E nehenehe outou e maramarama i te Bibilia

2. A taio ma te feruriraa farii

Ua faaino atu anei te hoê hoa i te hoê taata ta outou i ore i farerei aˈenei? E i to outou farereiraa i taua taata ra, aita ˈtura paha ïa outou i hiˈo faahou i to ˈna mau aravihi e huru maitatai. Tera atoa te nehenehe e tupu mai no nia i te Bibilia.

UA FAAARA te aposetolo Paulo i te ohipa e tupu ia ore tatou e taio i te Bibilia ma te feruriraa farii. Teie ta ˈna i papai no nia i te tahi mau ati Iuda o to ˈna tau: “O vau te ite ia ratou, e itoito to ratou i ta te Atua, e ere râ i te itoito ite.”—Roma 10:2.

Aita vetahi o taua mau ati Iuda ra o te senekele matamua i hinaaro e farii e o Iesu te Mesia, noa ˈtu e ua faaite te mau Papai Hebera i te reira ma te maramarama. Ua faaî hoi o Iesu no Nazareta i te mau titauraa bibilia atoa e ua faatupu i te mau parau tohu atoa. No to ratou râ mau manaˈo etaeta oti noa, aita te mau ati Iuda o to ˈna tau i maramarama i te Parau a te Atua.

Eaha ta te reira e haapii maira? Mea faufaa ïa ia taio i te Bibilia ma te feruriraa farii. E nehenehe te manaˈo oti noa e haafifi i te hoê taata taio ia maramarama i te parau mau bibilia.

Ei hiˈoraa, te faataa ra te hoê orometua no te mau haapiiraa faaroo i Marite, i te Bibilia mai “te hoê buka na te taata noa, o tei papai i to ratou iho mau manaˈo mea taa ê te tahi e te tahi e aita hoi e faaite maira i te aratairaa papu roa no nia i to tatou huru oraraa.” Mai te peu e e buka na te taata te Bibilia eiaha râ na te Atua, e haapao noa paha ïa te hoê taata i te aratairaa aore ra te faaueraa tumu ta ˈna e au.

Area te Bibilia, te faaitoito maira ïa ia haapii maite i te reira. Te na ô ra te mau Papai no to Berea i to Paulo tau: “Ua farii noa . . . ratou i te parau ma te aau mahora, e te imiraa i te parau i papaihia ra i te mau mahana atoa hoi i taua parau ra.” (Ohipa 17:11) Mai to Berea, e mea tia ia haapae outou i to outou mau manaˈo oti noa aore ra faahapa atoa no nia i te Bibilia. A taio i te Parau a te Atua ma te feruriraa farii e ma te hinaaro ru e ite i te poroi hope i te au a te Fatu o teie buka.