Daviti Kuenda Saulu

Daviti noke yoku ponda Goliata, Soma Saulu wo nõla oco a kale kesongo kolohoka viaye. Daviti wa yula ovoyaki alua kuenda weya oku kũlĩhĩwa calua. Eci Daviti a pitĩla konjo poku tiuka kuyaki, akãi veya loku imba ovisungo kuenda oku piluka vati: “Saulu wa ponda olohulukãi, kuenda Daviti wa ponda ekũi liolohulukãi!” Saulu wa kuatela esepa Daviti kuenje wa yonguile oku u ponda.

Daviti wa tẽlele oku sika ciwa ohalupa. Eteke limue osimbu Daviti a kala oku sikila Saulu ohalupa, soma wa imba unga kokuaye. Daviti wa wa tila kuenje unga wa veta vocimano. Noke yovina evi, Saulu wa seteka olonjanja vialua oku ponda Daviti. Pole, onjanja eyi Daviti wa tila kuenje wa salama vekalasoko.

Saulu wambata olohoka vi soka 3.000 kalume kuenje va enda oku ka sandiliya Daviti. Saulu wa iñila veleva limue muna Daviti kumue lalume vaye va kala oku salama. Alume va Daviti va popia loku loñola hati: “Lilo olio eteke Yehova a ku sapuila hati: ‘Tala! Ñasi oku eca unyãli wove peka liove. . . .’” Daviti wa enda levando kocitumãlo kua kala Saulu kuenje lutate walua wa teta kongenge yocikutu soma. Saulu ka ci limbukile. Noke utima wa Daviti wa kala oku u vetela evelo omo lioku teta kongenge yocikutu ca Saulu ka ci kuete ovoko. Eye ka tavele okuti alume vaye va ponda Saulu. Daviti wa vilikiya Saulu loku u sapuila okuti eye nda wa ponda Saulu eci a kuata epuluvi lioku ci linga. Anga hẽ Saulu wa pongolola ocisimĩlo caye catiamẽla ku Daviti?

Sio. Saulu wamamako oku suvuka Daviti. Vuteke umue Daviti kumue locimumba caye Avisiai va enda kocilombo ca Saulu. Toke muẽle Avinere lasualali va Saulu va kala oku pekela. Avisiai wa popia hati: “Etaili Suku wa ku ĩha unyãli wove peka liove. Kaliye ecelela okuti, ndu tomela posi lunga onjanja yimosi lika kuenda ka ci ka sukila oku ci linga onjanja yavali.” Daviti wa tambulula hati: “Ndeci Yehova a kasi lomuenyo, Yehova eye muẽle o ko ponda. . . . Kaliye tu tikule unga u kasi ocipepi lutue waye lesanga liovava kuenje tu ende lonjila yetu.”

Daviti wa londa komunda yimue ocipepi okuti yecelela oku mola ocilombo ca Saulu. Kuenje wa kaluka lolukandi hati: ‘Avinere momo lie kua lavuluile ñala yove soma? . . . Pi ku kasi unga wa soma lesanga liovava lia kala ocipepi lutue waye?” Saulu wa limbuka ondaka ya Daviti kuenje wa popia hati: ‘Ove nda wa ndi ponda, pole, kua ndi pondele eci Yehova a ngenca peka liove . . . Nda kũlĩha okuti o ka viala ndosoma kuenda usoma wa Isareli wamamako oku kala peka liove.’ Saulu wa tiukila konjo yaye. Pole, havosiko vepata lia Saulu okuti va suvukile Daviti.