Южтолэзь

Библиын вераське адямиос сярысь, кудъёсыз нырысь шонер улӥзы, нош собере шонер улэмысь дугдӥзы. Кылсярысь, Соломон эксэй. Со умой тодэ вал, кин со Иегова но кызьы солы ужано-тыршоно. Инмар сое бакель каре вал. Но берлогес Соломон зэмос луисьтэм инмаръёслы йыбыртъяны кутскиз, соин ик Иеговалэн туж вожез потӥз. Соломонлэн сьӧлыкъёсызлэн бервылъёсыз трос дауръёс ӵоже шӧдӥськизы на израиль калык вылын (3 Экс. 11:5—9; 4 Экс. 23:13). Озьы ке но Инмарлэн Кылаз верамын: «Соломон кулӥз но, сое атайёсыныз огазе Давидлэн, атаезлэн, городаз ватӥзы» (3 Экс. 11:43). Но со уг возьматы, вань кулэмъёс улӟытэмын луозы шуыса. Кулон адямилы право уг сёты выльысь улыны. Улӟытон — со яратӥсь Инмарлэн кузьымез. Иегова кузьма сое соослы, кинъёслы луонлык сётэмез потэ пырак дауръёс ӵоже солы ужаны-тыршыны (Иов 14:13, 14; Иоанн 6:44). Соломон сыӵе кузьым басьтоз-а? Иегова тодэ, нош ми — ум. Но ми тодӥськомы, Инмар одно ик шонер лэсьтоз шуыса. w24.05 4 б., 9 абз.

Иеговалы улонмес сӥзьыса, ми со доры куное лыктӥськомы. Со милемлы трос духовной сиён ӵектэ, озьы ик ми мукет куноосыныз эшъяськыны быгатӥськомы. Иеговалэн улон интыез — со кыӵе ке инты ӧвӧл. Солэн улон интыез отын, кытын солэн ужась-тыршисьёсыз (Усьт. 21:3). Нош мар вераны луоз Иеговалэн оскымон ужась-тыршисьёсыз сярысь, кудъёсыз кулӥзы ини? Луэ-а вераны, соос азьвыл сямен ик со дорын куноын шуыса? Луэ. Малы? Малы ке шуоно Иеговалэн син азяз соос улэпесь. Та адӟиське Иисуслэн кылъёсысьтыз: «Кулэмъёслэсь улӟыса султонзэс Моисей но куак дорысен возьматӥз, соку со Кузё-Инмарез Авраамлэн Инмарез, Исааклэн Инмарез, Иаковлэн Инмарез шуыса нимаз. Инмар — кулэмъёслэн Инмарзы ӧвӧл, Со — улэпъёслэн Инмарзы. Инмар азьын ваньмыз улэпесь» (Лука 20:37, 38). w24.06 3 б., 6, 7 абз.

Куке Садок Хевронэ мынӥз, солэн ожтӥрлыкез вал — со ожмаськыны дась вал (1 Пар. 12:38). Солэн юн мылкыдыз вал Давид палан ожмаськыны но Израилез тушмонъёслэсь утьыны. Садок священник вал, соин ик со трос ожмаськемын ӧй вал, дыр. Но со туж кышкасьтэм вал. Мар юрттӥз Садок священниклы кышкасьтэм луыны? Со котырын кужмоесь но кышкасьтэмесь адямиос вал. Со соослэсь адӟем кариз, луоз. Кылсярысь, соос пӧлын вал Давид. Со туж кышкасьтэм вал но ожгарчиосын кивалтӥз. Соин ик израиль калыклэн сое эксэе пуктэмез потӥз (1 Пар. 11:1, 2). Тушмонъёсыныз ожмаськыкуз, Давид котьку Иегова вылэ оскиськиз (Пс 137:3). Садок вӧзын вал на мукет адӟем карымон пиосмуртъёс: Иодай но кышкасьтэм Ванея пиез, озьы ик мукет «кызь кык мурт кивалтӥсь йыръёс» (1 Пар. 11:22—25; 12:26—28). w24.07 3 б., 5, 6 абз.

Тарс карысь Савл трос урод ужъёс лэсьтӥз. Со лек уйылӥз-улляз Христослэсь дышетскисьёссэ. Тросэз христианъёс малпазы, вылды, со ноку уз воштӥськы но уз ӧпкельы шуыса. Но улӟем Иисус мукет сямен малпаськиз. Со но солэн Атаез Савллэсь умой сямъёссэ адӟизы. Иисус Савл сярысь вераз: «Со... Мынам быръем сосудэ» (Ап. уж. 9:15). Савллы ӧпкельыны юрттон понна, Иисус паймымон уж лэсьтӥз (Ап. уж. 7:58—8:3; 9:1—9, 17—20). Иисуслэн дышетскисез луыса, Савл, кудӥз берлогес апостол Павел шуыса тодмо луиз, ӵем вералляз, Иеговалы но Иисуслы тау каре шуыса, солы ӟечлыксэс но гажан-жалянзэс возьматэмзы понна (1 Тим. 1:12—15). Огпол Павел кылӥз, Коринфысь кенешын одӥг агайлэн азыса-калгыса улэмез шоры чиньы пыр учко шуыса. Мар кариз Павел? Со кенешлы курон-косонъёс сётӥз, кудъёсысьтыз троссэ тодыны луэ Иегова сярысь. Куке Инмар кылкутытэ, со сое яратыса лэсьтэ, нош куке адями ӧпкеле, Инмар солы гажан-жалянзэ возьматэ. Милемлы но гажан-жалянмес возьматоно. w24.08 13 б., 15, 16 абз.

