Anga hẽ wa “Lilongisa Elumbu” Lioku Sanjukila Ovina o Kuete?

1. Nye ci lomboloka oku sanjukila ovina tu kuete kuenda nye ka ci lomboloka?

ANGA hẽ ove wa sanjukila ovina o kuete? Omanu vana va sanjukila ovina va kuete, va kuete esanju kuenda ombembua momo va tiamisila utima kasumũlũho va kuete cilo. Omanu vaco ka va sumua ale oku tema omo liovina ka va kuete. Pole, oku sanjukila ovina tu kuete, ka ci lomboloka okuti ka tu sukila oku sakalala lekalo liomuenyo wetu. Handi vali, hekanduko Kukristão umue oku kuata onjongole yoku vokiya upange a lingila Yehova. (Va Rom. 12:1; 1 Tim. 3:1) Pole, tu amamako lesanju ndaño okuti ka tu kasi oku tambula lonjanga ovikele tu yongola.

2. Ovitangi vipi tu pondola oku kuata nda ka tua sanjukilile ovina tu kuete?

² Nda ka tua sanjukilile ovina tu kuete, tu pondola oku nõla olonjila ka via sungulukile. Ndeci, omanu vana okuti ka va sanjukilile ovina va kuete, va talavaya olowola vialua oco va lande ovina ka va sukila. Ci sumuisa okuti Akristão vamue va pitĩla petosi lioku nyana olombongo kuenda ovina vikuavo va yonguile. Ovo pamue va sokolola ndoco: ‘Eci nda ca kala cange,’ ‘ndi ci yongola cilo’ ale ‘ndupa ño olombongo cilo noke ndi vi tiula.’ Pole, onjila yosi yoku nyana yi sumuisa Yehova kuenda ka yeci esivayo kokuaye. (Olosap. 30:9) Akristão vakuavo omo okuti ka va tambuile ovikele va yonguile, veya oku sumua calua kuenje va liwekapo oku vumba Yehova. (Va Gal. 6:9) Momo lie ufendeli umue wa Yehova a sokoluila oku linga ovina viaco? Pamue omunu waco wa liwekapo oku sanjukila ovina a kuete.

3. Ukanda ku Va Filipoi 4:​11, 12 u tu longisa nye?

³ Vosi yetu tu pondola oku likolisilako oku kuata ocituwa coku sanjukila ovina tu kuete. Upostolo Paulu wa soneha okuti, ‘kapuluvi osi wa lilongisa oku sanjukila eci a kuete.’ (Tanga Va Filipoi 4:​11, 12.) Eye wa soneha olondaka viaco eci a kala vokayike. Pole, eye wamamako oku kuata esanju. Eye wa “lilongisa elumbu” lioku sanjukila ovina a kuete. Nda tua likolisilako, tu pondolavo oku sanjukila ovina tu kuete ndeci ca lipita lupostolo Paulu. Ka tu pondola oku lavoka okuti ci leluka oku sanjukila ovina tu kuete omo liekalo tu sangiwa. Pole, tu sukila oku lilongisa oku sanjukila ovina tu kuete. Tu ci linga ndati? Vocipama cilo, tu lilongisa ovina vi pondola oku tu kuatisa oku sanjukila ovina tu kuete.

LEKISA OLOPANDU

4. Momo lie oku lekisa olopandu ci tu kuatisila oku kuata esanju? (1 Va Tesalonike 5:18)

⁴ Omunu una o lekisa olopandu o kuete apuluvi alua oku kuata esanju. (Tanga 1 Va Tesalonike 5:18.) Ndeci, nda tua kala vakualopandu omo tu kuete ovina tu sukila, pamue ka tu ka sokolola calua catiamẽla kovina tu yongola, pole, ka tu vi kuete. Eci tu lekisa olopandu ku Yehova omo lionjila ndomo tu u vumba cilo, ci ka tu kuatisa oku sokolola kalikolisilo tu pondola oku linga kupange waye okuti, ka tu tiamisila calua utima koku kuata ocikele cikuavo tu yongola. Yehova wa kũlĩha okuti ci kuete esilivilo oku lekisa olopandu kuenda eli olio esunga lieci Vembimbiliya eye a tu vetiyila oku eca olopandu eci tu likutilila. Eci tu lekisa ocituwa coku eca olopandu, tu ka kuata “ombembua ya Suku yina ya piãla olondunge viosi.”—Va Fil. 4:​6, 7.

