Isaia 40:31: “O te feia râ e tiaturi ia Iehova, e noaa ïa te etaeta apî”

“E puai-faahou-hia râ te feia e tiaturi ra ia Iehova. E pee ratou mai te huru ra e pererau to ratou mai te aeto. E horo ratou e eita e paruparu. E haere ratou e eita e rohirohi.”—Isaia 40:31, Huriraa o te ao apî.

“O te feia râ e tiaturi ia Iehova, e noaa ïa te etaeta apî; e pee ratou i nia mai tei nia i te pererau o te aeto ra; e horo ratou, e e ore e rohirohi; e haere â hoi ratou, e e ore e matapourihia.”—Isaia 40:31, Te Bibilia Moˈa ra.

Auraa o te Isaia 40:31

Te haapapu ra te Atua ra o Iehovaa i ta ˈna mau tavini e horoa o ˈna i te puai hinaarohia no te faaruru e no te faaoromai i te mau fifi atoa ta ratou e farerei.

“E puai-faahou-hia râ te feia e tiaturi ra ia Iehova.” A tiaturi ai e mana to te Atua e te hinaaro ra o ˈna e tauturu i ta ˈna mau tavini, e nehenehe tatou e fanaˈo i ta ˈna turu. (Maseli 3:5, 6) Hoê ravea ta te Atua e faaohipa ra no te haapuai i ta ˈna mau tavini, o to ˈna ïa varua moˈa aore ra to ˈna puai ohipa.—Luka 11:13.

“E pee ratou mai te huru ra e pererau to ratou mai te aeto.” Te faaite ra teie hohoˈa i te ohipa o te puai o te Atua i nia i te hoê taata. Te faaohipa ra te hoê aeto i te mataˈi veavea no te turai ia ˈna i nia i te raˈi no te rere atu. Ia ite anaˈe te aeto i te hoê mataˈi veavea, e hohora o ˈna i to ˈna pererau ma te ohu noa e tera mataˈi ia maraa roa o ˈna i nia i te raˈi. Ia faaohipa anaˈe o ˈna i te mataˈi veavea e te tahi atu mataˈi, e nehenehe ïa o ˈna e vai maoro i roto i te reva a rere atu ai i te hoê vahi ma te faaohipa iti noa ˈˈe i to ˈna puai.

“E horo ratou e eita e paruparu.” E nehenehe te mau fifi o te oraraa e haaparuparu ia tatou i te pae tino e i te pae o te huru aau, tera râ, e nehenehe tatou e faaoromai maoti te puai ta te Atua e horoa mai. E nehenehe te puai o te Atua e horoa mai i te itoito rahi ia rave tatou i te mea maitai noa ˈtu te mau fifi rahi. Ua papai te aposetolo Paulo, o tei farerei atoa i te mau fifi rahi: “E puai to ˈu ia faaruru i te mau mea atoa maoti tei horoa mai i te puai.”—Philipi 4:13.

Irava tapiri o te Isaia 40:31

Ua faaohipa te Atua i te peropheta Isaia no te papai i teie mau parau i te senekele vaˈu hou te tau o Iesu. Noa ˈtu ua papaihia tera irava no te taatoaraa o te mau tavini taiva ore a te Atua, ua hinaaro paha Iehova maoti teie mau parau e faaitoito i te mau ati Iuda tei tapeahia i Babulonia e 70 matahiti i te maoro. I to te mau ati Iuda hoˈiraa mai i to ratou fenua, ua ite ratou i te tupuraa i te mau parau tohu a te Atua. (Isaia 40:1-3) Ua horoa te Atua i to ˈna puai ia nehenehe ratou e faatupu hoê tereraab roa e fifi mau mai Babulonia tae atu i Ierusalema i 537 hou te tau o Iesu.—Isaia 40:29.