Оштолэзь

Милям потэ ке пырак улэммы, соку Христослэн мозмытӥсь курбонэзлы осконо. Сыӵе луонлыксы туж трос адямиослэн вань (Еф. 1:7). Соос, кинъёсты Иисус «мукет ыжъёс» шуыса нимаз, Ӝытанын нянь сиыны но вина юыны кулэ ӧвӧл (Иоанн 10:16). Но куке соос Христослэн мозмытӥсь курбонэзлы осконзэс возьмато, вераны луоз, «улонлэсь няньзэ» сиё шуыса (Иоанн 6:53). Соос, кинъёс Ӝытанын нянь сиё но вина юо, возьмато, соосын выль сӥзён кутэмын но азьланяз соос инмысь Эксэйлыкын эксэйёс луозы шуыса. Кызьы ми адӟимы, зырӟем христианъёслы но, мукет ыжъёслы но мозмытӥсь курбонлы осконмес возьматоно шуыса. Соку гинэ ми быгатомы пырак улыны. w24.12 12 б., 14 абз.; 13 б.,16 абз.

Ӝытан дыръя Иисус апостолъёсызлы юмал нянь сётӥз но вераз, со солэсь мугорзэ возьматэ шуыса. Собере Иисус соослы вина сётӥз но вераз, со «Выль Сӥзён Вирыз» луэ шуыса (Марк 14:22—25; Лука 22:20; 1 Кор. 11:24). Озьыен, тани кулэ луись малпан: Иисус выль сӥзён сярысь вераз. Выль сӥзёнэз Иегова кутӥз духовной Израилен. Иегова ӧз куты сое вань адямиосын, нош соосын гинэ, кинъёс Иисусэн ӵош «Инмар Эксэйлыкын» кивалтозы (Евр. 8:6, 10; 9:15). Висъялэ саклыктэс, Ӝытанын Иисус «пичи уллёлы» вазиськиз шуыса. Нырысь ик отчы пыризы оскымон апостолъёс, кудъёсыз со ӝытэ Иисусэн ӵош вал. Соос но мукетъёсыз, кинъёс берлогес пичи уллёе пыризы, Ӝытанын нянь сиё но вина юо. Соос Иисусэн ӵош инмын луозы. w24.12 11 б., 9, 10 абз.

Иисусэз вузаз одӥгез матысь эшез. Собере Иисусэз кутӥзы, ултӥязы но янгыше уськытӥзы со понна, мае со ӧз лэсьты. Берлогес сое курадӟытӥзы но казнить каризы. Ожгарчиос Иисусэз казнить карон интые нуизы но киоссэ но пыдъёссэ юбо борды кортӵогазы. Иисус туж курадӟиз ке но, ваньзэ чидаз. Нош Иегова эшшо но зол курадӟиз. Солэн мертантэм бадӟым кужымез вань бере, со быгатэ вал Пизэ курадӟонъёслэсь мозмытыны. Но Иегова озьы ӧз лэсьты, малы ке шуоно со милемыз туж яратэ. Иисуслэн курбонэз котьмалэсь умой возьматэ, Иегова Адамлэсь но Евалэсь нылпиоссэс яратэ шуыса. Со возьматэ, макем юн яратэ Иегова тонэ. Инмарлы чидантэм вӧсь вал ке но, со сётӥз самой дунозэ, маиз солэн вал, аслэсьтыз яратоно Пизэ, тонэ сьӧлыклэсь но кулонлэсь мозмытон понна (1 Иоанн 4:9, 10). Солэн котькудмылы юрттэмез потэ сьӧлыкен нюръяськыны но сое вормыны! w24.08 6 б., 13, 14 абз.

Ми умойгес валаломы, макем юн яратэ милемыз Иегова, малпаськимы ке, макем вӧсь солы вал адӟыны яратоно Пиезлэсь курадӟемзэ. Шайтан вера, секыт дыръя одӥг адями но Инмарлы оскымон уз луы шуыса. Со озьы ӧвӧл шуыса возьматон понна, Иегова лэзиз, Пиез кулэмез азьын мед курадӟоз шуыса (Иов 2:1—5). Иегова адӟиз, кызьы религиозной кивалтӥсьёс Иисусэз серем каризы, кызьы ожгарчиос сое сюлоен жугизы, юбо борды кортӵогазы но курадӟыса кулыны кельтӥзы (Матф. 27:28—31, 39). Иегова быгатэ вал Иисусэз мозмытыны. Кылсярысь, куке адямиос шуизы: «Инмарлы Со ярано ке, табере Со мед мозмытоз Сое», Иегова зэм но Иисусэз мозмытыны быгатэ вал (Матф. 27:42, 43). Но соку дун тыремын ӧй луысал но милям вуоноезлы нокыӵе осконмы ӧй луысал. Соин ик Иегова лэзиз, Пиез кулытозяз мед курадӟоз шуыса. w25.01 22 б., 7 абз.