5. Momo lie va Isareli va sukilile oku lekisa olopandu? (Talavo ociluvialuvia.)

⁵ Tu kũlĩhĩsi ovina via lipita la va Isareli. Ovo olonjanja vialua va lisiõsũila Yehova omo ka va kuatele okulia va enda oku lia Kegito. (Ate. 11:4-6) Ocili okuti vekalasoko omuenyo ka wa lelukile. Nye nda ca va kuatisa oku sanjukila ovina va kuatele? Ovo va ponduile oku sokolola kovina viosi Yehova a va lingila kuenda oku eca olopandu. Va sukilile oku ivaluka okuti, eci va kala apika loku tatiwa lungangala Kegito, Yehova wa va yovola poku kangisa va Egito lafengi ekũi. Eci va Isareli va tunda Kegito, Yehova wa lingisa okuti va Egito va eca kokuavo opalata yalua, ulu kuenda ovowalo. (Etu. 12:​35, 36) Handi vali, eci va Egito va va landula toke Kokalunga Kakusuka, Yehova wa tepa ovava Okalunga oco va Isareli va yoke. Eci va kala vekalasoko, eteke leteke Yehova wa enda oku va ĩha omana oco va lie. Oco hẽ, momo lie va Isareli va kalela oku lisiõsiõla omo liokulia? Ndaño okuti Yehova wa ecele okulia kualua ku va Isareli, ovo ka va lekisile olopandu keliangiliyo liaco.

6. Nye ci pondola oku ku kuatisa oku kala ukualopandu?

⁶ Nye ci pondola oku ku kuatisa oku kala ukualopandu? Catete, sokiya otembo yimue eteke leteke oco o sokolole kovina viwa vi ku nenela esanju. Citava okuti o soneha ovina vivali ale vitatu o pondola oku lekisa olopandu. (Asiõ. 3:​22, 23) Cavali, lekisa olopandu kovina viosi vakuene va ku lingila kuenda ca velapo, eca olopandu ku Yehova oloneke viosi. (Osa. 75:1) Catatu, sanda akamba vana okuti vakualopandu. Momo nda akamba vetu vakualopandu, ocituwa cavo ciwa ci pondola oku tu vetiya oku lekisavo ocituwa caco. (Esin. 1:​26-28; 2 Tim. 3:​1, 2, 5) Eci tu sanda apuluvi oku eca olopandu, ka tu ka sumua omo okuti ka tu kuete ovina tu yongola, pole, tu ka sanjukila ovina tu kuete.

7. Nye ca kuatisa manji Aci oku sanjukila ovina a kuete?

⁷ Tu kũlĩhĩsi ulandu wa lipita la manji Aci wo ko Indonesia. Eye wa popia hati: “Vokuenda kuefengi lio COVID-19, nda fetika oku sokisa ekalo liange leli lia vamanji. Omo liaco, sia sanjukilile vali ovina nda kuatele.” (Va Gal. 6:4) Nye ca kuatisa manji Aci oku pongolola ovisimĩlo viaye? Eye hati: “Nda fetika oku sokolola kovina viwa Yehova a enda oku nyĩha eteke leteke. Nda sokololavo lutate kovina vialua viwa ndi kuete omo lioku panga onepa kocisoko caye. Noke, nda eca olopandu ku Yehova omo liovina viaco. Poku ci linga ca ndi kuatisa oku yeva esanju.” Nda okuti ove o yevite esumuo omo liekalo liove, o pondola hẽ oku linga ovina manji Aci a linga oco o kale ukualopandu?

