Ia au i te Bibilia . . .

No te aha e haapii ai i te Bibilia?

TE TAIORAA i te Bibilia taatoa, e ere ïa i te mea ohie. Ua taio aˈena anei outou i te Bibilia, hoê aore ra e rave rahi taime? E rave rahi mau taata o tei oaoa roa no te mea ua hope ia ratou, e ua tano roa ratou. E tia atoa ia tatou ia faariro i te faaherehereraa i te taime no te taio i te Bibilia ei tapao faufaa roa i roto i te oraraa; e tia hoi ia riro ei tapao faufaa roa ˈˈe i rotopu i te tahi atu mau tapao. Eaha te tumu? No te mea na roto i teie taioraa e noaa mai ai te ite no nia i te buka tei parare roa ˈˈe o te mau tau atoa, te buka hoê roa tei faaurua-mau-hia e te Atua.—Timoteo 2, 3:16.

Teie râ, maoti i te taio-noa-raa i te Bibilia e te iteraa i to ˈna mau manaˈo rahi, e nehenehe e haere â i nia i te tahi atu faito. Te hinaaro ra anei outou e faaoaoa i te Atua e e huti mai i te faufaa no te mau haapiiraa a ta ˈna buka moˈa? A pee ïa i teie mau aˈoraa ta te aposetolo Paulo i horoa ˈtu i te taurearea ra o Timoteo: “E rohi â i te taio i te parau, e te aˈo, e te haapii, . . . E haamanaˈo papu i teie nei mau parau; o ta oe ïa e rave eiaha e faaea, ia ite te taata atoa i te tupuraa o to oe ite. E ara ia oe, e ta oe e haapii ra; e tamau maite â i te reira: tei te na reira hoi e ora ˈi oe e te feia atoa e faaroo mai ia oe ra.”—Timoteo 1, 4:13, 15, 16.

No te feruri hohonu mai teie te huru i nia i te mau haapiiraa a te Bibilia e ia mau roa te reira i roto i to tatou feruriraa, eita noa e navai ia taio. E ere no te mea e e taio tatou i te Bibilia, e faaohipa maitai atoa ïa tatou i te mau haamaramaramaraa e noaa mai, mai ta te taioraa i te hoê buka no nia i te roro e ore e faariro i te hoê taata ei taote aravihi i te pae no te feruriraa. No reira, a haapao maite i teie â aˈoraa a Paulo ia Timoteo: “E faaitoito ia vai maite â oe i mua i te aro o te Atua ma te itehia mai, ei rave ohipa aita e haamaraa, e te tia hoi i te tufa i te parau mau ra.”—Timoteo 2, 2:15.

Te hoê ravea no te faarahi i to ˈna taa-maitai-raa

No te haapii i te faaohipa i te parau a te Atua ma te aravihi, e tia ia haapii ia ˈna. Ia haapii te hoê taata i te Bibilia ma te haapao maitai, oia hoi ia tuatapapa oia i te parau e vai ra i roto, e taa ia ˈna te auraa, e taio oia i te mau irava ia au i te mau pene i pihai iho mai e ia papu ia ˈna i te aamu, e nehenehe e noaa mai ia ˈna te maramarama o ta ˈna i ore roa ˈtu i manaˈo na mua ˈtu. E haamata oia i te huti mai i te faufaa no ˈna iho no roto mai i te Parau a te Atua.

E rave anaˈe na i te hoê hiˈoraa no te faaite e ia taio noa tatou i te hoê irava o te mau Papai, ma te ore e haapao i te mau irava no reira to ˈna hutiraahia mai, e nehenehe tatou e hape no nia i to ˈna auraa. I roto i te Ohipa 17:11, te parauhia ra no nia i te feia e ora ra i roto i te oire heleni no Berea, i pihai iho ia Tesalonia e: “E maitai mau to ratou i to Tesalonia, ua farii noa hoi ratou i te parau ma te aau mahora, e te imiraa i te parau i papaihia ra i te mau mahana atoa hoi i taua parau ra.”

Ia taio-noa-hia mai te reira, e nehenehe tatou e manaˈo e o te mau kerisetiano no Berea te mea tuatapapa maitai aˈe i to Tesalonia. Teie râ, a tapao na i te irava 10 o te Ohipa pene 17 e, i to raua tapaeraa ˈtu i Berea, ua haere atu o Paulo raua o Sila e poro i te Parau a te Atua i roto i “te sunago o te ati Iuda.” E te na ô atoa ra te irava 12 e ‘e feia rahi maira to te ati Iuda i faaroo.’ Auaa teie irava, e noaa mai te hoê faaotiraa ê atu. Te faaite maira te parau moˈa e ua faaauhia, eiaha te mau kerisetiano i roto i na oire toopiti nei, te mau ati Iuda râ e ora ra i reira.

