Ia tupu te hoê ati natura

Te parau ra o Andrew, no Sierra Leone: “Ua hepohepo roa matou, to matou ïa huru i taua taime ra. Aita ta matou e tauihaa faahou i toe mai. Ua hee mai te vari e ua î roa mai to matou vahi nohoraa i te pape.”

Te na ô ra o David, no te Taamotu Vierges: “I muri aˈe i te mataˈi rorofai, ua hoˈi matou i te fare. Aita hoê aˈe mea faahou i toe mai. Ua vai muhu noa matou. Ua topa turi ta ˈu tamahine e ua taˈi oia.”

MAI te peu e ua ora ˈtu oe i te hoê ati natura, e taa paha ia oe i ta te tahi atu mau taata tei ora mai i faaruru: ua oti roa ratou, aita ratou i farii i tei tupu, ua hepohepo, ua ahoaho aore ra ua moemoeâ ino mau ratou. Aita te rahiraa o ratou e hinaaro faahou e haere i mua.

Ua oti roa paha oe no te mea ua ere oe i te taatoaraa o ta oe mau taoˈa i roto i te tahi ati natura. Te manaˈo ra paha oe e ere i te mea hoona ia ora. Te faataa mai ra râ te Bibilia e mea hoona iho â to oe ora e e nehenehe atoa oe e tiaturi papu i te hoê a muri aˈe maitai roa.

MEA HOONA TE ORARAA MAOTI TE MAU PUE PARAU MAU BIBILIA

Te na ô ra te Koheleta 7:8: “E mea maitai aˈe te hopea ra i te matamehai ra.” Mai te peu e no haamata noa ˈtura oe i te maitai, aita râ oe e manaˈo e oaoa faahou oe. Tera râ, a tamau ai oe i te haere i mua ma te faaoromai, e maitai mai ïa to oe oraraa.

Ua tohu te Bibilia e e tae mai te hoê taime ‘e ore hoi e faaroo-faahou-hia te reo oto e te reo auê.’ (Isaia 65:19) E tupu teie parau tohu i te taime e faariro te Faatereraa arii a te Atua i te fenua ei paradaiso. (Salamo 37:11, 29) E faaorehia te mau ati natura. E ore roa te mauiui e te mau pêpê e a muri noa ˈtu no te mea te fafau ra te Atua Mana hope: “E ore hoi tei mutaaihora e manaˈohia, e ore e faatupu-faahou-hia i roto i te aau.”—Isaia 65:17.

A feruri na: Ua faanaho te Atua poiete ia fanaˈo oe i te hoê a muri aˈe e te hoê tiaturiraa: te hoê oraraa hau i nia i te fenua faaterehia e te Faatereraa arii tia roa a te Atua. (Ieremia 29:11) Mai te peu e ua ite oe i teie parau mau, e manaˈo anei oe e mea hoona ia ora? Te na ô ra o Sally, tei faahitihia i te tumu parau matamua: “Ia feruri oe i te mau ohipa faahiahia atoa ta te Faatereraa arii a te Atua e rave no tatou, eita ïa oe e tiatonu faahou i nia i te ati, e haere râ oe i mua.”

A haapii atu â no nia i ta te Faatereraa arii a te Atua e rave no te huitaata. Ia na reira oe, e papu ia oe e noa ˈtu te ati ta oe i faaruru, mea hoona te oraraa i teie nei a tiai ˈi oe i te hoê a muri aˈe aita e ati faahou. I teie nei, te horoa mai ra te Bibilia i te mau aratairaa o te tauturu mai ia oe ia faaoromai. A hiˈo na i te tahi mau hiˈoraa.

Irava Bibilia o te tauturu mai

A taoto maitai.

“E maitai rahi te rima hoê ia î i te maa ma te hau, i na rima atoa e piti ia î, ma te peapea e te amu i te mataˈi ra.”—Koheleta 4:6.

Ua taa i te mau aivanaa, ia ore te taata e taoto maitai i muri aˈe i te ati, e ino roa ˈtu â paha to ˈna mauiui e e faaruru o ˈna i te mau fifi i te pae o te mau huru aau. No reira, mea faufaa roa ia taoto maitai.

A paraparau no nia i to oe mau huru aau.

“E oto tei te aau o te taata ra, e piˈo ïa i raro; hoê roa râ parau maitai ra, oaoa aˈera ïa.”—Maseli 12:25.

A paraparau i te hoê mero utuafare aore ra te hoê hoa tiaturihia. E faaroo te mau mero utuafare aore ra te mau hoa piri ia oe. Hau atu â, e tamahanahana ratou ia oe maoti te mau parau maitai e e tauturu atoa ratou ia oe.a

A hiˈo atea i te a muri aˈe maitai.

“Te tiai nei râ tatou i te mau raˈi apî e te hoê fenua apî ia au i ta ˈna i fafau, e i reira e vai noa ˈi te parau-tia.”—Petero 2, 3:13.

a Peneiaˈe mea hepohepo aore ra mea ahoaho roa te hoê taata no te hoê maororaa rahi, e ani paha oia i te tauturu a te mau taote.