“Uyaki wa Tiamẽla ku Yehova”

Cosi ca fetika kesulilo liunyamo wo 1990. Ombiali yo Fransa ya kisika lonjila yimue ka ya sungulukile oco o Filiale yo Fransa yi fete elisimu, omo liolombanjaile va tambuile oku upisa kunyamo wo 1993 toke kunyamo wo 1996. Tua seteka oku potolola ocitangi caco lekuatiso liolombonge vio Fransa, pole, ka tua kuatele onima yiwa. Tua setekavo oku pinga ekuatiso, pole, ka tua kuatelevo onima kuenda ombiali yopa vokonda yetu yombango ci pitahãla 4,5 kolohuluwa violo euro (okuti 6.300.000 kolondolale). Tua lavokaile okuti Ekanga Linene lio Europa li Teyuila Ekalo Liomanu, li tetulula ocitangi cetu. Pole, osimbu ombonge yaco ka ya tetuluile ocitangi cetu, ya pinga oco tu liongolole locimunga colonganji viombiali kumue lonumiwa yimue Yekanga Linene. Ocimãho cohongele yaco, oku limbuka nda tu potolola ocitangi caco osimbu ka ca tualiwile kekanga.

Tua simĩle okuti onumiwa yaco Yekanga Linene, ya laikele oku tu kisika oku potolola ocitangi caco, poku feta onepa yimue yolombongo ya kisikiwile lombiali. Pole, tua kũlĩhĩle okuti nda tua ecele kokuavo olombongo vimue ndaño muẽle vitito, nda ka ca likuatele lolonumbi Viembimbiliya, momo, vamanji va ecele olombanjaile viaco oco vi kuatise Usoma. Ovio ka via tiamẽlele kombiali. (Mat. 22:21) Ndaño ndoco, etu tua endele kohongele yaco oco tu pokole kovihandeleko Viekanga Linene yo ko Europa.

Tua liongoluila vohondo yimue ya posoka Yombonge. Pole, ohongele yaco ka ya fetikile ciwa. Onumiwa Yekanga Linene yo ko Europa ya fetika loku popia hati, Olombangi via Yehova via sukilile oku feta onepa yimue yelisimu ya kisikiwile lombiali yo ko Fransa. Vocipikipiki, tua vetiyiwa oku u pula hati: “Ove hẽ wa kũlĩha okuti ombiali ya tambula ale ci pitahãla 4,5 kolohuluwa violo euro vokonda yetu yombango?”

Eci ca temisa calua Onumiwa yaco. Eci ocimunga colonganji viombiali ca eca uvangi wovina va linga, ocituwa caye ca pongoloka. Eye wa va pisa kuenje vepuluvi liaco wa malusula ohongele. Nda limbuka okuti Yehova wa pongolola onjila ndomo ocitangi caco ca kala oku potoluiwa lonjila yimue okuti ka tua lavokaile. Tua tunda kohongele yaco lesanju lialua kuenda tua komõha calua lovina via pitako.

Keteke 30 Yevambi wo 2011, Ekanga Linene lio Europa li Teyuila Ekalo Liomanu, lia nõlapo onjila yimue yoku tu teyuila. Olio lia popia okuti, elisimu ombiali ya pingile ka ya sungulukile kuenda ya handeleka ombiali oku tiula olombongo viosi va tu tambuile. Handi vali, ovo va sukilile oku vi feta losindike! Onjila yaco ya nõliwapo haiyo yi komõhisa, ya siata oku teyuila efendelo liocili ko Fransa toke cilo. Epulilo lina tua linga okuti ka tua li sokiyile, lia kala ndewe lia asiwa vutue wa Goliata. Olio lia pongolola onjila ndomo ocitangi caco ca kala oku potoluiwa. Momo lie tua yulila? Momo ndeci Daviti a sapuila Goliata, “uyaki wa tiamẽla ku Yehova.”—1 Sam. 17:​45-47.

Eyulo eli halioko lika tua kuata kolombonge. Toke cilo, ndaño lelambalalo lialua tua siata oku liyaka lalio li tunda ko pulitika kuenda katavo, olombonge via velapo vieci ci soka 70 kolofeka kuenda olombonge vikuavo, via teyuila ale Olombangi Via Yehova kueci ci soka 1.225 kovitangi. Ayulo aco a siata oku teyuila elianjo lietu lioku fendela, oku kunda, oku yuvula oku panga onepa kovipito vio pulitika kuenda oku yuvula oku sakuiwa losonde.