LEKISA OCITUWA CUMBOMBE

8. Nye ca lipita la Baruke?

⁸ Baruke usonehi wuprofeto Yeremiya, vokuenda kuotembo yimue wa sumuile omo liekalo liaye liomuenyo. Baruke wa kuatele ocikele cimue ka ca lelukile. Eye wa sukilile oku kuatisa Yeremiya oku sapuila va Isareli vakualutukãi, ovina via laikele oku lipita lavo omo lioku sinila Yehova. Baruke ka tiamisilile utima kueci Yehova a yonguile okuti o ci linga, pole, wa fetika oku sokolola calua kueci eye muẽle a yonguile oku linga. Omo liaco, Yehova pocakati cuprofeto Yeremiya, wa sapuila Baruke hati: “Ove muẽle o kasi oku lisandela ovina vinene. Liwekapo oku sanda ovina viaco.” (Yer. 45:​3-5) Volondaka vikuavo, Yehova wa kala oku sapuila Baruke hati: “Sanjukila ekalo o kuete cilo.” Baruke wa tava elungulo liaco kuenje wamamako oku kala ekamba lia Yehova.

9. Olondaka vi sangiwa kukanda 1 Va Korindo 4:​6, 7, vi tu kuatisa ndati oku kuata ovisimĩlo via sunguluka viatiamẽla kovikele? (Talavo oviluvialuvia.)

⁹ Olonjanja vimue, Ukristão umue o pondola oku sima okuti o sesamẽla oku kuata ocikele cimue. Pamue eye o kuata ovisimĩlo viaco momo o kuete ovoloño alua, o talavaya calua kuenda o kasi ale oku vumba Yehova vokuenda kuotembo yalua. Pole, citava okuti vamanji vakuavo va kasi oku tambula ovikele eye a yonguile oku kuata. Nye ci pondola oku kuatisa manji yaco oku yuvula oku tema? Eye o sukila oku sokolola kolondaka viupostolo Paulu vi sangiwa kukanda 1 Va Korindo 4:​6, 7. (Tanga.) Ocikele cosi kuenda uloño tu kuete, vi tunda ku Yehova. Eye ka tu ĩha ovina viaco omo okuti tua velapo omanu vakuavo. Pole, o ci lingila omo liocisola kuenda ohenda a tu kuetele.—Va Rom. 12:​3, 6; Va Efe. 2:​8, 9.

10. Tu kuata ndati ocituwa cumbombe?

¹⁰ Tu pondola oku kuata ocituwa cumbombe poku sokolola lutate kongangu Yesu a tu sila. Tu kũlĩhĩsi eci ca lipita kuteke Yesu a sukula olomãhi viovapostolo vaye. Upostolo Yoano wa soneha ndoco: “Omo Yesu a kũlĩhĩle okuti Isia wa eca ovina viosi peka liaye kuenda wa tunda ku Suku kuenje wa kala oku enda ku Suku, . . . wa fetika oku sukula olomãhi violondonge.” (Yoa. 13:​3-5) Yesu nda wa sokolola okuti olondonge viaye ovio via ponduile oku sukula olomãhi viaye. Pole, Yesu vokuenda kuomuenyo waye palo posi, lalimue eteke a kuatele ocisimĩlo cokuti wa sesamẽlele oku kuata ekalo limue liwa halio lia velapo komuenyo. (Luka 9:58) Yesu wa kala embombe haeye wa sanjukilile ovina a kuatele. Omo liaco, eye wa tu sila ongangu yimue ya li pua.—Yoa. 13:15.

11. Nye ca kuatisa manji Dennis oku sanjukila ovikele a kuete?

¹¹ Manji umue o tukuiwa Dennis o kasi kofeka yo Holanda wa popia okuti, wa siata oku likolisilako oku kuama ongangu ya Yesu yoku lekisa umbombe, pole, ka ca lelukile. Eye hati: “Olonjanja vimue eci manji umue a tambula ocikele cimue ndi yongola, ndi tema momo ndi sima okuti ame nda sesamẽlele oku tambula ocikele caco. Pole, eci ñuata ovisimĩlo viaco, ndi lilongisa ovipama vi lombolola catiamẽla kumbombe. Vo JW Library,^® nda taya ovisonehua vimue viatiamẽla koku lekisa umbombe oco ci ñuatise oku vi sanga lonjanga kuenda oku vi pitolola. Handi vali, nda tapavo vo telefone yange olohundo vimue vi lombolola catiamẽla kumbombe loku vi yevelela olonjanja vialua.a Nda lilongisa okuti upange wosi ndi lingila Yehova, ocimãho caco oku u sivaya, pole, si ci lingila oco ndi muiwe lomanu. Omunu lomunu pokati ketu o kuete ocikele cimue kupange tu lingila Yehova.” Nda okuti wa sumua omo ku kuete ocikele cimue o yongola, likolisilako oku kala embombe. Eci ci ka pamisa ukamba wove la Yehova kuenda ci ka ku kuatisa oku sanjukila ovikele o kuete.—Tia. 4:​6, 8.

