Te haere nei to outou oraraa ihea?
• Mea rahi te taata o te haapao roa ra i te mau ohipa o te oraraa i te mau mahana atoa, a ore atu ai e manaˈo roa e te haere nei ratou ihea.
• Te faaara maira te Bibilia i te mau ohipa faahiahia e tupu a muri aˈe. Te faaara atoa maira e e taui roa te mau faanahoraa taatoa a te taata i te ao nei. No to tatou maitai e no te ape i te ati, mea ru ia rave i te mau ohipa maitatai.
• Ua ite vetahi i ta te Bibilia e parau ra e te tamata ra ratou i te faaohipa i te reira, te vaiiho nei râ ratou i te mau tapitapi o te oraraa ia haafifi ia ratou.
• Te oaoa ra anei outou i te aveia ta to outou oraraa e rave ra? Ia opua outou e rave i te tahi mea, e feruri anei outou i te faahopearaa i nia i ta outou mau fa vai maoro i roto i te oraraa?
[Tumu parau tarenihia/Hohoˈa i te api 9]
Eaha te mea faufaa roa ˈˈe no outou?
Eaha to outou manaˈo i to muri nei? A tanumera ˈtu mai te 1 e tae atu i te 10.
Mea rahi e parahiraa tano to te reira i roto i te oraraa, eaha râ ta outou e maiti na mua? i muri iho? e e na reira noa.
․․․ Te faaanaanataeraa
․․․ Ta ˈu ohipa
․․․ To ˈu ea
․․․ To ˈu iho oaoa
․․․ To ˈu apiti
․․․ To ˈu na metua
․․․ Ta ˈu mau tamarii
․․․ Te fare e te ahu nehenehe
․․․ Te rave-maitai-roa-raa i te mau mea atoa
․․․ Te haamoriraa a te Atua
[Tumu parau tarenihia i te mau api 10, 11]
Ta outou e maiti, o ta outou iho â anei e hinaaro ra?
A FERURI I TEIE MAU UIRAA
TE FAAANAANATAERAA: E tamǎrû anei te faaanaanataeraa ta ˈu e maiti ia ˈu? E faaanaanataeraa horuhoru anei o te nehenehe e haafifi i to ˈu ea aore ra e haaparuparu roa i to ˈu tino? E huru “arearearaa” anei o te faaanaanatae paha tau hora e o te haamauiui maoro râ i te aau? Noa ˈtu e e faaanaanataeraa maitai ta ˈu e maiti, te pau rahi ra anei to ˈu taime a ore atu ai e navai no te mau mea faufaa aˈe?
TA ˈU OHIPA: E imiraa anei aore ra e faatîtîraa? Te pau rahi ra anei to ˈu taime a fifihia ˈtu ai to ˈu ea? Mea au aˈe anei na ˈu e rave i te hora hau i ta ˈu ohipa aore ra e faataa i te taime no to ˈu apiti aore ra no ta ˈu mau tamarii? Ia faaue mai ta ˈu paoti e rave i te tahi ohipa o te haapeapea i to ˈu manaˈo haava aore ra o te faaore i te mau faufaa pae varua, e faaroo anei au ia ore au e tihatihia?
TO ˈU EA: Te tâuˈa ore ra anei au i te reira aore ra te haapao maitai noa ra vau? Tera noa anei ta ˈu paraparauraa? Te faaite ra anei to ˈu haapao maitai i to ˈu ea i to ˈu tapitapi i to ˈu utuafare?
TO ˈU IHO OAOA: O ta ˈu manaˈoraa matamua anei? Te haapao ra anei au i to ˈu oaoa na mua ˈˈe i to to ˈu apiti aore ra to ˈu utuafare? Te tuati ra anei ta ˈu huru imiraa i te reira i to ˈu tiaraa taata haamori i te Atua mau?
TO ˈU APITI: Te hiˈo ra anei au i to ˈu apiti ei hoa no ˈu i te mau taime noa e au ia ˈu? Te faatura ra anei au i to ˈu apiti, ei taata e au ia ˈna te tura? Te ohipa ra anei te tiaturiraa i te Atua i nia i ta ˈu hiˈoraa i to ˈu apiti?
TO ˈU NA METUA: Mai te peu e aitâ i raea to ˈu matahiti, te auraro ra anei au i to ˈu na metua—na roto i te pahonoraa ma te faatura, te raveraa i te ohipa i te fare, te hoˈiraa i te fare i te hora ta raua i faataa, te aperaa i te mau amuimuiraa e te mau ohipa ta raua i opani? Mai te peu e e taata paari au, te faaroo ra anei au i to ˈu na metua ma te faatura, ma te tauturu au noa ia raua ia hinaarohia? Ua niuhia anei to ˈu huru i nia ia raua i nia i to ˈu iho maitai aore ra te aˈoraa o te Parau a te Atua?