Асьме вакытысь 33-тӥ ар, 16-тӥ нисан. Иисуслэн дышетскисьёсыз туж ӝожомемын. Соос туж куректо но кышкало. Дышетскисьёс пӧлысь кыкез Иерусалимысь Еммаусэ мыныны пото. Дышетскисьёслэн мылкыдзы туж усемын, малы ке шуоно соос оскизы, Иисус — со Мессия шуыса, кудӥз еврейёслэсь улонзэс умой пала воштоз. Нош Иисусэз виемзы бере соослэн вань осконзы куашказ. Еммаусэ мыныкузы, дышетскисьёс тодмотэм муртэ пумитало. Соос солы верало, малы соос ӝожомемын но мар луиз Иисусэн. Тодмотэм мурт соосты сак кылзэ но вера соослы сое, мае соос ноку но уз вунэтэ. Со «Моисей бордысен кутскыса, вань пророкъёслэсь... верамзэс валэктэ». Озьы солэн верамез потэ вал, малы Мессия курадӟыны но кулыны кулэ вал. Куке соос куиньназы ик Еммаусэ вуо, дышетскисьёс валало, тодмотэм мурт — со улӟем Иисус шуыса! (Лука 24:13—35). Берпум 40 нунал ӵоже музъем вылын улыкуз, Иисус трос пол адӟиськылӥз дышетскисьёсыныз. Нырысь дышетскисьёсыз кышкам, йыромем ыжъёс кадь вал, нош собере соос кышкасьтэм ожгарчиос кадь луизы. Табере соослэн юн мылкыдзы вань Эксэйлык сярысь ӟеч иворез вераны но юрттыны мукетъёсызлы но Христослэн дышетскисьёсыз луыны. w24.10 12 б., 1—3 абз.

Нылпи ас понназ будэ. Нош быдэ вуэм христианъёс луон понна, тыршыны кулэ. Кылсярысь, Коринфын улӥсьёс ӟеч иворез кылзӥзы, пылатӥськизы но святой духез басьтӥзы. Со сяна, соосты ачиз апостол Павел дышетӥз (Ап. уж. 18:8—11). Озьы ке но, пылатӥськемзы бере кӧня ке ар ортчыса но, соос пӧлысь тросэз быдэ вуэм христианъёс ӧй вал на (1 Кор. 3:2). Быдэ вуэм христианъёс луон понна, нырысь ик мылкыд луыны кулэ. Нош соос, кинъёслэн тодон-валан басьтэмзы но воштӥськемзы уг поты, быдэ вуэм христианъёс ноку уз луэ (Мад. 1:22). Милям уг поты луэммы адями кадь, кудӥз быдэ вуэм бераз но возьма, анай-атаез со интые ужпумъёс кутылозы шуыса. Милям асьмелэн тыршеммы потэ Иеговаен кусыпъёсмес юнматыны. Ми валамы ке, мае ке умоятыны кулэ на шуыса, ойдолэ вӧсяськомы, кулэ луись воштӥськонъёс лэсьтыны Иегова милемлы мылкыд но, кужым но мед сётоз шуыса (Флп. 2:13). w24.04 4 б., 9, 10 абз.

Иегова вера милемлы, кыӵе солэн шӧдонъёсыз кылдо, куке со приговоръёсты ялэ (Иез. 33:11). Иегова нокинэ но пыраклы быдтыны уг дырты. Со гажась-жалясь Инмар. Луэмезъя со котьку тырше со сямзэ возьматыны. Тодӥськомы-а ми, кин улӟытэмын уз луы? Библиын верамын куд-ог сыӵе адямиос сярысь. Иисус валамон возьматӥз, Иуда Искариот улӟытэмын уз луы шуыса (Марк 14:21; озьы ик учке Иоаннлэсь 17:12). Со озьы, малы ке шуоно Иуда валаса вылысь Иеговалы но солэн Пиезлы пумит ӝутскиз. (Учке Марклэсь 3:29; озьы ик учке та кылбурлы валэктонэз «Эскерон понна поттэм Библиысь» (ӟуч)). Со сяна, Иисус вераз, куд-ог религиозной кивалтӥсьёс, кудъёсыз солы пумит мынӥзы, улӟытэмын уз луэ шуыса (Матф. 23:33). Нош апостол Павел гожтӥз, зэмос йыбырттонлэсь палэнскемъёс, кудъёсыз ӧз ӧпкеле, улӟытэмын уз луэ шуыса (Евр. 6:4—8; 10:29). w24.05 4 б., 10, 11 абз.