Кӧня ке дауръёс ӵоже, Иегова пичиен-пичиен валэктылӥз, кызьы сьӧлыко адямиос со доры матэгес кариськыны быгато. Нырысетӥез, кин Адамлэн но Евалэн сьӧлыкамзы бере Иеговалы оскиз, вал Авель, Адамлэн но Евалэн кыкетӥез пизы. Авель Иеговаез яратэ вал, солэн сое шумпоттэмез но соин эшъяськемез потэ вал. Авель пудо возьма вал бере, со аслаз уллёысьтыз кӧня ке ыжпиосты Иеговалы курбонлы вайиз. Кельшиз-а со Иеговалы? Кельшиз. «Кузё-Инмар Авель шоры яратыса учкиз, солэсь саламзэ-кузьымзэ кабыл басьтӥз» (Ул.-выл. 4:4). Берлогес мукет адямиос но, кудъёсыз Иеговаез яратӥзы но солы оскизы, солы курбонъёс вайылӥзы. Кылсярысь, одӥгез сыӵе адями вал Ной (Ул.-выл. 8:20, 21). Соослэн но курбонъёссы Иеговалы кельшо вал. Озьы Иегова возьматӥз, сьӧлыко адямиос сое шумпоттыны но соин эшъяськыны быгато шуыса. w24.08 3 б., 5, 6 абз.

Шонерлыктэм ужен пумиськыку, куддыръя милемлы чидантэм вӧсь луэ, сюлэммы ик чигиське (Екк. 7:7, ВД). Та выллем шӧдонъёссы вал Инмарлэн мукет но оскымон ужась-тыршисьёсызлэн, кылсярысь, Иовлэн но Аввакумлэн (Иов 6:2, 3; Авв. 1:1—3). Сыӵе шӧдонъёс валамон ке но, милемлы сак луоно. Малы ке шуоно, ми малпамъя, милемыз вӧсь карись адями кылкутытэмын ӧвӧл ке, милям малпанмы кылдыны быгатэ, асьмеды шонер воземмы нокыӵе пайда уг вайы шуыса. Ӵапак озьы малпа вал 72-тӥ псаломез гожъясь но. Со адӟе вал, лек адямиос шонерлыко адямиосты ултӥяса возё но со дыре ик майбыр уло шуыса (Пс. 72:12). Солэн сокем мылкыдыз куашказ, Инмарлы ужан-тыршон солы шумпотон уг вайы ни вал. Псаломез гожъясь вераз: «Кызьы меда тае валано шуыса, мон малпай; но мон понна со секыт вал» (Пс. 72:14, 16). w24.11 3 б., 5—7 абз.

Ми Иеговаез данъяськомы, малы ке шуоно сое мур гажаськомы. Милям трос мугъёсмы вань Инмарез гажаны. Кылсярысь, Иеговалэн мертантэм бадӟым кужымез вань (Пс. 95:4—7). Иегова котькинлэсь визьлыко. Сое адӟыны луэ кылдытэмъёсысьтыз. Иегова милемлы улон кузьма но улон понна ваньзэ кулэзэ сётэ (Усьт. 4:11). Инмар оскымон (Усьт. 15:4, ВД). Мар борды гинэ со медам басьтӥськы, солэн ваньмыз пӧрме. Сётэм кылзэ со котьку быдэстэ (Иис. Н. 23:14). Соин ик паймонэз ӧвӧл, Иеремия пророк Иегова сярысь таӵе кылъёс вераз шуыса: «Вань калыкъёс пӧлын, вань эксэйлыкъёсын но Тон кадь визьнодоез ӧвӧл» (Иер. 10:6, 7). Та куд-ог мугъёс гинэ, малы ми инмысь Атаймес гажаськомы. Со сяна, ми сое туж яратӥськомы. Нош валтӥсез, ми Иеговаез данъяськомы, малы ке шуоно сое туж яратӥськомы. w25.01 3 б., 5, 6 абз.

