Apokalupo 21:4: “E tamǎrô oia i te mau roimata atoa”

“E tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”—Apokalupo 21:4, Huriraa o te ao apî.

“E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:4, Te Bibilia Moˈa ra.

Auraa o te Apokalupo 21:4

Ua fafau te Atua i te faaore i te oto e te mauiui o te taata e te tumu o teie mau fifi.

“E tamǎrô oia i te mau roimata atoa o to ratou mata.” Te haapapu mai ra teie mau parau i te parau fafau a Iehovaa papaihia e te peropheta Isaia, oia hoi “e tamǎrô . . . Iehova i te roimata o to ratou mau mata atoa.” (Isaia 25:8; Apokalupo 7:17) Te faaite mai ra teie mau parau i to te Atua huru i nia i te feia o te oto ra no te mea ua pohe tei herehia e ratou aore ra no te tahi atu mau tumu.

“E ore roa te pohe.” E nehenehe atoa teie parau e hurihia “eita te pohe e ite-faahou-hia.” Ua fafau mai te Atua i te faaore i te pohe e te mauiui ta te reira i faatupu. Hau atu â e faatiahia mai te feia pohe. (Korinetia 1, 15:21, 22) E e haamouhia te pohe.—Korinetia 1, 15:21, 22, 26.

“E ore atoa te oto e te auê e te mauiui.” E ere te auraa eita roa ˈtu te taata e mauiui faahou i te pae tino. Ei hiˈoraa, ia maui anaˈe to tino e faaararaa ïa te reira e titauhia ia haapao maitai ia ore oe ia pepe. Te haapapu ra teie parau fafau e ore roa te mau mauiui i te pae feruriraa, i te pae aau e i te pae tino ta te harab e to tatou huru tia ore e faatupu.—Roma 8:21, 22.

“Ua mou hoi te mau mea tahito.” E haapotoraa teie o te mau tauiraa faahiahia roa e tupu. Te na ôhia ra i roto i te tahi faahororaa: “E monohia te oraraa tahito i reira te taata e faaruru ai i te pohe, te oto, te auê e te mauiui e te hoê oraraa apî.” I reira ïa te taata e ora ˈi e a muri noa ˈtu i roto i te paradaiso, mai ta te Atua i opua na i te omuaraa.—Genese 1:27, 28.

Irava tapiri o te Apokalupo 21:4

I te omuaraa o te pene 21, ua faataa te aposetolo Ioane te orama ta ˈna i ite: “E ite atura vau i te hoê raˈi apî e te hoê fenua apî.” (Apokalupo 21:1) E faahohoˈaraa ta ˈna e faaohipa ra no te faataa i te hoê tauiraa tei tohuhia i roto i te tahi atu mau irava Bibilia. (Isaia 65:17; 66:22; Petero 2, 3:13) E mono te faatereraa i te raˈi a te Atua, aore ra te “raˈi apî,” i te mau faatereraa atoa a te taata. E faatere te reira i “te hoê fenua apî,” oia hoi te hoê huiraatira apî o te ora i nia i te fenua.—Isaia 65:21-23.

Na te aha e haapapu ra e te faahitihia ra te ora i nia i te fenua? A tahi, e haamata te parau fafau a te Atua mai teie: “Inaha, tei te huitaata ra te tiahapa o te Atua.” (Apokalupo 21:3) E ere ïa no te mau melahi i te raˈi teie parau, no te huitaata ra i te fenua. A piti, te faataa ra te orama i te hoê ao e “ore roa te pohe.” (Apokalupo 21:4) Aita e pohe i te raˈi, o te taata anaˈe i te fenua tei faaruru i te pohe. (Roma 5:14) No reira, mea tano iho â ïa ia parau e te faataa ra teie irava i te huru oraraa e itehia i nia i te fenua.

A mataitai i teie video o te faataa poto noa i te buka Apokalupo.