Иеговаен кусыпъёсмы юнэсь луизы ке, Шайтан милемлы тупатыны луонтэм изъян вайыны уз быгаты (1 Иоанн 3:8). Выль дуннеын но Иегова оскымон эшъёссэ утёз ваньмызлэсь, мар соин кусыпъёссэс лябӟытыны быгатэ. Со сяна, со соосты кулонлэсь но утёз (Усьт. 21:4). Иегова милемыз ас дораз куное ӧтиз бере, со милемыз аслаз эшъёсыныз лыдъя. Ми понна со туж бадӟым дан. Ми пырак дауръёс ӵоже соин эшъяськыны быгатӥськомы (Иез. 37:27). Кызьы тау кароно Иеговалы милемыз куное ӧтемез понна? Шуом, тӥледыз куное ӧтизы. Отчы лыктыса, тӥ асьтэлэсь куронъёстэс уд пуктылэ ук. Ӵапак озьы ик милемлы тодыны кулэ, мае возьма Иегова аслаз куноосызлэсь. Ми Иеговаез яратӥськомы, соин ик «котьмар ласянь Солы тэрытскыса» улэммы потэ (Кол. 1:10). Милемлы тае тодамы возёно но котьку сое мур гажано. Та юрттоз милемлы котьку но Иеговалэсь сюлэмзэ шумпоттыса улыны. Милям туж потэ Инмармы азьын зӥбыт-востэмесь луэммы (Мих. 6:8). w24.06 4 б., 8, 9 абз.

Иегова куриз Авраамез Исаак пизэ курбонлы вайыны. Малпалэ гинэ, макем вӧсь соку луиз Авраамлэн сюлмыз. Озьы ке но со соглаш луиз со ужез быдэстыны. Куке Авраам кизэ ӝутӥз вал ини пизэ вандыны, Инмар сое дугдытӥз. Авраамлэн пизэ курбонлы вайыны дась луэмез возьматэ вал, мае Иегова азьланяз лэсьтоз — со яратоно Пизэ курбонлы ваёз. Адӟиське, Иегова адямиосты туж зол яратэ шуыса (Ул.-выл. 22:1—18). Кӧня ке дауръёс ортчыса, Иегова израиль калыклы закон сётӥз. Со законъя, Инмарлэсь калыксэ сьӧлыкъёсызлэсь мозмытон понна, пудо-животъёсты курбонлы ваёно вал (Лев. 4:27—29; 17:11). Со курбонъёс возьмато вал, азьланяз эшшо но бадӟым курбон ваемын луоз шуыса, кудӥз вань адямиосты сьӧлыкъёссылэсь быдэсак мозмытоз. Святой духлэн валтэмез улсын пророкъёс валэктылӥзы, кидыс-выжы — со Инмарлэн яратоно Пиез шуыса, кудӥз курадӟоз но кулоз, адямиосты, озьы ик тонэ но, сьӧлыклэсь но кулонлэсь мозмытон понна (Ис. 53:1—12). w24.08 4 б., 7, 8 абз.

Библиез лыдӟыкуды, малпаське, кызьы лыдӟемдэс улонады пыртоно. Кыӵе ке люкетэз лыдӟемды бере малпаське: «Кызьы та юрттоз мыным али яке азьланяз?» Шуом, тӥ лыдӟиськоды 1 Фессалоникаослы 5:17, 18. Тӥ дугдӥськоды но малпаськоды: «Макем ӵем но вань сюлмысьтым-а мон вӧсяськисько?» Собере тӥ тодады вайиськоды, мар понна Иеговалы тау шуэмды потэ, но, кылсярысь, Инмарлэн куинь кузьымъёсыз понна солы тау шуиськоды. Кӧня ке минут куспын малпаськыса, тӥ валады, кыӵе визь-кенеш сётэ Библия, но сое улонады пыртӥды. Нош малпалэ гинэ, макем бадӟым пайда тӥ басьтоды, котькуд нунал Библиез малпаськыса лыдӟиды ке! Тӥляд умойгес но умойгес пӧрмоз Инмарлэн Кылызъя улыны. w24.09 4—5 б., 9, 10 абз.

Мукетъёсызлы юрттӥськыса, ми шудогес луиськомы. Озьы милемыз Иегова кылдытӥз. Милемлы кельше вын-агайёсмылы но сузэр-апайёсмылы ӟеч ужъёс лэсьтыны. Ми шумпотӥськомы, куке милемлы тау карон кылъёс верало. Озьы ке но, милемыз тау каро-а, уг-а, ми шумпотӥськомы, малы ке шуоно асьмеды шонер возиськомы. Ноку эн вунэтэ: мае гинэ тӥ мукетъёсызлы медад сётэ, «Кузё-Инмар... [тӥледлы] талэсь но троссэгес сётыны быгатоз» (2 Пар. 25:9). Иегова котькинлэсь шырыт сямо. Соин ик со котькинлэсь умой тау карыны быгатэ. Ойдолэ азьланяз но, инмысь Атаймы кадь, шырыт сямоесь луыны тыршомы! w24.09 30—31 б., 20, 21 абз.

