E pǔpǔ iti faaroo anei te mau Ite no Iehova?

Eita, e ere te mau Ite no Iehova i te hoê pǔpǔ iti faaroo. E Kerisetiano râ matou e tutava nei i te pee i te hiˈoraa o Iesu Mesia e i te ora ia au i ta ˈna mau haapiiraa.

Eaha te hoê pǔpǔ iti faaroo?

Mea taa ê te auraa o teie taˈo no tera e tera taata. E hiˈo mai râ tatou e piti manaˈo matauhia no nia i te mau pǔpǔ iti faaroo e no te aha e ere ai matou mai tera.

• Te hoê pǔpǔ iti faaroo no vetahi, e haapaoraa apî ïa aore ra taa ê roa i tei matauhia. Aita te mau Ite no Iehova i haamau i te hoê haapaoraa apî. Ta matou haamoriraa, mai ta te mau Kerisetiano ïa o te senekele matamua. Ua papaihia to ratou hiˈoraa e ta ratou mau haapiiraa i roto i te Bibilia. (Timoteo 2, 3:16, 17) Te tiaturi nei matou e na te mau Papai Moˈa e faaite mai e nafea ia haamori i te Atua.

• Te hoê pǔpǔ iti faaroo no vetahi, mea atâta ïa e e taata te aratai. Eita te mau Ite no Iehova e hiˈo i te tahi noa ˈˈe taata ei aratai no ratou. Te pee nei râ matou i te ture aveia ta Iesu i haamau no ta ˈna mau pǐpǐ. Ua parau oia: “Hoê anaˈe hoi Aratai to outou, o te Mesia.”—Mataio 23:10.

E ere te mau Ite no Iehova i te hoê pǔpǔ iti faaroo atâta. E faahopearaa maitai to ta ratou haapaoraa i nia i to ratou mau taata e ia vetahi ê atoa. Ei hiˈoraa, ua tauturu ta matou taviniraa i e rave rahi taata ia haapae i ta ratou mau peu ino, mai te raau taero e te inu-hua-raa i te ava. Na te ao nei, e haapii atoa matou i te taata ia taio e ia papai. E ia tupu te ati, e tauturu matou ia vetahi ê. Te rohi nei matou i te hamani maitai i te taata, mai ta Iesu i faaue i ta ˈna mau pǐpǐ.—Mataio 5:13-16.