Oco hẽ ame nda pitĩla ndati ko Europa loku kuatisa oku tetulula ocitangi cimue catiamẽla kombonge, nda nda kala oku talavaya kombala Yolombangi Via Yehova ko Nova Yorke, ko Estadus Unidus?

OMBILI OLONJALI VIANGE VIA KUATA KUPANGE WUMISIONALIU

Olonjali viange okuti George kuenda Lucille, via pindisiwa kocisoko 12 cosikola yo Gileada kuenda va kala oku talavaya ndolomisionaliu kofeka yo Etiopia eci nda citiwa kunyamo wo 1956. Ovo va ndi luka onduko ya Filipu, ukundi wo kocita catete. (Ovil. 21:8) Kunyamo wa kuamamo, ombiali ya tateka upange Wolombangi Via Yehova. Ndaño okuti kotembo yaco nda kala calua omõla, handi ndi ivaluka ciwa ndomo epata liange lia enda oku panga onepa kovopange usoma vuyombeki. Eci ca enda oku ndi komõhisa calua! Pole, ci sumuisa ceci okuti olombiali via tu kisika oku siapo ofeka kunyamo wo 1960.

Eci epata lietu lia ilukila ko Wichita, kolupale luo Kansas, kofeka yo Estadus Unidus olonjali viange viamamako oku lekisa ombili yavo kupange wumisionaliu. Ovo va kuatele omãla vatatu okuti, ame, mukãi wange Judy kuenda manjange kuasula Leslie. Vosi yetu tua citiwa ko Etiópia. Olonjali viange via kapeleko calua ocili kuenda va tu longisa oku sola Yehova loku u vumba lutima wosi. Nda papatisiwa eci nda kuata 13 kanyamo. Noke lioku pita anyamo atatu, epata lietu lia ilukila kocikanjo kua kala esukila lialua liakundi ko Arequipa, kofeka yo Peru.

Kunyamo wo 1974, eci nda kuata lika 18 kanyamo, o Betele yo ko Peru ya ndi nõla kumue la vamanji vakuãla oco tu kale akundi valikasi. Tua tumiwa oku ka kundila kovaimbo o kolomunda vio Andes okuti, ovikanjo vimue ka va la kundilako. Vocikele caco mua kongelele oku kundila vana va vangula elimi lio Quechua kuenda lio Aymara. Tua lingaile ungende lekãlu limue tua enda oku tukula okuti “Ocikasia,” momo lia molẽhele ndu okuti ocikasia cimue cinene. Ndi sole calua oku ivaluka otembo tua enda oku lekisa Vembimbiliya komanu va vangula elimi lio Quechua kuenda lio Aymara, okuti ndopo Suku o ka malako uhukũi, ovovei kuenda olofa. (Esit. 21:​3, 4) Valua pokati kavo va linga Olombangi Via Yehova.

NDA TUMIWA OKU KA TALAVAYA KOMBALA YOLOMBANGI VIA YEHOVA

Kunyamo wo 1977, manji Albert Schroeder okuti kotembo yaco wa pangele onepa Kosungu Yolombangi Via Yehova, vokuenda kuepasu liaye ko Peru, wa ndi vetiya oco ndi sonehe ocicapa coku ka talavaya ko Betele kombala Yolombangi Via Yehova. Kuenje eci oco nda linga. Noke liotembo yimue, keteke 17 Yevambi wo 1977 nda fetika oku talavaya ko Betele yo Brooklyn. Nda talavaya koseketa yoku yelisa kuenda yoku semũlũla vokuenda kuanyamo akuãla.

Kosãi Yevambi wo 1978, nda kũlĩha manji umue ukãi o tukuiwa Elizabeth Avallone kohongele yimue yolofeka ko Nova Orleans, ko Louisiana. Olonjali viaye via kalavo olombangi via Yehova ndeci olonjali viange. Elizabeth wa kala ale ukundi wotembo yosi vokuenda kuanyamo akuãla kuenda wa yonguile oku vumba Yehova kupange ulikasi vokuenda kuomuenyo waye wosi. Tua enda oku sapela kuenje vokuenda kuotembo tua fetika oku lisola. Keteke 20 ya Mbalavipembe wo 1979 tua kuela kuenda tua fetika oku talavaya ko Betele ndohueli.

