Eaha te auraa?

UA PARAU Iesu Mesia e: E tupu te tamaˈi, te oˈe, te maˈi parare, e te aueueraa fenua i “te hopea o teie nei ao.”—Mataio 24:1-8; Luka 21:10, 11.

Mai te matahiti 1914 mai â, ua ino te oraraa i te mau tamaˈi i rotopu i te mau nunaa e te mau opu fetii, e pinepine no te faaôraa te mau ekalesiatiko i roto i te poritita e no te ohipa totoaraa i parare aˈenei.

Noa ˈtu te haereraa i mua a te ihi, e mau hanere mirioni taata i te ao nei teie e faaruru nei i te oˈe rahi. I te mau matahiti atoa, e mau mirioni taata te pohe nei no te oˈe.

To roto atoa te maˈi pee parare i te tapao i horoahia e Iesu. I muri aˈe i te Tamaˈi rahi Matamua, ua haapohe te fiva parare e 21 000 000 tiahapa taata. Taa ê roa i te mau ati i itehia i te tahi noa mau vahi i tahito ra, ua û te mau nunaa i te ao nei e te mau motu atea atoa i taua maˈi ra. Te parare nei te heˈa mate e ati aˈe te fenua, e te tupu noa ra te tutoo, te malaria, te fiva aau, e te dengue i te mau fenua e haere ra i mua.

Ua tapaohia e mau ahuru tausani aueueraa fenua ma te puai rau i te mau matahiti atoa. Noa ˈtu te mau taihaa e te mau ravea faaararaa apî e vai ra, e faarooroohia te mau ati i tupu i te mau vahi taata no te mau aueueraa fenua.

Ua tohu atoa te Bibilia e: “E tupu te [mau taime ati rahi faaruru atâ] i taua anotau hopea nei, ia ite mai oe. E riro te taata nei ei miimii, e nounou moni, e faaahaaha, e teoteo, e faaino, e faaroo ore i te metua, e mauruuru ore, e te viivii, e aroha ore, e tahemo parau au, e pari haavare noa, e haapao ore, e iria, e te au ore i te taata maitatai ra, e haavare, e mârô, e faateitei, e te hinaaro i te mau mea e navenave ai ra aore hinaaro i te Atua, e hohoˈa paieti hoi to ratou, o te puai râ o te reira ra, ua hunahia ïa ia ratou, e fariu ê oe i te reira.”—Timoteo 2, 3:1-5; MN.

Eita anei outou e parau e te ora nei tatou i “te mau taime ati rahi faaruru atâ”?

Ua tapao anei outou e mea miimii, mea nounou moni, e mea ahaaha roa ino te taata?

O vai te patoi i te parau e ua î te ao i te taata miimii, te mauruuru ore, te tahemo parau au e te taiva ore?

Ua ite anei outou e ua maraa roa te faaroo ore i te metua e te aroha ore riaria eiaha noa i te tahi vahi, e ati aˈe râ te fenua?

Te taa maitai ra ia outou e te ora nei tatou i roto i te hoê ao e hinaaro ra i te mau mea navenave eiaha râ te maitai. Tera ïa te huru o te taata i te “anotau hopea” ia au i te Bibilia.

E hinaarohia anei te tahi atu â haapapuraa o te faataa i te tau ta tatou e ora nei? Ua tohu atoa Iesu e i te roaraa o taua tau ra, e porohia te parau apî maitai o te Basileia o te Atua e ati aˈe te fenua. (Mataio 24:14) Te tupu ra anei te reira?

Te nenei-tamau-hia nei Te Pare Tiairaa, te hoê vea bibilia o te faaite ra i te parau apî maitai o te Basileia o Iehova, na roto e rave rahi aˈe reo i te tahi atu vea.

I te mau matahiti atoa, te poro nei te mau Ite no Iehova hoê miria tiahapa hora no te faaite roa ia vetahi ê i te Basileia o te Atua.

Te nenei nei ratou i te mau papai o te faataa ra i te Bibilia na roto fatata e 400 reo, tae noa ˈtu te mau reo o te huiraatira rii e te atea. Te poro ra te mau Ite no Iehova i te parau apî maitai i te mau nunaa atoa, oia atoa i e rave rahi motu e tuhaa fenua haihai roa i te hiˈoraa poritita. I te rahiraa o te fenua, te rave nei ratou i te hoê porotarama haapiiraa bibilia tamau.

