O vai te haere i roto i te po auahi?

Te pahonoraa a te Bibilia

Te po aore ra te po auahi (“seole” e “hade” na roto i te mau reo tumu o te Bibilia) e menema noa ïa, e ere i te hoê vahi haamauiuiraa i te feia pohe i roto i te auahi. O vai te haere i roto i te po auahi? O te feia maitai ïa e te feia ino atoa. (Ioba 14:13; Salamo 9:17) I roto i te Bibilia, teie menema o te huitaata, o te fare ïa e farerei ai te feia ora atoa.—Ioba 30:23.

Ua haere atoa Iesu i roto i te po auahi i to ˈna poheraa. “Aita oia i faaruehia i roto i te po,” ua faahoˈi mai râ te Atua ia ˈna i te ora.—Ohipa 2:31, 32, Te Faufaa Api.

Mea mure ore anei te po auahi?

E faahoˈihia mai te feia tei haere i roto i te po auahi. Na Iesu e faahoˈi mai ia ratou i te ora maoti te puai o te Atua. (Ioane 5:28, 29; Ohipa 24:15) No nia i tera tia-faahou-raa no a muri aˈe, teie ta te Apokalupo 20:13 e faaite ra: “Tuu maira te apoo e hade i te feia i pohe i roto ia raua.” (Te Bibilia Moˈa ra) Ua pau anaˈe te taata i te faahoˈihia mai i te ora, aita faahou ïa e po auahi, aita e taata e haere faahou i ǒ no te mea “e ore roa te pohe.”—Apokalupo 21:3, 4; 20:14.

E ere râ pauroa te taata o tei pohe te haere i roto i te po auahi. Te faaite ra te Bibilia e te vai ra te taata o te ore roa e taui no te mea ua rahi roa to ratou ino. (Hebera 10:26, 27) Ia pohe ratou, e haere ratou, eiaha i roto i te po auahi, i te Gehena râ. E haamouraa mure ore teie. (Mataio 5:29, 30) Ei hiˈoraa, ua parau Iesu e haere te mau aratai haapaoraa haavarevare o to ˈna ra tau i te Gehena.—Mataio 23:27-33.