SOKOLOLA KOLOHUMINYO VIA YEHOVA

12. Elavoko lipi lio kovaso yoloneke li tu kuatisa oku kuata esanju? (Isaya 65:​21-25)

¹² Tu kuata esanju lialua eci tu sokolola kelavoko li komõhisa Yehova a tu likuminya. Kelivulu lia Isaya, Yehova o tu sapuila okuti o kuete elomboloko liovitangi tua siata oku liyaka lavio. Omo liaco, eye wa likuminya oku malako ovitangi viaco viosi. (Tanga Isaya 65:​21-25.) Tu ka kuata olonjo via posoka, upange u sanjuisa kuenda tu ka lia lia ovikulia vi pepa haivio vi nena uhayele. Etu ka tu ka sakalala vali okuti ocina cimue cĩvi ci pondola oku lipita letu ale lomãla vetu. (Isa. 32:​17, 18; Esek. 34:25) Tu pondola oku kolela okuti, olohuminyo viaco viatiamẽla kovaso yoloneke, vi ka tẽlisiwa muẽle ocili!

13. Ovitangi vipi tua siata oku liyaka lavio kuenda oku sokolola kelavoko lietu lio kovaso yoloneke ci tu kuatisa ndati?

¹³ Momo lie ci kuetele esilivilo lialua oku sokolola kelavoko lietu lio kovaso yoloneke olonjanja viosi? Momo tu kasi “koloneke via sulako” kuenda vosi yetu tua siata oku liyaka lovitangi ‘ka via lelukile.’ (2 Tim. 3:1) Pole, Yehova oloneke viosi wa siata oku tu kuatisa oku pandikisa poku tu ĩha olonumbi kuenda ongusu tu sukila. (Osa. 145:14) Handi vali, elavoko lietu li tu kuatisa, ca piãla enene eci tu liyaka lovitangi. Pamue ove o sukila oku talavaya calua oco o lande okulia, uwalo kuenda oku fetela onjo oco epata liove li kalemo. Anga hẽ eci ci lomboloka okuti o ka kala ohukũi otembo yosi? Ocili okuti sio! Yehova wa likuminya oku ku ĩha ovina viosi o sukila ca piãla enene Voluali Luokaliye. (Osa. 9:18; 72:​12-14) Citava okuti o kasi oku liyaka luvei umue ka u kuete esaku, esumuo ale locitangi cikuavo cuhayele. Anga hẽ o kamamako oku tala ohali okuti lalimue eteke o ka kaya? Sio hacoko. Voluali luokaliye lua Suku ka mu ka kala vali ovovei kuenda olofa. (Esit. 21:​3, 4) Elavoko liaco li tu kuatisa oku yuvula esumuo kuenda onyeño omo liovina vi kasi oku lipita letu cilo. Handi vali, tu pondola oku kuata esanju kuenda ombembua ndaño ceci tu tatiwa lekambo liesunga, tu fisa omunu umue ale ocina cimue cikuavo ci lipita komuenyo wetu. Momo lie? Momo tua kũlĩha okuti “ohali tu kasi oku tala yotembo yimue yitito” kuenda voluali luokaliye ka tu ka tala vali ohali.—2 Va Kor. 4:​17, 18.

