Elomboloko Kuenda Esilivilo Liepapatiso

1. Nye ci lekisa okuti epapatiso limue pokati kalongiso Embimbiliya a kuete esilivilo lialua?

ECI omunu umue a papatisiwa, tu kuata esanju lialua! Wa kũlĩha hẽ okuti Akristão vokocita catete va kuatavo esanju lialua eci va mola omanu valua oku papatisiwa ko Pendekoste yunyamo 33 K.K? Keteke liaco, upostolo Petulu wa linga ohundo yimue ya lombolola esilivilo lioku papatisiwa. (Ovil. 2:​38, 40, 41) Noke, upostolo Paulu wa soneha okuti, “elongiso liatiamẽla kapapatiso a litepa,” li panga onepa ‘kalongiso atete atiamẽla ku Kristu.’ (Va Hev. 6:​1, 2) Omo liaco, epapatiso limue pokati kalongiso a velapo Embimbiliya kuenda tu sukila oku kũlĩha ciwa elomboloko lialio. Momo lie?

2. Momo lie ci kuetele esilivilo oku kuata elomboloko lia suapo liepapatiso?

² Ndeci ociseveto cimue ca pama ci pondola oku kuatisa onjo yimue oku kolapo, cimuamue haico okuti, oku kuata elomboloko lia suapo liepapatiso kuenda esilivilo lialio, ci pondola oku tu kuatisa oku kuata ekolelo lia pama. Kuenje, ndaño okuti handi ka tua papatisiwile ale tunde eci tua papatisiwa pa pita ale anyamo alua, vosi yetu tu sukila oku kũlĩha esunga lieci epapatiso li kuetele esilivilo lialua. Omo liaco, vocipama cilo tu ka tambulula apulilo akuãimo ndeci: Epapatiso li lomboloka nye kuenda esilivilo lipi olio li kuete? Nye ca kongela voku papatisiwa? Momo lie tu papatisiwila vonduko ya Tate la Mõla kuenda yespiritu sandu?

CECI EPAPATISO LI LOMBOLOKA KUENDA ESILIVILO OLIO LI KUETE

3. Nye epapatiso li lekisa?

³ Epapatiso li lekisa komanu vosi okuti ove wa tava ocili catiamẽla ku Yehova Suku, ku Yesu Kristu, wa likekembela akandu ove kuenda wa linga apongoloko komuenyo oco o vumbe Yehova. Olio li lekisavo okuti ove wa kuata elomboloko liokuti Suku o talavaya la Yesu oco a tu yovole kekandu kuenda kolofa. Handi vali, epapatiso li lekisa okuti, ove wa tumbika omuenyo wove ku Yehova pocakati cohutililo loku situlula onjongole yove yoku u vumba kumue locisoko caye. Elitumbiko kuenda epapatiso liove, ocindekaise cokuti wa fetika ungende umue la Yehova, una u pondola oku kala otembo ka yi pui.

4. Nye ci lomboloka oku iñisiwa vovava? (Talavo ociluvialuvia.)

⁴ Eci omunu umue a papatisiwa, etimba liaye liosi li iñisiwa vovava noke li votuiwamo.a Ci kasi ndu okuti wa kendiwa kuenje o pinduiwa. (Sokisa lukanda ku Va Kol. 2:12.) Epapatiso ocindekaise capongoloko omunu a linga komuenyo waye. Ndamupi? Eci omunu umue a iñisiwa vovava, o lekisa okuti wa liwekapo oku ambata omuenyo a kuatele kosimbu. Eci a votuiwa, o fetika omuenyo umue wokaliye loku tiamisila utima koku linga ocipango ca Suku.

