NDOMO O LIYAKA LOKU LIVOKIYA KUONDANDO YOVINA
Kala Ukuakueca
Nda ove o kasi oku liyaka locitangi coku livokiwa kuondando yovina, o pondola oku sima okuti oku kala omunu umue ukuakueca ocina cimue okuti ka ci tẽliwa. Pole oku kuata ocituwa caco, ci pondola oku ku kuatisa. Osimbu o lekisa ocituwa coku eca, citavavo okuti o soleka olombongo vimue vi ku kuatisa.
ESUNGA LIECI CI KUETELE ESILIVILO
Eci tu eca ocina cimue ku vakuetu ndaño okuti citito, tu kuata esanju kuenda tu liyevavo ciwa. Akonomuiso a lekisa okuti oku kuata ocituwa coku eca ci pondola oku kuatisa uhayele wetu woketimba kuenda wovisimĩlo. Ndeci, o pondola oku tepulula asakalalo, esumuo, atesãu kuenda avalo akuavo. Ci pondolovo oku tu kuatisa oku kuata otulo tuwa.
Eci tu kuatisa vakuetu lolombongo ale lonjila yikuavo, ci pondola oku leluka kokuetu oku tava ekuatiso eci tu li sukila. Howard o kasi ko Inglaterra wa popia hati: “Poku sandiliwa olonjila vioku eca kuenda oku kuatisa vakuetu, ame lukãi wange tu liyeva okuti ka tu kasi oku kala ocilemo cimue ku vakuetu eci tu tambula ekuatiso limue.” Ocili okuti omanu va kuete ocituwa coku eca ka va lavoka oku tambula cimue. Pole ovo va pondola oku kuata akamba vocili okuti va va kuatisa lutima wosi eci ovo va sukila ekuatiso.
CECI O SUKILA OKU LINGA
Tepelako vakuene ovina o kuete. Ndaño okuti ove o kuete lika ovina vitito, o pondola oku eca ocina cimue ku vakuene ndeci okulia kumue kua leluka. Duncan lepata liaye okuti va kasi ko Uganda va kuete ocituwa coku eca ovina komanu vakuavo ndaño okuti ovo olohukũi. Duncan wa popia hati: “Vovialumingu ame kumue lukãi wange tu laleka omunu umue oco tu lile kumosi okulia kumue kua leluka konjo yetu. Tua siata oku sandiliya oku kala lomanu vakuavo.”
Ocili okuti eci weca ocina cimue ku vakuene, ove o sukila oku kala ukuesunguluko. Lekisa utate osimbu eca ovina vialua komanu vakuavo oco epata liove li kuatevo ovina li sukila. —Yovi 17:5.
Seteka ndoco: Seteka oku eca komunu umue okulia kumue kua leluka ale ocina cimue coku nyua. Nda okuti o kuete ovina vimue ku sukila vali, momo lie ku vi ecela kakamba ale komunu umue o lisungue laye okuti o pondola oku kuatisiwa lovina viaco?
Kuata ocituwa coku eca volonjila vikuavo. Vimue pokati kolombanjaile via velapo, ka vi sukila olombongo. Ndeci tu pondola oku eca otembo yetu kuenda oku lekisa okuti tua kapako vakuetu poku linga ovina vi kuete esilivilo kokuavo. Ndaño muẽle olondaka vimue viohenda vi pondola oku kala ombanjaile yimue! Omo liaco, sapuila vakuene okuti wa va kapako kuenda o va sole.
Seteka ndoco: Kuatisa vakuene oku linga ovopange o konjo loku semũlula ovina viavo. Soneha olondaka vimue vopapelo, ale tumisa esapulo kekamba limue ndaño wa popia lika okuti ñasi oku ku sokolola.
Eci ove o lekisa ocituwa coku eca o ka sanjuka vali calua.