Eaha ta te Bibilia e parau ra no nia i te mau ô horoa noa?
Te pahonoraa a te Bibilia
Te faaitoito ra te Bibilia ia horoa ma te aau atoa. E oaoa hoi te taata o te fanaˈo i te ô, oia atoa râ te taata o te horoa ˈtu. (Maseli 11:25; Luka 6:38) Ua parau Iesu: “E rahi aˈe te oaoa ia horoa ˈtu ia horoahia mai.”—Ohipa 20:35.
Te mau ô o te faaoaoa i te Atua
E oaoa te Atua ia horoa tatou i te ô ma te aau tae. Te parau ra te Bibilia: “Ia horoa te taata tataitahi mai ta ˈna i faaoti i roto i to ˈna aau, eiaha ma te aau tae ore aore ra ma te faahepohia, mea here hoi na te Atua te taata o te horoa ma te aau tae.”—Korinetia 2, 9:7, nota.
Ua riro te horoaraa ma te aau tae ei tuhaa o “te huru haapaoraa” ta te Atua e farii. (Iakobo 1:27, nota) E oaoa te Atua i te ite i te hoê taata ia tauturu i te tahi atu ma te aau tae. Ua riro te reira ei tarahu na te Atua. (Maseli 19:17) Te haapii ra te Bibilia e na te Atua iho e faahoˈi atu i ta taua taata ra no ta ˈna e rave ra.—Luka 14:12-14.
Te mau ô o te ore e faaoaoa i te Atua
Te mau ô horoahia ma te miimii. Teie te tahi mau hiˈoraa:
Ia itehia mai tatou.—Mataio 6:2.
No te fanaˈo i te tahi mea.—Luka 14:12-14.
No te tamata i te hoo mai i te ora.—Salamo 49:6, 7.
Te mau ô o te turu i te mau ohipa aore ra haerea o ta te Atua e faautua. Ei hiˈoraa, e ere i te mea maitai ia horoa i te moni i te hoê taata no te haere e hauti i te pere moni, e hoo mai i te raau taero aore ra no te inu-ava-raa. (Korinetia 1, 6:9, 10; Korinetia 2, 7:1) E ere atoa i te mea tano ia horoa i te moni no te hoê taata o te ore e hinaaro e rave i te ohipa.—Tesalonia 2, 3:10.
Te mau ô o te haafifi i te hoê taata ia amo i ta ˈna mau hopoia no ǒ mai i te Atua. Te haapii ra te Bibilia e e titauhia i te mau upoo utuafare ia haapao i te mau hinaaro o to ratou utuafare. (Timoteo 1, 5:8) E ere ïa i te mea tano ia horoa noa ratou no vetahi atu a ore atu ai e haapao i to ratou iho utuafare fetii. Oia atoa, ua faautua Iesu i te feia o te ore e hinaaro e haapao i to ratou mau metua ruhiruhia ma te parau e te mau mea atoa ta ratou e fanaˈo nei, “e ô pûpûhia i te Atua.”—Mareko 7:9-13.