Anga hẽ Embimbiliya li Pondola Oku Kuatisa Alume va Kuete Asakalalo?
Eci o sokolola komanu va kasi oku liyaka lasakalalo,a pamue o sokolola komunu umue o kuete usumba, omunu umue ka tela oku tunda vohama ale omunu umue okuti olonjanja viosi o vangula lika catiamẽla kovina viu sakalaisa.
Omanu vamue oco va kala, eci va kasi oku liyaka lasakalalo. Pole, vakuakunomuisa va limbuka okuti omanu vamue capiãla enene alume, va siata oku liyaka lekalo liaco lonjila ya litepa. Ekonomuiso limue lia lekisa okuti, alume “va siata oku nyua ovinyua vi koluisa, ovihemba ale olodroga oco va tẽle oku liyaka lasakalalo. Omo liaco, pamue tu sima okuti omunu o kuete ocitangi coku nyua calua ovinyua vi koluisa, pole, o kasi lika oku ci linga omo liasakalalo alua. Eci alume va kuatiwa lasakalo, va kuata onyeño yalua kuenda va tema calua.”
Ocili okuti, alume havosiko okuti lekisa ocituwa caco. Pole ocili ceci okuti, esakalalo ocitangi cimue ci kasi oku kuatiwa lomanu valua koloneke vilo via “tĩla calua halio li koka ohele.” (2 Timoteo 3:1) Anga hẽ, Embimbiliya li pondola oku ku kuatisa oku liyaka lasakalalo?
Olonumbi Viembimbiliya vi Kuatisa Oku Liyaka Lasakalalo
Vembimbiliya mu sangiwa olonumbi via koleliwa, vi pondola oku tu kuatisa eci tu kasi oku liyaka lasakalalo. Kũlĩhĩsa ovolandu atatu.
1. “Ko ka sakalali leteke liya, momo eteke liya li ka kuata asakalalo alio. Eteke leteke li kuete ovitangi vialio.”—Mateo 6:34.
Elomboloko Liocinimbu Eci: Tu kala ciwa nda ka tu sakalala calua lovina vi pondola oku lipita cilo, ale kovaso yoloneke. Olonjanja vialua ovina tu kuetele lavio usumba, ka vi lipiti letu. Kuenda olonjanja vimue, ekalo li pondola pongoloka loku kala ciwa kuenje o komõha.
Seteka ndoco: Ivaluka apuluvi kosimbu okuti, wa kolelele okuti ocina cimue cĩvi ci ka pita love, pole, ka ca lipitile. Noke, seteka oku lekisa esunguluko kuenda kũlĩhĩsa asakalalo o kuete cilo loku sokolola nda asakalalo aco a ka ku nenela ovitangi.
2. “Ndeci utale u lepika utale, haico omunu umue a lepika ekamba liaye.”—Olosapo 27:17.
Elomboloko Liocinimbu Eci: Omanu vakuavo va pondola lika, oku tu kuatisa oku liyaka lasakalalo etu, nda tua va ecelela. Ovo va pondola oku tu ĩha olonumbi vieci tu linga, poku kuama ovolandu va pita ale komuenyo wavo, ale, oku tu kuatisa oku tenda ocitangi caco lonjila yikuavo.
Seteka ndoco: Sokolola komunu umue o pondola oku eca kokuove alungulo awa, ndeci ekamba limue lia liyakavo lovitangi ndevi o kasi oku liyaka lavio. U pulisa ovina vio kuatisa levi ka vio kuatisile eci a liyaka lovitangi viaco.
3. “Yeki kokuaye asakalalo ene osi, momo eye o vu tati.”—1 Petulu 5:7.
Elomboloko Liocinimbu Eci: Suku wa kapako calua omunu una o kasi oku tala ohali. Eye o tu laleka oku likutilila kokuaye loku tukula ovina viosi vi kasi oku tu sakalaisa.
Seteka ndoco: Linga ulala wovina vimue vi kasi oku ku sakalaisa. Noke likutilila ku Suku loku u lomboluila ovitangi viaco kuenda u pinga oco a ku kuatise oku liyaka lavio.
Asakalalo ka a ka Kalako Vali
Emibmbiliya ka lieci lika olonumbi vi tu kuatisa oku liyaka lasakalalo, pole, li likuminyavo okuti kovaso yoloneke, ka tu ka kuata vali asakalalo. Ci ka lingiwa ndati?
Usoma wa Suku u ka malako asakalalo osi. (Esituluilo 21:4) Eci Usoma u ka viala osi, ka tu ka ivaluka vali asakalalo kuenda ovitangi vi tu kokela ohali.—Isaya 65:17.
Eli olio ekalo liokovaso yoloneke, “Suku una eca eca ombembua” a ku yonguila. (Va Roma 16:20) Eye o tu likuminya ndoco: “Momo nda kũlĩha ciwa ovisimĩlo ndu vu kueteli, . . . ovisimĩlo viombembua okuti, haviohaliko oco ngece kokuene ekalo liwa kuenda elavoko limue.”—Yeremiya 29:11.