Olonjanja Viosi Tukuli Vakuene Volohutililo Viene

1. Tua kũlĩha ndati okuti olohutililo vietu vi kuete esilivilo ku Yehova?

OHUTILILO ombanjaile yimue yi komõhisa. Yehova wa eca ovikele vimue kovangelo. (Osa. 91:11) Eye wa ecavo Komõlaye ovikele vialua. (Mat. 28:18) Anga hẽ, Yehova wa eca ocikele coku yevelela olohutililo vietu komunu ukuavo? Ocili okuti sio. Yehova ‘Ukuakuyeva ohutililo.’ (Osa. 65:2) Eye wa likapelako oku yevelela olohutililo vietu.

2. Momo lie upostolo Paulu ongangu yiwa yoku tukula vakuavo volohutililo?

² Tu pondola oku lianja poku sapela la Yehova catiamẽla kovina viosi vi tu sakalaisa. Pole, tu sukilavo oku tukula vakuetu volohutililo vietu. Upostolo Paulu wa eca ongangu yiwa konepa eyi. Eye wa sonehela ekongelo lio ko Efeso hati: “Ndamamako oku vu tukuli volohutililo viange.” (Va Efe. 1:16) Paulu wa endavo oku tukula olonduko viomanu vamue volohutililo viaye. Ndeci, eye wa sapuila Timoteo hati: “Ndi pandula Suku, . . . lalimue eteke ndi liwekapo oku ku ivaluka vapingilo ange uteke lutanya.” (2 Tim. 1:3) Ekalo liomuenyo lia Paulu ka lia lelukile; eye wa kuatele ovitangi kuenda wa enda oku likutilila catiamẽla kovitangi viaco. (2 Va Kor. 11:23; 12:​7, 8) Pole, eye wa endavo oku sanda otembo yoku tukula vakuavo volohutililo viaye.

3. Momo lie pamue tu ivalelako oku tukula vakuetu volohutililo?

³ Ocili okuti olonjanja vimue, tu ivalako oku tukula vakuetu volohutililo vietu. Momo lie? Manji umue ukãi o tukuiwa Sabrinaa wa lombolola esunga limue. Eye hati: “Omuenyo voluali lulo, lueyuka asakalalo. Kuenje tu pondola oku tiamisila calua utima kovitangi vietu muẽle loku likutilila lika catiamẽla kasakalalo etu.” Anga hẽ eci ca lipitile ale love? Nda oco, ocipama cilo, ci ka ku kuatisa (1) oku lilongisa esunga lieci ci kuetele esilivilo oku tukula omanu vakuavo volohutililo kuenda (2) oku kũlĩhĩsa olonumbi vimue vi pondola oku ku kuatisa oku ci linga.

MOMO LIE CI KUETELE ESILIVILO OKU TUKULA VAKUETU VOLOHUTILILO?

4-5. “Unene” upi olohutililo vietu vi kuete komanu vakuavo? (Tiago 5:16)

⁴ Oku tukula vakuetu volohutililo ci “kuete unene” walua. (Tanga Tiago 5:16.) Olohutililo vietu vi pondola oku kuatisa omunu umue. Yesu wa kũlĩhĩle okuti olohutililo vi kuete esilivilo komuenyo womunu umue. Poku kũlĩha okuti upostolo Petulu wa laikele oku u likala, eye wa popia hati: “Nda siata oku ku likutililako okuti ekolelo liove ka li hongua.” (Luka 22:32) Paulu wa kũlĩhĩlevo unene olohutililo vi kuete. Eci eye a kapiwile vokayike ko Roma, wa sonehela Filemone hati: “Nda kolela okuti, omo liolohutililo viene ndi tiuka vali kokuene.” (File. 22) Eci oco muẽle ceya oku lipita. Noke liotembo yimue, Paulu wa yovuiwa vokayike kuenje wa fetika vali oku kunda.

⁵ Eci ka ci lomboloka okuti, olohutililo vietu vi pondola oku kisika Yehova oku linga ocina cimue eye ka yongola. Yehova wa kapako calua asakalalo afendeli vaye kuenda olonjanja vimue, o nõlapo oku linga ovina ovo va pinga. Oku ci kũlĩha, ci tu kuatisa oku likutilila ku Yehova lutima wosi catiamẽla kesakalalo limue tu kuete kuenda oku eca kokuaye esakalalo liaco.—Osa. 37:5; tala 2 Va Korindo 1:11.