Инмарлэн тушмонъёсыз организациезлэсь ӟеч нимзэ саптаны тыршо. Кылсярысь, Библиысь асьмеос тодӥськомы, Иегова возьма, солэн ужась-тыршисьёсыз котьма ласянь чылкыт луозы шуыса. Инмар вера, кин сьӧлыка но воштӥськемез уг поты, кенешын луыны уг быгаты шуыса (1 Кор. 5:11, 12; 6:9, 10). Асьмеос кылзӥськиськомы та косонлэсь. Нош тушмонъёсмы верало, ми адямиосты ум яратӥське но соосты, кинъёс милесьтым пӧртэм луо, палэнтӥськомы шуыса. Милемлы валаны кулэ, кин зэмзэ ик Иеговалэсь организацизэ сантэма. Со Шайтан. Библиын со «ӧрекчаськонлэн атаез» шуыса нимамын (Иоанн 8:44; Ул.-выл. 3:1—5). Соин ик ми чик ум паймиське, со тушмонъёсмы пыр Иеговалэн организациез сярысь кыл вӧлдэ шуыса. w24.04 10—11 б., 13, 14 абз.

Бадӟым куректон «Быдӟым Вавилонэз» быдтонысен кутскоз. Соку куд-ог адямиос тодазы ваёзы, вылды, Иеговалэн Адӟись-Ивортӥсьёсыз кемалась верало вал ини, со озьы луоз шуыса. Со дыре куд-огъёсызлэн мылкыдзы ӝутскоз-а Иегова пала султыны? (Усьт. 17:5). Тодамы ваёмы, мар луиз Моисей улон нуналъёсы. Израиль калык Египетысь потыку, «пӧртэм выжыосысь адямиос но трос кузя соосын ӵош потӥзы» (Пот. 12:38). Соос пӧлысь кин ке но Иеговалы оскиз, вылды, куке адӟиз, кызьы быдэсмо Египет вылэ ыстэм дас шугадӟонъёс сярысь Моисейлэн кылъёсыз. «Быдӟым Вавилонэз» быдтэм бере но со выллем учыр кылдӥз ке но Армагеддон кутскон азьын адямиос ми пала султӥзы ке, ми шумпотомы-а? Туж шумпотомы! Милям адӟем кареммы потэ инмысь Атаймылэсь, кудӥз «адямиез яратӥсь, гажась-жалясь, кема чидась, туж гажась-жалясь, зэмлыко Инмар» луэ (Пот. 34:6). w24.05 11 б., 12, 13 абз.

Мар луоз, ми «визьмо дышетонъя» ӧм улэ ке? Эскеромы тае одӥг учыр вылын. Нырысетӥ даурын христиан кенешын вераськонъёс ветлӥзы, Иеговалэн нуналыз вуиз ини шуыса (2 Фес. 2:2, ВД). Сыӵе вераськонъёс кылдӥзы, вылды, гожтэт сэрен, кудзэ, верало вал, Павел гожтӥз шуыса. Фессалоникаысь куд-ог христианъёс, ваньзэ пыр-поч эскерытэк, со гожтэтлы оскизы но со сярысь мукетъёсызлы вераны кутскизы. Соос тодазы возьысалзы ке, малы соосты Павел азьвыл дышетӥз, соку со гожтэтлы ӧй оскысалзы (2 Фес. 2:1—5). Соин ик Павел вын-агайёсызлы тодазы вайытӥз, ваньмызлы осконо ӧвӧл шуыса. Соос азьланяз зэмлыкез пӧяськонлэсь висъяны мед быгатозы шуыса, Павел Фессалоникаослы 2-тӥ гожтэтсэ тазьы йылпумъяз: «Котькуд ыстэм гожтэтэлэсь ӟечкылан люкетсэ мон, Павел, ас киыным гожтыса, тазьы йылпумъясько» (2 Фес. 3:17). w24.07 12 б., 13, 14 абз.

Иудеяысь христианъёсты азьланяз шуг-секытъёс возьмазы, соин ик соослы чидан кулэ вал. Кин ке но уйылон-уллянъёсын азьвыл пумиськылӥз ке но, тросэз соосын пумиськылэмын ӧй вал. Соин ик апостол Павел тодазы вайытӥз, соослы уйылон-уллянъёслы дасяськоно но, Иисус сямен, кулытозязы оскымон луыны дась луоно шуыса (Евр. 12:4). Трос еврейёс лекъяськыса улӥзы, малы ке шуоно калыксы пӧлысь трос адямиос христианъёс луизы. Кӧня ке ар солэсь азьвыл 40-лэсь но тросгес еврейёс, «огазе люкаськыса, кескич сьӧд уж малпазы,— Инмар азьын кыл сётӥзы: Павелэз виытозязы, сиськытэк, юытэк улыны» (Ап. уж. 22:22; 23:12—14). Христианъёсты адӟемпотостэм каризы но уйылӥзы-уллязы ке но, соослы азьланяз но кулэ вал Инмарлы йыбыртъян понна огазе люкаськылыны, ӟеч иворез тодытыны но юн осконэн улыны. w24.09 11 б., 15 абз.

