Ene a Vamanji wa Kuki—vu Kuete Esilivilo Lialua Vekongelo
“Ndi komõha calua poku sokolola ovina nda enda oku linga eci nda kala umalẽhe. Pole, cilo omo lioku kuka, si tẽla vali oku linga ovina nda lingaile kosimbu.”—Manji umue ukãi o tukuiwa Connie, o kuete 83 kanyamo.
Citava okuti omo lioku kuka, ku tẽla vali oku linga ovina vialua wa lingaile kosimbu. Ndaño okuti o kasi ale oku vumba Yehova vokuenda kuanyamo alua, pamue o yeva esumuo eci o sokisa ovina wa lingaile kosimbu levi o kasi oku linga cilo. Nda okuti wa siata oku liyeva ndoco, nye ci pondola oku ku kuatisa oku liyaka lovisimĩlo viaco?
SOKOLOLA KOVINA YEHOVA A KU YONGUILA
Lipula ndoco: ‘Nye Yehova a yongola okuti oco ndi linga?’ Ove o pondola oku sanga elembeleko kolondaka vi sangiwa kelivulu Liesinumuĩlo 6:5, kuna ku popia hati: “Sola Yehova Suku yove lutima wove wosi, lomuenyo wove wosi kuenda longusu yove yosi.”
Ndomo ca lekisiwa vocinimbu eci, Yehova o yongola okuti vana va kuka vo vumba lutima wavo wosi, lomuenyo kuenda longusu yavo yosi. Eci ci ka va kuatisa oku yuvula oku sokisa ovina va linga levi omanu vakuavo va kasi oku linga ale ovina va enda oku linga eci va kala amalẽhe.
Sokolola ndoco: Eci wa kala umalẽhe, ovina vipi wa lingila Yehova? Afendeli valua va Yehova okuti cilo va kuka, va pondola oku popia okuti va likolisilako calua kupange wa Yehova. Kuenda citava okuti ove wa lingavo cosi ca kala vepondolo liove kotembo yaco. Nye o pondola oku lingila Yehova koloneke vilo? Pole, cilo ndaño okuti ekalo liove lia pongoloka, citava okuti handi wa siata oku likolisilako oku linga cosi ci kasi vepondolo liove kupange wa Yehova. Nda wa tenda ovina lonjila ndeyi, o ka limbuka okuti toke cilo, o kasi oku likolisilako kupange wa Yehova ndeci wa lingaile kosimbu. Wa vumba Yehova longusu yove yosi kosimbu kuenda cilo, o kasi oku amamako oku ci linga.
Eci wa kala umalẽhe wa likolisilako oku linga cosi o tẽla kupange wa Yehova, cilo, ndaño loku kuka, o kasivo oku likolisilako oku linga ocina cimuamue
OMANU VAKUAVO VA PONDOLA OKU KUATISIWA CALUA LULANDU WOMUENYO WOVE
Yuvula oku tiamisila calua utima kovina ku pondola oku linga vali omo lioku kuka, pole, sokolola kapuluvi alua o kuete oku kuatisa omanu vakuavo. Cilo, omo okuti wa kuka, o pondola oku linga ovina vimue okuti eci wa kala umalẽhe ka ca tavele oku vi linga. O pondola oku linga ovina vikuãimo ndeci:
Lomboluila komanu vakuavo ovina wa lilongisa vokuenda kuomuenyo wove. Kũlĩhĩsa ovina Embimbiliya li popia kovinimbu vikuãmo:
Soma Daviti: “Nda kala umalẽhe kuenje cilo nda kuka, pole, sia la mola ukuesunga okuti wa yandulukiwa, ndaño omãla vaye oku sanda okulia.”—Osa. 37:25.
Yehosua: “Kaliye tali! Ndopo ndi fa kuenda ene wa kũlĩhi ciwa lutima wene wosi lomuenyo wene wosi okuti, layimue ondaka ya kambapo pokati kolohuminyo viosi viwa vina Yehova Suku yene a popia kokuene. Viosi via tẽlisiwa kokuene. Layimue ondaka pokati kavio ya kambapo.”—Yeh. 23:14.
Citava okuti wa popele ale olondaka vimuamue oco o pamise omanu vakuavo. Daviti kuenda Yehosua va popia ovina via lipita komuenyo wavo. Omo okuti afendeli vaco vakuekolelo, va mola kuenda va yeva ovina vialua vokuenda kuanyamo, ovina ovo va popia via kuata esilivilo lialua.
Nda okuti o kasi ale oku vumba Yehova vokuenda kuanyamo alua, o pondolavo oku vangula catiamẽla kovina Yehova a ku lingila, levi a lingila omanu vakuavo. Ndeci, ivaluka hẽ epuluvi limue wa mola ndomo Yehova a kuatisa afendeli vaye lonjila yimue yi likasi? Nda oco, sapuilako omanu vakuavo catiamẽla kulandu waco! Oku lombolola ovolandu aco ci pondola oku ku kuatisa. Handi vali, eci vamanji va yevelela ovolandu ove, ekolelo liavo li pamisiwa calua kuenda va ka vetiyiwa oku amamako oku vumba Yehova.—Va Rom. 1:11, 12.