6. Ndomo ca lekisiwa kovolandu a tukuiwa, oku tukula vakuetu volohutililo vietu ci tu kuatisa ndati? (1 Petulu 3:8)

⁶ Oku tukula vakuetu volohutililo vietu ci tu kuatisa oku lekisa “ocikembe.” (Tanga 1 Petulu 3:8.) Omunu umue ukuacikembe, wa kapako ohali ya vakuavo kuenda o lekisa onjongole yoku kuatisa. (Mar. 1:​40, 41) Oku tukula vakuetu volohutililo vietu, ci nena asumũlũho. Ndeci, ukulu umue wekongelo o tukuiwa Michael wa popia hati: “Eci ndi likutilila catiamẽla kasukila a vakuetu, ndi kuata elomboloko lia suapo lieci va kasi oku liyaka laco kuenje ocisola ndi va kuetele ci livokiya. Handi vali, ukamba ndi va kuetele u pamisiwa calua ndaño okuti ovo ka va ci kũlĩhĩle.” Ukulu ukuavo wekongelo o tukuiwa Richard wa popia hati: “Eci tu tukula omunu umue volohutililo vietu, tu vetiyiwa oku linga cimue oco tu u kuatise. Poku ci linga, tu panga onepa ketambululo liohutililo yaco.”

7. Oku tukula vakuetu volohutililo vietu, ci tu kuatisa ndati oku tenda ovitangi vietu lonjila yimue ya sunguluka? (Va Filipoi 2:​3, 4) (Talavo oviluvialuvia.)

⁷ Oku tukula vakuetu volohutililo vietu, ci tu kuatisa oku tenda ovitangi vietu lonjila yimue ya sunguluka. (Tanga Va Filipoi 2:​3, 4.) Tu kasi voluali lumue lua vialiwa la Satana. Eli olio esunga lieci okuti, vosi yetu tua siata oku liyaka lovitangi. (1 Yoa. 5:19; Esit. 12:12) Oku kuata ocituwa coku tukula vakuetu volohutililo vietu, ci tu kuatisa oku ivaluka okuti, “vamanji vosi voluali va kasi oku tala ohali yimuamue.” (1 Pet. 5:9) Ukundi umue wotembo yosi o tukuiwa Katherine wa popia hati: “Oku tukula vakuetu volohutililo ci ndi kuatisa oku ivaluka okuti, hameko lika ndi kasi oku liyaka lovitangi. Ci ndi kuatisavo oku yuvula oku tiamisila calua utima kovitangi viange muẽle.”

OVO VA SUKILA OKU TUKUIWA VOLOHUTILILO VIETU

8. Ovimunga vipi viomanu tu pondola oku tukula volohutililo vietu?

⁸ Velie tu sukila oku tukula volohutililo vietu? Tu pondola oku tukula volohutililo vietu ovimunga vimue viomanu. Ndeci, vana va kuete ovitangi viuhayele, amalẽhe vana va siata oku kisikiwa oku linga ovina ka via sungulukile kosikola, ale vana va kasi oku liyaka lovitangi vioku kuka. Valua pokati ka vamanjetu, va siatavo oku liyaka lelambalalo vepata ale liombiali. (Mat. 10:​18, 36; Ovil. 12:5) Omo liovitangi viopulitika vamanji vamue va kisikiwa oku siapo olonjo viavo. Vakuavo va kasi oku liyaka lovitangi omo liovilunga. Citava okuti ka tua la mola vamanji vaco polo la polo. Pole, eci tu va tukula volohutililo vietu, tu lekisa okuti tu kasi oku pokola kocihandeleko ca Yesu coku “lisola pokati.”—Yoa. 13:34.

9. Momo lie tu sukilila oku tukula volohutililo vietu vamamji vana va kuete ocikele coku songola vocisoko ca Yehova kumue lakãi vavo?

