Mero apî o te Tino aratai

I TE poipoi Mahana toru 24 no Tenuare 2018, teie te parau apî taa ê i faaitehia i te mau utuafare o te Betela no Marite e no Kanada: ua faatoroahia taeae Kenneth Cook i roto i te Tino aratai a te mau Ite no Iehova.

Ua fanauhia e ua paari o taeae Cook i Pennsylvanie, Hau amui no Marite. Ua haapii oia i te parau mau i te hoê hoa haapiiraa ra na mua noa ˈˈe i te otiraa ta ˈna haapiiraa tuarua e bapetizohia ˈtura oia i te 7 no Tiunu 1980. Rave atura oia i te taviniraa taime taatoa ei pionie tamau i te 1 no Tetepa 1982. I muri aˈe e piti matahiti ei pionie, titauhia ˈtura oia i te Betela. Haamata ˈtura ïa oia i ta ˈna taviniraa i te Betela i Wallkill i New York, i te 12 no Atopa 1984.

I te roaraa o na 25 matahiti i muri iho, e rave rau ohipa ta taeae Cook i rave i roto i te tuhaa o te neneiraa papai e te tahi atu mau tuhaa taviniraa i te Betela. Faaipoipo atura oia ia Jamie i 1996 e apiti atoa maira oia ia ˈna i roto i te taviniraa i te Betela i Wallkill. I Titema 2009, faahaerehia ˈtura taeae e tuahine Cook i te Pu haapiiraa a te mau Ite no Iehova i Patterson i New York, e tuuhia ˈtura taeae Cook i te tuhaa e haapao ra i te pahono i te mau uiraa Bibilia. I Eperera 2016, i muri aˈe i te hoê tau poto i Wallkill, faahaerehia ˈtura taeae e tuahine Cook i Brooklyn i New York. E pae avaˈe i muri aˈe, faahaerehia ˈtura raua i te pu rahi i Warwick i New York. I Tenuare 2017, faatoroahia ˈtura taeae Cook ei mero tauturu i te Tomite papairaa a te Tino aratai.