Иоанн вал Иисус Христослэн матысь эшез но солэн апостолэз (Матф. 10:2). Со трос тодытӥз Иисус Христосэн ӵош, солэсь паймымон ужъёссэ адӟиз но секыт дыръёсы солы юрттӥськиз. Иоанн адӟиз, кызьы Иисусэз казнить каризы но кызьы со собере улӟиз. Озьы ик Иоанн адӟиз христиан кенешлэсь будэмзэ но ӟеч иворлэсь «ин улын улӥсь вань калыкъёс» пӧлын вӧлмемзэ (Кол. 1:23). Иоаннлы дан сётэмын вал Библиысь куд-ог книгаосты гожъяны. Улонэзлэн пумаз со гожтӥз «Иисус Христослэсь усьтӥськонзэ» (Усьт. 1:1). Со сяна, со гожтӥз ньыль Евангелиос пӧлысь одӥгзэ но куинь гожтэт. Куинетӥ гожтэтсэ Иоанн гожтӥз Гаий нимо оскымон агайлы, кудзэ со пизэ кадь яратэ вал (3 Иоанн 1). Та оскымон арлыдо ужась-тыршисьлэн гожъямез туннэ но Иисуслэсь дышетскисьёссэ юнматэ. w24.11 12 б., 15, 16 абз.

Яратӥсь карт кышнозэ дунъя но со шоры Иеговалэн кузьымез шоры кадь учке (Мад. 18:23; 31:10). Со кышноеныз ассэ лякыт но гажаса возе, ӵош кӧлакузы но. Кылсярысь, со уз косы лэсьтыны сое, маин сэрен кышноезлы возьыт луысал, со ассэ ултӥям кышномуртэн шӧдысал яке сое возьытлыкез йырйысал. Картлы но Иегова азьын чылкыт возьытлыкен улыны тыршоно (Ап. уж. 24:16). Картъёс, юн оске: Иегова адӟе, тӥ кылъёсыныды но ужъёсыныды кышнодылы гажамдэс возьматыны тыршиськоды шуыса. Соин ик кышнодэс ноку но вӧсь эн каре, соин асьтэды яратыса, лякытэн но гажаса возе. Озьы тӥ возьматоды, кышнодэс яратӥськоды но дунъяськоды шуыса. Кышнодэс гажаса, тӥ улонысьтыды самой дунозэ утёды — Иеговаен кусыпъёстэс (Пс. 24:14). w25.01 13 б., 17, 18 абз.

Маин пӧртэм Иеговалэн ужась-тыршисьёсыз соослэсь, кинъёс асьсэды христианъёс шуыса нимало гинэ? Иеговалэн ужась-тыршисьёсызлэн тодытыны ӟырдыт мылкыдзы вань. Мар юрттоз милемлы, кимес лэзьытэк, эшшо но ӟырдыт мылкыдын тодытыны? Иисус милемлы адӟем карон возьматӥз, кызьы тодытон уж шоры учконо. Со тодытэмысь ноку ӧз дугды. Дыр ортчемъя со эшшо но тыршиз тодытыны. Иисус ассэ ӵошатӥз виноград будэтӥсен, кудӥз куинь ар ӵоже смоква пуэз будэтӥз, со емыш мед ваёз шуыса. Иисус но куинь ар котыр еврейёслы тодытӥз, но тросэз солэн дышетскисьёсыз ӧз луэ. Виноград будэтӥсь смоква пуэз ӧз кора. Ӵапак озьы ик Иисус но адямиосты номырлы ярасьтэмъёсын ӧз лыдъя (Лука 13:6—9). Иисуслэн верамезлэсь кылзӥськыса но солэсь адӟем карыса, ми но ӟырдыт мылкыдын тодытомы. w25.03 14—15 б., 1—4 абз.

Шуом, тыныд кин ке но кельшиз. Мар табере кароно? Библиын вераське, тодон-валан басьтоно шуыса. Соин ик эн дырты адямилы вераны, со тыныд кельше шуыса. Визьмо луысал нырысь сое умойгес тодыны. Адямиез умойгес тодон понна, чакла, кызьы со ассэ возе кенешлэн пумиськонъёсаз но эшъёсыз пӧлын. Озьы тон тросгес тодод Иеговаен кусыпъёсыз сярысь но солэн сямъёсыз сярысь. Юа аслэсьтыд: «Кинэн со эшъяське? Мар сярысь со вераське? (Лука 6:45). Тупало-а милям ас азямы пуктэм ужпумъёсмы?» Озьы ик вераськыны луэ солэн кенешысьтыз тӧроосын яке мукет христианъёсын, кудъёсыз сое умой тодо но кудъёсызлэн Иеговаен юн кусыпъёссы (Мад. 20:18). Кылсярысь, юа, кыӵе солэн сямъёсыз но мар соос со сярысь малпало (Руфь 2:11). Но адями ассэ умойтэм медаз шӧды шуыса, ялан со сьӧры эн ветлы но ваньзэ пыр-поч тодыны эн тыршы. w24.05 22 б., 7, 8 абз.