Vamanji vo vekongelo lietu liatete okuti lio Espanyola Brooklyn, va tu tambula locisola calua. Vokuenda kuanyamo alua, tua kala vakongelo atatu a litepa kuenda vamanji vaco va tu tata locisola loku tu kuatisa kupange wetu wo Betele. Tu pandula calua omo liekuatiso tua tambula ku vamanji vaco kuenda tu pandulavo akamba lepata va tu kuatisa oku tata olonjali vietu via kuka.

OKU TALAVAYA KOSEKETA YOKU TETULULA OVITANGI VIOMBONGE

Kosãi ya Susu wo 1982 nda nõliwa oku ka talavaya koseketa yoku tetulula ovitangi viombonge ko Betele. Noke lianyamo atatu, vamanji va ndi pulisa nda ndi yongola oku ka tangela kosikola ya velapo oco ndi kale o netululi. Vokuenda kuotembo nda tangela kosikola yaco, nda sanjukile calua poku limbuka okuti elianjo omanu ko Estadus Unidus kuenda kolofeka vikuavo va kuete, lieyilila lika omo liayulo Olombangi Via Yehova via kuata kombonge. Tua enda oku konomuisa ovitangi viaco olonjanja vialua vokuenda kuelilongiso.

Kunyamo wo 1986 eci nda kuata 30 kanyamo, nda nõliwa oco ndi kale mitavaso Yoseketa yo Betele yi Tetulula Ovitangi Vio Kombonge. Eli lia kala esumũlũho limue linene kokuange momo, ndaño nda kala calua umalẽhe, nda limbuka okuti vamanji ko Betele va ndi kolelele. Pole, nda limbukavo okuti ca kala ocikele cinene kuenda kua kala ovina vialua okuti sia vi kũlĩhĩle.

Kunyamo wo 1988 nda linga onetululi. Pole, sia limbukile ndomo elilongiso lia velapo lia kapele kohele ukamba wange la Yehova. Elilongiso lia velapo li pondola oku vetiya omunu oku kuata oluhimo, loku sima okuti wa velapo omanu vakuavo omo lioku kuata ukũlĩhĩso walua. Ukãi wange Elizabeth wa ñuatisa calua. Eye wa ñuatisa oku tiamisila utima kovina nda lingaile osimbu sia endele kosikola ya velapo, oco ndi tẽle oku pamisa ukamba wange la Yehova. Cambata otembo yalua kuenje kamue kamue nda tẽla oku tumbulula vali ukamba wange la Yehova. Nda lilongisa okuti oku kuata ukũlĩhĩso walua hacoko ocina ca velapo komuenyo. Ocina ca velapo, oku kuata ukamba wa pama la Yehova, oku u sola kuenda oku solavo vamanji.

OKU TEYUILA LOKU IMBILA UVANGI OLONDAKA VIWA

Noke lioku malusula osikola ya velapo, nda tiamisila utima koku kuatisa kasukila atiamẽla kombonge ko Betele loku teyuila ocisoko ca Yehova kuenda elianjo lietu lioku kunda olondaka viwa. Upange wange wa enda oku ndi nenela esanju, pole, ka wa lelukilevo omo liapongoloko a kala oku pita vocisoko cetu. Ndeci, kosimbu tua enda oku pinga olombanjaile komanu poku eca alivulu etu. Pole, kunyamo wo 1990 vamanji va pinga olonumbi koseketa yoku tetulula ovitangi vio kombonge, viatiamẽla kovina mua kongelele oku liwekapo oku pinga olombanjaile. Noke Olombangi Via Yehova via fetika oku eca alivulu ocali. Kuenje eci ca leluisa upange wetu ko Betele kuenda kupange woku kunda. Toke cilo ca siata oku teyuila ovopange etu kovitangi viatiamẽla koku feta elisimu. Omanu vamue va simĩle okuti epongoloko liaco lia laikele oku koka okuti ka tu kuata vali olombongo kuenda alivulu oku eca komanu. Pole, eci hacoko ceya oku lipita. Tunde kunyamo wo 1990, etendelo liomanu va vumba Yehova lia livokiya kuenda omanu va pondola oku tanga ovolandu a kunamẽla Kembimbiliya okuti ka va feti cimue. Nda lilongisa okuti apongoloko vocisoko cetu, a kuata lika onima omo liekuatiso lia Yehova kuenda olonumbi tu tambula pocakati cukuenje wa kolelua.—Etu. 15:2; Mat. 24:45.