14. Tu pamisa ndati elavoko lietu?

¹⁴ Omo okuti elavoko lietu li tu kuatisa oku sanjukila ovina tu kuete, tu pamisa ndati elavoko liaco? Ndeci omunu umue a sukila oku kapa ovinokolo oco a mole ciwa ovina vi kasi ocipãla, oku sokolola ndu okuti tu kasi ale voluali luokaliye, ci pondolavo oku pamisa elavoko lietu. Eci tu sakalala calua omo liekambo liolombongo, tu pondola oku sokolola ndomo omuenyo wetu u ka kala eci ka tu ka sukila vali olombongo kuenda lomue o ka kala vali ohukũi. Nda okuti tua sumua omo ka tua tambuile ocikele cimue tu yongola, tu sukila oku sokolola okuti ovina viaco ka via velelepo ekalo liomuenyo tu ka kuata eci tu ka lipua kuenda oku vumba Yehova otembo ka yi pui. (1 Tim. 6:19) Pamue tu sakalala lovina vialua cilo kuenje ka ci leluka oku tiamisila utima kolohuminyo vio kovaso yoloneke. Pole, eci tu sokolola kekalo li komõhisa lio kovaso yoloneke Yehova a tu likuminya, ci ka leluka kokuetu oku tiamisila utima kolohuminyo viaco okuti, kasakalalo etu hakoko.

15. Nye wa lilongisila kolondaka via manji Christa?

¹⁵ Kũlĩhĩsa ndomo elavoko lia siata oku kuatisa manji Christa, ukãi wa manji Dennis wa tukuiwa ale vocipama cilo. Eye wa lombolola ndoco: “Ñuete uvei umue wa siata oku honguisa etimba liange, una u ndi kisika oku endela vokakãlu kalola kuenda oku pita otembo yalua oku pekela. Nda siata oku yeva evalo oloneke viosi. Kanyamo a sulako ondotolo yange ya ndi sapuila okuti uvei wange ka u kuete esaku. Vepuluvi liaco nda sokolola ndoco: ‘Eye ka tendi elavoko lio kovaso yoloneke ndeci ame nda li tenda.’ Ame nda tiamisila utima kelavoko liange lina li ndi kuatisa oku kuata ombembua yo vutima. Citava okuti cilo, ndi sukila oku pandikisa kovitangi vialua, pole, voluali luokaliye ndi ka kuata omuenyo umue wesanju.”

“VANA VA SANDA YEHOVA KA VA KA KAMBELA CIMUE CIWA”

16. Momo lie Daviti a popela okuti, “Vana va sanda Yehova ka va ka kambela cimue ciwa?”

¹⁶ Ndaño okuti tu sanjukila ovina tu kuete, lopo tu ka liyaka lovitangi. Sokolola kulandu wa Soma Daviti. Eye wa fisa omãla vatatu, wa lundiliwa, akamba vaye vo pakula kuenda osoma yimue ya seteka oku u ponda vokuenda kuanyamo alua. Pole, ndaño lovitangi viaco, Daviti wa kuatele esanju. Catiamẽla ku Yehova eye wa popia hati: “Vana va sanda Yehova ka va ka kambela cimue ciwa.” (Osa. 34:​9, 10) Momo lie Daviti a popela olondaka viaco? Momo eye wa kũlĩhĩle okuti, ndaño Yehova ka tatekele okuti o liyaka lovitangi komuenyo, olonjanja viosi wa laikele oku eca kokuaye ovina a sukilile. (Osa. 145:16) Ndeci ca lipita la Daviti, tu koleli okuti Yehova o ka tu kuatisavo oku pandikisa kovitangi vietu viosi. Omo liaco, tu pondola oku kuata ombembua kuenda esanju ndaño tu liyaka lovitangi.

17. Momo lie wa nõlelapo oku lilongisa elumbu lioku sanjukila ovina o kuete?

¹⁷ Yehova o yongola okuti ove o kuata esanju. (Osa. 131:​1, 2) Omo liaco, likolisilako oku lilongisa elumbu lioku sanjukila ovina o kuete. Nda ove wa likolisilako oku kala ukualopandu, oku lekisa umbombe kuenda oku pamisa elavoko liove kolohuminyo via Yehova, o ka popia hati: ‘Ocili, nda sanjuka.’—Osa. 16:​5, 6.