⁹ Tu pondolavo oku tukula volohutililo vietu vamanji vana va kuete ocikele coku songola vocisoko ca Yehova. Pokati ka vamanji vaco, mua kongela vamanji va panga onepa Kosungu Yolombangi Via Yehova, oloñuatisi viavo, Ocimunga Cakulu vo Filiale, vamanji va kuete ocikele coku songola oloseketa vio Betele, vamanji vakuakunyula akongelo, akulu vekongelo kuenda oloñuatisi viekongelo. Vamanji vaco va talavaya calua oco va tu tate kuenda valua pokati kavo va siata oku liyaka lasakalalo omuenyo. (2 Va Kor. 12:15) Ndeci, manji umue ukuakunyula akongelo o tukuiwa Mark wa popia hati: “Ocitangi cimue nda siata oku liyaka laco oku kala ocipãla lolonjali viange. Ovo va kuka ale kuenda va kuete ocitangi coku vela. Nda kũlĩha okuti manjange ukãi kuenda ulume waye, va siata oku va tata ciwa. Pole, ci ndi sumuisa calua omo okuti si tẽla oku linga calua oco ndi kuatise olonjali viange.” Ocili okuti halonjanja viosiko tua kũlĩha ovitangi vamanji vaco va siata oku liyaka lavio. Pole, ci kuete esilivilo lialua oku va tukula volohutililo vietu. (1 Va Tes. 5:​12, 13) Tu pondolavo oku tukula akãi vavo, momo ekuatiso liavo lia siata oku ecelela okuti vamanji vaco vamamako kocikele cavo.

10-11. Tua kũlĩha ndati okuti Yehova o sanjuka eci tu tukula vamanji vosi volohutililo vietu?

¹⁰ Ndomo tua ci konomuisa, olonjanja vimue tua siata oku tukula volohutililo vietu ovimunga vialua via vamanji. Ndeci, ndaño okuti ka tu tukula onduko ya manji umue, pole, tu pondola oku pinga ku Yehova oco a kuatise vamanji va kasi vokayike ale vana va fisa vangandiavo. Ukulu umue wekongelo o tukuiwa Donald wa popia hati: “Tu kuete vamanji valua va kasi oku liyaka lovitangi. Omo liaco, poku likutilila tu pinga ku Yehova oco a kuatise vosi va kasi oku tala ohali.”

¹¹ Anga hẽ olohutililo viaco vi sanjuisa Yehova? Ocili okuti oco! Etu ka tua kũlĩhĩle ovina viosi vamanjetu va sukila. Omo liaco, ca sunguluka oku pinga ku Yehova oco a kuatise vamanji vosi. (Yoa. 17:20; Va Efe. 6:18) Olohutililo viaco, vi eca uvangi wokuti tu ‘sole vamanji vosi.’—1 Pet. 2:17.

OKU TUKULA OMUNU UMUE VOHUTILILO

12. Oku kala vakuakululuvala lutate ci tu kuatisa oku linga nye?

¹² Kala ukuakululuvala lutate. Poku likutilila, ka tu tukula lika ocimunga cimue ca vamanji, pole, tu sukilavo oku tukula onduko yomunu umue. Anga hẽ vekongelo o kasi, muli manji umue o kasi oku liyaka luvei umue ka u kuete esaku? Muli hẽ umalẽhe umue wa sumua omo lielambalalo a kasi oku liyaka lalio kosikola? Wa kũlĩha hẽ onjali yimue yi kasi oku likolisilako oku pindisa omãla vaye lika liaye “ndomo ci likuata leci Yehova a popia?” (Va Efe. 6:4) Nda wa kala ukuakululuvala lutate, o ka tẽla oku lekisa ohenda ku vakuene kuenje ci ka ku vetiya oku va tukula volohutililo viove.b—Va Rom. 12:15.

13. Nye ci ka tu kuatisa oku tukula volohutililo vietu olonduko via vamanji ka tua li kũlĩhĩle polo la polo?

¹³ Kongela manji umue vohutililo yove poku tukula onduko yaye. Tu pondola oku ci linga ndaño muẽle la vamanji vana ka tua li kũlĩhĩle polo la polo. Ndeci, vamanji valua vo ko Singapura, ko Krimeia, ko Eritreia kuenda ko Rusia, va kasi vokayike. Vonumbi yetu yo jw.org, tu pondola oku sanga ulala umue wolonduko via vamanji vaco va kapiwa vokayike.c Manji umue ukuakunyula akongelo o tukuiwa Brian wa popia hati: “Nda limbuka okuti eci ndi soneha onduko ya manji umue o kasi vokayike kuenda oku tukula onduko yaye lolukandi, ci ndi kuatisa oku ivaluka manji yaco loku u kongela volohutililo viange.”

14-15. Nye ci pondola oku tu kuatisa oku pinga ovina tu yongola volohutililo vietu?

¹⁴ Poku likutilila, pinga ovina o yongola. Manji Michael wa tukuiwa ale, wa popia hati: “Eci ndi tanga vo jw.org ovolandu a vamanji va kasi vokayike, ndi seteka oku sokolola ndomo ekalo liange nda lia kala nda ocitangi caco ca lipitile lame. Ocili okuti, ame nda nda sakalala lukãi wange kuenda oku pinga okuti omunu umue u tata. Oku sokolola kovina viaco ci ndi kuatisa oku kũlĩha ovina ndi sukila oku tukula volohutililo viange nda okuti manji umue o kuele wa kapiwa vokayike.”—Va Hev. 13:​3, etosi.

