Ia hepohepo roa vau, e nehenehe anei te haapaoraa, te Atua aore ra te Bibilia e tauturu mai?
Te pahonoraa a te Bibilia
E. Te horoa ra te Bibilia, te hoê buka tahito î i te paari, i te mau pahonoraa no nia i te mau uiraa faufaa roa o te oraraa. E tauturu atoa te Bibilia ia maitai mai to oe huru. Teie te tahi mau uiraa ta ˈna e pahono mai.
Te vai ra anei te hoê Atua poiete? Te parau ra te Bibilia e na te Atua “i poiete i te mau mea atoa.” (Apokalupo 4:11) Ei Atua poiete, ua ite o ˈna eaha ta tatou e hinaaro mau ra e e nafea ia fanaˈo i te hoê oraraa oaoa.
Te haapeapea ra anei te Atua no ˈu? Te parau ra te Bibilia: “Aita hoi oia i atea ia tatou tataitahi.” (Ohipa 17:27) Te auraa ïa, te haapeapea ra te Atua no te mau ohipa e tupu i nia ia oe e te hinaaro ra oia ia oaoa oe.—Isaia 48:17, 18; Petero 1, 5:7.
Nafea te iteraa o vai te Atua e tauturu ia ˈu ia maitai mai? Ua poiete te Atua ia tatou e te “hiaai . . . i te mau mea pae varua,” oia hoi ia taa te auraa e te fa o te oraraa. (Mataio 5:3) Oia atoa, ia haapii o vai mau na to tatou Atua poiete e ia fanaˈo i te hoê auhoaraa piri e o ˈna. E mauruuru te Atua no ta tatou mau tutavaraa ia ite o vai o ˈna. Te parau ra te Bibilia: “A faafatata ˈtu i te Atua, e e faafatata mai oia ia outou.”—Iakobo 4:8.
Ua tauturu te hoê auhoaraa piri e te Atua i na mirioni taata ia maitai mai e ia ite i te oaoa mau. E ere râ te auraa e aita e fifi faahou, tera râ e tauturu mai te paari e vai ra i roto i te Bibilia ia:
Fanaˈo i te hoê oraraa utuafare oaoa.
Vai hau noa e o vetahi ê.
Faaruru i te mau fifi mai te hepohepo rahi, te haapeapearaa i te pae moni e te maˈi tamau.
E rave rahi haapaoraa e faaohipa nei i te Bibilia, aita râ ratou e pee i ta ˈna mau haapiiraa. Taa ê atu, e tauturu te haapaoraa mau ia oe ia ite o vai te Atua, no te mea te pee ra o ˈna i ta te Bibilia e haapii mau ra.