5. Momo lie tu popela okuti alikolisilo oku papatisiwa a sokisiwa loku tunga ocimbaluku? (1 Petulu 3:​18-21)

⁵ Tanga 1 Petulu 3:​18-21. Alikolisilo omunu umue a linga oco a lipongiyile epapatiso, a sokisiwa lalikolisilo Noha a linga oco a tunge ocimbaluku. Nda okuti ndopo wa fetika oku lilongisa Embimbiliya, pamue o sima okuti ka ca lelukile oku linga apongoloko oco o papatisiwe. O pondola oku sima okuti ka ca lelukile oku ci linga, ndeci ca lipita la Noha eci a tunga ocimbaluku. Anga hẽ ci sukila muẽle oku linga alikolisilo alua? Ocili okuti ci sukila alikolisilo ndeci ca lipita la Noha. Suku wa ecele ku Noha olonumbi vi lekisa ndomo a ponduile oku tunga ocimbaluku kuenje Noha, wa sukilile oku kuama olonumbi viaco oco a puluke Ketande. Noha wa tẽla oku tunga ocimbaluku momo wa kolelele ku Yehova, wa pokola kokuaye kuenda Yehova wo kuatisa. “Noha wa linga cosi Suku o handelekele” kuenda ove o pondolavo oku linga cimuamue.—Efet. 6:22.

6. Epapatiso li tu popela ndati?

⁶ Kocinimbu 21, upostolo Petulu wa soneha hati: ‘Epapatiso . . . li vu popeli.’ Ocili okuti oku papatisiwa lika, ka ci tu nenela epopelo ale oku tu yelisa kakandu. Momo, ovina evi vi tẽliwa lika omo liocilumba ca Yesu. (1 Yoa. 1:7) Pole, oku papatisiwa ci kuete esilivilo lialua momo Yehova wa tu handeleka oku ci linga. Epapatiso onjila yimue yoku “pinga ku Suku owanji wutima wa yela.” Kuenje, Yehova o ka sanjukila oku tambulula epingilo liaco poku ecela akandu etu pocakati cocilumba ca Yesu. Omo liaco, epapatiso ‘li tu popela’ kuenda li ecelela okuti tu kuata omuenyo ko pui.

OVINA VIA KONGELA VOKU PAPATISIWA

7. Epapatiso li sukila oku lingiwa ndati?

⁷ Ndomo tua lilongisa, oco omunu umue a papatisiwe o sukila oku iñisiwa vovava. Pole, Embimbiliya ka li lombolola ovina vikuavo vi lekisa ndomo epapatiso li sukila oku lingiwa. Pole, olio li eca olonumbi vialua vi tu kuatisa oku kũlĩha ovituwa tu sukila oku lekisa vepuluvi liepapatiso. Ndeci, Embimbiliya li tu kuatisa oku kũlĩha ovowalo vana va ka papatisiwa va sukila oku wala kuenda ovituwa omanu vana va kasi oku tala va sukila oku lekisa. (1 Va Kor. 14:40; 1 Tim. 2:9) Olonjanja vialua ukulu umue wekongelo eye o kuete ocikele coku papatisa, pole, ka tu eci ekemãlo komunu o tambula ocikele caco. (1 Va Kor. 1:​14, 15) Handi vali, epapatiso li kuete esilivilo lialua ndaño okuti ku kala omanu valua va tala ale sio.—Ovil. 8:36.

8. Apulilo api a siata oku lingiwa ku vana va ka papatisiwa kuenda momo lie? (Ovilinga 2:​38-42) (Talavo ociluvialuvia.)

⁸ Embimbiliya li lekisa okuti tu sukila oku ‘sapula ekolelo lietu ku vakuetu, lina li tuala kepopelo’ ale oku situlula ekolelo lietu. (Va Rom. 10:​9, 10) Etu ka tu ci lingi lika eci tu kundila omanu vakuavo, pole, tu ci linga ca piãla enene keteke liepapatiso lietu, momo epapatiso enanga limue li kuete esilivilo lialua oco tu popeliwe! Eli olio esunga lieci okuti, ku lingiwa apulilo avali ku vana va ka papatisiwa. Epulilo liatete hati: “Wa likekembela hẽ akandu ove loku litumbika ku Yehova kuenda wa tava esokiyo liaye lioku yovola pocakati ca Yesu Kristu?” Epulilo eli li tu ivaluisa ohundo Petulu a linga ko Pendekoste kuenda li kuete ocimãho coku kũlĩha apongoloko omunu a linga oco a pitĩle kepapatiso. Epulilo liavali li popia hati: “Anga hẽ, ca ku lomboloka ciwa okuti, elitumbiko liove kuenda epapatiso, ondimbukiso yokuti Wumbangi ya Yehova kuenda wa tiamẽla kocisoko caye?” Epulilo eli li tiamisiwila kovina omunu a ka linga. Eye o likuminya oku kapako olonumbi vi eciwa locisoko ca Yehova kuenda oku fendela Yehova kumue la vamanji. Eci oco omanu va kala kocipito co Pendekoste va linga noke lioku papatisiwa. (Tanga Ovilinga 2:​38-42.) Vana va tambulula lutima wosi okuti oco kapulilo a-a avali, va pondola oku papatisiwa.