TA ˈU MAU TAMARII: Te manaˈo ra anei au e na ˈu te hopoia e haapii i ta ˈu mau tamarii i te mau faufaa morare maitatai, aore ra te vaiiho ra anei au e na te fare haapiiraa e haapao atu? Te faataa ra anei au i te taime no ta ˈu mau tamarii, aore ra te vaiiho ra anei au e na te taoˈa hauti, te afata teata, aore ra te roro uira e haapao atu? Te aˈo ra anei au i ta ˈu mau tamarii i te mau taime atoa e tâuˈa ore ai ratou i te mau haamanaˈoraa a te Atua, aore ra e na reira anei au ia riri au?
TE FARE E TE AHU NEHENEHE: Ia au i te aha e haapao ai au i to ˈu faaneheneheraa e ta ˈu mau taoˈa—te faahiahiaraa anei te feia tapiri? te maitai o to ˈu utuafare? to ˈu tiaraa taata haamori i te Atua?
TE RAVE-MAITAI-ROA-RAA I TE MAU MEA ATOA: Te manaˈo ra anei au e mea faufaa ia rave-maitai-hia te mau mea? Te tautoo ra anei au i te riro ei numera hoê? E huru ê anei au ia rave maitai aˈe te tahi atu i te tahi ohipa?
TE HAAMORIRAA A TE ATUA: E mea faufaa aˈe anei no ˈu te farii maitai a te Atua, i ta to ˈu apiti, ta ˈu mau tamarii, to ˈu na metua, aore ra ta ˈu paoti? No te tapea maite i te hoê oraraa fanaˈo, e hinaaro anei au e tuu i te taviniraa i te Atua i te piti o te parahiraa?
A FERURI MAITE I TE MAU AˈORAA BIBILIA
Eaha te parahiraa o te Atua i roto i to outou oraraa?
Koheleta 12:13 (MN): “O te Atua te mǎtaˈu atu, e haapao hoi i ta ˈna parau; o ta te taata atoa ïa [hopoia] e ati noa ˈˈe.”
A UI IA OUTOU IHO: Te faaite ra anei to ˈu oraraa e tera atoa to ˈu manaˈo? Na te auraro i te mau faaueraa a te Atua anei e faaoti e nafea vau e amo ai i te mau hopoia i te fare, i te ohipa, aore ra i te haapiiraa? Aore ra na te tahi atu mau mea aore ra na te faaheporaa o te oraraa anei e faaoti e e faataa vau i te taime no te Atua?
Eaha te huru o to outou taairaa e te Atua?
Maseli 3:5, 6 (MN): “E tiaturi ia Iehova ma to aau atoa ra; eiaha râ e tiaturi i to oe ihora [maramarama]. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.”
Mataio 4:10: “O to Atua o Iehova ta oe e haamori, e oia anaˈe ra ta oe e faaroo.”
A UI IA OUTOU IHO: Tera anei to ˈu manaˈo i te Atua? Te faaite ra anei ta ˈu mau ohipa o te mau mahana atoa, to ˈu huru atoa i mua i te mau fifi, i taua tiaturi e paieti ra?
Eaha te faufaaraa o te taioraa e te haapiiraa i te Bibilia no outou?
Ioane 17:3: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”
A UI IA OUTOU IHO: Te faaite ra anei to ˈu haafaufaaraa i te taioraa e te feruriruriraa i te Parau a te Atua e te tiaturi mau ra vau i te reira?
Eaha te faufaaraa o te haereraa i te mau putuputuraa a te amuiraa Kerisetiano no outou?
Hebera 10:24, 25: “E haapao maite â tatou te tahi i te tahi, a faaaraara ˈtu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa, . . . no te mea te hiˈo na outou i taua mahana ra i te fatataraa mai.”
Salamo 122:1 (MN): “Oaoa aˈera vau e te feia atoa i parau mai ia ˈu e, [Mai haere] tatou i nia i te fare o Iehova.”
A UI IA OUTOU IHO: Te faaite ra anei to ˈu huru oraraa i te mauruuru no teie aˈoraa o te Parau a te Atua? I te avaˈe i mahemo, ua mairi anei au i te tahi putuputuraa no te rave i te tahi ohipa?
Te faaitoito ra anei outou i te faaite i te Atua e ta ˈna opuaraa ia vetahi ê?
Mataio 24:14: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.”
Mataio 28:19, 20: “E teie nei, e haere outou e faariro i te mau fenua atoa ei pǐpǐ, . . . ma te haapii atu ia ratou i te haapao i te mau mea atoa ta ˈu i parau atu ia outou na.”
Salamo 96:2: “E himene ia Iehova, e haamaitai i to ˈna iˈoa; e faaite i te ora na ˈna eiaha ei mahana tuua.”
A UI IA OUTOU IHO: Te haafaufaa ra anei au i teie ohipa i roto i to ˈu oraraa mai tei titauhia? Te faaite ra anei ta ˈu apitiraa ˈtu e ua papu ia ˈu e e tau ru ta tatou e ora nei?