Иегова гажась-жалясь (Пс. 102:13; Ис. 49:15). Куке милемлы вӧсь, Инмарлы но вӧсь луэ (Зах. 2:8). Иегова милемлы юрттэ соин эшъяськыны (Пс. 24:14; Ап. уж. 17:27). Со сяна, со зӥбыт-востэм — «со инбам шоры, музъем шоры учкон понна мыкырске, тузон пушкысь куанерез султытэ» (Пс. 112:6, 7). Кызьы уд данъя сыӵе Инмарез! Ми Иеговаез данъяськомы, малы ке шуоно милям потэ, мукетъёсыз но со сярысь зэмлыкез мед тодозы шуыса. Тросэз Иегова сярысь зэмлыкез уг тодо. Малы? Малы ке шуоно Шайтан адямиосты пӧя, нош соос солы оско (2 Кор. 4:4). Шайтан адямиосты оскытӥз, Иегова — лек Инмар, со ми сярысь уг сюлмаськы но вань курадӟонъёсмы со бордысь пото шуыса. Но ми инмысь Атаймы сярысь зэмлыкез тодӥськомы! Милям со сярысь мукетъёсызлы вераммы луэ. Озьы ми Инмарез данъяськомы (Ис. 43:10). w25.01 3 б., 6, 7 абз.

Инмарлэн Пиез, Иисус, сьӧлыктэм вал но трос паймымон ужъёс лэсьтӥз. Озьы ке но Шайтан адямиос пыр со сярысь шонертэмзэ вераз. Кылсярысь, религиозной кивалтӥсьёс веразы, периосты улляны Иисуслы «периослэн эксэйзы» кужым сётӥз шуыса (Марк 3:22). Нош куке Иисусэз судъязы, религиозной кивалтӥсьёс веразы, со Инмарез сантэма шуыса, но калыкез Иисусэз виыны ӝутказы (Матф. 27:20). Берлогес, куке Христослэн дышетскисьёсыз ӟеч иворез веразы, тушмонъёссы «язычникъёслэсь сюлэмъёссэс вожомытӥзы, соослы пумит берыктӥзы» (Ап. уж. 14:2, 19). Тани мар вераське 1998-тӥ арын 1-тӥ толсур понна поттэм «Возьмаськон башняын» со сярысь, мар гожтэмын Апостолъёслэн ужъёсазы 14:2: «Иудейёс, христианъёслэн тушмонъёссы, зэмлыкез палэнтэм сяна, кыл вӧлдыса ветлӥзы но язычникъёслэсь сюлэмъёссэс Иисуслэн дышетскисьёсызлы пумит берыктылӥзы». Туннэ но Шайтан быдэс дуннелэсь визьзэ туга. w24.04 11 б., 15, 16 абз.

Куке Иегова быръёз, адямиез улӟытоно-а, ӧвӧл-а, со уз учкы, ку со кулӥз. Иегова — дун-шектэм Судья, со котьку но шонерлыко ужпум кутэ (Пс. 32:4, 5). Милям оскеммы луэ, «быдэс музъемлэн Судьяез» шонер лэсьтоз шуыса. Со сяна, куке Инмар быръёз, адямиез улӟытоно-а, ӧвӧл-а, со уз учкы, кытын со улӥз. Туннэ трос миллион адямиос уло сыӵе шаеръёсын, кытын Эксэйлык сярысь ивор уг вӧлмытӥськы. Валамон, адямилэсь кытын улэмзэ лыдэ басьтыса гинэ, Иегова сое «кечъёс» пӧлы уз пырты! (Матф. 25:46). Быдэс музъемлэн шонерлыко Судьяез адямиос понна милесьтым золгес сюлмаське. Ми пыр-поч ум тодӥське, мар кароз Иегова бадӟым куректон дыръя. Но куке Инмар вань калыкъёслы дун-шектэм луонзэ возьматоз, соос пӧлысь куд-огъёсыз солы оскозы но со пала султозы, вылды (Иез. 38:16). w24.05 12 б., 14, 15 абз.

Иеговалэн ужась-тыршисьёсыз ярато ог-огзылы юрттӥськыны (2 Кор. 8:4). Куддыръя со понна кышкасьтэм луыны кулэ, кылсярысь, ожмаськонъёс дыръя. Агайёсмы но сузэръёсмы Библитэк, публикациостэк, сиёнтэк но дӥськуттэк кыльыны быгато. Нош яратӥсь тӧроос тыршо, Иеговалэн калыкезлэн ваньмыз кулэез мед луоз шуыса. Со понна соос улонзэс но ыштыны дась. Секыт дыръя туж кулэ огкылысь улыны. Кылзӥське кивалтэтлэсь, кудзэ филиалысь агайёс сёто (Евр. 13:17). Тӧроос сётэм кивалтэтэз ялан эскерыны кулэ, кенеш шӧдтэк шорысь кылдэм секыт югдурлы дась мед луоз но мар карыны мед тодоз шуыса (1 Кор. 14:33, 40). Кышкасьтэмесь луэ, но со дыре ик чаклаське (Мад. 22:3). Мае ке лэсьтэмлэсь азьло малпаське. Иегова вылэ оскиське. Со юрттоз тӥледлы валаны, кызьы умойгес луоз агайёслы но сузэръёслы юрттыны. w24.07 4 б., 8 абз.; 5 б., 11 абз.