Тӧроос уз дыртэ малпаны, сьӧлыкам мурт ноку уз ӧпкельы шуыса. Куд-огъёсыз, тӧроосын нырысетӥзэ пумиськыкузы ик ини, ӧпкелё. Нош кинлы ке но тросгес дыр кулэ. Соин ик тӧроос соин кӧня ке пол пумиськылозы. Оло нош, тӧроосын нырысетӥзэ пумиськемез бере сьӧлыкам мурт соослэн кылъёссы вылын малпаськыны кутскоз, Иегова азьын зӥбыт-востэм кариськоз но куроз сое простить карыны (Пс. 37:19). Соку, тӧроосын мукет дыръя пумиськыкуз, солэн мукет мылкыдыз луоз ини, вылды. Сьӧлыкам муртлы ӧпкельыны юрттыкузы, тӧроос асьсэды небыт возё. Соос вӧсясько, Иегова тыршемзэс бакель мед кароз шуыса, но оско, агай яке сузэр сьӧлыксэ валалоз но ӧпкелёз шуыса (2 Тим. 2:25, 26). w24.08 22—23 б., 12, 13 абз.

Иеговалэн уг поты, кин ке но мед быроз шуыса. Солэн потэ, сьӧлыкасьёс соин кусыпъёссэс мед тупатозы шуыса (2 Кор. 5:20). Тӥни малы дауръёс ӵоже Иегова котьку но ӧтиз аслэсьтыз ужась-тыршисьёссэ, кудъёсыз солэсь палэнскизы, ӧпкельыны но со доры берытскыны. Тӧроослы бадӟым дан сётэмын Иеговаен ӵош ужаны — юрттыны соослы, кинъёс сьӧлыказы, ӧпкельыны (Рим. 2:4; 1 Кор. 3:9). Пуктэ син азяды, макем шумпото Иегова, Иисус но кылчинъёс, куке сьӧлыкасьёс ӧпкелё! Куке ышем ыж кенеше берытске, Иеговалэн сюлмыз шумпотонэн пачылме. Инмысь Атаймылэн гажан-жалянэз но ӟечлыкез сярысь малпаськыса, ми сое эшшо но зол яратӥськомы (Лука 1:78). w24.08 31 б., 16, 17 абз.

Иисус лэзьысал ке ассэ эксэе пуктыны, со политикае пыриськысал. Нош мар со кариз? Со «гурезе кошкиз». Адямиослэн зӥбемзы шоры учкытэк, Иисус политикае ӧз пыриськы. Та пумысен со милемлы туж умой адӟем карон возьматӥз! Милемыз уз куре, вылды, паймымон амалэн адямиосты сюдыны, соосты бурмытыны яке быдэс калыкен кивалтыны. Но адямиос милемыз косыны быгато кин ке понна куарамес сётыны яке кызьы ке мукет сямен солы дурбасьтыны. Нош Иисус политикае ӧз пыриськы но берлогес шуиз: «Мынам Эксэйлыке та дуннелэсь ӧвӧл» (Иоанн 17:14; 18:36). Ми Христослэн дышетскисьёсыз бере, милям со кадь малпаськеммы но асьмеды воземмы потэ. Соин ик ми Инмарлэн Эксэйлыкез пала кариськиськомы, со сярысь тодытӥськомы но вӧсяськиськомы, со мед лыктоз шуыса (Матф. 6:10). w24.12 4 б., 5, 6 абз.

Тырше уже кутыны сое, мае тӥ тодӥды, Библиез эскерыкуды. Кылсярысь, Иеговалэсь адӟем карыса, котькинэн асьтэды шонерлыко возе. Иисуслэсь адӟем карыса, инмысь Атайдэс но адямиосты яратэ. Озьы ик дась луэ Иеговалэн нимыз понна курадӟыны но мукет адямиос понна малэсь ке куштӥськыны. Со сяна, мукет адямиос но дун тыронлы оскыны мед быгатозы шуыса, вералэ соослы со сярысь, мар соос понна лэсьтӥз Иегова. Дун тырон сярысь тросгес тодыса но сое дунъяса, ми эшшо но зол яратомы Иеговаез но солэсь Пизэ. Соос но милемыз эшшо но юн яратозы (Иак. 4:8). Соин ик ойдолэ дун тырон сярысь мае ке выльзэ тодыны тыршомы, Библиез эскерыса но уже кутыса ваньзэ, мае сётэ Иеговалэн организациез. w25.01 25 б., 16, 17 абз.

Пуктэ син азяды, кызьы Иегова ӧпкелись адямилэсь сьӧлыкъёссэ басьтэ но адӟонтэм вылысь соосты сэрпалтэ. Туннэлы кылбурысь кылъёсты тазьы берыктыны луэ: «Тон лэсьтӥд озьы, сьӧлыкъёсы ӧй но вал кадь». Та выллем малпан гожтэмын Михейлэсь 7:18, 19. Отын вераське, Иегова сьӧлыкъёсмес зарезь пыдсы сэрпалтэ шуыса. Вашкала дыръя зарезь пыдсы усем мае ке поттыны уг луы вал ини. Кызьы возьмато та примеръёс, простить карыкуз Иегова сьӧлыкъёсмес быдэсак куштэ, возьытлыкмы милемыз медаз йырйы ини шуыса. Давид вераз: «Шудоесь, кинъёслэн законлы пумит улэмъёссы куштэмын, кинъёслэн сьӧлыкъёссы ӵушемын» (Рим. 4:7). Со зэмос простить карон! w25.02 9 б., 7, 8 абз.