Hau atu, ua tapao anei outou e no te aha e mea maitai aˈe te manaˈo o te mau Berea? No te mea ua imi ratou i te mau Papai ma te ru. I roto i te hoê buka faahororaa (Word Pictures in the New Testament), ua tatara te orometua haapii ra o Archibald Robertson i teie mau parau i te na ôraa e: “I te mau mahana atoa, ua faataa o Paulo i te mau Papai ma te hohora maitai i te mau parau atoa mai i Tesalonia ra, teie râ, maoti i te faahapa i ta ˈna faataaraa apî, ua tuatapapa te mau Berea ratou iho (anakrinô oia hoi te auraa te titiaraa, te raveraa i te mau maimiraa hohonu e te papu, mai te ravehia i roto i te hoê haavaraa [...]) i te mau Papai.” E ere ta ratou tuatapaparaa i te mea papu ore. Ua tamata maite teie mau ati Iuda no Berea i te parau ta Paulo raua o Sila e haapii ra ia au i te mau Papai, no te haapapu e o Iesu te Mesia i tǎpǔhia mai mai mutaa ihora mai â.

No reira, ia au i te hiˈoraa o te mau Berea no Tahito ra, mea faufaa roa eiaha noa ia taio i te Parau a te Atua, ia tuatapapa atoa râ, ia ‘hiˈopoa maite i te mau papai,’ ia taa ia tatou i te auraa. Mea na reira ïa tatou e haafaufaa hau atu ai i te Bibilia e e nehenehe ïa tatou mai ia Timoteo e ‘faaora ia tatou iho e te feia atoa e faaroo mai.’ E te reira, no te mea taa ê atu i te taioraa i te mau Papai, ua tuatapapa tatou i te reira no te auraro i te mea o ta tatou i haapii.—Maseli 3:1-6.

Te pu no te mau mea faufaa mau e te mau parau tohu

E tuatapapa anaˈe e piti tumu ê atu no te haapii i te Bibilia. Eita te Bibilia e nehenehe e faaauhia i te tahi atu buka, i te pae no te faaauraa i te mau faufaa morare. Tau matahiti i teie nei, ua parau te hoê taata haapii marite e: “Te tiaturi nei au e mea faufaa aˈe te ite no nia i te Bibilia ma te ore e haere i te haapiiraa teitei, i te haereraa i te haapiiraa teitei ma te ore e ite i te Bibilia.” Ia riro te ite no nia i te Bibilia ei taoˈa faufaa no outou, e tia ia outou ia tuatapapa i te mau Papai ma te hinaaro e faaohipa i ta ratou mau faaueraa e ta ratou mau haapiiraa i roto i to outou oraraa no te mau mahana atoa, ia riro outou ei taata maitai aˈe, ia riro mai outou ei taata o “te tia hoi i te tufa i te parau mau ra.”—Timoteo 2, 2:15; Maseli 2:1-22.

Hau atu, i roto i te mau api o te Bibilia, te faataahia ra te mau parau tohu i faauruahia mai e te Atua o tei tupu ê na e te tahi o te tupu nei i te senekele XX. E tauturu te tuatapaparaa i te mau parau tohu bibilia ia taa i te auraa o te mau ohipa e tupu ra na te ao nei (te mau tamaˈi, te mau oˈe, te amahamaharaa o te utuafare, te haavîraa uˈana) e ia ore e topa i roto i te hepohepo i mua i teie mau ohipa. (Luka 21:10, 11, 25-28) No reira, te haamaramarama maira te mau ravea ta te Atua e faaau maira no te mau fifi o teie nei tau ia tatou: te faaite maira ratou e teihea roa tatou i roto i te tereraa o te tau e nafea tatou e faatupu ai i te mau opuaraa no a muri aˈe o te manuïa. Te tae maira teie mau ravea ia tatou nei na roto i te arai o te pǔpǔ a ‘te tavini haapao maitai e te paari tei faatavaihia,’ o te faaohipa ra i te Taiete Watchtower ei pu neneiraa buka.—Mataio 24:45-47; Petero 2, 1:19.

Te na ô ra te Salamo 119:105 e: “E lamepa ta oe parau i to ˈu nei avae, e tiarama no to ˈu nei mau eˈa.” No reira, te feia e tuatapapa tamau nei i te mau parau paari e vai ra i roto i te Bibilia e o te faaohipa nei, o ratou ïa te maramarama no nia i te hinaaro e te opuaraa a te Atua; e i te mea e ua maramarama to ratou eˈa, e aratai-mau-hia ratou na roto i te vahi vari morare no teie nei mahana.