a sanjukila oku yevelela’ okuti, “kelongiso liocili” lia Yehova lia kunamẽla Vembimbiliya hakoko. (2 Tim. 4:3) Eci tu sapela lukulu umue wekongelo catiamẽla kocitangi cimue, eye o pondola oku tu pulisa nda tua sapela ale lakulu vakuavo vekongelo catiamẽla kocitangi caco kuenda alungulo ovo va tu ĩha. Kuenje lesuluviko, eye o pondola oku tu vetiyiwa oku pinga alungulo kukulu ukuavo wekongelo.—Olosap. 13:10.

OCIKELE OMUNU LOMUNU A KUETE

16. Ocikele cipi omunu lomunu a kuete?

¹⁶ Ndaño okuti akulu vekongelo va kuete ocikele coku songuila olomeme via Suku, pole, ka va tu sapuila onjila tu sukila oku nõla. Vosi yetu pocakati covina tu popia, levi tu linga eteke leteke, tu sukila oku lekisa ku Yehova okuti tu u sole kuenda tu yongola oku u sanjuisa. Nda tua ci linga, Yehova o ka tu kuatisa oku nõla olonjila violondunge, loku amamako oku u vumba lekolelo. (Va Rom. 14:12) Eli olio esunga lieci okuti, akulu vekongelo ka va tu sapuila ovina tu sukila oku linga. Pole, va talavaya Lembimbiliya oco va tu kuatise oku kuata elomboloko lieci Yehova a sima catiamẽla kocitangi cimue, noke va ecelela okuti etu muẽle tu nõla onjila tu kuama. Poku kapako alungulo avo a kunamẽla Vembimbiliya, tu pondola oku “pindisa olondunge” vietu oco tu nõle olonjila via sunguluka.—Va Hev. 5:14.

17. Nye Yehova a yongola okuti oco tu linga?

¹⁷ Tu pandula calua Yehova omo lioku tu tata lohenda ndeci ungombo umue a tata olomeme viaye! Eye wa tuma Yesu “ungombo uwa” oco a ece omuenyo waye kokuetu ndocisembi okuti tu kuata omuenyo ko pui. (Yoa. 10:11) Yehova wa tu ĩhavo akulu vekongelo oco va tu tate, ndeci eye a likuminya poku popia hati: “Ndi ka eca kokuene angombo va linga ndomo ci likuata locipango cange kuenje ovo va ka vu tekuli lolondunge kuenda lelomboloko.” (Yer. 3:15) Eci ci lekisa okuti, nda ekolelo lietu li kasi oku hongua, ale tu sukila oku tumbulula ukamba wetu la Yehova, ka tu ka kuati ohele yoku pinga ekuatiso kakulu vekongelo. Pole, tu nõlipo oku kuatisiwa leliangiliyo lia Yehova pocakati cakulu vekongelo.