Туннэ музъем вылын рай вань. Отын уло трос миллион тупаса улонэз яратӥсь адямиос. Ваньзы соос ӟеч ужъёс лэсьто. Со райын улӥсьёслэн отысь потэмзы уг поты. Со сяна, соос мукетъёссэ но ӧтё отчы пырыны. Кыӵе рай сярысь вераськон мынэ? Со духовной рай! Та дуннеын адямиос лекъяськыса но ог-огзэс адӟемпотостэм карыса уло (1 Иоанн 5:19; Усьт. 12:12). Нош Иегова сюлмаське аслаз калыкез сярысь. Со кылдытӥз духовной рай, кытын солэн ужась-тыршисьёсыз тупаса но огкылысь улыны быгато. Со духовной раез Библия ӵошатэ ватӥськон интыен но «вуэн тырмыт кисьтэм садэн» (Ис. 4:6; 58:11). Иегова бакель каре аслэсьтыз калыксэ, соин ик соос отын таӵе секыт вакытэ но кышкатэк но шумпотыса уло (Ис. 54:14; 2 Тим. 3:1). w24.04 20 б., 1, 2 абз.

Тынад кузпалъяськемед потэ ке, тон со сярысь вӧсяськиськод, луоз. Иегова кылзэ ӧз сёты, тыныд карт яке кышно утчалоз шуыса. Но со тодэ, мар тыныд кулэ но мае тон шӧдӥськод, но тыныд юрттыны быгатэ тупась кузпал шедьтыны. Соин ик азьланяз но вера Инмарлы аслад сюлмаськонъёсыд но мылпотонъёсыд сярысь (Пс. 61:9). Вӧсяськы, чидан но визьлык курыса (Иак. 1:5). Тыныд малпамедлэсь кемагес возьмано луиз ке но, Иегова тонэ уз кельты, тон сярысь сюлмаськоз но тонэ яратоз (Пс. 54:23). Но чакласькы, кузпалэз утчан улонад нырысетӥ интые медаз поты шуыса (Флп. 1:10). Кузпалъяськемын-а тон, ӧвӧл-а, тон зэмзэ ик шудо луод, Иеговаен юн кусыпъёсыд луизы ке (Матф. 5:3, ВД). Кузпалъяськымтэ христианъёс Иеговалы тросгес ужаны-тыршыны быгато (1 Кор. 7:32, 33). Соин ик дырдэ пайдаё уже кут но тыршы пӧртэм амалъёсын ужаны-тыршыны. w24.05 21 б., 4 абз.; 22 б., 6 абз.

Кӧня дыр пумиськылоно? Дыртон номыр умойзэ уг вайы (Мад. 21:5). Соин ик пумиськылоно сомында, кӧня кулэ, ог-огдэс умой тодон понна. Но нокыӵе мугтэк кема пумиськылоно ӧвӧл. Библиын гожтэмын: «Кема дыр ӵоже быдэсмисьтэм оскиськон сюлэмез шугъяськытэ» (Мад. 13:12). Нош, тодмоосмы пӧлысь кин ке пумиськылэ ке, кызьы милям соослы юрттэммы луэ? Кылсярысь, ми быгатӥськомы соосты ӧтьыны ӵош сиськыны, семьяен йыбырттонамы яке ӵош шутэтскыны (Рим. 12:13). Оло нош, тӥ соослы юрттыны быгатӥськоды, соосын ӵош кытчы ке мыныса яке соосты ас дорады ӧтьыса, соос кыкназы гинэ медаз кыле шуыса (Гал. 6:10). Агай но сузэр тӥледыз ӧтизы ке соосын дырзэс ортчытыны, шумпотыса соглаш кариське. Соосты кыкназы гинэ эн кельтэ, но со дыре ик ялан сьӧразы эн ветлэ, соос ог-огенызы вераськыны мед быгатозы шуыса. w24.05 30 б., 13, 14 абз.

Тӧроос валаны тыршо, малы адями сьӧлыказ. Малы агайлэн яке сузэрлэн Иеговаен кусыпъёсыз лябӟизы? Оло нош, со ялан Библиез эскеремысь, тодытэмысь яке вань сюлмысьтыз вӧсяськемысь дугдӥз? Оло нош, со шонертэм мылпотонъёсызлы сётскиз? Кинэн но кызьы со шутэтске? Кызьы сыӵе быръён солэн малпаськон амалэз но мылпотонъёсыз вылын шӧдӥськиз? Вала-а со, аслаз ужъёсыныз инмысь Атайзэ, Иеговаез, вӧсь кариз шуыса? Умой малпам юанъёс сётъяса, тӧроос юртто сьӧлыкам муртлы малпаськыны со сярысь, малы со Иеговалэсь палэнскиз но сьӧлыказ (Мад. 20:5). Соку тӧроослы лякытэн вераськоно но мултэссэ тодыны тыршоно ӧвӧл. Озьы ик тӧроос вераны быгато пример, кудӥз сьӧлыкам муртлы валаны юрттоз, вылды, макем урод уж со лэсьтӥз. Оло нош, тӧроосын нырысетӥзэ вераськыкуз ик, сьӧлыкам мурт лэсьтэм ужез сярысь жаляны кутскоз. Оло нош, ӧпкелёз но. w24.08 22 б., 9—11 абз.

