NDOMO O LIYAKA LOKU LIVOKIYA KUONDANDO YOVINA

Kala Ukuelavoko

Pocitumãlo o kasi ovina vi kasi hẽ oku tĩla calua pole kofeto yove ka va vokiyileko? Ove hẽ wa sakalala loku sandiliya ovina o litekula lavio kuenda evi o tekula lavio epata liove? Nda oco citava okuti o sakalala omo lioloneke vi keya kovaso. Pole ndaño lekalo limue lia tĩla calua, ci kuete esilivilo oku kuata elavoko.

ESUNGA LIECI CI KUETELE ESILIVILO

Omanu va kuete elavoko, ka va kevelela lika okuti va lipita lovina viwa. Elavoko li tu vetiya oku linga ocina cimue oco tu mioñolole ekalo lietu. Ndeci akonomuiso amue a lekisa okuti omanu va kuete elavoko. . .

olonjanja vialua va pandikisa vakalo ka a lelukile
va tẽla oku linga apongoloko eci ci sukiliwa
va nõla olonjila viwa vi va kuatisa oku kuata uhayele uwa loku kuata ekalo liwa komuenyo.

CECI O SUKILA OKU LINGA

Tete, kũlĩhĩsa ndomo Embimbiliya li ku kuatisa eteke leteke. Vembimbiliya mu sangiwa olonumbi vi ku kuatisa oku liyaka locitangi coku livokiya kuondando. Olonumbi viaco, vi pondolavo oku ku kuatisa oku yuvula oku sima okuti ku kuete ekuatiso, pole o ka limbuka okuti kuli ocina cimue o pondola oku linga cilo kuenda kovaso yoloneke eci ovina vi ka tĩla vali calua.

“Ukũlĩhĩso u kamamako oku ku lava, kuenda uloño u ka ku teyuila.”—Olosapo 2:11. Embimbiliya li Kola.

Vali, konomuisa eci Embimbiliya li popia catiamẽla kovaso yoloneke. Eci ove o limbuka esilivilo liolondunge vi sangiwa Vembimbiliya, o pondola oku vetiyiwa oku li tanga lutate oco o kũlĩhe eci olio li popia catiamẽla kovaso yoloneke. Ndeci ove o ka lilongisa okuti Suku ka yongola lika okuti o kuata “ekalo liwa kuenda elavoko limue” pole o yongolavo okuti ove o kuata esunga lia kolapo lioku kolela kohuminyo yaco. (Yeremiya 29:11) Esunga liaco, Usoma wa Suku.

NYE CI LOMBOLOKA USOMA WA SUKU KUENDA OVINA VIPI U KA LINGA?

Usoma wa Suku uviali umue okuti u ka viala ongongo yosi. (Daniele 2:44; Mateo 6:10) Owo u ka viala oku upisa kilu loku malako ohali kuenda uhukũi kuenje u ka vi piñanya lombembua lokulia kualua ndomo ci lekisiwa vovisonehua vikuãimo.

“Ove o ka sanjuka kuenda o ka kuata ovokuasi.”—Osamo 128:2.

‘Ovo [olonungi Viusoma] ka vi ka talavaya elivova.’—Isaya 65:23.

“Ku ka kala olomema vialua kilu lieve.”—Osamo 72:16.

Omanu valua va kolela kolohuminyo evi kuenda va tava okuti Suku “ka pondola oku kemba.” (Tito 1:2) Omo liaco, momo lie ku konomuisila Embimbiliya ove muẽle oco o limbuke eci olio li popia? Elavoko Embimbiliya li eca, li pondola oku ku ĩha ongusu o sukila oco o liyake locitangi cekambo liolombongo kuenda oku kolela okuti ku keya oloneke viwa.