Давид эксэй Иеговаез тодӥз но со вылэ оскиськыса улӥз. Саул эксэйлэсь но мукет тушмонъёсызлэсь пегаса улыкуз, Давид Иеговалэсь юрттэтсэ утчаз. Куке Инмар Давидлы юрттӥз но сое утиз, Давид шумпотыса вераз: «Кузё-Инмаре улэп!» (Пс. 17:47). Та кылъёсын Давид Инмар зэм но вань шуыса гинэ ӧз вера. Давид вераз, Иегова — со улэп Инмар шуыса, кудӥз котьку но калыкезлы юрттэ. Зэм, Давид ас вылаз шӧдӥз, Иегова — со улэп Инмар шуыса. Солэн юн мылкыдыз вал азьланяз но Иеговалы ужаны-тыршыны но сое данъяны (Пс. 17:29, 30, 50). Ми оскимы ке, Иегова — со улэп Инмар шуыса, соку вань сюлмысьтымы солы ужаны-тыршыны быгатомы. Ми вань шуг-секытъёсты чидаломы но азьланяз но солы ужаломы-тыршомы. Озьы ик ми номырлы ум лэзе Иеговаен кусыпъёсмес лябӟытыны. w24.06 20—21 б., 3, 4 абз.

Малы милемыз дышето апостол Павеллэн кылъёсыз, кудъёссэ со Фессалоника карысь кенешлы гожтӥз? Ми но кылыны быгатӥськомы кыӵе ке паймытӥсь иворез яке сое, мар Библиысь зэмлыклы пумит мынэ. Соку туж сак луоно. Огпол Совето Союзысь агайёс гожтэт басьтӥзы. Верамын вал, со валтӥсь кивалтонниысь шуыса. Агайёслэсь мылкыдзэс ӝуто вал нимаз организация кылдытыны. Со гожтэт тушмонъёслэсь вал ке но, малпан кылдыны быгатэ вал, со агайёслэсь шуыса. Но оскымон агайёс ӧз пӧяське. Соос валазы, гожтэт пумит мынэ шуыса солы, малы соосты азьвыл организацимы дышетӥз. Туннэ но тушмонъёсмы туала технологиосты кутыны быгато, милемыз суран но ог-огмылэсь люкон понна. Соин ик туж сак луоно но дыртоно ӧвӧл. Пӧяськонлэсь утиськон понна, туж сак малпано, со, мае ми лыдӟиськомы но кылӥськомы, пумит ӧвӧл-а зэмлыклы, кудзэ ми тодӥськомы ини (2 Фес. 2:2; 1 Иоанн 4:1). w24.07 12 б., 14, 15 абз.

Улонмес Иеговалы сӥзьыса но солэн семьяез пӧлы пырыса, ми самой кулэ луись ужпум кутӥськомы. Иеговалэн потэ, вань адямиос сыӵе быръён мед лэсьтозы шуыса. Малы? Инмарлэн потэ, адямиос соин мед эшъяськозы но пырак мед улозы шуыса (К. Зак. 30:19, 20; Гал. 6:7, 8). Озьы ке но Иегова нокинэ кужмысь уг косы аслыз ужаны-тыршыны. Со котькуд адямилы лэзе аслыз быръён лэсьтыны. Нош мар кароно, куке пылатӥськем христиан мурт Инмарлэсь законзэ тӥя но бадӟым сьӧлык лэсьтэ? Со уг ӧпкельы ке, сое кенешлэсь палэнтоно (1 Кор. 5:13). Соку но Иегова туж возьма, сьӧлыкам мурт со доры берытскоз шуыса. Ӧпкелисьёсты простить карыны мед быгатоз шуыса, Иегова адямиос понна аслэсьтыз Пизэ сётӥз. Яратӥсь Инмармы сьӧлыкасьёсты ӧте ӧпкельыны (Зах. 1:3; Рим. 2:4; Иак. 4:8). w24.08 14 б., 1, 2 абз.