Иисус ӟырдыт мылкыдын «Инмар Эксэйлык сярысь Ӟеч Иворез» тодытӥз. Со тодэ вал, Инмар сое ӵапак со понна ыстӥз шуыса. Ужан-тыршон Иисуслэн улоназ нырысетӥ интыын вал. Музъем вылын улонэзлэн берпуметӥ толэзьёсаз но со адямиосты «городъёстӥ, гуртъёстӥ дышетыса» ветлӥз (Лука 13:22). Озьы ик со выль дышетскисьёсты дышетӥз, соос соин ӵош мед тодытозы шуыса (Лука 10:1). Туннэ но ӟеч иворез тодытон — самой кулэ уж. Иеговалэн но Иисус Христослэн потэ, ми со ужез мед быдэсъяломы шуыса (Матф. 24:14; 28:19, 20). Мар милемлы юрттоз азьланяз но ӟырдыт мылкыдын тодытыны? Милемлы котькуд адями шоры Иеговалэн синмыныз учконо. Солэн потэ, тросгес адямиос ӟеч иворез мед кылозы но соя мед улозы шуыса (1 Тим. 2:3, 4). Иегова милемыз дышетэ эшшо но быгатӥсь дышетӥсьёс луыны, малы ке шуоно ивор, кудзэ ми вераськомы, адямиослэсь улонзэс уте. Адямиос али Иеговалы ужаны-тыршыны ӧз кутске ке но, оскон вань, соос бадӟым куректон йылпумъяськытозь ужаны-тыршыны кутскозы шуыса. w25.03 15—16 б., 5—7 абз.

Кызьы асьмеды возёно соосын, кинъёс кенешлэсь палэнтэмын вал? Котькуд агай яке сузэр ачиз ужпум кутэ, дышетэм возьытлыксэ лыдэ басьтыса. Куд-огъёсыз ужпум кутыны быгато кенешлэсь палэнтэм адямиен ӟечбуръяськыны яке солы кӧня ке ӟеч кылъёс вераны. Но ми соин кема ум вераське яке кызьы ке мукет сямен дырмес ум ортчытъялэ. Куд-огъёсызлэн таӵе юанзы кылдыны быгатэ: «Уг вера-а Библия, сыӵе муртэн ӟечбуръяськыса, христиан мурт „солэн урод ужъёсаз пыриське“ шуыса?» (2 Иоанн 9, 10). Иоаннлэсь кыкетӥ гожтэтсэ пыр-почгес эскерыса, валаны луэ, 9-тӥ кылбурысен 11-тӥ кылбурозь вераське шуыса зэмос йыбырттонлэсь палэнскемъёс сярысь но соос сярысь, кинъёс мукетъёсызлэсь мылкыдзэс ӝуто лэсьтыны сое, мае Библия уродэн лыдъя (Усьт. 2:20). Соин ик адями вӧлмытэ ке дышетонъёсты, кудъёсыз Библилы пумит мыно, тӧроос соин уз пумиськылэ. Ми оскиськомы, сыӵе адями ӧпкелёз шуыса. Но со дырозь ми соин ум ӟечбуръяське но пумиськонъёсамы ум ӧте. w24.08 30—31 б., 14, 15 абз.

Трос адямиосты сюдэмез бере Иисус дышетскисьёссэ косӥз пыже пуксьыны но Капернауме берытскыны. Нош ачиз, сое эксэе пуктыны турттӥсь адямиослэсь пегӟыса, гурезь йылэ тубиз (Иоанн 6:16—20). Куке апостолъёс зарезь вылын вал, кужмо сильтӧл ӝутскиз. Пыж борды бадӟым тулкымъёс шуккылӥськизы. Ӵапак соку дышетскисьёс адӟизы, кызьы Иисус соос доры ву вылтӥ лыктэ. Иисус Пётрлы но ӵектӥз ву вылтӥ мыныны (Матф. 14:22—31). Иисус пыже пырем бере тӧл пуксиз. Дышетскисьёс шуизы: «Зэм ик, Тон Инмар Пи» (Матф. 14:33). Паймоно кадь, дышетскисьёс тае али гинэ валазы шуыса. Нош куке Иисус трос адямиосты сюдӥз, соос сое ӧз валалэ. Та сярысь Марк шуиз: «Асьсэ куспын соос туж паймыса, абдраса улӥзы. ...Нянь люкылыку луэм паймымон ужез адӟыса но, соос ӧз валатске» (Марк 6:50—52). Дышетскисьёс ӧз валалэ, та кык паймымон ужъёсты лэсьтыны Иисуслы Иегова кужым сётӥз шуыса. w24.12 5 б., 7 абз.