¹⁵ Oku sokolola kekalo liomuenyo weteke leteke lia vamanjetu va kasi vokayike, ci tu kuatisa oku tukula ovina tu yongola volohutililo vietu. Ndeci, tu pondola oku likutilila oku pinga oco olondavululi vi tate ciwa vamanjetu kuenda oco olombiali vi ecelele okuti vamanjetu va kuata elianjo lioku fendela Yehova. (1 Tim. 2:​1, 2) Tu pondolavo oku likutilila oco ongangu ya vamanji vaco vakuekolelo, yi pamise ekongelo lio pocitumãlo kuenda oco vana ka va vumbi Yehova va mole ovituwa viavo viwa loku nõlapo oku yevelela esapulo tu va kundila. (1 Pet. 2:12) Ocili okuti olonumbi viaco vi tiamisiwilavo eci tu kongela volohutililo vietu vamanji vana va kasi oku liyaka lovitangi vikuavo. Eci tu kala vakuakululuvala lutate, oku tukula onduko ya manji umue vohutililo kuenda oku pinga ovina tu yongola, tu lekisa okuti utima wetu u supoka ‘locisola tu likuetele omunu lomunu.’—1 Va Tes. 3:12.

KUATA OCISIMĨLO CA SUNGULUKA CATIAMẼLA KOLOHUTILILO VIOVE

16. Ocisimĩlo cipi tu sukila oku kuata catiamẽla kolohutililo vietu? (Mateo 6:8)

¹⁶ Ndomo tua ci konomuisa, olohutililo vietu vi pondola oku kuatisa omunu umue. Pole, tu sukila oku kuata ocisimĩlo ca sunguluka catiamẽla kolohutililo vietu. Eci tu likutilila, ka tu kasi oku lomboluila ku Yehova ocina cimue okuti eye handi ka ci kũlĩhĩle. Eye ka sukilavo olonumbi vietu oco a tetulule ocitangi cimue. Osimbu handi omunu umue ka kũlĩhĩle ovina a sukila, ale etu oku ci kũlĩha, Yehova wa kũlĩha ale asukila omunu waco. (Tanga Mateo 6:8.) Oco hẽ, momo lie tu sukilila oku tukula vakuetu volohutililo vietu? Momo oku tukula vakuetu volohutililo vietu, uvangi wocisola tu va kuetele. Handi vali, Yehova o sanjuka calua eci a mola okuti, afendeli vaye va kasi oku u setukula koku lekisa ocisola komanu vakuavo.

17-18. Ocindekaise cipi ci tu kuatisa oku kuata ocisimĩlo ca sunguluka catiamẽla kolohutililo vietu?

¹⁷ Olonjanja vimue olohutililo vietu vi pondola oku molẽha ndu okuti, ka vi kasi oku eca onima. Pole, ovio vi situlula ocisola tu kuetele vamanjetu kuenda Yehova o yevelela lutate olohutililo viaco. Tu pondola oku ci sokisa locindekaise ci kuãimo: Sokolola okuti epata limue li kuete omãla vavali, umue ulume ukuavo ukãi. Omõla ulume o kasi oku vela. Kuenje omõla ukãi o lipilika ku isiaye hati: “A tate linga ohenda, lingako cimue oco o kuatise manjange momo eye o kasi oku vela calua!” Ocili okuti isia o kasi ale oku likolisilako oku u kuatisa, oku u tata ciwa kuenda o sole calua omõlaye. Pole, sokolola esanju isia yaco a pondola oku kuata poku limbuka okuti omõlaye ukãi wa kapako calua manjaye ulume.

¹⁸ Eci oco Yehova a tu vetiya oku linga. Eye o yongola okuti tu likapako pokati omunu lukuavo kuenda tu kongela vakuetu volohutililo vietu. Eci tu linga ovina viaco, tu lekisa okuti ka tua likapeleko lika etu muẽle, pole, tua kapakovo vamanjetu lutima wosi. (2 Va Tes. 1:3; Va Hev. 6:10) Ndomo tua konomuisa, olohutililo vietu vi pondola oku kuatisa omanu vakuavo. Omo liaco, lalimue eteke ka tu ka ivaliko oku tukula vakuetu volohutililo vietu.