Eaha ta te Bibilia e parau ra no nia i te faaipoiporaa e te taata no te hoê nunaa ê?
Te pahonoraa a te Bibilia
E farii te Atua i te faaipoiporaa i rotopu i te hoê tane e vahine noa ˈtu eaha to raua nunaa, no te mea no ˈna hoê â te taata no te mau nunaa atoa. Te parau ra te Bibilia “e ore te Atua e maitiiti i te taata,” e farii râ oia i te taata no te mau nunaa atoa.—Ohipa 10:34, 35.
E hiˈopoa anaˈe te tahi mau aratairaa Bibilia o te tauturu mai e nafea ia faatura i te taata no te mau nunaa atoa e i roto i te faaipoiporaa.
Hoê â haamataraa no te mau nunaa taata atoa
No roto mai te mau taata atoa ia Adamu raua Eva, o ta te Bibilia e parau o ˈna te “metua vahine no te mau taata ora atoa.” (Genese 3:20) No reira te Bibilia e parau ai no te Atua: “I te hoê noa taata, ua hamani oia i te mau nunaa atoa.” (Ohipa 17:26) Noa ˈtu no teihea nunaa oia, no roto mai te taata atoa i te hoê noa utuafare. I te vahi e ora ˈi oe, mea hiˈo-ino-roa-hia anei te taata no te hoê nunaa ê? Aore ra te vai ra anei te taa-ê-raa rahi i rotopu i te taata veve e te taata moni?
E ani te taata paari i “to te tahi e te tahi manaˈo”
Te farii ra te Atua te faaipoiporaa i rotopu i te hoê tane e vahine no te nunaa ê, e ere râ hoê â manaˈo no e rave rahi. (Isaia 55:8, 9) Ia opua oe i te faaipoipo i te hoê taata no te hoê nunaa ê, mea maitai ia tauaparau orua i to muri nei uiraa:
E nafea orua i mua i te faaheporaa a te mau fetii e a te taata i te vahi e ora ˈi orua?
E nafea e tauturu ai i ta orua mau tamarii i mua i te faainoraa?
A “ani i to te tahi e te tahi manaˈo,” e tauturu te reira ia manuïa to orua faaipoiporaa.—Maseli 13:10; 21:5.