Luka 1:37: “Aore roa hoi e mea e ore te tia i te Atua.”

“Aita hoi e parau e ore e tia i te Atua ia faatupu.”—Luka 1:37, Huriraa o te ao apî.

“Aore roa hoi e mea e ore te tia i te Atua.”—Luka 1:37, Te Bibilia Moˈa ra.

Auraa o te Luka 1:37

E mana to te Atua Puai hope ia faatupu i te mau mea eita e haere i te taata. Aita hoê aˈe mea e tapea ia ˈna ia faatupu i ta ˈna i parau aore ra i fafau.

I roto i teie irava, no ǒ mai teie “parau” i te Atua ra. Te faataa atoa ra te reira i te faahopearaa o ta te Atua ra o Iehovaa i parau. No te mea hoi e tupu noa iho â ta te Atua i parau, e nehenehe atoa e huri i te Luka 1:37 mai teie: “E tupu iho â te mau parau fafau a te Atua” aore ra “No te Atua hoi, aore roa e mea eita e tupu.” Te horoa ra teie mau huriraa i teie parau mau faufaa roa: E tupu te parau aore ra te parau fafau atoa a te Atua, no te mea aore roa e mea eita e tupu ia ˈna.—Isaia 55:10, 11.

Te faahiti ra te Bibilia i te tahi atu mau parau mai tera no nia i te mau parau fafau a te Atua. Ei hiˈoraa, na roto i ta ˈna melahi, ua faaite atea Iehova e hapû Sara, te vahine a Aberahama, i to ˈna ruhiruhiaraa. Aita hoi ta raua e tamarii. Ua parau oia: “Te vai ra anei te tahi mea e ore e tia ia Iehova?” (Genese 18:13, 14) I muri iho i to te patereareha Ioba feruriruriraa i te mau mea ta te Atua i poiete, teie ta ˈna i parau: “Aita hoê mea ta oe i opua e rave eita ta oe e nehenehe e faatupu.” (Ioba 42:2) E i to te mau pǐpǐ a Iesu faaiteraa i to ratou manaˈo feaa e faaorahia ratou e te Atua, ua haamanaˈo Iesu ia ratou e “i te Atua . . . e tia ïa te mau mea atoa.”—Mataio 19:25, 26.b

Irava tapiri o te Luka 1:37

Na te hoê melahi o Gaberiela te iˈoa i faahiti i tei papaihia i roto i te Luka 1:37 ia Maria te hoê vahine apî ati Iuda. No parau noa maira o ˈna ia Maria e fanau mai o ˈna i te “Tamaiti a Tei Teitei Roa ˈˈe” e ia “topa i te iˈoa o Iesu.” E riro mai taua Tamaiti ra ei Arii o te Faatereraa a te Atua, o te faatere e a muri noa ˈtu.—Luka 1:26-33; Apokalupo 11:15.

Ui atura Maria e nafea te reira ohipa e tupu ai, aita hoi o ˈna i faaipoipo e aita “i taoto aˈenei i te hoê tane.” (Luka 1:34, 35) Pahono maira Gaberiela e faaohipa te Atua i to ˈna varua moˈa, aore ra puai ohipa. I tera taime, e tamaiti varua Iesu na te Atua i te raˈi. Ua faaohipa ïa Iehova i to ˈna varua moˈa no te tuu i te ora o ta ˈna Tamaiti i roto i te opu o Maria. (Ioane 1:14; Philipi 2:5-7) Hapû ihora ïa Maria maoti Iehova. No te haapuai i te faaroo o Maria i te mana o te Atua, ua parau te melahi ia ˈna e ua hapû atoa to ˈna fetii o Elisabeta “noa ˈtu ua paari roa oia.” Aita e tamarii ta Elisabeta raua Zekaria ta ˈna tane. Eita hoi ta ˈna tamarii e noaa. (Luka 1:36) O Ioane Bapetizo ïa ta raua tamaiti. Ua tohu atoa Iehova no nia i ta ˈna taviniraa.—Luka 1:10-16; 3:1-6.

Faahiti atura ïa te melahi Gaberiela i tei papaihia i roto i te Luka 1:37, a manaˈo ai paha ia Maria raua Elisabeta. E haapapuraa teie mau parau no te mau tavini a Iehova i teie mahana e faatupu noa iho â o ˈna i ta ˈna mau parau fafau, oia atoa te monoraa i te mau faatereraa a te taata na roto i te faatereraa tia roa a ta ˈna Tamaiti o Iesu Mesia, te Arii o te faatereraa a te Atua i te raˈi.—Daniela 2:44; 7:13, 14.

A mataitai i teie video o te faataa poro noa i te buka Luka.