Voluali Luosi mu ka Kala Ombembua

Omanu vosi va yongola oku kala voluali lumue muli ombembua. Vokuenda kuanyamo alua olombiali via siata oku seteka oku malako ovoyaki oco vi nene ombembua. Olonjanja vimue, alikolisilo avo a nena ekavuluko votembo yimue. Ci sumuisa ceci okuti, noke liotembo yimue omanu va fetika vali oku liyaka. Anga hẽ voluali luosi mu ka kala muẽle ombembua? Oco, mu ka kala! Kũlĩhĩsa eci tu pondola oku lilongisila ku Yesu.

Ceci Yesu a ka linga

Embimbiliya li popia eci Yesu a ka linga oco a nene ombembua voluali luosi.

• “[Yesu] o ka tukuiwa . . . Mbiali Yombembua. Oku amamako kuviali waye kuenda kuombembua, ka vi ka sulila.” (Isaya 9:6, 7) Omo okuti Yesu eye Ombiali Yusoma wa Suku, o ka nena ombembua ka yi sulila voluali luosi.

• “Momo eye o ka yovola ohukũi yina yi kaluka oku pinga ekuatiso . . . lomunu wosi ka kuete umue u kuatisa.” (Osamo 72:12-14) Yesu o ka talavaya lunene waye oco a nene esunga liocili, loku malako ovoyaki osi, ungangala kuenda ohali.

• “Ofeka ka yi ka katukila ofeka yikuavo losipata, ka va ka lilongisa vali uyaki.” (Isaya 2:4) Vemẽhi liuviali wa Yesu, omanu vosi va ka lilongisa ombembua okuti uyaki sio.

Oco o lilongise ndomo Yesu a ka nena ombembua kovaso yoloneke kuenda eci ci lomboloka kokuove, tala ovideo yakukutu amue losapi, Usoma wa Suku u Lomboloka Nye?

Ceci Yesu a Longisa

Koloneke vilo, alongiso a Yesu a siata oku kuatisa olohuluwa viomanu oku kala lombembua lavakuavo. Yesu Vohundo a lingila Komunda, wa longisa olonumbi vi kuatisa omanu oku kuata ombembua eteke leteke. Kũlĩhĩsa ovolandu amue.

• “Va sumũlũha vakuakulinga ombembua.” (Mateo 5:9) Yesu ka vetiyile lika olondonge viaye oku yuvula oku liyaka, pole, wa vi vetiyavo oku sanda ombembua.

• “Tete ka lisunguluise la manjove kuenje tiuka, oco wece ombanjaile yove.” (Mateo 5:23, 24) Yesu wa lungula olonjeveleli viaye oco vi tetulule ovitangi lonjanga. Eye wa va longisa okuti ci kuete esilivilo oku lisunguluisa oco tu kuate ukamba uwa la Suku.

• “Liwekipo oku pisa, oco ka vu ka pisiwi.” (Mateo 7:1) Yesu wa lungula oku yuvula oku sombisa lonjila yimue ka ya sungulukile okuti yi koka oku liyaka. Yesu wa longisa olondonge viaye oco ‘vi amameko oku ecela’ akulueya a vakuavo.—Luka 6:37.

Voluali luosi omanu va kasi oku kapako ovina Yesu a longisa. Ndaño kovitumãlo vina okuti kuli ungangala ale uyaki, ovo va kasi oku likolisilako oku tetulula ovitangi lombembua, oku ecela, oku lekisa ocisola ndaño ceci omanu vakuavo va va tata lungangala.

Oco o limbuke ndomo alongiso a Yesu a kuatisa oku sanda ombembua, tanga ocipama losapi“Kuata Ombembua Ndaño Luyaki Kuenda Ungangala.”