Ka tua siatele lika oku kuata ayulo kombonge omo okuti tu kuete olonetululi viwa. Olonjanja vimue ocina ci vetiya ombiali yimue oku tu kuatisa, ovituwa viwa viafendeli va Yehova. Nda mola ulandu waco kunyamo wo 1998, eci vamanji vatatu va panga onepa Kosungu Yolombangi Via Yehova kumue lakãi vavo va endele kolohongele vi likasi kofeka yo Kuba. Ovo va lekisa ocisola kuenda esumbilo komanu vosi. Ongangu yavo yiwa, oyo ya velelepo calua okuti olohongele vikuavo tua kuata lolombiali oco tu lekise okuti ka tu litengi vo pulitika, ci sule.

Olonjanja vimue eci ovitangi kombonge ka vi tetuluiwa lonjila ya sunguluka, tu sukila “oku teyuila loku imbila uvangi olondaka viwa” kolombonge. (Va Fil. 1:7) Ndeci, vokuenda kuanyamo alua olombiali vioko Europa kuenda ombiali yo ko Koreia du Sul, ka via yonguile oku limbuka elianjo lietu lioku yuvula oku panga onepa kusualali. Omo liaco, ci soka 18.000 via vamanji alume ko Europa kuenda ci pitahãla 19.000 vo ko Koreia du Sul, va kapiwa vokayike omo lioku likala oku linga ovopange usualali.

Pole, keteke 7 Yevambi Linene wo 2011, Ekanga Linene lio ko Europa, lia nõlapo onjila yimue yi komõhisa yatiamẽla kocitangi cofeka yo Bayatyan kuenda yo Armênia. Olio lia kisika okuti olofeka viosi vio ko Europa, vi ecelela oku linga ovopange akuavo okuti ka tu pangi onepa kusualali. Keteke 28 Yevambi wo 2018, Ombonge Yinene yo ko Koreia du Sul ya nõlapovo onjila yimuamue. Ayulo aco nda ka a tẽliwile nda okuti vamanjetu amalẽhe ka va yuvuile oku panga onepa kopulitika.

Oloseketa vietu vioku tetulula ovitangi vio kombonge violo Filiale koluali luosi, vi kasi oku talavaya calua oco vi teyuile elianjo lietu lioku fendela Yehova kuenda lioku kunda Usoma. Esumũlũho linene oku kuatisa vamanjetu va siata oku liyaka lelambalalo li tunda kombiali. Ndaño ceci ka tu yuli ocitangi cimue, tu kasi oku eca uvangi kolonguluvulu, kolosoma kuenda kolofeka. (Mat. 10:18) Olonganji, olonumiwa viombiali, ovingungu viasapulo kuenda omanu vosi, va siata oku mola ovinimbu Viembimbiliya tu soneha vovicapa kuenda oku yeva evi tua siata oku tukula vokuenda kuesombiso. Omo liaco, omanu valua vakuotima wa sunguluka, va kuata ukũlĩhĩso wa suapo watiamẽla Kolombangi Via Yehova kuenda kono yalongiso etu. Toke muẽle, vamue va linga vamanjetu.

NDI PANDULA YEHOVA!

Vokuenda kueci ci soka 40 kanyamo, nda kuata esumũlũho lioku kuatisa koku tetulula ovitangi vio kombonge kolo Betele violuali luosi, oku enda kolombonge vialua via velapo kuenda oku kala kovaso yomanu valua vakualuhimo. Ndi sole calua kuenda nda siata oku komõha vamanji ndi talavaya lavo koseketa yoku tetulula ovitangi vio kombonge kombala Yolombangi Via Yehova, lo koloseketa vikuavo vi tetulula ovitangi vio kombonge kolualui luosi. Ñuete esanju lialua omo liasumũlũho nda siata oku tambula.

Ukãi wange Elizabeth wa siata oku kala ekamba limue ukuacili haeye ukuacisola vokuenda kueci ci soka 45 kanyamo, cikaile kapuluvi awa kuenda ãvi. Eye wa siata oku ndi komõhisa calua ndaño okuti o kasi oku liyaka luvei umue u kokela ehonguo.

Vokuenda kuomuenyo wetu, tua lilongisa okuti ongusu kuenda eyulo ka vi tundi kovoloño etu muẽle. Ndomo Daviti a ci popia, “Yehova eye ongusu yomanu vaye.” (Osa. 28:8) Ocili, “uyaki wa tiamẽla ku Yehova.”