Oia mau, te porohia nei te parau apî maitai o te Basileia o te Atua e ati aˈe te fenua, eiaha no te taui i te ao, no te horoa râ i te faaiteraa. I te mau vahi atoa, te fanaˈo nei te taata i te ravea no te faaite e te tâuˈa ra anei ratou i tei poiete i te raˈi e te fenua, e faatura anei ratou i ta ˈna mau ture e e faaite anei i te aroha i to ratou taata-tupu.—Luka 10:25-27; Apokalupo 4:11.

E fatata te Basileia o te Atua i te tamâ i te fenua i te feia iino atoa, a faariro atu ai ei paradaiso.—Luka 23:43.

[Tumu parau tarenihia i te api 6]

Te anotau hopea o te aha?

E ere i te anotau hopea o te huitaata. No te feia e rave i te hinaaro o te Atua, te pûpû ra te Bibilia i te tiaturiraa e ora e a muri noa ˈtu.—Ioane 3:16, 36; Ioane 1, 2:17.

E ere i te anotau hopea o te fenua. Te fafau ra te Parau a te Atua e e vai mai te fenua e a muri noa ˈtu.—Salamo 37:29; 104:5; Isaia 45:18.

E anotau hopea râ o teie faanahoraa haavî e te aroha ore o te mau mea e o te feia e rave i ta ˈna mau peu.—Maseli 2:21, 22.

[Tumu parau tarenihia/Hohoˈa i te api 7]

E Parau na te Atua iho â anei te Bibilia?

E rave rahi taime to te mau peropheta Bibilia papairaa e: “Te na ô maira Iehova.” (Isaia 43:14; Ieremia 2:2) Ua haapapu o Iesu Mesia atoa, te Tamaiti a te Atua, e ‘ta ˈna i parau, e ere ïa i ta ˈna iho.’ (Ioane 14:10) Te parau maitai ra te Bibilia iho e: “Te mau Papai atoa, e mea faaurua ïa e te Atua.”—Timoteo 2, 3:16, MN.

Aita ˈtu e buka e neneihia nei na roto e rave rau reo, e 2 200 tiahapa reo ia au i te taiete bibilia amui. Aita ˈtu e buka e opere-rahi-hia nei, e maha miria tiahapa i teie nei. E ere anei tera ta outou e tiai ra no te hoê poroi a te Atua no te huitaata atoa?

Ei faahohonuraa ˈtu â i te mau haapapuraa e mea faaurua te Bibilia e te Atua, a hiˈo i te buka Te Bibilia—Parau na te Atua aore ra na te taata?, neneihia e te mau Ite no Iehova.

Ia taio outou i te Bibilia e ia farii e e Parau iho â na te Atua, e faufaa-rahi-hia ïa outou.

[Tumu parau tarenihia/Hohoˈa i te api 8]

Eaha te Basileia o te Atua?

O te faatereraa ïa i te raˈi ta te Atua mau ra o Iehova, tei poiete i te raˈi e te fenua, i haamau.—Ieremia 10:10, 12.

Te faataa ra te Bibilia e e horoa te Atua i tera mana faatere ia Iesu Mesia. (Apokalupo 11:15) A vai ai oia i te fenua nei, ua haapapu Iesu e ua fanaˈo ê na oia i te mana faahiahia roa no ǒ mai i te Atua ra, maoti taua mana ra i tia ˈi ia ˈna ia haavî i te mau puai natura, ia faaora i te mau maˈi atoa, e ia faatia atoa i te feia pohe. (Mataio 9:2-8; Mareko 4:37-41; Ioane 11:11-44) Ia au i te parau tohu bibilia faaurua, ua horoa atoa te Atua ia ˈna ra i “te mana, e te hinuhinu, e te basileia no ˈna, ia auraro mai te taata atoa, e te mau fenua atoa, e te reo atoa ia ˈna.” (Daniela 7:13, 14) E parauhia tera faatereraa te Basileia o te raˈi; mai te raˈi mai e faatere ai o Iesu Mesia i teie nei.

[Hohoˈa i te api 7]

Pororaa i te parau apî maitai e ati aˈe te fenua