E tia anei ia faaohipa i te mau hohoˈa i roto i ta tatou haamoriraa?

Te pahonoraa a te Bibilia

Aita. Te parau ra te hoê buka no nia i te mau ture ta te Atua i horoa i te nunaa Iseraela: “Ia au i te mau aamu Bibilia mea papu aita te mau tavini a te Atua e faaohipa i te mau hohoˈa i roto i ta ratou haamoriraa.” (New Catholic Encyclopedia) A hiˈo i teie mau irava Bibilia:

“Eiaha roa oe e hamani na oe i te hoê tii taraihia, aore ra te hoê hohoˈa no te tahi mea i nia i te raˈi, i raro i te fenua nei aore ra i roto i te mau pape i raro aˈe i te fenua. Eiaha roa oe e piˈo i raro i mua ia ratou aore ra e umehia e tavini ia ratou, no te mea o vau, o Iehova to oe Atua, e Atua ïa o te titau ra ia haamori ia ˈu anaˈe.” (Exodo 20:4, 5) No reira, aita te Atua e oaoa mai te peu e faaohipahia i te mau hohoˈa, te mau idolo, te mau tii e te mau tapao no te haamori ia ˈna.
“E ore au e horoa . . . ta ˈu arueraa no te mau tii nanaˈohia.” (Isaia 42:8) Aita roa ˈtu te Atua e hinaaro ia haamorihia o ˈna ma te faaohipa i te mau hohoˈa. I te taime te mau Iseraela i faaohipa ˈi i te hoê tii fanauˈa puaatoro no te haamori ia ˈna, ua parau te Atua “ua haaviivii ratou ia ratou” oia hoi ua rave ratou i te hara rahi.—Exodo 32:7-9.
“Eiaha . . . tatou e manaˈo e e mai te auro, te ario aore ra te ofai te Atua, mai te tahi mea i manaˈohia e i hamanihia e te taata.” (Ohipa 17:29) Pinepine te mau nunaa ěê e faaohipa i te mau hohoˈa “mai te tahi mea i manaˈohia e i hamanihia e te taata” i roto i ta ratou haamoriraa. Area râ te mau Kerisetiano te pee ra ratou i teie faaueraa Bibilia: “E haerea faaroo hoi to tatou, e ere i te haerea ite mata.”—Korinetia 2, 5:7.
“A ara i te mau idolo.” (Ioane 1, 5:21) I roto i te ture horoahia i te nunaa Iseraela e te mau Kerisetiano, te faaite ra te Bibilia e mea hape ia manaˈo e farii te Atua ia faaohipahia i te mau hohoˈa i roto i te haamoriraa.