Onjila yikuavo yoku pamisa omanu vakuavo, oku enda enda kolohongele viekongelo Vonjango Yusoma olonjanja viosi ekalo liove li ku ecelela. Nda wa ci linga, o ka pamisa vamanji kuenda ove muẽle o ka pamisiwavo. Manji Connie wa tukuiwa ale wa popia hati: “Oku enda enda kolohongele Vonjango Yusoma, ca siata oku ndi kuatisa oku yuvula esumuo. Sia siatele oku yeva esumuo omo liocisola vamanji va siata oku ndi lekisila Vonjango Yusoma. Ndi lekisa olopandu ku vamanji poku va ĩha olombanjaile vimue. Handi vali, nda siatavo oku likolisilako oku panga onepa kovopange Usoma kumue la vamanji.”
YEHOVA WA KAPAKO CALUA OVINA VIOSI WA SIATA OKU U LINGILA
Vembimbiliya mu sangiwa ovolandu omanu valua va soliwile la Yehova ndaño okuti ka va ponduile oku linga ovina viosi va yonguile kupange waye. Ndeci, kũlĩhĩsa ulandu wu Isareli umue o tukuiwa Simeone okuti, kotembo eci Yesu a citiwa eye wa kukile ale. Eci Simeone a endaile vonembele, citava okuti eye wa enda oku mola amalẽhe oku linga ovopange alua a kuete esilivilo vonembele. Pole, nye ci popiwa catiamẽla kokuaye? Omo lioku kuka, pamue Simeone wa simĩle okuti ka kuatele vali esilivilo lialua kovaso a Yehova, momo ka ponduile vali oku linga ovopange alua vonembele ndeci amalẽhe vaco. Pole, Yehova wo tendele lonjila yimue ya litepa. Yehova wa limbuka okuti Simeone wa kala omunu umue ‘ukuesunga haeye wa enda oku lekisa esumbilo kokuaye’ kuenje eye wa eca ku Simeone esumũlũho lioku mola Yesu. Toke muẽle Yehova wa talavaya la Simeone oco a situlule ocitumasuku cimue catiamẽla ku Mesiya wa likuminyiwile! (Luka 2:25-35) Eci ci lekisa okuti, Yehova ka tiamisilile utima kutunga wa Simeone, pole, wa limbuka okuti Simeone wa kala ulume umue ukuekolelo kuenda “espiritu sandu lia kala laye.”
Yehova wa eca ku Simeone esumũlũho lioku mola Yesu kuenda oku situlula ocitumasuku cimue catiamẽla ku Mesiya wa likuminyiwile
Kolela okuti Yehova wa kapakovo upange wosi o kasi oku u lingila, ndaño okuti ku pondola oku linga ovina vialua ndeci wa lingaile kosimbu. Kovaso a Yehova, ombanjaile yosi yi taviwa laye ‘momo eye o lavoka okuti, omunu eca eci a pondola, okuti haceciko ka pondola.’—2 Va Kor. 8:12.
Eci ci lomboloka okuti o sukila oku tiamisila utima kovina o pondola oku linga cilo. Ndeci, kolonepa vipi viupange woku kunda o pondola oku panga onepa ndaño muẽle vokuenda kuotembo yimue yitito? Anga hẽ o pondola oku pamisa vamanji poku va telefonalela ale poku va tumisa ovikanda? Ivaluka okuti ovilinga vitito viocisola, vi pondola oku pamisa calua vamanji, capiãla enene nda ovio vi lingiwa lomunu umue o kasi ale oku vumba Yehova vokuenda kuanyamo alua.
Ndaño lovitangi viuhayele, vana va kuka handi va pondola oku linga calua kupange wa Yehova. Kũlĩhĩsa ulandu umue wa lipita vo Afrika u sangiwa vokakasia losapi hati: “Manji Umue Ukãi wa Talavaya Lembimbiliya Oco a Kuatise Oku Popela Omuenyo Womunu Umue.”
Ene a vamanji wa kuki, ivaluki okuti ongangu yene yiwa yoku vumba Yehova vokuenda kuanyamo alua kuenda yoku amamako oku ci linga toke cilo, yi pondola oku pamisa omanu valua. Ene vungangu yimue yiwa yoku pandikisa kuenda koleli okuti, “Suku hokuanyako okuti ivalako upange wene, locisola wa lekisi konduko yaye koku vumba olosandu, loku amamako oku va vumba.”—Va Hev. 6:10.
TIAMISILI UTIMA KOKU KUATISA OMANU VAKUAVO
Akonomuiso a lekisa okuti, alume lakãi va kuka okuti va tiamisila utima koku kuatisa omanu vakuavo, va kuete uhayele uwa, va sokolola ciwa kuenda va pondola oku kala komuenyo vokuenda kuanyamo alua.
Ocili okuti oku lingila ovina viwa omanu vakuavo ka ci maliko ovitangi viosi vi tundilila koku kuka. Usoma wa Suku owo lika u ka malako ovitangi viosi vi tundilila koku kuka kuenda olofa tua piñala ku Adama la Eva.—Va Rom. 5:12.
Pole, upange o lingila Yehova okuti mua kongela oku kuatisa omanu vakuavo oco vo kũlĩhe, u pamisa elavoko liove kuenda u pondolavo oku ku kuatisa oku kuata uhayele uwa cilo. A vamanji wa kuki, kũlĩhi okuti Yehova wa kapako calua ovina viosi wa siati oku u lingila kuenda vamanji vosi vekongelo va siatavo oku kuatisiwa longangu yene yekolelo.