Ove hẽ O civaluka?

Ove hẽ wa tanga lutate ovolandu Wutala Wondavululi wunyamo ulo? Nda oco, likolisilako oku tambulula apulilo akuãimo:

Nye ci tu vetiya oku eca ulamba ku Yehova?

Tu eca ku Yehova ulamba omo liesumbilo kuenda ocisola tu u kuetele. Handi vali, tu yongola okuti omanu vakuavo vo kũlĩha.—w25.01, kem. 3.

Tu lekisa ndati ocituwa coku ecela eci omunu umue a tu sumuisa?

Ocili okuti tua kapako ovisimĩlo vietu; Pole, eci tu likolisilako oku yuvula ocikumbiti, ci tu kuatisa oku yuvula oku kuata esumuo.—w25.02, kem. 15-16.

Momo lie ondonge Marko ongangu yimue yiwa ku vamanji akuenje?

Marko wa tava lutima wosi ocikele cimue cupange. Citava okuti eye wa sumuile omo liocitangi cimue, pole ka li wekelepo. Marko wa enda oku kala la Paulu kuenda la vamanji vakuavo va kala ale oku vumba Yehova vokuenda kuanyamo alua.—w25.04, kem. 27.

Nye Yesu a yonguile oku popia eci a likutilila hati: “Nda va longisa onduko yove?” (Yoano 17:26)

Olondonge viaye via kũlĩhĩle ale onduko ya Suku. Pole, Yesu wa vi kuatisa oku kũlĩha ciwa Yehova, oku kongelamo ocipango caye catiamẽla kongongo, komanu, ovina eye a linga ale, evi a laikele oku linga kuenda ovituwa viaye.—w25.05, kem. 20-21.

Nda tua lekisa ocituwa cumbombe, ovina vipi tu ka limbuka?

Tu ka limbuka okuti ka tua kũlĩhĩle ovina viosi. Ndeci, ka tua kũlĩhĩle eteke esulilo lioluali lulo li keya kuenda ndomo Yehova a ka endisa ovina. Handi vali, ka tua kũlĩhĩlevo ovina vi ka lipita letu hẽla ale oku kuata elomboloko lia suapo konjila ndomo Yehova a tu kũlĩha ciwa.—w25.06, kem. 15-18.

Nye ci pondola oku tu kuatisa oku upa esilivilo poku tanga ocipama cimue ale poku yevelela ohundo yimue yowiñi?

Tu pondola oku lipula ndoco: ‘Ovovangi api a tukuiwa oco a vetiye omanu? Anga hẽ kua tukuiwa ocindekaise cimue ndi pondola oku talavaya laco eci ndi longisa ocili komunu umue? Helie okuti pamue o ka sola ulandu waco?’—w25.07, kem. 19.

Nye tu lilongisila catiamẽla kongecelo ya Yehova konjila ndomo a tata Daviti?

Daviti wa lingile ovina vialua vĩvi, pole, omo okuti wa likekembela lutima wosi, Yehova wo wecela. (1 Olos. 9:​4, 5) Eci Yehova a ecela akandu etu, ka tiamisila utima kakandu ana eye a ecela ale kuenda ka talavaya lakulueya aco, oco a tu pise kovaso yoloneke.—w25.08, kem. 17.

Nye o pondola oku linga nda omunu o kasi oku longisa Embimbiliya ka kasi oku kuata elomboloko lietosi limue?

Nda okuti omunu o kasi oku longisa Embimbiliya ka kasi oku kuata elomboloko lietosi limue, amisiko lelingiso kuenda sokiya oku sapela etosi liaco vepuluvi likuavo.—w25.09, kem. 24.

Embimbiliya li popia eci catiamẽla ‘kunene wekandu.’ (Va Hev. 3:13) Eci ci lomboloka nye?

Ekambo lietu lioku lipua, ka li tu kokela lika oku linga ovina ka via sungulukile, pole, li tu kokelavo oku kuata atatahãi atiamẽla kocisola Yehova a tu kuetele.—w25.10, kem. 16.

Ovina vipi vitatu vi ka tu kuatisa oku likutilila ku Yehova lutima wosi?

(1) Sokolola lutate kovituwa via Yehova. (2) Sokolola kovina o ka popia, ndeci esukila tu kuete lioku ecela omunu umue. (3) Ku ka kuate onjanga. Poku ci linga, ci ka ku ecelela oku situlula ovisimĩlo viove viondongosi.—w25.10, kem. 19-20.

Nye tu sukila oku linga oco tu kuatise vamanji va kuka?

Tu pondola oku va nyula, oku va telefonalela kuenda oku va sindikila kosipitali. Handi vali, tu pondolavo oku talavaya kumue lavo kolonjila via litepa viupange woku kunda.—w25.11, kem. 6-7.

Olonumbi vipi vi pondola oku kuatisa vana va laika oku kuela oku eca esivayo ku Yehova keteke liuvala wavo?

Oku pokola kovihandeleko viombiali, oku likolisilako oco okuti uvala u situlula epako liespiritu lia Suku, oku lekisa esuluviko konjila yoku wala kuenda yoku liposuisa, oku yuvula ovituwa ka vi li kuata lolonumbi Viembimbiliya kuenda oku sapela lonjila yimue yi lomboloka haiyo yi lekisa esumbilo poku sokiya uvala.—w25.12, kem. 21-24