No te aha outou e ore ai e faaohipa i te satauro?

No te taata e rave rahi, e tapao te satauro o te Kerisetianoraa. Noa ˈtu e e Kerisetiano te mau Ite no Iehova, aita matou e faaohipa ra i te satauro i roto i ta matou haamoriraa. No te aha?

No te mea i roto i te reo tumu o te Bibilia, ua faataahia e ua pohe Iesu i nia i te hoê pou, eiaha râ i nia i te hoê satauro. Hau atu â, te faaara mau nei te Bibilia i te mau Kerisetiano ia “maue ê atu i te haamori idolo.” Eiaha ïa ratou e faaohipa i te satauro i roto i te haamoriraa.—Korinetia 1, 10:14; Ioane 1, 5:21.

Ua parau Iesu: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:34, 35) Ua faaite ïa Iesu e e itehia ta ˈna mau pǐpǐ mau maoti to ratou aroha aore ra here pipiri ore, eiaha râ maoti te satauro aore ra te tahi atu hohoˈa.