Милям Иеговалы дун тырон понна тау кареммес возьматэммы луэ Ӝытан азьын, со дыръя но со бере лэсьтэм ужъёсынымы. Ми асьмеос но тыршомы Ӝытанэ лыктыны, озьы ик мукетъёсызлы но со сярысь вераломы. Валэктэ соослы, кинэ тӥ ӧтиськоды, кызьы Ӝытан ортчытӥське. Кылсярысь, возьматэ соослы jw.org сайтысь «Малы Иисус кулӥз?» но «Иисус Христослэсь кулонзэ тодэ ваён» видеороликъёсты. Тӧроос одно ик тыршозы ӧтьыны агайёсты но сузэръёсты, кудъёсыз пумиськонъёсамы ветлэмысь дугдӥзы. Малпалэ гинэ, макем шумпотозы инмысь но музъем вылысь Иеговалэн ужась-тыршисьёсыз, куке солэн ышем ыжъёсыз кенеше берытскозы! (Лука 15:4—7). Нош Ӝытанэ лыктыса, ог-огенымы ӟечбуръяськем сяна, ойдолэ ӟечбуръяськомы соосын но, кинъёс нырысетӥзэ лыктозы яке кинъёс кемалась ӧз ветлэ ни. Милям потэ, ваньзы мед шӧдозы, ми соослы шумпотӥськомы шуыса (Рим. 12:13). w25.01 29 б., 15 абз.

Дун тырон возьматэ, Иегова шонерлыко шуыса. Со сяна, со валаны юрттэ, макем юн яратэ Иегова адямиосты (Иоанн 3:16; 1 Иоанн 4:9). Иеговалэн потэ, ми пырак мед уломы шуыса. Со сяна, солэн потэ, ми солэн семьяяз мед пыромы шуыса. Куке Адам сьӧлыказ, Иегова сое семьяысьтыз улляз. Соин ик нокин но Инмарлэн семьяяз уг вордӥськы. Но дун тыронлы луыса Иегова сьӧлыкъёсмес простить каре. Соин ик адямиос, кудъёсыз Инмарлы оско но солэсь кылзӥсько, азьланяз солэн пиосыз но нылъёсыз луозы. Нош али милям Иеговаен но солэн калыкеныз матысь кусыпъёсмы луыны быгато. Зэм но, Иегова милемыз туж яратэ! (Рим. 5:10, 11). w25.01 21 б., 6 абз.

Дун тырон — Иеговалэн дуно кузьымез (2 Кор. 9:15). Инмар музъем вылэ аслэсьтыз Пизэ ыстӥз, кудӥз ми понна улонзэ сётӥз. Солы луыса ми быгатӥськомы Иеговалэн матысь эшъёсыз луыны но пырак улыны. Иегова ми понна Пизэ сётӥз, малы ке шуоно милемыз туж яратэ (Рим. 5:8). Тау карон мылкыдмы медаз сӥя шуыса, озьы ик медам вунэтэ шуыса, мар ми понна каризы Иегова но солэн Пиез, Иисус косӥз арлы быдэ солэсь кулонзэ Тодэ ваён ӝытанэз пусйылыны (Лука 22:19, 20). 2026-тӥ арын Ӝытан ортчоз 2-тӥ оштолэзе, покчиарняе. Ми ваньмы тыршомы отчы лыктыны. Умой луоз Ӝытан азьын но со бере кӧня ке арня ӵоже малпаськыны со сярысь, мар ми понна лэсьтӥзы Иегова но Иисус. w25.01 20 б., 1, 2 абз.

Ми быгатомы эшшо но трос тодыны Иеговалэн но Иисус Христослэн яратонзы сярысь, малпаськимы ке, мар соос ми понна лэсьтӥзы. Кылсярысь, тырше та арын Ӝытан азьын но собере дыр висъяны, одӥг яке кӧня ке Евангелиосты сак лыдӟон понна. Лыдӟиськыны пуксьыкуды, туж трос лыдӟыны эн турттэ. Со интые дыртытэк лыдӟиське но ужпум пуктэ эшшо но трос мугъёс шедьтыны Иеговаез но Иисусэз яратыны. Мае ке выльзэ тодӥды ке, одно ик сое мукетъёсызлы вералэ! Тӥ кемалась пылатӥськемын ке ини, тӥ малпаськоды, вылды, Инмарлэн шонерлыкез, яратонэз сярысь но дун тырон сярысь ваньзэ тодӥськоды ини шуыса. Но зэмзэ верано ке, та темаосты эскерыса, котьку мае ке выльзэ тодыны луэ! Соин ик публикациосмыя эскерон ортчытэ. Тӥ адӟоды, отысь туж трос выльзэ шедьтыны луэ шуыса. w25.01 24—25 б., 13—15 абз.