9. Nye vosi yetu tu sukila oku linga oco tu sanjuise Yehova?

⁹ Citava okuti osimbu kua lilongisile ocili, wa kala omunu umue uwa kuenda lalimue eteke wa lingile ekandu limue linene. Ale pamue, olonjali viove Akristão kuenda via ku kuatisa oku sola Yehova. Anga hẽ, o sukila vali oku likekembela kuenda oku papatisiwa oco o sanjuise Suku? Ocili okuti oco. Momo vosi yetu tua citiwa vekandu kuenje eci ci tu tateka oku kala akamba va Suku. (Osa. 51:5) Omo liaco, osimbu tu kũlĩha Yehova, tu sukila oku pitisa kovaso oku linga ocipango caye. Tu sukilavo oku likekembela omo liekalo liomuenyo wetu tu ambatele kosimbu, kuenda oku ambata omuenyo umue u sanjuisa Isietu wo kilu. Poku ci linga, tu pondola oku papatisiwa.—Ovil. 3:19.

10. Nye ove o sukila oku linga ndaño okuti wa papatisiwa ale ketavo likuavo?

¹⁰ Citava okuti kosimbu eci wa kala vetavo likuavo, wa papatisiwile ale. Pole, cilo o sukila oku papatisiwa oco o kale Ombangi ya Yehova. Momo lie? Momo kotembo yaco kua kuatele elomboloko lia suapo liocili catiamẽla ku Yehova Suku kuenda ku Yesu. Handi vali, ndaño okuti wa lingile ale ohutililo yimue yelitumbiko ku Suku, ohuminyo yove ka ya kunamẽlele kelomboloko lia suapo liocipango caye. Upostolo Paulu eci a kala ko Efeso, wa sanga alume vamue okuti va papatisiwile ale pole, ka va kuatele elomboloko lia suapo lialongiso Akristão. Omo liaco, alume vaco va sukilile oku papatisiwa vali.b (Ovil. 19:​1-5) Cimuamue haico okuti koloneke vilo, Yehova o tava lika epapatiso liomunu umue, nda okuti omunu waco o kuete ukũlĩhĩso wa suapo wocipango caye.

“VONDUKO YA TATE LA MÕLA KUENDA YESPIRITU SANDU”

11. Nye ci lomboloka oku papatisiwa “vonduko ya Tate la Mõla kuenda yespiritu sandu?” (Mateo 28:​18-20)

¹¹ Yesu wa handeleka okuti olondonge viaye viokaliye, via sukilile oku papatisiwa “vonduko ya Tate la Mõla kuenda yespiritu sandu.” (Tanga Mateo 28:​18-20.) Nye eye a yonguile oku popia? Vembimbiliya ondaka yokuti “onduko,” yi tiamisiwila kovituwa viomunu umue. Yi pondolavo oku tiamisiwila kocikele kuenda kunene omunu waco a kuete. (Sokisa lelivulu lia Mateo 10:41) Omo liaco, eci tu papatisiwa vonduko ya Yehova kuenda ya Yesu, tu lekisa okuti ovo va kuete omoko kuenda unene woku tu sapuila ovina tu sukila oku linga. Kuenda eci tu papatisiwa vonduko yespiritu sandu, tu limbuka ocikele olio li kuete lioku tu songuila. Tu konomuisi ndomo tu pondola oku ci linga.

