Daviti Kuenda Goliata

Yehova wa sapuila Samuele hati: “Ndu ku tuma ku Jese u Beteleme, momo pokati komãla vaye nda li nõlelapo osoma yimue.” Kuenje Samuele wa enda konjo ya Jese. Eci eye a mola omõla ukulu, wa kala oku sima hati: ‘Ocili okuti, u eye ombuavekua ya Yehova.’ Pole, Yehova wa sapuila Samuele hati: “Ku ka vanje ño keposo liaye, pamue koku lepa kuaye, momo ndo likala. Ndomo omunu a vanja, hacoko Suku a vanja, omunu o vanja lika eci ci molẽha kilu, pole, Yehova o vanja vutima.”

Jese wa pitisa omãla vaye valume epanduvali kovaso a Samuele, pole, Samuele wa sapuila Jese hati: “Yehova ka nõlele laumue pokati kava” Samuele wa pula Jese hati: “Ava ovo omãla vosi valume o kuete?” Jese wa tambulula hati: “Kua kamba umalẽhe; eye o kasi oku lisa olomeme.” Eci Daviti a iñila, Yehova wa sapuila Samuele hati: “Votoka, u waveka, momo u eye nda nõla!” Samuele wa kapa ulela kutue wa Daviti, oco o waveke ndosoma yi ka viala va Isareli.

Noke yotembo yimue va Isareli va linga uyaki la va Filisiti, vana va kala locindululu cimue ci tukuiwa hati Goliata. Olonjanja viosi Goliata wa enda oku yola epembe va Isareli. Eye wa kaluka lolukandi hati: “Nõli ulume umue pokati kene oco a liyake lame. Nda eye wa tẽla oku liyaka lame loku ndi ponda, tu linga apika vene. Pole, nda ndo yula ene vu linga apika vetu loku tu vumba.”

Daviti weya kocilombo colohoka via va Isareli oku nena okulia ku va huvaye vana va kala asualali. Eye wa yevelela ovina Goliata a kala oku vangula kuenje wa popia hati: ‘Ndi liyaka laye.’ Soma Saulu wa popia hati: “Ove ku ka tẽla oku liyaka lu Filisiti u, momo ove wumalẽhe.” Daviti wa tambulula hati: “Yehova una wa ndi popela peka liohosi lokanyani, o ka ndi popelavo peka liu Filisiti u.”

Saulu wa seteka oku eca ovimalẽho viaye ku Daviti, pole, Daviti wa popia hati: ‘Si tẽla oku yaka lovimalẽho evi.’ Daviti wa kuata epipili liaye peka kuenje wa enda polui. Eye wa tikula ombueti yaye kuenda wa nõla ovawe atãlo vocimbota loku a kapa vonjeke yaye. Kuenje Daviti wa lupuka oku ka lisanga la Goliata. Ocindululu ca kaluka lolukandi citi: ‘Enju kokuange kuenje ngeca etimba liove kolonjila viovailu lo kovinyama viovusenge.’ Daviti ka kuatele usumba. Daviti wa tambulula u Filisiti hati: “Ove wiya kokuange losipata, lunga kuenda onjelia, pole, ame ndiya kokuove vonduko ya Yehova ukualohoka, haeye Suku ya va Isareli ukualohoka una ove o yongola oku liyaka laye. Vosi va liongoluila palo, va ka limbuka okuti, Yehova ka popela losipata, ale lunga, momo uyaki wa tiamẽla ku Yehova kuenda eye o ka eca vosi yene povaka etu.’

Daviti wa kapa ewe limue vepipili liaye kuenje wa limba longusu yalua. Lekuatiso lia Yehova ewe lia veta Goliata kuenje lia iñila vupolo waye. Ocindululu ca kupukila posi kuenje ca fa. Va Filisiti va tila lolupesi oco va popele omuenyo wavo. Ove hẽ wa kolela ku Yehova ndeci Daviti a linga?