Куке Иоанн куинетӥ гожтэтсэ гожтӥз, кылдӥзы адямиос, кудъёсыз зэмос луисьтэм дышетонъёсты вӧлмытӥзы но кенешез люкизы. Но вал соос но, кинъёс азьвыл сямен «зэмлыкез санэ поныса» улӥзы. Соос Иеговалэсь кылзӥськизы но «Солэн курон-косонъёсызъя» улӥзы (2 Иоанн 4, 6). Сыӵе оскымон христианъёс Иоаннэз но Иеговаез шумпоттӥзы (Мад. 27:11). Малы ми дышетскиськомы? Оскымон луон шумпотон вае (1 Иоанн 5:3). Кылсярысь, ми шумпотӥськомы, куке Иеговаез шумпоттӥськомы. Нош со шумпотэ, куке ми визь сынаськонъёслы ум сётскиське но солэн законъёсызъя улӥськомы. Озьы ик инмысь кылчинъёс но шумпото (Лука 15:10). Со сяна, ми шумпотӥськомы, куке агайёсмы но сузэръёсмы Инмарлы оскымон кылё (2 Фес. 1:4). Нош куке Шайтанлэн дунеез быдтэмын луоз, ми шумпотомы, Иеговалы оскымон кылимы шуыса. w24.11 12 б., 17, 18 абз.

Кӧня дыр ортчыны кулэ шӧдонъёсыд сярысь верамедлэсь азьло? Дыртӥд ке, малпан кылдоз, тыныд чидан уг тырмы шуыса (Мад. 29:20). Туж кема возьмад ке, малпан кылдоз, тон дӥсьтӥсьтэм адями шуыса — уката но со адями шӧдонъёсыд сярысь сактӥськиз ке ини (Екк. 11:4). Адямиен вераськемедлэсь азьло тыныд ужпум кутоно ӧвӧл, кузпалъяськоно-а, ӧвӧл-а. Но тыныд валаны кулэ, тон кузпалъяськыны дась шуыса но та адями тыныд умой карт яке кышно луыны быгатэ шуыса. Нош мар кароно, тон шӧдӥд ке, кинлы ке кельшиськод шуыса? Со адями тыныд уг кельшы ке, валамон со сярысь вера. Озьы ӧд лэсьты ке, адями малпалоз, тон соин пумиськылыны пумит ӧвӧл шуыса, нош берло солы туж вӧсь луоз (Еф. 4:25). w24.05 22—23 б., 9, 10 абз.

Соос гинэ, кин зэмзэ ик святой духен зырӟемын но кинъёс пумозяз оскымонэсь луозы, Иисусэн ӵош инмысь Эксэйлыкын луозы. Зырӟем христиан мурт сак улэмысь дугдӥз ке, со кылчинъёсын люкам быръем адямиос пӧлын уз луы (Матф. 24:31). Но Иисуслэн алонэзлэсь кылзӥськоно соослы но, кинъёс музъем вылын пырак улыны оско. Соослы но сак улоно но оскымонэсь луоно. Ми умой тодӥськомы Иеговаез но оскиськомы кутэм ужпумъёсызлы. Со асьме нуналъёсы оскымон христианъёс пӧлысь кинэ ке святой духеныз зырӟе ке, милемлы со пумысен сюлмаськоно ӧвӧл. Тодамы ваёмы, мар Иисус вераз соос сярысь, кинъёс виноград бакчаын одӥг час гинэ ужазы (Матф. 20:1—16). Соос но, быдэс нунал ужасьёс но одӥг кадь уждун басьтӥзы. Ӵапак озьы ик зырӟем христианъёсын но: ку гинэ соос быръемын медам луэ, соос Иисусэн ӵош инмысь Эксэйлыкын луозы. w24.09 24 б., 15—17 абз.

Иисус самой умой адӟем карон возьматӥз, кызьы астэ возёно, шонерлыктэм ужъёсын пумиськыку. Соин асьсэды шонертэм возизы трос адямиос, озьы ик семьяез но. Ӵыжы-выжыосыз малпазы, со визьзэ ыштӥз шуыса. Религиозной кивалтӥсьёс веразы, солы периос кужым сёто шуыса. Нош рим ожгарчиос сое мыскыл каризы, жугизы но виизы (Марк 3:21, 22; 14:55; 15:16—20, 35—37). Иисус ваньзэ тае чидаз но пунэмзэ берыктыны ӧз тыршы. Малы та милемыз дышетэ? (1 Пётр 2:21—23). Шуг-секытъёсын пумиськыкумы, милемлы Иисуслэсь адӟем кароно. Со тодэ вал, ку шып улоно, нош ку мар ке но верано (Матф. 26:62—64). Солы пумит верам котькуд кыл бере со ассэ шонере поттыны ӧз туртты (Матф. 11:19). Нош мар ке но веракуз, со тушмонъёссэ ӧз ултӥя но соосты ӧз кышкаты. w24.11 5 б., 9, 10 абз.

