Osoma Yatete ya va Isareli

Yehova wa ecele ku va Isareli olonganji oco vi va songuile, pole, ovo va yonguile osoma yimue. Ovo va sapuila Samuele vati: “Tu nõleleko osoma yimue oco yi linge onganji yetu ndeci olofeka viosi vikuavo.” Olondaka viaco ka via sanjuisile Samuele omo liaco wa likutilila ku Yehova catiamẽla kondaka yaco. Yehova wo sapuila hati: “Haveko va kasi oku ku likala, pole, ame va kasi oku ndi likala ndosoma yavo. . . . Va sapuila okuti soma o laika oku va viala, o ka kuata omoko yoku va kisika ovina vimue.” Kuenje omanu va tambulula vati: “Ka ci kuete cimue, etu tua nõlapo oku kuata osoma yimue.”

Yehova wa sapuila Samuele okuti, ulume umue o tukuiwa hati Saulu eye o linga osoma yatete. Eci Saulu a enda oku ka nyula Samuele ko Rama, Samuele wa waveka Saulu ndosoma poku kapa ulela kutue waye.

Noke Samuele wongolola va Isareli, oco a va lekise osoma yavo yokaliye. Ovo va kala loku u sandiliya, pole, ka vo sangele. Ove hẽ wa kũlĩha esunga liaco? Momo eye wa kala oku salama pokati kovikuata. Eci ovo va sanga Saulu, vo tuala kosamua kuenje vo talamisa pokati komanu. Saulu wa lepele calua okuti omanu vakuavo ci sule kuenda wa posokele calua. Samuele wa popia hati: ‘Vu lete hẽ omunu Yehova a nõla?’ Omanu vosi va fetika oku kaluka vati: ‘Soma a kale hũ lomuenyo!’

Kefetikilo, Soma Saulu wa yevelela Samuele kuenda wa pokola ku Yehova. Pole, noke wa pongoloka. Soma ka kuatele omoko yoku eca ovilumba. Onjanja yimue Samuele wa sapuila Saulu oco a kevelele toke eci eye a pitĩla, pole, Samuele ka pitĩlile vepuluvi liaco. Kuenje Saulu wa nõlapo eye muẽle oku eca ocilumba. Nye Samuele a linga? Eye wa sapuila Saulu hati: “Momo lie kua pokuilile kondaka ya Yehova?” Anga hẽ Saulu wa sukilile oku lilongisila kakulueya aye?

Noke, eci Saulu a endele oku ka liyaka la va Amaleke, Samuele wa sapuila Saulu oco a va ponde vosi okuti ka pa supi laumue. Pole, Saulu wa nõlapo oku popela Soma Agage. Yehova wa sapuila Samuele hati: “Nda livela oku nõla Saulu oco a linge osoma, momo eye wa liwekapo oku ñuama kuenda ka pokuile kolondaka viange.” Samuele wa sumuile calua, kuenje wa sapuila Saulu hati: “Omo okuti, wa likala ondaka ya Yehova eye wa ku likalavo okuti, ku kala vali osoma.” Eci Samuele a ñualapo oco a ende, Saulu wa kuata kongenge yocikutu ca Samuele kuenje ca toka. Samuele wa sapuila Saulu hati: “Etaili Yehova wa ku upa uviali.” Yehova o laika oku eca usoma komunu una okuti, o kuetele ocisola Yehova kuenda o pokola kokuaye.