12. Voku papatisiwa vonduko ya Tate mua kongela nye? (Esituluilo 4:11) (Talavo oviluvialuvia.)

¹² Oku papatisiwa vonduko ya Tate. Voku ci linga, mua kongela oku kolela okuti Yehova eye Isietu wo kilu, una wa tu ĩha omuenyo. Eye Suku Ukuonene Wosi, una wa lulika ovina viosi. (Tanga Esituluilo 4:11.) Omo tua kolela okuti eye o yevelela olohutililo vietu, tu tukula onduko yaye poku likutilila kuenda poku sapela lomanu catiamẽla kokuaye. (Osa. 65:2) Pole, voku papatisiwa vonduko ya Tate, mua kongela vali ocina cikuavo. Omanu vana va yevelela Petulu ko Pendekoste, va kũlĩhĩle ale Yehova. Pole, oku upisa keteke liaco, ovo va sukilile oku kuata elomboloko liokuti Yehova wa laikele oku eca lika omuenyo ko pui pocakati ca Yesu Kristu. Cimuamue haico tu sukila oku linga.—Va Rom. 5:8.

13. Tu papatisiwa ndati vonduko Yomõla? (Talavo oviluvialuvia.)

¹³ Oku papatisiwa vonduko Yomõla. Tua kolela okuti Yesu omõla wongunga wa Suku. Yesu eye “onjila” kuenda pocakati caye, tu pondola oku kala akamba va Yehova. (Yoa. 14:6) Etu tua kolelavo okuti Yesu eye Upopeli wetu. Eye wa tu fila oco tu kuate omuenyo ko pui. Oku kũlĩha ovina viaco, ci tu vetiya oku kuama ongangu yaye eteke leteke okuti ka tu ci lingi lika eci tu papatisiwa. (1 Yoa. 2:6) Ndeci Yesu a linga, etu tu lekisa ombili kupange woku kunda kuenda ka tu ecelela okuti ocina cimue ci tu tateka oku ci linga. (Luka 4:43) Toke muẽle tua likapelako oku liyaka lalambalalo oco tu vumbe Yehova lekolelo. (2 Tim. 3:12) Etu tua sumbila Yesu “utue wekongelo.” Omo liaco, tu pokola lesanju kolonumbi via vana eye a nõla oco va songuile ekongelo kuenda oku tata olondonge viaye.—Va Efe. 4:​8, 11, 12; 5:23.

14. (a) Tu papatisiwa ndati vonduko yespiritu sandu? (Talavo oviluvialuvia.) (b) Apapatiso api akuavo olombuavekua vi kuete? (Tala okakasia losapi hati: “Apapatiso Akuavo Olombuavekua vi Kuete.”)

¹⁴ Oku papatisiwa vonduko yespiritu sandu. Etu tu tava kocili catiamẽla kespiritu sandu. Tua kũlĩha okuti olio hamunuko kuenda ka li pangi onepa kelongiso lia Suku Umosi Muvatatu, pole, ongusu ya pama ya Suku. Tua kũlĩhavo okuti, Yehova wa talavaya lespiritu sandu oco a kuatise ovaprofeto oku kũlĩha ovina va popia kuenda oku kuatisa asonehi Vembimbiliya oco va sonehe ovina Eye a yonguile oku popia. (2 Pet. 1:​20, 21) Kuenda tua siata oku likolisilako oco ka tu ka linge akandu anene, momo tua kũlĩha okuti eci ci pondola oku tu tateka kuenda oku tatekavo ekongelo oku tambula espiritu sandu.—Va Efe. 4:30.

15. Nye wa nõlapo oku linga?

¹⁵ Nda okuti ove wa papatisiwa ale, nõlapo oku kuata elomboloko liesunga lieci epapatiso li kuetele esiliviloc kuenda tẽlisa ohuminyo wa linga ku Yehova eci wa litumbika kokuaye loku papatisiwa. Pole, nye ci popiwa nda okuti handi kua papatisiwile? Anga hẽ kuli cimue ci kasi oku ku tateka? Vocipama cikuãimo, tu ka konomuisa ovina tu pondola oku linga oco tu amameko oku kula toke kepapatiso.