Шуом, тӥ эштылы чебер но пайдаё кузьым кузьмады. Нош со сое ӝажы вылэ пуктӥз но со сярысь вунэтӥз! Соин сэрен тӥляд кӧтты ӝож луоз, дыр. Нош эшты кузьымды понна тӥледлы тау кариз ке но сое уже кутӥз ке, тӥ туж шумпотоды. Мае возьматэ та пример? Иегова но милемлы кузьым лэсьтӥз — ми понна аслэсьтыз Пизэ сётӥз. Ми солэсь кузьымзэ но милемыз яратэмзэ дунъямы ке, со туж шумпотоз! (Иоанн 3:16; Рим. 5:7, 8). Дыр ортчыса, дун тырон понна тау карон мылкыдмы сӥяны быгатэ. Вераны луоз, озьы ми Инмарлэсь дуно кузьымзэ ӝажы вылэ пуктӥськомы. Нырысь ми солы шумпотӥмы вал, нош собере со сярысь вунэтӥмы. Мар кароно, тау карон мылкыдмы медаз сӥя шуыса? Ялан тодамы вайылоно, мар ми понна каризы Инмар но Иисус Христос. w25.01 26 б., 1, 2 абз.

Агай, кудӥзлэн тӧро луэмез потэ, «али пылатэмъёс пӧлысь» луыны кулэ ӧвӧл. Тӧро луон понна, одно ик трос аръёс пылатӥськемын луыны кулэ ӧвӧл ке но, юн осконэн христиан мурт луон понна, кӧня ке дыр ортчыны кулэ. Иисус Христослэсь адӟем кар. Соку тон быгатод зӥбыт-востэм луыны, дась луыса кенешын котькыӵе ужъёсты быдэсъяны но чидаса возьманы, ку Иегова тыныд мукет ужъёсты оскоз (Матф. 20:23; Флп. 2:5—8). Со сяна, тӧролы «вӧсяськыса шонер улӥсь» луоно, яке солы Иеговалэн шонерлыко эсэпъёсызъя улоно но организациезлэн куронъёсызлэсь кылзӥськоно. Библия валамон вера, тӧро «дышетыны-валэктыны быгатӥсь» луыны кулэ шуыса. Возьматэ-а та, тӧро одно ик быгатыны кулэ шуыса туж умой речьёс вераны? Одно ик уг. Вань тӧроос сцена вылысен туж умой дышетыны уг быгато. Озьы ке но тодытон понна яке агайёсты но сузэръёсты юнматон понна, тӧролы быгатыса Библиез уже кутоно но дышетон быгатонлыкъёссэ ялан умоятоно. w24.11 23—24 б., 14, 15 абз.

Библиез лыдӟыкуды, тӥледлы тодмотэм кылбур пумиськиз ке, эскере сое. Собере нунал ӵоже малпаське, мае тӥ тодӥды эскеронды дыръя но мар со вера Иегова, Иисус но соослэн яратонзы сярысь (Пс. 118:97). Мылкыдды медаз куашка, Библиез котькуд лыдӟыкуды но эскерыкуды, тӥ мае ке выльзэ но тунсыкозэ уд ке шедьтӥське. Тӥледыз зарниез утчасен ӵошатыны луэ. Куддыръя, со трос часъёс но нуналъёс утча, но номыре уг шедьты. Озьы ке но со кизэ уг лэзьы. Со туж шумпотэ, куке солы пичи ке но зарни пыры сюре. Нош Библиысь зэмлык трослы дуногес! (Мад. 8:10). Соин ик чидась луэ, азьланяз но Библиез лыдӟе но со пушкы ватэм марӟанъёсты утчалэ (Пс. 1:2). w25.01 24—25 б., 14, 15 абз.

Иеговалэн потэ, ми дась мед луомы шуыса простить карыны соосты, кинъёс милемыз вӧсь каризы (Пс. 85:5; Лука 17:4). Адямилэн кылъёсыз яке ужъёсыз милемыз туж вӧсь карыны быгато, тужгес но со матысь адямимы ке (Пс. 54:13—15). Куддыръя чидантэм вӧсь луэ — сюлмамы пуртэн бышкалтэм кадь (Мад. 12:18). Бышкалтэм пуртэз ӧд потты ке, номыр умоез уз луы. Ӵапак озьы ик милемыз вӧсь каризы ке, нош ми асьмеды оскытӥськомы ке, милемлы вӧсь ӧвӧл но ваньмыз умой шуыса, малпано ӧвӧл, милемлы капчигес луоз шуыса. Куке милемыз вӧсь каро, ӵем дыръя ми йыркуръяськыны кутскиськомы. Йыркуръяськон шоры Библия уродэн уг учкы. Но валтӥсез — йыркуръяськон милемыз медаз вормы (Пс. 4:5; Еф. 4:26). Малы? Малы ке шуоно вожпотон ӵем дыръя номыр умойзэ уг вайы (Иак. 1:20). Эн вунэтэ: вожез поттыны но вожпотыса улыны — со пӧртэм. Нырысетӥез — со милям шӧдонъёсмы, кыкетӥез — со милям быръёнмы. w25.02 15 б., 4—6 абз.

Одӥг мадёназ Иисус пусйиз, адями, кудӥз коньдон люка но «Инмар азьын узырлык люкатэк» улэ, визьмо уг лэсьты шуыса (Лука 12:16—21). Одӥг адями но уг тоды, мар соин ӵуказе луоз (Мад. 23:4, 5; Иак. 4:13—15). Нош дышетскисьёсызлы Иисус эшшо одӥг шуг-секыт сярысь вераз — милемлы дась луоно вань ваньбурмес ыштыны (Лука 14:33). Нырысетӥ даурын, куке Иудеяысь христианъёс кельтӥзы ваньзэ, марзы соослэн вал, соос шумпотонзэс ӧз ыштэ (Евр. 10:34). Асьме нуналъёсы трос агайёс политикае пыриськымтэзы понна ужзэс ыштӥзы (Усьт. 13:16, 17). Мар ваньзылы соослы юрттӥз шуг-секытсы пыр потыны? Соос юн оскизы, Иегова таӵе сётэм кылзэ быдэстоз шуыса: «Уг кельты тонэ, уг кушты тонэ» (Евр. 13:5). Озьыен, арлыдо луэммы бере коньдонтэк медам кыле шуыса, милемлы лэсьтоно ваньзэ, мае быгатӥськомы, нош кылемзэ Иегова кие сётоно. Ми оскиськомы, шуг-секытъёс дыръя но Инмар ми сярысь сюлмаськыны быгатоз шуыса. w25.03 29 б., 13, 14 абз.

Иегова уг возьма, ми ас поннамы быдэ вуэм христианъёс луомы шуыса. Со сюлмаськиз, христиан кенешын возьмасьёс но дышетӥсьёс мед луозы шуыса. Та агайёс милемлы юртто Христос кадь быдэ вуыны (Еф. 4:11—13). Озьы ик Иегова сётӥз милемлы святой духсэ, милям «Христослэн визьмыз» мед луоз шуыса (1 Кор. 2:14—16). Со сяна, милям вань ньыль Евангелиосмы, кудъёсыз возьмато, кызьы малпаськиз, мар вераз но кызьы ассэ возиз Иисус, музъем вылын улыкуз. Солэсь адӟем карыса, ми быгатомы быдэ вуэм христианъёс луыны. Но со понна «Христослэн дышетонэзлэн кутсконэз» сярысь, яке Библиысь валтӥсь дышетонъёс сярысь, гинэ тодыны тырмыт ӧвӧл. w24.04 4 б., 11, 12 абз.

Ваньмы ми котькуд нунал ужпумъёс кутылӥськомы. Куд-огъёсыз капчиесь, кылсярысь, мае ӵукна сиёно яке ку изьыны выдоно. Мукетъёсыз — секытгес. Соос герӟаськемын тазалыкен, шудэн, семьяен но Инмарлы йыбыртъянэн. Милям потэ, кутэм ужпумъёсмы милемлы но, матысь адямиосмылы но пайда мед ваёзы шуыса. Нош валтӥсез — милям потэ, соос Иеговаез мед шумпоттозы шуыса (Рим. 12:1, 2). Ужпум кутэмлэсь азьло нырысь ик ваньзэ лыдэ басьтоно. Малы со кулэ? Шуом, адямилэн секыт висёнэз вань. Со эмъясь доры лыктӥз. Кутскоз-а эмъясь адямиез эмъяны, нырысь сое учкытэк но солы юанъёс сётъятэк? Уз! Ӵапак озьы ик милемлы но ужпум кутэмлэсь азьло ваньзэ лыдэ басьтоно. w25.01 14 б., 1—3 абз.

Иегова — гажась-жалясь Инмар но солэн уг поты, кин ке мед быроз шуыса (2 Пётр 3:9). Кызьы со гажан-жалянзэ возьматэ соослы, кинъёс секыт сьӧлыкъёс лэсьтӥзы? Учкомы куд-ог примеръёсты. Одӥгез соос пӧлысь — Давид эксэй. Со секыт сьӧлыкъёс лэсьтӥз, кылсярысь, азон-калгон сьӧлыке пыриз но адямиез вииз. Но Давид ӧпкелиз, соин ик Иегова сое простить кариз (2 Экс. 12:1—12). Манассия эксэй трос кышкыт, урод ужъёс лэсьтыса улӥз. Но Иегова адӟиз солэсь ӧпкелемзэ но сыӵе адямиез но простить кариз (2 Пар. 33:9—16). Та примеръёс милемлы тодамы вайыто, Иегова луэмезъя котьку гажан-жалянзэ возьматыны тырше шуыса. Со улӟытоз сыӵе адямиосты, кудъёсыз валазы, макем секыт сьӧлыкъёс соос лэсьтӥзы, но ӧпкелизы. w24.05 4 б., 12 абз.